Izithunywa Zokuthula KukaNkulunkulu Ziyahlangana
“YONKE imihlangano yesigodi esike saba kuyo iye yasakha,” kusho umdala ongumKristu e-United States. “Nokho, owalonyaka umane waba into engachazeki. Usuku nosuku besihamba sizibuza ukuthi kazi olwangakusasa lusiphatheleni esingalulindele, futhi besingadumali!”
Uma ube khona komunye weMihlangano Yesigodi ‘Yezithunywa Zokuthula KukaNkulunkulu,’ ngokungangabazeki uzovumelana nalesi sihambeli somhlangano esinomdlandla. Usuku ngalunye lomhlangano lwalugxile esicini esihlukile somsebenzi oFakazi BakaJehova abawufezayo njengezithunywa zikaNkulunkulu. Ake sibukeze lesi simiso sezinsuku ezintathu.
‘Muhle Omemezela Izindaba Ezinhle Zokuthula’
Lesi kwakuyisihloko sosuku lokuqala lomhlangano. Sasisekelwe ku-Isaya 52:7. Kulezi zikhathi ezinzima, abaningi bakhonza uJehova ngaphansi kwezimo eziyinselele. Inkulumo ethi “Ukuzwa Ezivela Kubamemezeli Bokuthula Abashisekayo” yayinezingxenye okwakuxoxwa kuzo nabanye balaba bamemezeli abakholekile. Ukuzwa amazwi abo kwakukhuthaza ngempela, futhi kwabaqinisekisa ababeze emhlanganweni ukuthi uJehova angabaqinisa nabo, abanikeze ngisho ‘namandla angaphezu kwavamile’ ukuze abasize bakhuthazele.—2 Korinte 4:7.
Izimfuneko zikaJehova aziwona umthwalo osindayo. (1 Johane 5:3) Lokhu kwenziwa kwacaca enkulumweni yokugcina esimisweni sasekuseni, esafinyelela umvuthwandaba ngokukhululwa kwencwajana enamakhasi angu-32 enesihloko esithi Yini UNkulunkulu Ayifunayo Kithi? Akungabazeki ukuthi lensiza-kufundisa entsha enemifanekiso emihle izofeza indima ephawulekayo ekusizeni abaningi abengeziwe ukuba bafunde ngezinjongo zikaNkulunkulu. Ukukhulumela kokusetshenziswa kwalencwajana entsha kutholakala esihlokweni sokugcina esifundwayo kulomagazini nasemakhasini 16 no-17.
Inkulumo ethi “Ukukhuthazela Emsebenzini Omuhle” yagcizelela ukuthi uJehova uyakuqaphela impela ukulingwa kwethu. Ukukhuthazela kusho ukuma siqinile futhi singaphelelwa ithemba. UJehova uye wasinika iZwi lakhe, umoya wakhe nenhlangano yakhe ukuze kusisize. Ukushumayela kudinga ukukhuthazela, kodwa ukushumayela kusisiza ukuba sikhuthazele, ngoba kugcina ukholo lwethu luphila. Njengoba sesisondele kangaka ekupheleni, akufanele sivumele izinkinga zethu zidambise intshiseko yethu, ngoba yilabo kuphela abakhuthazela kuze kube sekupheleni abayosindiswa.—Mathewu 24:13.
Inkulumo eyisihluthulelo ethi, “Indima Yethu Njengezithunywa Zokuthula KukaNkulunkulu,” yadonsela ukunakekela ekukhululweni kwabathunjwa abangamaJuda eBabiloni nasekubuyiselweni kokukhulekela okumsulwa eJerusalema ngo-537 B.C.E. Isikhulumi sachaza ukuthi lesi senzakalo sasimane sinikeza umbono kusengaphambili walokho uMbuso kaNkulunkulu ozokufeza ngokushesha ngezinga lomhlaba wonke. (IHubo 72:7; Isaya 9:7) Isabelo sethu njengamanje siwukushumayela izindaba ezinhle zaloMbuso nokuphila ngokuvumelana naleso sigijimi. Uthando ngoNkulunkulu nomakhelwane kufanele lusishukumisele ukuba siqhubeke nalomsebenzi singayekethisi.—IzEnzo 5:42.
