Uthando LukaKristu Lusishukumisela Ukuba Sibe Nothando
“UJesu ebathandile abakhe abasezweni, wabathanda kwaze kwaba sekupheleni.”—JOH. 13:1.
1, 2. (a) Yini ephawulekayo ngothando lukaJesu? (b) Iziphi izici zothando esizoxoxa ngazo kulesi sihloko?
UJESU wabeka isibonelo esiphelele sothando. Konke akwenza—amazwi akhe, ukuziphatha kwakhe, ukufundisa kwakhe nokufa kwakhe komhlatshelo—kwabonisa uthando lwakhe. Wabonisa uthando kulabo ayehlangana nabo, ikakhulu abafundi bakhe, kwaze kwaba sekupheleni kokuphila kwakhe emhlabeni.
2 Isibonelo sikaJesu esivelele sothando sibekela abalandeli bakhe indinganiso ephakeme okumelwe banamathele kuyo. Sisishukumisela nokuba sibonise uthando olufanayo kubafowethu nodadewethu abangokomoya nakubo bonke abanye. Kulesi sihloko, sizoxoxa ngalokho abadala bebandla abangakufunda kuJesu ngokubonisa uthando kulabo abenza izono, ngisho nezinkulu. Sizobuye sixoxe nangendlela uthando lukaJesu olungashukumisela ngayo amaKristu ukuba athathe izinyathelo zokusiza abafowabo ezikhathini zobunzima, lapho bebhekene nezinhlekelele noma begula.
3. Naphezu kokushiyeka kukaPetru, uJesu wamphatha kanjani?
3 Ngobusuku bangaphambi kokufa kukaJesu, umphostoli wakhe, uPetru, wamphika kathathu. (Marku 14:66-72) Kodwa lapho esephendukile, njengoba uJesu ayeshilo, wamthethelela. UJesu wamphathisa imithwalo yemfanelo emikhulu. (Luka 22:32; IzE. 2:14; 8:14-17; 10:44, 45) Yini esingayifunda esimweni sengqondo uJesu ayenaso ngalabo abenza izono ezingathí sina?
Bonisa Isimo Sengqondo SikaKristu Kulabo Abenze Okubi
4. Isiphi isimo ngokukhethekile esidinga ukuba sibonise isimo sengqondo sikaKristu?
4 Phakathi kwezimo eziningi ezidinga ukuba sibonise isimo sengqondo sikaKristu, esingase sisizwise ubuhlungu obukhulu esokusingatha udaba lomuntu owenze isono esingathí sina, kungakhathaliseki ukuthi ekhaya noma ebandleni. Kuyadabukisa ukuthi njengoba isimiso sikaSathane sisondela ekupheleni kwaso, umoya wezwe uthonya isimilo sabantu abaningi kakhulu. Izimo zengqondo zokuziphatha zaleli zwe elibi noma zokunganaki zingathonya abasha nabadala, zikhukhule ukuzimisela kwabo ukuhamba endleleni enyinyekile. Ekhulwini lokuqala, abanye kwadingeka basuswe ekuhlanganyeleni nebandla lobuKristu, abanye basolwa. Nanamuhla kwenzeka okufanayo. (1 Kor. 5:11-13; 1 Thim. 5:20) Noma kunjalo, lapho abadala abasingatha izindaba ezinjalo bebonisa uthando olunjengolukaKristu, lokhu kungaba nomphumela ophawulekayo kumenzi wobubi.
5. Abadala kufanele basilingise kanjani isimo sengqondo sikaKristu ngabenzi bokubi?
5 NjengoJesu, abadala kumelwe banamathele ezindinganisweni zikaJehova zokulunga ngazo zonke izikhathi. Uma benza kanjalo, babonisa ubumnene, umusa nothando lukaJehova. Lapho umuntu ephenduka ngempela, ‘ephukile enhliziyweni’ futhi ‘enomoya ochobozekile’ ngenxa yesono sakhe, kungase kube lula ngabadala ukuba ‘bamlungise ngomoya wobumnene.’ (IHu. 34:18; Gal. 6:1) Kodwa abadala kufanele bamphathe kanjani umuntu odelelayo futhi ongaphenduki noma obonisa ukuphenduka okuncane?
6. Yini abadala okumelwe bayigweme lapho besebenzelana nabenzi bokubi, futhi ngani?
6 Lapho umenzi wobubi esenqaba iseluleko esingokomBhalo noma esola abanye ngesono sakhe, lokhu kungase kubacasule abadala nabanye. Njengoba bewazi umonakalo asewenzile, bangase balingeke ukuba bambonise indlela abazizwa ngayo ngezenzo nangesimo sengqondo sakhe. Nokho, intukuthelo iyalimaza futhi ayibonisi “umqondo kaKristu.” (1 Kor. 2:16; funda uJakobe 1:19, 20.) Osukwini lwakhe, uJesu waxwayisa abathile ngamazwi acacile, kodwa akakaze asho amazwi abonisa inzondo noma ahloselwe ukuzwisa ubuhlungu. (1 Pet. 2:23) Kunalokho, wanika abenzi bobubi ithuba lokuphenduka nokubuyela emseni kaJehova. Ngempela, esinye sezizathu esiyinhloko sokuza kukaJesu ezweni ‘kwakuwukusindisa izoni.’—1 Thim. 1:15.
