Basha, Dumisani UJehova!
“Dumisani uJehova emhlabeni, . . . nina zinsizwa nani futhi zintombi.”—IHUBO 148:7, 12.
1, 2. (a) Hlobo luni lwemingcele intsha eningi elwazi kahle? (b) Kungani intsha kungadingeki icasulwe imingcele abazali abayibekela yona?
IZINGANE zizazi kahle izinto ezingakavunyelwa ukuba zizenze. Eziningi zingakutshela ngokushesha ukuthi ziyovunyelwa uma sezineminyaka emingaki ukuwela umgwaqo ophithizelayo zizodwa, noma ukuba zilale ngehora elithile ebusuku, noma ukushayela imoto. Ngezinye izikhathi, osemusha angaba nomuzwa wokuthi njalo uma ecela ukwenza okuthile akufuna ngempela, kuthiwa: “Uzokwenza uma usumdala lokho.”
2 Basha, niyazi ukuthi abazali benu bakubona kuwukuhlakanipha ukubeka imingcele enjalo, mhlawumbe bevikela nina. Ngokuqinisekile, niyazi nokuthi uJehova uyajabula lapho nilalela abazali benu. (Kolose 3:20) Nokho, kuke kwenzeke yini nizizwe sengathi nibekelwe imingcele eminingi kakhulu? Ingabe zonke izinto ezibalulekile anivunyelwe ukuzenza kuze kube yilapho senikhulile? Akunjalo neze! Kukhona umsebenzi owenziwa namuhla obaluleke kakhulu kunanoma iliphi ilungelo okungenzeka nisalinde ukulithola. Ingabe nina basha nivunyelwe ukuhlanganyela kulo msebenzi? Akukhona nje ukuthi nivunyelwe—empeleni uNkulunkulu oPhezukonke uqobo lwakhe uyanimema ukuba nihlanganyele kuwo!
3. Iliphi ilungelo uJehova amema abasha ukuba babe nalo, futhi imiphi imibuzo esizoxoxa ngayo manje?
3 Imuphi lo msebenzi esikhuluma ngawo? Phawula amazwi ombhalo walesi sihloko: “Dumisani uJehova emhlabeni, . . . nina zinsizwa nani futhi zintombi, nina maxhegu kanye nabafana.” (IHubo 148:7, 12) Yileli ilungelo elikhulu eninalo: Ningadumisa uJehova. Njengomuntu omusha, ingabe uyakujabulela ukuhlanganyela kulowo msebenzi? Abaningi bayakujabulela. Ukuze ubone ukuthi kungani kufaneleka ukuzizwa ngaleyo ndlela, ake sihlole imibuzo emithathu. Okokuqala, kungani kufanele udumise uJehova? Okwesibili, ungamdumisa kanjani ngokuphumelelayo? Okwesithathu, kufanele uqale nini ukudumisa uJehova?
Kungani Kufanele Udumise UJehova?
4, 5. (a) NgokweHubo 148, isiphi isimo esimangalisayo esikuso? (b) Indalo engakhulumi futhi engacabangi ingamdumisa kanjani uJehova?
4 Isizathu esivelele sokudumisa uJehova ukuthi unguMdali. IHubo 148 lisisiza ukuba sigxile kuleli qiniso. Cabanga nje: Uma ubungezwa iqembu elikhulu labantu lihlabelela unqambothi lwengoma evusa usinga ngamaphimbo abumbene, ubungazizwa kanjani? Ubungenzenjani uma wazi ukuthi amazwi aleyo ngoma ayiqiniso, asho izinto ozaziyo ukuthi zibalulekile, ziyajabulisa, futhi ziyakhuthaza? Ingabe ubungazizwa ufisa ukuwafunda lawo mazwi, nawe ucule nalo? Iningi lethu belingazizwa kanjalo. IHubo 148 libonisa ukuthi usesimweni esithi asifane, kodwa esihle kakhulu. Lelo hubo lichaza uquqaba olukhulu, oludumisa uJehova ngobunye. Nokho, njengoba ulifunda leli hubo, ungase uphawule okuthile okungavamile. Yini leyo?
