Ingabe UNkulunkulu Uyawushintsha Umqondo?

IBHAYIBHELI lisho lokhu ngoNkulunkulu: “Kuye akukho ukushintshashintsha kokuphenduka kwethunzi.” UNkulunkulu ngokwakhe uyasiqinisekisa: “NginguJehova; angizange ngishintshe.” (Jakobe 1:17; Malaki 3:6) Yeka ukuthi uJehova uNkulunkulu uhluke kanjani kubantu okunzima ukubajabulisa nokungelula ukubethemba ngoba bawushintsha njalo umqondo!

Nokho, abanye abafundi beBhayibheli bayazibuza ukuthi uNkulunkulu usewushintshile yini umqondo. Ngokwesibonelo, uJehova uNkulunkulu wake wanikeza amaKristu amandla okwenza izimangaliso, kodwa manje akusenjalo. Endulo, wayesibekezelela isithembu, kodwa manje akusenjalo. Ngaphansi koMthetho KaMose, wayefuna kugcinwe iSabatha, kodwa manje akasafuni. Lezi zibonelo azibonisi yini ukuthi uNkulunkulu useshintshile?

Okokuqala, singaqiniseka ngokuthi uNkulunkulu akalokothi ashintshe izindinganiso zakhe zothando nobulungisa. ‘Injongo’ yakhe “engunaphakade” yokubusisa isintu ngoMbuso wakhe nayo ayikaze ishintshe. (Efesu 3:11) Noma kunjalo, njengoba nje nawe ungase uwushintshe umqondo wakho ngomuntu oziphatha ngendlela ekudumazayo, noJehova uyashintsha uma abantu bengenzi izinto azifunayo.

UNkulunkulu uyazishintsha futhi iziyalezo zakhe kubantu bakhe kuye ngesimo nangezidingo zabo. Lokhu akufanele kusimangaze. Cabangela lokho okungase kwenziwe umuntu ohlakaniphile obonisa izivakashi indawo lapho ebona ingozi ngaphambili. Angase atshele iqembu aliqondisayo ukuba lihambe ngomunye umgwaqo oqhelile engozini. Nokho, lokho akusho ukuthi useshintshe umqondo wakhe ngendawo okuyiwa kuyo. Ngakho-ke, ake sihlole izibonelo ezintathu eziphawulwe ngenhla okunzima ngabanye ukuziqonda.

Kungani Izimangaliso Zaphela?

Kungani uNkulunkulu anikeza amanye amaKristu ekhulu lokuqala amandla okwenza izimangaliso? Mhlawumbe uyazi ukuthi ngesikhathi u-Israyeli eseyisizwe sikaNkulunkulu esikhethiwe, uNkulunkulu wayevame ukubonisa ngezimangaliso ukuthi unaye. Wasebenzisa uMose ukuze abonakalise amandla akhe esabekayo ngokukhulula ama-Israyeli eGibhithe nangokuwahola ehlane aze ayofika eZweni Lesithembiso. Okudabukisayo ukuthi ama-Israyeli ahluleka kaningi ukubonisa ukholo. Lapho uJehova egcina ewalahlile futhi esungula ibandla lobuKristu, wanikeza abaphostoli nabanye amandla okwenza izimangaliso. Ngokwesibonelo, umphostoli uPetru noJohane belapha indoda eyayilunyonga kwasekuzalweni, umphostoli uPawulu yena wavusa indoda eyayisifile. (IzEnzo 3:2-8; 20:9-11) Izimangaliso abazenza zasiza ekusunguleni ubuKristu ezindaweni eziningi. Pho kungani izimangaliso zaphela?

Umphostoli uPawulu wachaza lokhu ngomfanekiso: “Ngesikhathi ngiseyingane, ngangikhuluma njengengane, ngicabanga njengengane, ngisebenzisa ingqondo njengengane; kodwa njengoba sengiyindoda, sengizilahlile izici zobungane.” (1 Korinte 13:11) Njengoba nje abazali bephatha ingane esencane ngendlela ehlukile kwesikhulile, indlela uJehova ayesebenzelana ngayo nebandla lobuKristu yashintsha lapho lingaseyona “ingane.” Umphostoli uPawulu wathi izipho ezinjalo zokwenza izimangaliso ezinjengekhono lokukhuluma izilimi noma ukuprofetha ‘zaziyoqedwa.’—1 Korinte 13:8.

Kungani Isithembu Sasivunyelwe?