7, 8. Yini okufanele iqondise abadala lapho besingatha izindaba zokwahlulela?
7 Isibonelo sikaJesu kulokhu kufanele sisithinte kanjani isimo sethu sengqondo ngalabo okumelwe bathole isiyalo ebandleni? Khumbula ukuthi isinyathelo sokwahlulela ebandleni siyilungiselelo elingokomBhalo lokuvikela umhlambi futhi singase senze ukuba umenzi wobubi aphenduke. (2 Kor. 2:6-8) Kuyadabukisa ukuthi abanye abaphenduki bese kudingeka basuswe ekuhlanganyeleni, kodwa kuyaduduza ukwazi ukuthi inani elikhulu labanjalo kamuva liyabuyela kuJehova nasebandleni lakhe. Lapho abadala bebonisa isimo sengqondo esinjengesikaKristu, benza kube lula ngomuntu ukuba aphenduke ngokusuka enhliziyweni futhi ekugcineni abuye. Ngokuhamba kwesikhathi, abanye ababengabenzi bokubi bangase bangazikhumbuli zonke izeluleko ezingokomBhalo abazinikezwa abadala, kodwa nakanjani bayokhumbula ukuthi abadala babaphatha ngenhlonipho nangothando.
8 Ngakho-ke, abadala kumelwe babonise “izithelo zomoya,” ngokuyinhloko uthando olunjengolukaKristu, ngisho nasezimweni ezivivinyayo. (Gal. 5:22, 23) Akufanele bajahe ukususa umenzi wobubi ekuhlanganyeleni. Kumelwe babonise ukuthi isifiso sabo siwukuba labo abonile babuyele kuJehova. Ngakho, lapho siphenduka kamuva, njengoba kwenza abaningi, isoni singase simbonge kakhulu uJehova ‘nezipho ezingabantu’ ezikwenze kwaba lula ngaso ukuba sibuyele ebandleni.—Efe. 4:8, 11, 12.
Ukubonisa Uthando OlunjengolukaKristu Esikhathini Sokuphela
9. Nikeza isibonelo sendlela uJesu abonisa ngayo abafundi bakhe uthando.
9 ULuka ulandisa ngesenzakalo esiphawulekayo uJesu abonisa kuso uthando. Azi ukuthi ngokuhamba kwesikhathi amabutho amaRoma ayeyovimbezela iJerusalema, kungaphumi muntu, ngothando uJesu waxwayisa abafundi bakhe: “Lapho nibona iJerusalema lihaqwe amabutho akanisile, khona-ke yazini ukuthi ukuchithwa kwalo sekusondele.” Kwakufanele benzeni? UJesu wabanikeza iziyalezo ezicacile neziqondile kusengaphambili. “Khona-ke labo abaseJudiya mababalekele ezintabeni, abaphakathi kwalo baphume, abasemaphandleni bangangeni kulo; ngoba lezi yizinsuku zokukhipha isahlulelo, ukuze zonke izinto ezilotshiwe zigcwaliseke.” (Luka 21:20-22) Ngemva kokuba amabutho amaRoma ezungeze iJerusalema ngo-66 C.E., labo abalalela lezi ziyalezo bathatha isinyathelo.
10, 11. Ukucabanga ngokubaleka kwamaKristu okuqala eJerusalema kungasilungiselela kanjani ‘usizi olukhulu’?
10 Lapho ebaleka eJerusalema, amaKristu kwakudingeka abonisane uthando olunjengolukaKristu, njengoba nje noKristu ayebathandile. Ngokuqinisekile, kwakufanele ahlanganyele noma yini ayenayo nabanye. Kodwa isiprofetho sikaJesu sasinokunye ukugcwaliseka ngaphandle kokubhujiswa kwalowo muzi wasendulo. Wabikezela: “Kuyoba khona usizi olukhulu olungakaze lube khona kusukela ekuqaleni kwezwe kuze kube manje, cha, futhi olungasayikuphinde lube khona.” (Math. 24:17, 18, 21) Nathi singase sibhekane nobunzima nokuswela ngaphambi naphakathi ‘kosizi olukhulu’ oluzayo. Ukuba nesimo sengqondo esinjengesikaKristu kuyosisiza sikwazi ukuchusha kulezo zimo.