5 Abaningi babadumisi abashiwo encwadini yeHubo 148 abakwazi ukukhuluma noma ukucabanga. Ngokwesibonelo, sifunda ngelanga, inyanga, izinkanyezi, iqhwa, umoya, izintaba, namagquma, konke kudumisa uJehova. Le ndalo engaphili ingakwenza kanjani lokhu? (Amavesi 3, 8, 9) Empeleni, ingakwenza njengoba nje kwenziwa yizihlahla, izidalwa zasolwandle, nezilwane. (Amavesi 7, 9, 10) Wake wabubuka yini ubuhle bokushona kwelanga, noma wabuka inyanga edilingene ithubeleza ezinkanyezini, noma wahlekiswa izilwane zidlala, noma wakhexiswa ubuhle bendawo ethile? Khona-ke wake “wayizwa” ingoma yendalo yokudumisa. Konke uJehova akwenzile kusikhumbuza ukuthi unguMdali onguMninimandla onke, ukuthi akekho emhlabeni nasemazulwini onamandla, onokuhlakanipha, noma onothando njengaye.—Roma 1:20; IsAmbulo 4:11.
6, 7. (a) IHubo 148 libala ziphi izidalwa ezihlakaniphile ezidumisa uJehova? (b) Kungani singase sishukumiseleke ukuba sidumise uJehova? Fanekisa.
6 IHubo 148 likhuluma nangendalo ehlakaniphile edumisa uJehova. Evesini 2, sithola ‘ibutho’ likaJehova lasezulwini, izingelosi, lidumisa uNkulunkulu. Evesini 11, kumenywa abantu abanamandla nethonya, njengamakhosi nabahluleli, ukuba bahlanganyele kulokhu kudumisa. Uma izingelosi ezinamandla zikujabulela ukudumisa uJehova, imuphi umuntu oyinyama okungamukeleka uma ethi yena ubaluleke kakhulu ukuba amdumise? Emavesini 12 no-13, kube sekumenywa nina basha ukuba nani nihlanganyele ekudumiseni uJehova. Ingabe niyashukumiseleka ukuba nifune ukwenza kanjalo?
7 Cabanga ngalo mfanekiso: Ukube ubunomngane omkhulu onekhono elimangalisayo—mhlawumbe kwezemidlalo, kwezobuciko, noma emculweni—ubungabaxoxela yini ngaye abakini nabanye abangane? Akubuzwa. Ukufunda ngakho konke uJehova akwenzile kungaba nomphumela ofanayo kithi. Ngokwesibonelo, iHubo 19:1, 2 lithi amazulu anezinkanyezi enza ukuba “inkulumo iphuphume.” Thina-ke, lapho sicabanga ngezinto ezimangalisayo uJehova azifezile, asikwazi neze ukuthula singatsheli abanye ngoNkulunkulu wethu.
8, 9. Iziphi izizathu ezenza uJehova afune ukuba simdumise?
8 Esinye isizathu esiphawulekayo sokudumisa uJehova siwukuthi ufuna senze kanjalo. Ngani? Ingabe yingoba edinga udumo lwabantu? Cha. Thina bantu singase sikudinge ukudunyiswa ngezinye izikhathi, kodwa uJehova uphakeme kakhulu kunathi. (Isaya 55:8) Akanakho nokuncane ukungazethembi noma ukungabaza ngezimfanelo zakhe. (Isaya 45:5) Noma kunjalo, ufuna simdumise futhi uyajabula lapho senza kanjalo. Ngani? Cabanga ngezizathu ezimbili. Okokuqala, uyazi ukuthi siyakudinga ukumdumisa. Wasidala saba nesidingo esingokomoya, isidingo sokukhulekela. (Mathewu 5:3) Ukusibona sanelisa leso sidingo kuyamjabulisa uJehova, njengoba nje nabazali bakho kubajabulisa ukukubona udla ukudla abaziyo ukuthi kukulungele.—Johane 4:34.