Isici esivelele esimisweni sangoLwesihlanu kwakuwuchungechunge oluthi, “Qaphela Izingibe Ezingabonakali Zokuzijabulisa.” Umculo wanamuhla, amabhayisikobho, ama-video, izinhlelo zethelevishini, imidlalo yama-video, izincwadi, omagazini nezincwadi zamahlaya ngokuvamile kubonisa ukucabanga kobudemoni. Ngakho-ke, kudingeka ‘senyanye okubi’ futhi ‘sibambelele kokuhle.’ (Roma 12:9) Yebo, ukuzijabulisa okonakele kumelwe sikubheke njengokwenyanyekayo futhi sikugweme, kuyilapho sigxilisa ukunaka kwethu ezintweni ezimsulwa, ezinhle nezifanelekela ukudunyiswa. (Filipi 4:8) Izincwadi nezinto zokucwaninga ezilungiselelwa yinhlangano kaJehova kushukumisa izingqondo zethu ngemicabango eyakhayo futhi kusiqeqeshele ukuhlukanisa okulungile nokungalungile. (Heberu 5:14) Kufanele sibambelele kulamalungiselelo ngendlela ebesingenza ngayo esikebheni olwandle oluyaluzayo.
Kwalandela inkulumo ethi, “Melana NoDeveli—Ungawubekezeleli Umbango.” Ngaphambi nje kokuba angene eZweni Lesithembiso, ama-Israyeli ayizinkulungwane abanjwa ugibe lokuziphatha okubi. UFinehasi akawubekezelelanga umbango ngokuqondene nokukhulekela kweqiniso. Wabathathela isinyathelo esiwujuqu abenzi bokubi, futhi ukuzinikela kwakhe okukhethekile kwamjabulisa uJehova. (Numeri 25:1-13) Umgomo kaSathane uwukwenza ngamunye wethu angakufanelekeli ukungena ezweni elisha likaNkulunkulu. Ngakho-ke njengoFinehasi, kumelwe simelane nemizamo kaDeveli yokusingcolisa. Kungakhathaliseki ukuthi sishadile noma asishadile, kumelwe ‘sibalekele ubufebe.’—1 Korinte 6:18.
Isihloko senkulumo yokuphetha ngosuku lokuqala lomhlangano sasithi, “Ukusekela Ubuqotho BeZwi LikaNkulunkulu Ngokwethembeka.” Abahumushi abaningi bayazishintsha noma bazikhiphe izingxenye ezithile zemiBhalo. Ngokwesibonelo, ukuze bagweme izimpikiswano abacabanga ukuthi zingaphakanyiswa abameleli bamalungelo abesifazane, abahumushi be-New Testament and Psalms: An Inclusive Version ababhekiseli kuNkulunkulu ngokuthi uBaba, kodwa ngokuthi uBaba-Mama nakuJesu ngokuthi “uMuntu” kunokuthi “iNdodana yomuntu.” Ngokuphambene, i-New World Translation inamathela ngokwethembeka embhalweni wolimi lokuqala kangangokuba iye yenza ukucabanga kwethu kwacaca ezindabeni ezithile ezingokomBhalo. Ngokwesibonelo, isikhulumi sathi: “Kwakuwukuhumusha okunembile kwe-New World Translation okwanikeza isisekelo sokuhlela kabusha kwethu amabandla ngokumisa izindikimba zabadala, ukuze sivumelane ngokuseduze nesibonelo esabekwa ibandla lobuKristu lekhulu lokuqala.” Sibonisa ukwethembeka kwethu eZwini likaNkulunkulu ngokulifunda nsuku zonke nangokusebenzisa iseluleko salo. Isikhulumi sathi futhi: “Sibonisa ukuthi singabameleli abaqotho beZwi likaNkulunkulu ngokulishumayela kwabanye ngenkuthalo nangokulisebenzisa ngokucophelela lapho sifundisa abanye, singalokothi sizame ukulenza livumelane nemibono yethu ngokusonta noma ngokwandisa elikushoyo.”
‘Ukuthula KukaNkulunkulu Kudlula Konke Ukucabanga’
Lesi sihloko, esisekelwe kweyabaseFilipi 4:7, sabeka isisekelo sosuku lwesibili lomhlangano. Ukwaziswa okuningi okwanikezwa kwakuphathelene nombono ofanele ngenkonzo yomuntu, umkhaya, ukuzinikezela kwakhe nezinye izici zokuphila kwansuku zonke.
