Ukuthwesa Iziqu Abafundi BeZwi LikaNkulunkulu
BELINGISA amaKristu ekhulu lokuqala, oFakazi BakaJehova baziwa emhlabeni wonke ngokushumayela kwabo endlini ngendlu. Lomsebenzi wagcizelelwa emazwini okuvula esimisweni sokuthweswa iziqu kwekilasi le-102 le-Watchtower Bible School of Gilead.
Ngo-March 1, 1997, u-Albert Schroeder, ilungu leNdikimba Ebusayo YoFakazi BakaJehova, wadonsela ukunakekela esihlokweni samuva esisephephabhukwini lesiFulentshi elithi Le Point. Saphawula ngokuhlela kwamaRoma Katolika ukuqala ukushumayela endlini ngendlu e-Italy. Lesi sihloko sathi: “Ukuze [izithunywa zevangeli zaseVatican] zingabuyi zilambatha njengoba zincintisana noFakazi BakaJehova ensimini yabo, iVatican iye yahlela ngisho nokuba kunyatheliswe amakhophi ayizigidi eVangeli LikaSanta Mark, njengoba izithunywa zayo zibhekene nochwepheshe [oFakazi] ‘ekuhambiseni’ izindaba ezinhle endlini ngendlu.”
Labo abangu-48 abathweswa iziqu baphakathi kwalabo abaye balingisa izindlela zikaJesu zokushumayela eziwubuchwepheshe ekusakazeni iZwi likaNkulunkulu. Babeze e-Watchtower Educational Center, ePatterson, eNew York bevela emazweni angu-8. Phakathi nezinyanga ezinhlanu befunda kulesi sikole, batadisha lonke iBhayibheli. Izifundo zabo zihlanganisa nomlando wenhlangano kaNkulunkulu, izici eziwusizo zempilo yezithunywa zevangeli nezithelo zomoya kaNkulunkulu. Konke lokhu kwenziwa ngomgomo owodwa—ukubalungiselela inkonzo yezithunywa zevangeli emazweni angu-17 ababethunyelwa kuwo. Njengoba babethweswa iziqu, izethameli ezingu-5015 ezivela ezizweni zonke zahlanganyela nabo lesi senzakalo esijabulisayo. Isiphi iseluleko sokugcina esiwusizo laba bafundi baseGileyadi abasithola?
Isikhuthazo Esifike Ngesikhathi Sezithunywa Zevangeli Ezintsha
Ngemva kwamazwi okuvula kasihlalo, uRalph Walls, umsizi weKomiti Yezisebenzi yeNdikimba Ebusayo, wanikeza inkulumo yokuqala emfushane eneseluleko esiwusizo esiqondiswe ezithunyweni zevangeli ezintsha. Isihloko sakhe sasithi “Khumbula Ukuthanda.” Waphawula ukuthi iBhayibheli, kweyesi-2 Thimothewu isahluko sesithathu, labikezela ukuthi izwe liyoqhubeka lintula uthando. Wanikeza izithunywa zevangeli lesi sikhumbuzo esifike ngesikhathi, ngokuvumelana nencazelo yothando ekweyoku-1 Korinte 13:1-7: “Nina, njengezithunywa zevangeli, ningase neqe umgomo wenu wamahora. Ningase nibe nengcebo yolwazi eniluthole ekuqeqeshweni kwenu kwaseGileyadi. Noma singase sisebenze isikhathi esengeziwe ngentshiseko ezabelweni zethu egatsheni. Kodwa yonke imizamo nokuzidela kwethu kuyize uma sikhohlwa ukuthanda.”
Esimisweni kwalandela uCarey Barber, weNdikimba Ebusayo, owacabangela isihloko esithi “UJehova Usiholela Ekunqobeni.” Kusukela esiqalweni sazo esincane ngemva kweMpi Yezwe I, uJehova uNkulunkulu uye waholela izinceku zakhe ezikholekile ekunqobeni ekumemezeleni izindaba ezinhle zoMbuso wakhe, naphezu koshushiso. Ngo-1931, abaFundi BeBhayibheli, njengoba babaziwa kanjalo ngaleso sikhathi, bamukela igama elithi oFakazi BakaJehova okwabajabhisa abefundisi beLobukholwa. “Ikilasi le-102 lezithunywa zevangeli eziqeqeshwe eGileyadi manje linelungelo elihle kakhulu lokuba nengxenye enkulu emsebenzini okhazimulayo wokunika abaningi ngangokunokwenzeka ithuba lokufunda lelo gama elingcwele,” kusho uMfoweth’uBarber. Linezelwa ohlwini olude lwezithunywa zevangeli ezingu-7 131 eziye zaqeqeshwa eSikoleni SaseGileyadi neziye zasiza ekwandiseni ukushunyayelwa kweZwi likaNkulunkulu ukusuka emazweni angu-54 ngo-1943 kuya kwangu-233 namuhla.