9 Okwesibili, uJehova uyazi ukuthi nabanye abantu kudingeka basizwe simdumisa. Umphostoli uPawulu wabhalela insizwa enguThimothewu la mazwi: “Ziqaphele njalo wena nokufundisa kwakho. Hlala kulezi zinto, ngoba ngokwenza lokhu uyozisindisa wena nabakulalelayo.” (1 Thimothewu 4:16) Yebo, lapho ufundisa abanye ngoJehova uNkulunkulu, umdumisa, bangase bamazi uJehova nabo. Ulwazi olunjalo lungabaholela ensindisweni yaphakade!—Johane 17:3.
10. Kungani sizizwa sishukumiseleka ukuba sidumise uNkulunkulu wethu?
10 Kukhona esinye futhi isizathu sokudumisa uJehova. Khumbula umfanekiso womngane wakho onekhono eliyisimanga. Uma ubungezwa abanye bemqambela amanga, bemnyundela, ubungeke yini uzimisele nakakhulu ukumtusa? UJehova unyundelwa yonke indawo kuleli zwe. (Johane 8:44; IsAmbulo 12:9) Ngakho labo abamthandayo bazizwa beshukumiseleka ukuba baveze iqiniso ngaye, balungise izinkulumo ezingamanga. Ungathanda yini ukubonisa ukuthi uyamthanda futhi uyamazisa uJehova, ubonise ukuthi ufuna kube nguye uMbusi wakho, hhayi isitha sakhe esikhulu, uSathane? Konke lokho ungakwenza ngokudumisa uJehova. Umbuzo olandelayo-ke uwukuthi ungamdumisa kanjani.
Indlela Enye Intsha Eyamdumisa Ngayo UJehova
11. Iziphi izibonelo zeBhayibheli ezibonisa ukuthi intsha ingaphumelela kakhulu ekudumiseni uJehova?
11 IBhayibheli libonisa ukuthi intsha ngokuvamile ayive iphumelela ekudumiseni uJehova. Ngokwesibonelo, kwakukhona intombazane engumIsrayeli eyayithunjwe abaseSiriya. Yashumayela ngesibindi ngomprofethi kaJehova, u-Elisha, kumkankosi yayo. Amazwi ayo aholela esimangalisweni, futhi kwanikezwa ubufakazi obunamandla. (2 AmaKhosi 5:1-17) NoJesu washumayela ngesibindi lapho eseyingane. Kuzo zonke izenzakalo zasebusheni bakhe ezazingase zibhalwe emiBhalweni, uJehova wakhetha esisodwa, lapho uJesu oneminyaka engu-12 ebuza abaholi benkolo imibuzo ngesibindi ethempelini eJerusalema futhi ebakhexisa ngokuqonda kwakhe izindlela zikaJehova.—Luka 2:46-49.
12, 13. (a) Yini uJesu ayenza ethempelini ngaphambi nje kokuba afe, okwaba namuphi umphumela kubantu ababelapho? (b) UJesu wazizwa kanjani ngokudumisa kwabafana abancane?
12 Njengendoda esikhulile, uJesu futhi washukumisela izingane ukuba zidumise uJehova. Ngokwesibonelo, ezinsukwini ezimbalwa ngaphambi kokuba afe, uJesu wachitha isikhathi esethempelini eJerusalema. IBhayibheli lithi wenza “izimangaliso” lapho. Waxosha abantu ababenza leyo ndawo engcwele umhume wabaphangi. Waphulukisa nezimpumputhe nezinyonga. Wonke umuntu owayelapho, ikakhulu abaholi benkolo, kwakufanele ashukumiseleke ukuba adumise uJehova neNdodana yakhe, uMesiya. Nokho, ngokudabukisayo abaningi ngalezo zinsuku abazange babadumise. Babazi ukuthi uJesu uthunywe nguNkulunkulu, kodwa babesaba abaholi benkolo. Nokho, kukhona iqembu labantu elakhuluma ngesibindi. Uyazi ukuthi kwakungobani? IBhayibheli lithi: “Lapho abapristi abakhulu nababhali bebona izimangaliso [uJesu] ayezenza nabafana ababememeza ethempelini bethi: ‘Siyanxusa, sindisa iNdodana kaDavide!’ bathukuthela bathi [kuJesu]: ‘Uyakuzwa lokhu abakushoyo laba?’”—Mathewu 21:15, 16; Johane 12:42.
