IBhayibheli Lishintsha Ukuphila
YIZIPHI izinyathelo ezingokoqobo ezathathwa owayeyilungu lezigilamkhuba nomlutha wensangu ukuze akwazi ukunqoba imikhuba yakhe emibi? Yini eyenza ilungu leqembu lomculo we-rock onesigqi esinamandla ligcine ligunde izinwele zalo ezinde futhi lishintshe isimo salo sengqondo ngomculo elaliwukhonzile? Yini eyashukumisa indoda eyayimelene negunya lenkolo nelikahulumeni ukuba ikhonze uNkulunkulu? Woza nendlebe.
“Nganqoba ukuba umlutha wensangu.”—UPETER KAUSANGA
UBUDALA: 32
IZWE AZALELWA KULO: INAMIBIA
UMLANDO: WAYEYILUNGU LEZIGILAMKHUBA NOMLUTHA WENSANGU
UKUPHILA KWAMI: Ngakhulela eKehemu, elinye lamalokishi amane amakhulu edolobheni laseRundu. Abantu balapho babeziphilisa ngokuthengisa unyaluthi, izinkuni namalahle.
Umama washona ngineminyaka emibili, ngakho ngakhuliswa ugogo futhi sasiphila ukuphila okuphansi. Ngokwemvelo nje ngangiyingane elalelayo, kodwa ngenxa yokufuna ukujabulisa abangane ngagcina sengiyisigangi. Ngaba yilungu leqembu lezigilamkhuba ngisesesikoleni. Ngakho, ngangilwa nabantu emgwaqweni, ngiyisiqhwaga, isela, umshushumbisi wamadayimane, isidakwa nomlutha wezidakamizwa. Ngaboshwa kabili ngenxa yokugqekeza nokukhwabanisa.
Ngasishiya phansi isikole ebangeni le-8, ekugcineni ngathutha endaweni futhi ngahlukana neqembu engangikulo. Ngangifuna ukuqala ukuphila kwami kabusha. Kodwa ngangisalokhu ngiwumlutha wensangu. Ngezinye izikhathi ngangihamba amakhilomitha amaningi ngezinyawo ngiyoyifuna.
INDLELA IBHAYIBHELI ELAKUSHINTSHA NGAYO UKUPHILA KWAMI: Ekuqaleni kuka-1999, ngahlangana noFakazi BakaJehova ababenikeza abantu izincwadi zeBhayibheli emgwaqweni. Bakhuluma nami ngenhlonipho, futhi lokho kwangithinta kakhulu. Engakufunda encwadini abanginika yona kwangitshela ukuthi ngangithole inkolo yeqiniso. Ngaqala ukutadisha iBhayibheli ngenkuthalo futhi ngokushesha ngaqaphela ukuthi kwakufanele ngenze izinguquko ekuphileni kwami uma ngifuna ukujabulisa uJehova uNkulunkulu.
Ngazibekela usuku engangizoyeka ngalo ukubhema futhi ngalahla yonke into ehlobene nogwayi. Ngatshela nabangane bami ukuthi bangabe besangipha ugwayi, ngabacela nokuthi bangabhemi eduze kwami. Naphezu kwakho konke lokho, izinto azihambanga ngokwezifiso zami. Iziwombe ezimbili ngehluleka ukuzithiba, ngazithola sengibhema ugwayi nensangu. Kodwa lokho akuzange kungiqede amandla. Ngangiwakhumbula njalo amazwi ezAga 24:16: “Olungile angawa ngisho nakasikhombisa, kodwa ngokuqinisekile uyovuka.” Ekugcineni, ngayiyeka insangu.
Njengoba ngangifunda okuningi ngoJehova, ngafisa nakakhulu ukumenza umngane wami omkhulu. Enye incwadi yeBhayibheli eyangithinta inhliziyo yiHubo 27:10: ‘Noma kungenzeka ubaba nomama bangishiye, yebo uJehova yena uyongamukela.’ Njengoba ngangiqhubeka ngifunda izinto ezijulile eBhayibhelini, ngalibona iqiniso elikulawo mazwi. UJehova waba umngane wami wangempela noBaba okhathalelayo.
Ngaqala ukuzihlanganisa njalo noFakazi BakaJehova. Ngabona uthando lwangempela phakathi kwabo nokuthi bangabangane beqiniso, into engangingakaze ngiyibone ngaphambili.
INDLELA ENGIYE NGAZUZA NGAYO: Ngosizo lukaJehova noloFakazi ngiye ngakwazi ukulungisa indlela engibukeka, engigqoka, engiziphatha nengikhuluma ngayo. Uma ngibheka emuva, ngicabanga ukuthi izinguquko ezenzeke ekuphileni kwami zifana nokushintsha kwesibungu esibi sibe uvemvane olunemibala emihle. Izihlobo zami ziyalujabulela lolu shintsho, futhi seziyangethemba. Manje ngishadile futhi ngizama kakhulu ukuba umyeni onothando nobaba okhathalelayo.