Ngemva kwengxoxo yetekisi losuku, kwanikezwa uchungechunge olunesihloko esithi, “Izithunywa Eziletha Izindaba Ezinhle Zokuthula.” Isigijimi sethu esokuthula, futhi kufanele sidluliselwe ngendlela enokuthula. (Efesu 6:15) Umgomo wethu uwukuzuza izinhliziyo zabantu, hhayi ukunqoba ezimpikiswaneni. Ukuqeqeshwa nezincwadi esizithola enhlanganweni kaJehova kusisiza ukuba senze lokho kanye. Akufanele sivumele ukunganakwa noma ukungakhathali kusidangalise. Kunalokho, kufanele siqhubeke ‘senza konke okusemandleni,’ sibe nesimiso esihle sesifundo somuntu siqu, ukuba khona emihlanganweni nokuhlanganyela emsebenzini wokushumayela. (2 Thimothewu 2:15) Akumelwe kunganakwa ukwenza okuhle kwabanye, ikakhulukazi kulabo abahlobene nathi okholweni. (Galathiya 6:10) Yiqiniso, ukwenza konke okusemandleni akusho ukuzikhandla ngokweqile. Lokho umuntu ngamunye akwazi ukukwenza ngokwamandla akhe nezimo zakhe kuyamukeleka kuJehova.
Abantu bakaNkulunkulu banikela ngesikhathi sabo, amandla, nezimali ukuze bathuthukise izithakazelo zoMbuso. Inkulumo ethi “Ukupha Ngokwenama Enhlanganweni KaJehova” yaveza ukuthi njengoba abanjengezimvu abengeziwe besabela esigijimini soMbuso, kunesidingo sezinto ezengeziwe zokusebenza, izindawo zokuhlangana nezakhiwo zamagatsha. Iminikelo yethu yenza inhlangano ikwazi ukuba nanoma yini edingekayo ukuze kufezwe umsebenzi wokushumayela womhlaba wonke. Futhi ukupha ngomusa kudumisa uJehova kulethe nenjabulo kophayo. Ngakho-ke, njengamaKristu akumelwe sisishaye indiva lesi sici esibalulekile sokukhulekela kwethu.—2 Korinte 8:1-7.
Inkulumo eyaphetha isimiso sasekuseni kwaba eyobhapathizo—ihlale iyisici esivelele emibuthanweni emikhulu yoFakazi BakaJehova. Yeka injabulo okwakuyiyo ukubona abasanda kuzinikezela belandela ezinyathelweni zikaJesu ngokuziletha ukuba babhapathizwe ngamanzi! (Mathewu 3:13-17) Bonke abathatha lesi sinyathelo baye bafundiswa emthonjeni wokuhlakanipha okukhulu kunakho konke—iBhayibheli. Ngaphezu kwalokho, baye bathola injongo yangempela ekuphileni, futhi babusiswa ngokuthula okubangelwa ukwazi ukuthi benza okulungile.—UmShumayeli 12:13.
Kwanikezwa iseluleko esicacile enkulumweni ethi “Ukuqonda Makukulonde.” Ukuqonda kubaluleke kakhulu ezindabeni zokusebenzelana ngezamabhizinisi. Akufanele siqhube izindaba zebhizinisi zomuntu siqu eHholo LoMbuso, futhi akufanele sisizakale ngamaKristu esikanye nawo ngenxa yenzuzo yemali. (Qhathanisa noJohane 2:15, 16.) Ukuqonda kuyadingeka nalapho ufaka imali ebhizinisini noma lapho uboleka noma ubolekisa ngemali. “Ukuhluleka kwamabhizinisi kumaKristu kuye kwaholela ekudumaleni nasekulahlekelweni ngisho ingokomoya kwabanye abangenela ngokubhuduzela amacebo ayingozi okwenza imali,” kuphawula isikhulumi. Nakuba kungekhona okungalungile ngamaKristu ukuba enze ibhizinisi ndawonye, ngokuqinisekile ukuqapha kuwukuhlakanipha. Futhi lapho kwenziwa isivumelwano sebhizinisi phakathi kwezinhlangothi ezimbili, ngaso sonke isikhathi imininingwane kufanele ibhalwe phansi.
Enkulumweni ethi “Wabadala, Owesilisa Nowesifazane” kwaxoxwa ngendinganiso kaNkulunkulu ngabesilisa nabesifazane. Kuwo wonke umlando izindima zalaba bantu ziye zahlanekezelwa. “Abaningi ngephutha bahlobanisa ubudoda nokubusa ngokhahlo, ubulukhuni, noma ukuqhosha kwabesilisa,” kusho isikhulumi. “Kwamanye amasiko akuvamile, futhi kuyihlazo nokuba yihlazo, ukuba indoda ikhale izinyembezi phambi kwabantu noma ngisho nangasese. Nokho, uJohane 11:35 ulandisa ukuthi lapho esesixukwini ngaphandle kwethuna likaLazaru, ‘uJesu wakhala izinyembezi.’” Kuthiwani ngabesifazane? Ubufazi buvame ukuhlotshaniswa nokukhanga ngokomzimba. Kodwa isikhulumi sabuza: “Uma owesifazane emuhle kodwa engenangqondo futhi ethanda ukuqophisana nabantu, ebhuqa, noma eqhosha, kungashiwo yini ukuthi muhle ngempela, ukuthi ungumfazi ngempela?” (Qhathanisa nezAga 11:22; 31:26.) Ekukhulumeni, ekuziphatheni nasekuzilungiseni kwabo, abesilisa nabesifazane abangamaKristu balwela ukulandela izindinganiso zeBhayibheli. Isikhulumi sathi: “Kulula ukuhlonipha indoda ebonisa izithelo zomoya, futhi kulula ukuthanda owesifazane owenze njalo.”—Galathiya 5:22, 23.