13 Labo bapristi babenethemba lokuthi uJesu uzobathulisa abafana ababemdumisa. Ingabe wabathulisa? Lutho neze! UJesu waphendula abapristi: “Yebo. Anizange yini nikufunde lokhu, ‘Emlonyeni wezingane nowabasancela ulungiselelé indumiso’?” Kusobala ukuthi uJesu noYise babekujabulela ukudumisa kwala bafana abancane. Lezo zingane zazenza lokho bonke abantu abadala ababelapho okwakufanele ngabe bayakwenza. Kumelwe ukuba kwakukhanya bhá ezingqondweni ezisencane zalabo bafana. Babebona le ndoda yenza izimangaliso, ikhuluma ngesibindi nangokholo, futhi ibonisa uthando olukhulu ngoNkulunkulu nangabantu bakhe. Yayinguye ngempela umuntu eyayithi inguye—“iNdodana kaDavide” ethenjisiwe, uMesiya. Njengoba babusiswa ngokholo lwabo, laba bafana baba nanelungelo lokugcwalisa isiprofetho.—IHubo 8:2.
14. Izipho intsha enazo ziyisiza kanjani ukuba idumise uNkulunkulu?
14 Yini esingayifunda kulezi zibonelo? Ukuthi intsha ingaba abadumisi bakaJehova abaphumelela kakhulu. Ngokuvamile inesipho sokubona iqiniso ngokucacile nangendlela elula, ikhulume ngobuqotho nangentshiseko ngokholo lwayo. Inanesipho esishiwo encwadini yezAga 20:29: “Ubuhle bezinsizwa ngamandla azo.” Yebo, nina basha nibusiswe ngamandla nobungqabavu—izinto eziwusizo kakhulu ekudumiseni uJehova. Iziphi izindlela eziqondile eningasebenzisa ngazo lezi zipho?
Ungamdumisa Kanjani UJehova?
15. Ukuze sidumise uJehova ngokuphumelelayo, kudingeka sibe nasiphi isisusa?
15 Ukuphumelela kuqala enhliziyweni. Ngeke umdumise ngokuphumelelayo uJehova uma ukwenza ngoba nje abanye befuna ukwenze. Khumbula ukuthi umyalo omkhulu kunayo yonke uthi: “Kumelwe uthande uJehova uNkulunkulu wakho ngayo yonke inhliziyo yakho nangawo wonke umphefumulo wakho nangayo yonke ingqondo yakho.” (Mathewu 22:37) Ingabe usuyamazi uJehova ngokomuntu siqu ngokuzitadishela mathupha iZwi lakhe? Uma ulitadisha ngaleyo ndlela uyozizwa umthanda uJehova. Indlela enengqondo yokubonisa lolo thando ukumdumisa. Lapho nje isisusa sakho sesicacile futhi sinamandla, usukulungele ukudumisa uJehova ngomdlandla.
16, 17. Ukuziphatha kwakho kunayiphi indima ekudumiseni uJehova? Fanekisa.
16 Manje, ungakacabangi nangokuthi yini ozoyisho, cabanga ngokuthi uzoziphatha kanjani. Ukube leya ntombazane engumIsrayeli osukwini luka-Elisha yayivame ukwedelela, ingahloniphi, noma ingathembeki, ucabanga ukuthi abathumbi bayo baseSiriya babeyoyilalela lapho ikhuluma ngomprofethi kaJehova? Cishe babengeke. Ngokufanayo, amathuba okuba abantu bakulalele aba maningi uma bebona ukuthi uyahlonipha, uthembekile, futhi uziphatha kahle. (Roma 2:21) Cabanga ngesibonelo esilandelayo.