Isikhulumi esalandela, uLloyd Barry, naso okungeseNdikimba Ebusayo, sathweswa iziqu ekilasini le-11 laseGileyadi futhi sakhonza njengesithunywa sevangeli eJapane iminyaka engaphezu kuka-25. Sanikeza isikhuthazo ngesihloko saso esithi, “Hlala Kulezi Zinto.” “Injabulo yenu enkulu iyotholakala ekukhuthazeleni,” sitshela abafundi. Imiphi imivuzo etholakala ngokukhuthazela emsebenzini wezithunywa zevangeli noma kunoma isiphi esinye isabelo esingokwasezulwini? “Ngaphezu kwakho konke, ukukhuthazela kwethu kwenza inhliziyo kaJehova ithokoze . . . Kunokwaneliseka okukhulu okutholakala ekugcineni ubuqotho ngaphansi kovivinyo . . . Yenza inkonzo yezithunywa zevangeli ibe umsebenzi wokuphila kwakho . . . Umvuzo wakho uyokuba amazwi ajabulisayo athi ‘wenze kahle.’” (Mathewu 25:21; IzAga 27:11) Ephetha inkulumo yakhe, uMfoweth’uBarry wakhuthaza ngokusuka enhliziyweni izithunywa zevangeli ezintsha ukuba ‘zihlale kulezizinto’ ngokuzimisela ukuba insimu yazo ibe ukuphila kwazo.—1 Thimothewu 4:16.
Umbuzo othi “Yini Oyoyibona?” waphakanyiswa uKarl Adams, oye waba nengxenye ekufundiseni amakilasi amaningi aseGileyadi. Waveza ukuthi lokho izithunywa zevangeli ezintsha eziyokubona ezabelweni zazo akuxhomekile emehlweni azo angokwenyama kuphela kodwa nasemehlweni ezinhliziyo zazo. (Efesu 1:18) Lokhu kwaboniswa yilokho okwabonwa izinhloli zama-Israyeli lapho zihlola iZwe Lesithembiso. Zonke lezi zinhloli ezingu-12 zabona izinto ezifanayo ngokwenyama, kodwa kwaba ezimbili kuphela ezabona iZwe Lesithembiso ngokombono kaNkulunkulu. Izithunywa zevangeli nazo zingabona izinto ngezindlela ezihlukahlukene. Kwamanye amazwe eziyokhonza kuwo, zingase zibone ubumpofu, ukuhlupheka nokuphelelwa ithemba. Kodwa akufanele zisabele kabi futhi zishiye lelozwe. UMfoweth’u-Adams walandisa ngesinye isithunywa sevangeli sekilasi elidlule esathi: “Lokhu engiye ngabhekana nakho kungenze ngaqaphela ukuthi kudingeka ngihlale lapha. Laba bantu badinga ithemba ngekusasa. Ngifuna ukwenza ushintsho ekuphileni kwabo.” UMfoweth’u-Adams waphetha ngokukhuthaza izithunywa zevangeli ezintsha ukuba zibheke amazwe ezabelwe kuwo njengezindawo uJehova aye wanquma ukuzenza ingxenye yePharadesi laKhe lembulunga yonke futhi zibheke abantu balapho njengabangase babe amalungu omphakathi wezwe elisha.
Inkulumo yokugcina kulengxenye yesimiso yanikezwa uWallace Liverance, owakhonza iminyaka eminingana ensimini yezithunywa zevangeli ngaphambi kokuba afundise eGileyadi. Isihloko sakhe sasithi “Yenza Imisebenzi Emangalisayo KaNkulunkulu Ngokuqonda.” Ukwenza izinto ngokuqonda kuhilela ukuzenza ngokuqapha nangengqondo ehluzekile. Yilokho inkosi yakwa-Israyeli uSawule eyahluleka ukukwenza.—1 Samuweli 13:9-13; 15:1-22.
Enye indlela yokwenza izinto ngokuqonda iwukwamukela izinselele zokuzivumelanisa nendlela entsha yokuphila, kuhlanganise nokufunda ulimi olusha kanye nokujwayelana nabantu. Okuhlangenwe nakho kwezithunywa zevangeli ekubhekaneni nezinselele nokunqoba izithiyo kungaziqinisa ngokomoya ngendlela uJoshuwa noKalebi abaqiniswa ngayo lapho benqoba izwe uNkulunkulu ayebabele lona.