Kwalandela uchungechunge oluthi, “UNkulunkulu Wokuthula Uyakukhathalela.” AmaKristu amaningi anokukhathazeka okuphathelene nezimali. Noma kunjalo, uJehova uyathembisa: “Angisoze ngakushiya noma ngakulahla nganoma iyiphi indlela.” (Heberu 13:5) Naphezu kwezinkinga zezomnotho, abanye baye babonisa ukuthembela kulesi sithembiso ngokungenela inkonzo yamaphayona asizayo noma avamile. Abanye abangenakuphayona njengamanje babeka izithakazelo zoMbuso kuqala ngokubamba wonke amathuba okufakaza. (Mathewu 6:33) Yonke imizamo enjalo kufanele inconywe! Inhlangano kaJehova iye yalungiselela izincwadi eziningi zokusisiza enkonzweni yethu nezokusisiza sibhekane nezinkinga zethu. Uma sibonisa ukwazisa ngamalungiselelo kaJehova angokomoya, uyosibusisa ngokuthula kulezi zikhathi ezinesiyaluyalu ngokwezomnotho.—IHubo 29:11.
Ekupheleni kwenkulumo yokugcina yalolo suku ethi, “Phishekela Ukuthula KukaNkulunkulu Ekuphileni Komkhaya,” ababeze emhlanganweni bajabula ukwamukela incwadi entsha ethi, Imfihlo Yenjabulo Yomkhaya. “Yitadisheni ngenkuthalo lencwadi, ngokomuntu siqu nanjengemikhaya,” kunxusa isikhulumi. “Zamani ngobuqotho ukusebenzisa iseluleko sayo esisekelwe eBhayibhelini, futhi qinisekani ukuthi niyokwandisa ukuthula nenjabulo yomkhaya wenu.”
‘Gcinani Ubunye Esibophweni Esihlanganisayo Sokuthula’
Lesi kwakuyisihloko esifanelekayo sosuku lokugcina lomhlangano, esasisekelwe kweyabase-Efesu 4:3. OFakazi BakaJehova, abavela kuzo zonke izizwe zomhlaba, baye bafundiswa nguNkulunkulu. Ngakho-ke, bayakuthanda ukuthula. Balandela isibonelo sikaJesu futhi bazama “ukugcina ubunye bomoya esibophweni esihlanganisayo sokuthula.”
Ukuthula okugcwele enhlanganweni kaNkulunkulu kwaqokonyiswa ochungechungeni oluthi “Ukubona Uhlobo Olufanele Lwezithunywa.” Kwa-Israyeli wasendulo kwakunabaprofethi bamanga. Nokho, izithunywa zikaNkulunkulu zeqiniso—abaprofethi abanjengo-Isaya, u-Hezekeli noJeremiya—bakubikezela ngokunembile ukuwa kweJerusalema, inkathi yokudingiswa nokukhululwa kwabantu bakaNkulunkulu ekugcineni. Namuhla kunesimo esifanayo. Izithunywa zamanga zigcwele kwezombangazwe nasenkolweni yamanga. Nokho, uJehova uye waphakamisa oFakazi bakhe ukuba bamemezele injongo yakhe ngokuqondene nalesi simiso sezinto. Ikakhulukazi kusukela ngo-1919, izinceku zikaJehova ziye zasetshenziselwa ukumemezela isigijimi sikaNkulunkulu. Yeka indlela ezihluke ngayo ezithunyweni zamanga zeLobukholwa! Kwangathi ngenkuthalo singafeza indima yethu kulomsebenzi kuze kube yilapho uJehova ethi kufeziwe.