17 EPortugal, intombazane eneminyaka engu-11 esikoleni yayibhekene nengcindezi yokugubha amaholide angqubuzana nonembeza wayo oqeqeshwe ngeBhayibheli. Yachazela uthisha wayo ngenhlonipho ukuthi kungani yenqaba ukuwagubha, kodwa uthisha wayenza inhlekisa. Njengoba kuhamba isikhathi, uthisha wayehlale ezama ukuyilulaza, ehlekisa ngenkolo yayo. Nokho, le ntombazanyana yayilokhu imhlonipha. Ngemva kweminyaka ethile, lowo dade omncane wayeseyiphayona elivamile, isikhonzi sesikhathi esigcwele. Lapho ebukele abantu ababhapathizwayo emhlanganweni wesigodi, wabona umuntu amaziyo kubo. Kwakungulowaya thisha wakhe! Ngemva kokwangana ngezinyembezi, uthisha watshela lo dade ukuthi akazange akukhohlwe ukuziphatha kwakhe okunenhlonipho ngesikhathi esamfundisa. Kwathi lapho kufika uFakazi kwakhe, lo thisha wakhuluma ngokuziphatha komfundi ake aba naye. Ngenxa yalokho, kwaqalwa isifundo seBhayibheli, futhi lona wesifazane walamukela iqiniso leBhayibheli. Yebo, ukuziphatha kwakho kungaba indlela enamandla kakhulu yokudumisa uJehova!
18. Yini osemusha angayenza uma ekuthola kunzima ukuqala ingxoxo mayelana neBhayibheli noJehova uNkulunkulu?
18 Ingabe ngezinye izikhathi ukuthola kunzima ukuqala izingxoxo eziphathelene nenkolo yakho esikoleni? Uma uzizwa kanjalo, awuwedwa. Nokho, ungase wandise amathuba okuba abanye bakubuze ngenkolo yakho. Ngokwesibonelo, uma kuvunyelwe, kungani ungafiki nezincwadi ezisekelwe eBhayibhelini bese uzifunda ngesikhathi sekhefu noma ngezinye izikhathi lapho kwamukeleka ukwenza kanjalo? Ofunda nabo bangase bakubuze ukuthi ufundani. Ngokubaphendula futhi ubatshele ukuthi yini oyithandayo kuleso sihloko noma incwadi oyiphethe, ungase uthole ukuthi kuqala ingxoxo emnandi unganakile. Khumbula ukubuza, uthole ukuthi yini abayikholelwayo laba ofunda nabo. Lalela ngenhlonipho, ubaxoxele lokho okufunde eBhayibhelini. Njengoba kubonisa okuhlangenwe nakho okusekhasini 29, intsha eningi idumisa uNkulunkulu esikoleni. Lokhu kuyinika injabulo enkulu futhi kusiza abaningi ukuba bazi uJehova.
19. Intsha ingaphumelela kanjani ngokwengeziwe enkonzweni yendlu ngendlu?
19 Inkonzo yendlu ngendlu iyindlela ephumelela kakhulu yokudumisa uJehova. Uma ungakaqali ukuhlanganyela kuyo, kungani ungazibekeli lokho njengomgomo wakho? Uma usuqalile, ikhona yini imigomo eyengeziwe ongazibekela yona? Ngokwesibonelo, kunokuba usho into efanayo kuzo zonke izindlu, funa izindlela zokuthuthukisa, ucele amacebiso kubazali bakho nakwabanye abanokuhlangenwe nakho. Funda ukusebenzisa iBhayibheli kakhudlwana, ukwenza izimpindelo ngokuphumelelayo, nokuqala isifundo seBhayibheli. (1 Thimothewu 4:15) Lapho umdumisa ngokwengeziwe uJehova ngalezi zindlela, uyophumelela ngokwengeziwe, futhi uyoyijabulela ngokwengeziwe inkonzo yakho.