“Sengiyitholile injongo yangempela ekuphileni.”—UMARCOS PAULO DE SOUSA
UBUDALA: 29
IZWE AZALELWA KULO: IBRAZIL
UMLANDO: WAYEYILUNGU LEQEMBU LOMCULO WE-ROCK ONESIGQI ESINAMANDLA
UKUPHILA KWAMI: Ekhaya sasihlala edolobheni laseJaguariuna, eSão Paulo. Abazali bami babengamaKatolika ashisekayo, futhi ngesikhathi ngisemncane ngangiyisikhonzi sase-altare. Yingakho izingane engangifunda nazo zazingibiza ngoFata. Nokho, lapho ngineminyaka engu-15, ngaqala ukulalela umculo we-rock onesigqi esinamandla futhi ngazihlanganisa nabaculi bayo. Ngakhulisa izinwele, futhi ngo-1996 ubaba wangisiza ukuze ngithenge isigubhu sami sokuqala.
Ngo-1998, ngajoyina iqembu lomculo we-rock onesigqi esinamandla. Sasidlala umculo odumisa uSathane nowawunenhlamba. Lowo mculo wawugqugquzela nobudlova futhi wathonya indlela yami yokucabanga nokuziphatha. Ngaqala ukubona yonke into emhlabeni ingalungile futhi ngaba nolaka.
INDLELA IBHAYIBHELI ELAKUSHINTSHA NGAYO UKUPHILA KWAMI: Ngahlangana okokuqala noFakazi BakaJehova ngo-1999. Bacela ukungifundela iBhayibheli, futhi ngavuma, nakuba ngangingathandi ngempela. Kodwa lokho engangikufunda eBhayibhelini kwashintsha indlela engangibheka ngayo ukuphila.
Abantu babengibiza ngokuthi “ngiyinsizwa yezinwele,” “isilomo se-rock,” noma “umshayi wezigubhu.” Kodwa ngaqaphela ukuthi ukuba yilungu leqembu lomculo onesigqi esinamandla kwase kungenze umuntu ozicabangelayo noncintisanayo, futhi ngangingathandi ukwaziwa kanjalo. Kwangikhanyela ukuthi abaculi engangibakhulekela babengenayo injongo yangempela ekuphileni. Kancane kancane ngabona ukuthi uma ngifuna ukujabulisa uJehova uNkulunkulu kwakufanele ngihlukane nalowo mculo futhi ngiyeke ukuphila okonakele nokukhulekela izithombe okuhlobene nawo.
Ngangiwuthanda lo mculo, ngizifela nangezinwele zami ezinde. Ngangizibuza ukuthi ngiyokwazi yini ukuphila ngaphandle kwako. Ngabona nokuthi kwakufanele ngifunde ukulawula ulaka lwami. Nokho, isifundo sami seBhayibheli sangisiza ukuba ngimthande kakhulu uJehova. Ukufunda ngothando, ukubekezela nangesihe sakhe kwangenza ngamthanda ngempela. Ngathandaza kuye ngimcela ukuba angisize ngishintshe, futhi nembala wangisiza. Ngiye ngazibonela ngokwami iqiniso elikumaHebheru 4:12. Lowo mBhalo uthi: “Izwi likaNkulunkulu liyaphila, linamandla.”
Lapho ngiqala ukuhlanganyela noFakazi BakaJehova, ngabona ukuthi bahlukile. Ngangiqala ekuphileni kwami ukubona abantu abanothando olungaka. Ngalubona ngokukhethekile emihlanganweni yabo emikhulu. Yangithinta inhliziyo indlela izisebenzi zokuzithandela ezazisebenza ngayo ngentshiseko ukuze umhlangano uhambe kahle futhi bonke abantu bawujabulele.
INDLELA ENGIYE NGAZUZA NGAYO: Ngosizo lukaJehova sengiyakwazi ukulawula ulaka lwami. Ngicabanga ukuthi angiseyena loya muntu owayezicabangela futhi eqhosha.
Kumelwe ngivume ukuthi ngangike ngiyikhumbule indlela engangiphila ngayo—kodwa manje sekwaphela lokho. Sengiyitholile injongo yangempela ekuphileni. Ngiyajabula ngokuthi sengifunda indlela yokukhathalela abanye abantu nenhlalakahle yabo.