Inkulumo eyayinesihloko esithi “Lalela Futhi Uthobele IZwi LikaNkulunkulu” yagcizelela ukuthi imiBhalo iwumthombo omkhulu kakhulu wesiqondiso, induduzo nethemba. (Isaya 30:20, 21; Roma 15:4) Izwe lanamuhla liya liyekelela nakakhulu. Ngakho kudingeka silalele iseluleko esivela eZwini nasenhlanganweni kaNkulunkulu kunanini ngaphambili. UJehova uyabazi ubuthakathaka bethu, futhi eZwini lakhe uye wayiveza ngokucacile inkambo eyosizuzisa. Ukwazi ukuthi uJehova uyasisekela kusinikeza amandla okufeza noma yini asicela yona.
Lenkulumo yabeka isisekelo sedrama egqokelwe ezasendulo eyalandela. Yayinesihloko esithi “Kungani Kumelwe Uhloniphe Amalungiselelo Angokwasezulwini?” Isebenzisa ukulandisa kweBhayibheli ngoGideyoni njengesisekelo, lengxenye yagcizelela isifundo esinamandla—kumelwe silandele iziyalezo zikaNkulunkulu singafaki ukucabanga kwethu esikhundleni sazo noma sizame ukugwema iseluleko esingokwasezulwini.
Inkulumo yeningi yayinesihloko esithi “Ukuthula Kweqiniso Ekugcineni!—Kuvela Kumuphi UMthombo?” Ukuthula uNkulunkulu akuthembisayo kudlula noma yini lelizwe elingayicabanga. “Ukuthula kweqiniso kusho ukuba nokuthula nsuku zonke,” kusho isikhulumi. “Ukuthula kukaNkulunkulu kusho izwe elingenazifo, ubuhlungu, ukudabuka nokufa.” IBhayibheli lisitshela ukuthi uJehova “uphelisa ukulwa kuze kube-semikhawulweni yomhlaba.” (IHubo 46:9) Uyokwenza kanjani lokhu? Ngokususa umphehli wempi, uSathane uDeveli. (IsAmbulo 20:1-3) Lokhu kuyovulela abathobekileyo indlela ukuze ‘badle ifa lomhlaba, bathokoze ngokuthula okukhulu.’—IHubo 37:11.
Ngemva kweSifundo Se-Nqabayokulinda esifingqiwe sangalelo sonto, kwanikezwa inkulumo yokuphetha umhlangano. Njengoba yayinesihloko esithi “Ukuqhubekela Phambili Njengezithunywa Zokuthula KukaNkulunkulu,” lenkulumo eshukumisayo yagcizelela ukuthi umsebenzi wethu wokushumayela uyingqayizivele futhi uyaphuthuma. Lesi akusona isikhathi sokuyekethisa, sokuthilileka, noma sokuphindela emibonweni eyiphutha. Sihlonyiswa ngalokho esikudingayo—isigijimi sikaNkulunkulu, umoya wakhe ongcwele namanye amalungiselelo amaningi avela enhlanganweni yakhe engokwaphezulu enothando. Ngakho-ke njengezinceku zikaJehova, kwangathi singaqhubekela phambili njengezithunywa zokuthula kukaNkulunkulu!
[Ibhokisi/Izithombe ekhasini 9]
Ilungiselelo Lothando Lemikhaya
Labo ababekhona ngosuku lwesibili loMhlangano Wesigodi “Wezithunywa Zokuthula KukaNkulunkulu” bakujabulela kakhulu ukwamukela incwadi entsha enesihloko esithi, Imfihlo Yenjabulo Yomkhaya. Lencwadi iqukethe ukwaziswa okungokomBhalo okuyozuzisa yonke imikhaya ethanda uNkulunkulu.
Umdala waseConnecticut, e-U.S.A., uyaphawula: “Ngo-June 15, sathola incwadi yethu ethi Injabulo Yomkhaya. Ngo-June 16, ngase ngimaphakathi nayo ngiyifunda. Ngomhla ka-17, saba nesifundo sethu somkhaya sokuqala ngayo, futhi sakhuthazeka kakhulu! Ngalo lolo suku, ngayiqeda lencwadi. Akungabazeki ukuthi bazoyithanda bonke abayisebenzisayo lencwadi enhle. Ukungagunci kwayo nokwaziswa kwayo okuhambisana nesikhathi kunikeza ubufakazi obengeziwe bokuthi ‘isigqila esikholekile nesiqondayo’ sinikeza ‘ukudla ngesikhathi esifanele’ futhi siyaziqaphela ngempela izidingo zethu kulezi zikhathi ezivivinyayo.”—Mathewu 24:45-47.
[Isithombe ekhasini 7]
Abancane nabadala ngokufanayo bafuna ukwazi ukuthi yini uNkulunkulu ayifunayo