“Izwi LikaNkulunkulu . . . Linamandla”
1 “Izwi likaNkulunkulu liyaphila futhi linamandla,” kubhala umphostoli uPawulu. (Heb. 4:12) Wayesho ukuthini ngalokho? Izwi likaNkulunkulu, noma isigijimi, esitholakala eBhayibhelini singaba nethonya elinamandla kubantu. Ukuhlakanipha okuseBhayibhelini kunamandla okushintsha ukuphila komuntu kube ngcono. Induduzo nethemba elilinikezayo kwenza abantu basondele kuMniki-kuphila, uJehova uNkulunkulu. Isigijimi salo singanikeza abanhliziyo ziqotho isiqalo endleleni eholela ekuphileni okuphakade. Nokho, ukuze siyibone le miphumela, kumelwe silisebenzise iBhayibheli lapho sifakaza kwabanye.
2 Funda Umbhalo Ngawo Wonke Amathuba: Kubonakala sengathi abamemezeli abaningi sebewuyekile umkhuba wokufunda iBhayibheli emizini. Ingabe kunjalo nangawe? Ngenxa yokuthi abantu abaningi babonakala bengenaso isikhathi sengxoxo ende, mhlawumbe nawe usuwele esijwayezini sokuhambisa incwadi kuphela noma umane ukhulumele umbhalo nje. Sikhuthaza bonke abamemezeli ukuba benze umzamo oqotho wokufunda okungenani ivesi elilodwa eBhayibhelini lapho beshumayela izindaba ezinhle, ukuze umuntu abone ukuthi ngempela isigijimi sethu sitholakala eZwini likaNkulunkulu.
3 Nakuba bembalwa abantu abakwenza umkhuba ukufunda iBhayibheli, ngokuvamile lisahlonishwa. Ngisho nabantu abamatasatasa ngokuvamile bathi gozololo kancane ukuze balalele isigijimi esifundwa ngokuqondile eZwini likaNkulunkulu. Lapho umbhalo ofanelekayo ufundwa ngemfudumalo futhi uchazwa kafushane, amandla ezwi likaJehova angaba nethonya elihle kolalele. Kodwa ungawaxhumanisa kanjani amazwi akho esethulo nokufunda ivesi eBhayibhelini?
4 Kuzame Lokhu Emsebenzini Kamagazini: Umbonisi ojikelezayo uyisebenzisa ngokuphumelelayo imiBhalo lapho ehlanganyela emsebenzini kamagazini. Uphatha iBhayibheli elincane ephaketheni lakhe. Ngemva kokubonisa umuntu omagazini futhi akhulumele isihloko kafushane, uvula iBhayibheli ngaphandle kokungabaza afunde ivesi elihambisana nesihloko. Lokhu kungenziwa ngokumane ubuze, “Ucabangani ngalesi sithembiso esikhuthazayo?” bese uqhubeka ufunda umbhalo owukhethile.
5 Kwenze umgomo wakho ukuhlanganyela ivesi elilodwa noma amabili eBhayibhelini nesilaleli sakho. Amandla alo ashukumisayo angavula indlela yokuba abantu abengeziwe basondezwe kuNkulunkulu.—Joh. 6:44.