UJesu wabonisa ukuthi kunesimiso somshado uNkulunkulu asibeka lapho etshela umbhangqwana wokuqala wabantu: “Indoda iyoshiya uyise nonina inamathele kumkayo, futhi laba ababili bayoba nyamanye.” (Mathewu 19:5) Umshado kwakumelwe ube yisibopho esihlala njalo phakathi kwabantu ababili. Nokho, ngesikhathi uNkulunkulu ehlela isizwe sama-Israyeli futhi esinika uMthetho, kakade isithembu sase siwumkhuba ovamile. Ngakho, nakuba uNkulunkulu engazange asisungule noma asikhuthaze, wabeka imithetho yokusilawula. Lapho kumiswa ibandla lobuKristu, iZwi likaNkulunkulu lasenqabela ngokucacile isithembu.—1 Thimothewu 3:2.

UJehova uNkulunkulu uyazibekezelela izinto ezithile kuze kufike isikhathi sakhe sokuzilungisa. (Roma 9:22-24) UJesu wabonisa ukuthi uJehova wayebekezelele amasiko emishado angalungile okwesikhashana, ‘ewavumela’ ngenxa ‘yobulukhuni bezinhliziyo’ zama-Israyeli.—Mathewu 19:8; IzAga 4:18.

Kungani Ukugcinwa KweSabatha Kwakungokwesikhashana?

Ngemva kokuba uNkulunkulu ekhulule ama-Israyeli eGibhithe, wasungula ukugcinwa kweSabatha kwamasonto onke. Kamuva wakwenza kwaba ingxenye yoMthetho wesizwe sawo. (Eksodusi 16:22-30; 20:8-10) Umphostoli uPawulu wachaza ukuthi uJesu wanikela ngokuphila kwakhe njengomhlatshelo futhi ‘waqeda uMthetho wemiyalo owakhiwa izinqumo,’ ‘wasula nencwadi elotshwe ngesandla.’ (Efesu 2:15; Kolose 2:14) Umthetho weSabatha wawuphakathi kwezinto ‘ezaqedwa’ ‘nezasulwa,’ ngoba iBhayibheli liqhubeka lithi: “Ngakho-ke ningahlulelwa muntu ngokudla nokuphuza noma ngokuqondene nomkhosi noma ukugujwa kokuthwasa kwenyanga noma isabatha.” (Kolose 2:16) Kungani kwasekuqaleni uNkulunkulu enza ilungiselelo loMthetho, ohlanganisa nokugcinwa kweSabatha?

Umphostoli uPawulu wabhala: “UMthetho uye waba umfundisi wethu oholela kuKristu.” Wabe esenezela: “Njengoba ukholo selufikile, asisekho ngaphansi komfundisi.” (Galathiya 3:24, 25) Kunokushintsha umqondo, uNkulunkulu wasebenzisa iSabatha njengelungiselelo lesikhashana ukuze afundise abantu ukuthi kwakufanele bazinike njalo isikhathi sokuzindla ngezinto ezingokomoya. Nakuba umthetho weSabatha wawungowesikhashana, wawuwumfuziselo wesikhathi lapho isintu sasiyothola khona impumuzo yaphakade ezinkingeni ezingokwenyama nezingokomoya.—Hebheru 4:10; IsAmbulo 21:1-4.

UNkulunkulu Esingamethemba Nonothando

Izibonelo eziseBhayibhelini okukhulunywe ngazo ngenhla zibonisa ukuthi uJehova uNkulunkulu wanikeza iziqondiso neziyalezo ezingafani ngezikhathi ezingafani. Kodwa lokho akusho ukuthi wayeshintsha umqondo. Kunalokho, wayehambisana nezidingo zabantu bakhe ngaphansi kwezimo ezihlukahlukene, futhi lokho kwakuzuzisa bona. Kusenjalo nanamuhla.

Ngenxa yokuthi uJehova akazishintshi izimiso zakhe, siyazi ukuthi kumelwe senzeni ukuze simjabulise. Ngaphezu kwalokho, singaqiniseka ngokuthi zonke izithembiso zakhe ziyofezeka. Uthi: “Ngizokwenza konke okungijabulisayo . . . Ngikwakhile, ngizokwenza futhi.”—Isaya 46:10, 11.

[Amazwi acashunwe esihlokweni ekhasini 21]

UNkulunkulu akalokothi ashintshe izindinganiso zakhe zothando nobulungisa

[Amazwi acashunwe esihlokweni ekhasini 22]

UPawulu wathi ngokuhamba kwesikhathi, izipho zokwenza izimangaliso ‘zaziyoqedwa’

[Amazwi acashunwe esihlokweni ekhasini 23]

Umshado kwakumelwe ube yisibopho esihlala njalo phakathi kwabantu ababili