Izingxoxo
Ingxenye eyalandela esimisweni yayinochungechunge lwezingxoxo. UHarold Jackson waxoxa no-Ulysses Glass, obhalisayo nosefundise isikhathi eside eSikoleni SaseGileyadi, manje oneminyaka engu-85 ubudala. Izithunywa zevangeli eziningi ezisesensimini zisayikhumbula kahle iminyaka yakhe yokufundisa nokuqeqesha ngokwethembeka. Kwalandela uMark Noumair, ofundisa eGileyadi nokhonze iminyaka eminingi njengesithunywa sevangeli e-Afrika ngaphambi kokuba abe omunye wabafundisa eSikoleni SaseGileyadi. Waxoxa nabafundi ngenkonzo yabo phakathi nezinyanga ezinhlanu befunda. Okuhlangenwe nakho kwabo kwabonisa ngokusobala ukuthi kunabantu abanesithakazelo eZwini likaNkulunkulu ensimini yendawo.
URobert Ciranko noCharles Molohan babe sebexoxa namadoda anokuhlangenwe nakho ayeze kwesinye isikole kulesi sakhiwo, isikole esiphathelene nezisebenzi zegatsha. Iseluleko sawo ekilasini elithweswa iziqu sahlanganisa isidingo sokuthobeka nokunikela ebunyeni bebandla. Asikisela ukuba labo abathweswa iziqu akufanele babe nemibono ecatshangelwe kusengaphambili yalokho okuzokwenzeka emsebenzini wezithunywa zevangeli kodwa kunalokho, bamane bazimisele ukwamukela noma yini abahlangabezana nayo. Ukusebenzisa lesi seluleko ngokungangabazeki kuyosiza lezi zithunywa zevangeli ezintsha ukuba zifeze izabelo zazo njengabafundisi beZwi likaNkulunkulu.
Ekugcineni, uTheodore Jaracz, ilungu leNdikimba Ebusayo, wakhuluma nezethameli ngesihloko esithi “Yini Ethonya Enye?” Wachaza ukuthi uma thina njengamaKristu sibonisa izithelo zomoya, singaba ithonya elihle kwabanye abantu. “Izithunywa zevangeli ezithunywa inhlangano kaJehova ziye zakha umlando otusekayo wokuthonya abantu ngendlela enempilo nengokomoya,” ephawula. Wabe esecaphuna amazwi ashiwo abantu abaye basizwa ukuba bakhonze uNkulunkulu ngenxa yezibonelo ezinhle ezabekwa izithunywa zevangeli. Waphetha ngokuthi: “Kwangathi ningalilondoloza idumela eliye lazuzwa abantu bakaJehova futhi niqhubeke ningqongqoza kuleyo minyango esabelweni senu sakwamanye amazwe nicinga abafanelekayo . . . Futhi, yenqabani ithonya lalelizwe ngokuziphatha kwenu okuqotho nokuhlanzekile futhi nibe ithonya elihle kube udumo kuJehova.”
Ekuphethweni kwesimiso, usihlalo wadlulisela imikhonzo evela kude naseduze wabe esekhipha ama-diploma futhi wamemezela izabelo zezithunywa zevangeli. Ngemva kwalokho, omunye wababethweswa iziqu wafunda izwi lesinqumo lekilasi elalizwakalisa ukubonga ngezifundo elizinikeziwe. Ngokusobala, isimiso sokuthweswa iziqu kwekilasi le-102 senza bonke ababekhona bazimisela ngokwengeziwe ukuqhubeka bememezela iZwi likaNkulunkulu.
[Isithombe ekhasini 31]
Ikilasi Le-102 Elithweswe Iziqu Le-Watchtower Bible School of Gilead
Ohlwini olungezansi, imigqa ibalwa kusukela phambili kuya emuva, futhi amagama ahlelwe ukusuka kwesobunxele kuya kwesokudla emgqeni ngamunye.
(1) Duffy, C.; Alexis, D.; Harff, R.; Lee, J.; Corey, V.; Nortum, T.; Mora, N.; Journet, F. (2) Djupvik, L.; Singh, K.; Hart, B.; Kirkoryan, M.; Lee, S.; Rastall, S.; Zoulin, K.; Kollat, K. (3) Singh, D.; Pitteloud, J.; Pitteloud, F.; Bokoch, N.; Torma, C.; Muxlow, A.; Richardson, C.; Nortum, D. (4) Harff, J.; Journet, K.; Barber, A.; Loberto, J.; Loberto, R.; Muxlow, M.; Mora, R.; Hart, M. (5) Torma, S.; Rastall, A.; Diaz, R.; Diaz, H.; Weiser, M.; Weiser, J.; Kirkoryan, G.; Zoulin, A. (6) Alexis, R.; Barber, D.; Djupvik, H.; Duffy, C.; Kollat, T.; Richardson, M.; Bokoch, S.; Corey, G.