11 Ngaleso sikhathi, kuyodingeka silingise isibonelo sikaJesu, sibonise uthando olungenabugovu. Mayelana nalokhu, uPawulu weluleka: “Yilowo nalowo kithi makajabulise umakhelwane wakhe ngento ezomakha. Ngoba ngisho noKristu akazijabulisanga yena . . . Manje kwangathi uNkulunkulu onika ukukhuthazela nenduduzo anganipha ukuba phakathi kwenu nibe nesimo sengqondo esifanayo naleso uKristu Jesu ayenaso.”—Roma 15:2, 3, 5.
12. Hlobo luni lothando okudingeka siluhlakulele manje, futhi ngani?
12 UPetru, owazizwela mathupha uthando lukaJesu, naye wanxusa amaKristu ukuba ahlakulele “uthando lobuzalwane lokungazenzisi” futhi ‘alalele iqiniso.’ Kufanele ‘athandane kakhulu ngokusuka enhliziyweni.’ (1 Pet. 1:22) Namuhla, kunanini ngaphambili kudingeka sihlakulele izimfanelo ezinjengezikaKristu. Kakade, izingcindezi ziyanda kubo bonke abantu bakaNkulunkulu. Akekho kithi okufanele athembele kunoma iyiphi ingxenye yaleli zwe elidala, njengoba kubonakaliswa ngokucacile ukuwa kwezomnotho kwamuva kwalesi simiso. (Funda eyoku-1 Johane 2:15-17.) Kunalokho, njengoba ukuphela kwalesi simiso kuya kusondela, kudingeka sisondele nakakhulu kuJehova nakwamanye amaKristu, sakhe ubungane bangempela ebandleni. UPawulu weluleka: “Othandweni lobuzalwane thandanani omunye nomunye. Ekubonisaneni udumo nihole.” (Roma 12:10) UPetru wagcizelela leli phuzu, ethi: “Ngaphezu kwakho konke, yibani nothando olukhulu ngomunye nomunye, ngoba uthando lumboza izono eziningi.”—1 Pet. 4:8.
13-15. Abanye abazalwane baye balubonisa kanjani uthando olunjengolukaKristu lapho kuvele izinhlekelele?
13 Emhlabeni jikelele, oFakazi BakaJehova baziwa ngokubonisa uthando olunjengolukaKristu. Cabanga ngoFakazi abasabela lapho kucelwa usizo ngemva kweziphepho ezacekela phansi izindawo eziningi eningizimu ye-United States ngo-2005. Zishukunyiswe isibonelo sikaJesu, izisebenzi zokuzithandela ezingaphezu kuka-20 000, eziningi kuzo ezashiya imizi yazo ethokomele nemisebenzi eholela kahle, zahamba zayosiza abafowabo abahluphekile.
14 Kwenye indawo, amanzi olwandle angamamitha angu-10 ukuphakama angena ezweni ibanga elingamakhilomitha angu-80. Lapho amanzi ebohla, ingxenye yesithathu yemizi nezinye izakhiwo ezazisendleleni yawo kwakucekelwe phansi. Izisebenzi zokuzithandela ezichwepheshile ezingoFakazi zakwamanye amazwe zafika namathuluzi nezinto zokwakha kuleyo ndawo futhi zazimisela ukwenza noma imuphi umsebenzi owawudingeka. Odade ababili bandawonye abangabafelokazi bafaka izinto zabo elolini, bahamba amakhilomitha angaphezu kuka-3 000 beyosiza. Omunye wabo usahlala kuleyo ndawo, usebenza nekomiti yosizo futhi ukhonza njengephayona elivamile.
15 Kuye kwakhiwa noma kwalungiswa imizi yoFakazi neyabanye engaphezu kuka-5 600 kule ndawo. OFakazi bendawo bazizwa kanjani ngokuboniswa lolu thando olukhulu kangaka? Omunye udade owabhidlikelwa umuzi, wathuthela kumahamba-nendlwana omncane onophahla oluvuzayo nesitofu esingasebenzi. Abazalwane bamakhela umuzi omncane kodwa othokomele. Emi phambi komuzi wakhe omusha, wakhala izinyembezi zenjabulo, ebonga uJehova nabafowabo. Kwezinye izimo eziningana, oFakazi bendawo ababebekwe kwezinye izindawo zesikhashana bahlala lapho unyaka noma ngaphezulu ngemva kokuba imizi yabo seyiphinde yakhiwa. Kungani? Ukuze bahlalise izisebenzi zokusiza. Yeka isibonelo esihle sokubonisa isimo sengqondo esinjengesikaKristu!
Ukubonisa Isimo Sengqondo EsinjengesikaKristu Kwabagulayo
16, 17. Iziphi izindlela esingabonisa ngazo isimo sengqondo sikaKristu kwabagulayo?
