Sondela KuNkulunkulu
“UMuzwi Womthandazo”
INGABE uJehova uNkulunkulu uyayiphendula ngempela imithandazo eqotho yabakhulekeli bakhe abazinikele? Indaba eseBhayibhelini yendoda engadumile kangako egama layo linguJabezi ibonisa ukuthi ngempela uJehova ‘unguMuzwi womthandazo.’ (IHubo 65:2) Le ndaba emfushane itholakala endaweni ongase ungayicabangi—ohlwini lwamagama asekuqaleni encwadini yeziKronike Zokuqala. Ake sihlole eyoku-1 IziKronike 4:9, 10.
UJabezi kukhulunywa ngaye kula mavesi amabili kuphela. Ivesi 9 lithi unina “wambiza ngokuthi uJabezi, ethi: ‘Ngimzele ngezinhlungu.’”a Kungani ametha lelo gama? Ingabe eyakhe imihelo yayingavamile? Ingabe mhlawumbe wayengumfelokazi, ekhalela ukuthi umyeni wakhe wayengeke ambone umntanakhe? IBhayibheli alisho. Kodwa ngelinye ilanga lona wesifazane wayeyoba nesizathu esikhulu sokuziqhenya ngendodana yakhe. Kungenzeka ukuthi abafowabo babeqotho, kodwa “uJabezi waba onodumo kakhulu kunabafowabo.”
UJabezi wayeyindoda yomthandazo. Waqala umthandazo wakhe ngokucela isibusiso sikaNkulunulu. Wabe esecela izinto ezintathu ezibonisa ukuthi wayenokholo oluqinile.
Okokuqala, wanxusa uNkulunkulu: ‘Yandisa indawo yami.’ (Ivesi 10) Le ndoda enodumo yayingelona igovu, futhi yayingafuni ukwamuka abanye izinto zabo. Kungenzeka ukuthi yacela lokhu ngobuqotho ngoba icabangela abanye abantu. Mhlawumbe yayicela ukuba inwetshelwe indawo ukuze kuhlale abakhulekeli bakaNkulunkulu abengeziwe; kodwa yayifisa ukuba lokhu kwenzeke ngokuthula.b
Okwesibili, uJabezi wanxusa uNkulunkulu ukuba “isandla” saKhe sibe naye. Ngolimi olungokomfanekiso, isandla sikaNkulunkulu sisho amandla akhe awasebenzisela ukusiza abakhulekeli bakhe. (1 IziKronike 29:12) Ukuze athole akufisayo, uJabezi wathandaza kuNkulunkulu obavulela isandla sakhe labo ababonisa ukholo kuye.—Isaya 59:1.
Okwesithathu, uJabezi wathandaza: “Ngilonde enhlekeleleni, ukuba ingangilimazi.” Amazwi athi “ukuba ingangilimazi” kungenzeka asho ukuthi uJabezi wathandazela ukuba angapheli amandla lapho ebhekene nezinto ezibuhlungu, hhayi ukuthi wayecela ukuba angabhekani nezinkinga.
Umthandazo kaJabezi wembula ukuthi wayekukhathalela ukukhulekela kweqiniso nokuthi wayenokholo futhi ethembela kuMuzwi womthandazo. UJehova wasabela kanjani? Le ndaba emfushane iphetha ngala mazwi: “Khona-ke uNkulunkulu wenza ukuba kwenzeke lokho ayekucelile.”
UMuzwi womthandazo akakashintshi. Uyayijabulela imithandazo yabakhulekeli bakhe. Labo ababa nokholo kuye futhi bathembele kuye bangaqiniseka ngalokhu: “Kungakhathaliseki ukuthi yini esiyicelayo ngokwentando yakhe, uyasizwa.”—1 Johane 5:14.
[Imibhalo yaphansi]
a Igama elithi Jabezi livela emsukeni wegama elingase lisho “ubuhlungu.”
b Izinguqulo zesiJuda zemiBhalo Engcwele ezibizwa ngokuthi amaTargum ziwabeka kanje amazwi kaJabezi: “Ngibusise ngezingane futhi wandise indawo yami yokuhlala ngabafundi.”