“Ukukhathalela abanye kunginikeza injabulo.”—UGEOFFREY NOBLE
UBUDALA: 59
IZWE AZALELWA KULO: I-UNITED STATES OF AMERICA
UMLANDO: WAYEMELENE NEGUNYA LENKOLO NELIKAHULUMENI
UKUPHILA KWAMI: Ngakhulela e-Ipswich, eMassachusetts, idolobha elingasolwandle labantu abangempofu kodwa futhi abangacebile. Lapho sengikhulile ngakhetha ukuyozihlalela endaweni ecezile eVermont. Ngokwendlela yokuphila yabantu baseNyakatho Melika, mina nentombi yami sasizihluphekisa. Sasingenawo ugesi, ngakho sasitheza izinkuni ukuze sibase futhi sipheke. Indlu yethu yangasese kwakungeyomgodi futhi cishe wonke unyaka izimpompi zethu zazingaphumi amanzi. Sasingayifuni impucuko, futhi lokho wawungakubuzi uma usibona. Kukhona isikhathi lapho ngangiziqhenya ngokuthi kwase kuphele izinyanga eziyisithupha ngingazikami izinwele zami.
Ngaleso sikhathi i-United States yayiseMpini YaseVietnam. Lokho kwayithinta indlela engangibheka ngayo igunya. Ngabona ubuzenzisi kuhulumeni nasenkolweni. Ngaba nomuzwa wokuthi lezi zinhlangano ngeke zikusize ngalutho, ngakho umuntu kufanele azinqumele yena ukuthi yini enhle noma embi. Ngakho-ke, ngangicabanga ukuthi angoni uma ngeba into engiyidingayo.
INDLELA IBHAYIBHELI ELAKUSHINTSHA NGAYO UKUPHILA KWAMI: Mina nentombi yami saqala ukuzifundela iBhayibheli kodwa sasingezwa lutho. Ngangidla izidakamizwa, kodwa ngangizama ukuziyeka. Intombi yami yayifuna sishade bese siba nezingane. Omunye uFakazi kaJehova wafika cishe ngalezo zinsuku emzini wethu, waqala ukusifundisa iBhayibheli.
Kungakabiphi, ngakwazi ukuyeka imikhuba yami emibi; kodwa kwaba nzima ukushintsha indlela engangibheka ngayo abantu abasemagunyeni. Ngangiphikisa yonke into. Ngakhula ngingatshelwa ukuthi ngiphile kanjani, ngakho akubanga lula ukwamukela ukuphila ngemithetho yomunye umuntu.
Ngangikholelwa kuMdali, kodwa engqondweni yami wayeyinto engaqondakali. Nokho, njengoba ngangitadisha iBhayibheli, ngaqala ukuqonda ubuntu bukaJehova uNkulunkulu. Ngaqaphela ukuthi uzisho ngokuqondile izinto azifuna kimi, akagudli guma. Ngafunda nokuthi unenjongo yokwenza umhlaba ube ipharadesi futhi uzoyifeza. (2 Petru 3:13) La maqiniso angenza ngafuna ukushintsha ukuze ngifanelekele ukumkhonza.
Kwangihlaba umxhwele ngokukhethekile ukwenqaba koFakazi BakaJehova ukuhlanganyela empini. Emhlabeni wonke, ayikho inkolo engiyaziyo eyanamathela ngaleyo ndlela kulokho okushiwo yiBhayibheli.
Ngangazi ukuthi uma ngifuna ukukhonza uJehova kwakuzodingeka ngilungise indlela engangibukeka ngayo. Ekuqaleni, ngangingakhululeki ukugqoka ngendlela oFakazi abagqoka ngayo. Akekho kithi noma kubangane bami owayenehembe eligqokwa nothayi, ibhulukwe noma izicathulo ezihloniphekile. Angisayiphathi-ke eyothayi! Ngagunda izinwele, ngalungisa indlela engangibukeka ngayo. Ngisakhumbula mhla ngiqala ukushumayela endlini ngendlu. Ngadlula kwelinye ifasitela ngabona indlela entsha engase ngibukeka ngayo. Ngazibuza ngenhliziyo, ‘Yimi lo osebukeka kanje?’ Kamuva, ayibange isangikhathaza indlela yami entsha yokubukeka.
INDLELA ENGIYE NGAZUZA NGAYO: Ngashada nentombi yami futhi namanje sisajabule emshadweni wethu. Siye sakwazi ukukhulisa izingane zethu ezintathu ukuba zithande futhi zikhonze uJehova. Ngiye ngajabulela nokusiza abanye ukuba bafunde amaqiniso ashintsha ukuphila kwami.
Ngangivame ukuqhosha ngokuthi anginandaba nokuthi abanye abantu bacabangani. Kodwa manje kuyangijabulisa ukukhathalela abanye nokwazi ukuthi nabo bayangikhathalela.
[Amazwi acashunwe esihlokweni ekhasini 26]
“Ngangihamba amakhilomitha amaningi ngezinyawo ngiyofuna insangu”
[Amazwi acashunwe esihlokweni ekhasini 28]
“Engakufunda eBhayibhelini kwashintsha indlela engangibheka ngayo ukuphila”
[Amazwi acashunwe esihlokweni ekhasini 29]
“Ngangingakhululeki ukugqoka ngendlela oFakazi abagqoka ngayo”