Kufanele Uqale Nini Ukudumisa UJehova?
20. Kungani singekho isizathu sokuba intsha izibone isencane kakhulu ukuba idumise uJehova?
20 Emibuzweni emithathu ekule ngxoxo, impendulo yalona wokugcina iyona elula kunazo zonke. Phawula impendulo eqondile yeBhayibheli: “Manje khumbula uMdali wakho Omkhulu ezinsukwini zobunsizwa bakho.” (UmShumayeli 12:1) Yebo, isikhathi sokuqala ukudumisa uJehova yimanje. Akuve kulula ukuthi: “Ngisemncane kakhulu ukuba ngidumise uJehova. Angikazi lutho. Kufanele ngiqale ngithi ukukhulakhula.” Uma uzizwa kanjalo, kuyobe akuqali ngawe. Ngokwesibonelo, lapho esemncane, uJeremiya wathi kuJehova: “Maye, Nkosi EnguMbusi Jehova! Bheka empeleni angikwazi ukukhuluma, ngoba ngisewumfana nje.” UJehova wamqinisekisa ukuthi asikho isizathu sokwesaba. (Jeremiya 1:6, 7) Ngokufanayo, akukho lutho okufanele silwesabe lapho sidumisa uJehova. Akukho lutho olungasehlela uJehova angenakululungisa ngokuphelele.—IHubo 118:6.
21, 22. Kungani intsha engabadumisi bakaJehova ifaniswa namaconsi amazolo, futhi kungani kukhuthaza ukuyifanisa nawo?
21 Ngakho siyanikhuthaza basha: Ningangabazi ukudumisa uJehova! Isikhathi esikahle kakhulu sokuhlanganyela emsebenzini obaluleke kakhulu owenziwa emhlabeni namuhla yimanje njengoba nisebancane. Lapho nihlanganyela kuwo, niba ingxenye yokuthile okumangalisayo—umkhaya wendawo yonke wabadumisi bakaJehova. UJehova uyakujabulela kakhulu ukuba khona kwakho kulo mkhaya. Phawula la mazwi aphefumulelwe, umhubi awasho kuJehova: “Abantu bakho bayozinikela ngokuzithandela ngosuku lwempi yakho. Ebukhazikhazini bobungcwele, kusukela esibelethweni sokuntwela kokusa, uneqembu lakho lezinsizwa elinjengamaconsi amazolo.”—IHubo 110:3.
22 Amaconsi amazolo abenyezelayo ekukhanyeni kwasekuseni mahle, akunjalo? Ayaqabula, ayacwazimula, futhi ngeke uwabale ngenxa yobuningi bawo. UJehova unibheka kanjalo nina basha enimdumisa ngokwethembeka kulezi zikhathi ezibucayi. Kusobala ukuthi ukukhetha kwenu ukudumisa uJehova kwenza inhliziyo yakhe ijabule. (IzAga 27:11) Ngakho, basha yenzani konke eningakwenza ukuze nidumise uJehova!
Ungaphendula Kanjani?
• Iziphi ezinye zezizathu ezibalulekile zokudumisa uJehova?
• Iziphi izibonelo eziseBhayibhelini ezibonisa ukuthi intsha ingaphumelela kakhulu ekudumiseni uJehova?
• Intsha ingamdumisa kanjani uJehova namuhla?
• Intsha kufanele iqale nini ukudumisa uJehova, futhi ngani?
[Izithombe ekhasini 25]
Ukube ubunomngane onekhono elimangalisayo, ubungeke yini utshele abanye ngaye?
[Isithombe ekhasini 27]
Ofunda nabo bangase bathande ukuzwa ngezinkolelo zakho
[Isithombe ekhasini 28]
Uma ufuna ukuthuthukisa inkonzo yakho, cela amacebiso kuFakazi onokuhlangenwe nakho