16 Bambalwa kakhulu kithi abake babhekana nenhlekelele yemvelo enkulu. Kodwa wonke umuntu uyabhekana nezinkinga zempilo, kungaba eyakhe noma eyamalungu omkhaya wakhe. Isimo sengqondo sikaJesu ngabagulayo siyisibonelo esihle kithi. Uthando lwakhe lwamenza waba nozwela ngabo. Lapho izixuku ziletha abagulayo kuye, “welapha bonke ababengaphathekile kahle.”—Math. 8:16; 14:14.
17 Namuhla, amaKristu awanawo amandla ayisimangaliso afana nakaJesu okuphulukisa, kodwa njengoJesu analo uzwela ngabagulayo. Alubonisa kanjani? Enye indlela abadala ababonisa ngayo ukuthi banesimo sengqondo sikaKristu iwukwenza amalungiselelo okusiza abagulayo ebandleni, belalela isimiso esikuMathewu 25:39, 40.a (Funda.)
18. Odade ababili balubonisa kanjani uthando lweqiniso komunye udade, futhi kwaba namiphi imiphumela?
18 Yiqiniso, akudingeki ukuba umuntu abe umdala ukuze asize abanye. Cabanga ngoCharlene oneminyaka engu-44 ubudala, owayenomdlavuza futhi owatshelwa ukuthi usalelwe izinsuku eziyishumi kuphela. Beqaphela ukuthi wayedinga usizo nokuthi umyeni wakhe owayemnakekela ngokuzinikela wayekhandleka kakhulu, odade ababili, uSharon noNicolette, bazinikela ukuze bamsize isikhathi esigcwele lapho esezoshona. Lezo zinsuku zaba amasonto ayisithupha, kodwa lab’ odade ababili babonisa uthando kwaze kwaba sekugcineni. USharon uthi: “Kunzima lapho wazi ukuthi umuntu ngeke esalulama. Kodwa uJehova wasiqinisa. Lokhu okuhlangenwe nakho kwasisondeza kuYe futhi sathandana kakhulu.” Umyeni kaCharlene uthi: “Ngiyohlale ngiwukhumbula umusa nokusekela kwalab’ odade ababili abathandekayo. Izisusa zabo nesimo sabo sengqondo esihle kwenza ukuba lolu vivinyo lokugcina lungabi nzima kakhulu kuCharlene wami othembekile futhi kwanginika impumuzo engangiyidinga kakhulu ngokwenyama nangokomzwelo. Ngiyohlale ngibabonga uma nje ngisaphila. Ukuzidela kwabo kwaqinisa ukholo lwami kuJehova nothando lwami ngayo yonke inhlangano yabafowethu.”
19, 20. (a) Iziphi izici ezinhlanu zesimo sengqondo sikaKristu esixoxe ngazo? (b) Uzimisele ukwenzani?
19 Kulezi zihloko ezintathu, siye saxoxa ngezici ezinhlanu zesimo sengqondo sikaJesu nangendlela esingakulingisa ngayo ukucabanga nezenzo zakhe. Masibe ‘nomoya omnene futhi sithobeke enhliziyweni,’ njengoJesu. (Math. 11:29) Kwangathi nathi singalwela ukuphatha abanye ngomusa, ngisho nalapho ukungapheleli nobuthakathaka babo busobala. Masibe nesibindi, senze konke uJehova akufunayo, ngisho nalapho sibhekene novivinyo.
20 Okokugcina, masibonise uthando olunjengolukaKristu kubo bonke abafowethu, njengoba kwenza uKristu, ‘kuze kube sekupheleni.’ Lolo thando lusibonakalisa njengabalandeli bakaJesu beqiniso. (Joh. 13:1, 34, 35) Yebo, “uthando lwenu lobuzalwane maluqhubeke.” (Heb. 13:1) Ungazigodli! Sebenzisa ukuphila kwakho ukuze udumise uJehova futhi usize abanye! UJehova uyoyibusisa imizamo yakho eqotho.
[Umbhalo waphansi]
a Bheka isihloko esithi “Yenza Okungaphezu Kokuthi: ‘Nifudumale Nisuthe’” kuyi-Nqabayokulinda ka-October 15, 1986.
Ungachaza?
• Abadala bangasibonisa kanjani isimo sengqondo sikaKristu kubenzi bokubi?
• Kungani kubalulekile ukulingisa uthando lukaKristu ikakhulu kulesi sikhathi sokuphela?
• Singasibonisa kanjani isimo sengqondo sikaKristu kwabagulayo?
[Isithombe ekhasini 17]
Abadala bafuna ukuba abenzi bokubi babuyele kuJehova
[Isithombe ekhasini 18]
AmaKristu abaleka eJerusalema asibonisa kanjani isimo sengqondo sikaKristu?
[Isithombe ekhasini 19]
OFakazi BakaJehova baziwa ngokubonisa uthando olunjengolukaKristu