Obani Abayizithunywa Zokuthula Zangempela?
NGO-MAY 31, 1996, imithombo yezindaba yamemezela lokho okwakubonakala sengathi kuyisigijimi sokuthula. Ngayizolo kwakukhishwe isitatimende esingokomthetho esasiqinisekisa ukuthi uBenjamin Netanyahu, owayesezoba undunankulu wase-Israel, ‘wayezinikele ngokujulile ekuqhutshekisweni kwezingxoxo zokuthula, ukuthula kanye nokulondeka, phakathi kwezwe lase-Israel nabo bonke omakhelwane balo, kuhlanganise nabasePalestine.’
Ukukhethwa kukaNetanyahu okwakungundab’uzekwayo kwenza abaningi bazibuza ukuthi kungenzeka yini ukuthi ukuthula eMpumalanga Ephakathi akulona nje iphupho. Uma kungelona, ingabe nezinye izizwe zingakwenza okufanayo, zikhohlwe izingxabano zazo?
Yiqiniso, kulula ukuthembisa ukuthula kunokukufinyelela. Beqaphela lokhu, abaningi babenokungabaza. Njengoba intatheli uHemi Shalev yakubeka, “ingxenye yomphakathi e-Israel manje inomuzwa wokuthi inkululeko iseduze, kanti enye ikholelwa ukuthi ivaleleke esihogweni emhlabeni.” Ngamafuphi, yathi: “Abanye bayajabula; abanye bayakhala.”
Kuba njalo lapho umuntu ezama ukuletha ukuthula. Ukunqoba komholi othile nabalandeli bakhe kusho ukwehlulwa kweqembu eliphikisayo. Ukunganeliseki kuholela ekukhungathekeni, kanti ukukhungatheka kuvame ukuholela ekuvukeleni. Kungakhathaliseki ukuthi kuseMpumalanga Ephakathi, eLatin America, eMpumalanga Yurophu, noma noma yikuphi—imizamo yomuntu yokuletha ukuthula ikhohlisa kakhulu.
Ukuthula Kwangempela Kuseduze!
Lapho ukuthula kwaseMpumalanga Ephakathi kwakuyindaba esematheni, kwakuzwakala esinye isigijimi sokuthula. Sasingeyona inkulumo yezombangazwe ewundab’uzekwayo; singesona futhi nesivumelwano sokuthula phakathi kwezizwe. Kunalokho, lesi sigijimi sasimemezela ukuthula okuyofika kuphela ngoMbuso kaNkulunkulu. Sezwakalaphi lesi sigijimi? EMihlanganweni Yesigodi ‘Yezithunywa Zokuthula KukaNkulunkulu’ engaphezu kuka-1 900 oFakazi BakaJehova ababa nayo emhlabeni wonke phakathi no-1996/97.
Kulemihlangano kwenziwa kwacaca ukuthi akukho hulumeni wabantu ongaletha ukuthula kweqiniso nokulondeka. Ngani? Ngoba lokho kungadinga ukuba kuqedwe izinto ezisiphuca ukuthula usuku nosuku. Ukuthula kweqiniso kusho ukuvuka njalo ekuseni kungekho songo lwempi noma ubudlova. Kusho ukungabi bikho kobugebengu, ukungabi bikho kwezihluthulelo ezicabheni zethu, ukungesabi ukuhamba emigwaqweni, ukungachitheki kwemikhaya. Yimuphi uhulumeni emhlabeni ongafinyelela konke lokho? Empeleni, yimuphi uhulumeni emhlabeni ongalokotha nje ukuthembise?
Nokho, uMbuso kaNkulunkulu ungaziletha lezi zinto futhi uyoziletha. IBhayibheli liyathembisa: “Bheka! Itende likaNkulunkulu likanye nesintu, uyohlala naso, futhi siyoba abantu bakhe. Futhi uNkulunkulu ngokwakhe uyoba naso. Futhi uyosula zonke izinyembezi emehlweni aso, futhi ukufa ngeke kusaba khona, noma ukulila noma ukukhala noma ubuhlungu ngeke kusaba khona. Izinto zangaphambili zidlulile.” (IsAmbulo 21:3, 4) Yeka impumuzo lokhu okuyoyiletha esintwini esihluphekayo!
Isithembiso sikaJehova uNkulunkulu asilona uwangala. IBhayibheli liyasiqinisekisa: “UNkulunkulu akasiye umuntu ukuba aqambe amanga, nandodana yomuntu ukuba azisole; ushilo, angayikukwenza, na? Ukhulumile, angayikukuphelelisa, na?” (Numeri 23:19) Yebo, lokho uNkulunkulu akuthembisile kuyokwenzeka—kube isibusiso kubo bonke abama ngasohlangothini lwakhe.
Izithunywa Zokuthula ZikaNkulunkulu
OFakazi BakaJehova baziwa kakhulu ngokushumayela kwabo ngentshiseko ngoMbuso kaNkulunkulu. Unyaka ngamunye, bebonke basebenzisa amahora angaphezu kwezigidi eziyinkulungwane behlanganyela nabanye isigijimi seBhayibheli esimisa isibindi. Lokhu kugcwalisa amazwi kaJesu: “Lezizindaba ezinhle zombuso ziyoshunyayelwa emhlabeni wonke owakhiweyo ngenjongo yobufakazi ezizweni zonke; khona-ke ukuphela kuyofika.” (Mathewu 24:14) Isigijimi oFakazi abasilethayo ‘siyizindaba ezinhle’ ngempela, ngoba simemezela uMbuso kaNkulunkulu wasezulwini njengowukuphela kwethemba lesintu. Futhi yeka ukuthi siyithemba elinokwethenjelwa kanjani ngekusasa!
Ngisho namanje uMbuso kaNkulunkulu uveza isibopho sangempela sokuthula nothando lobuzalwane ezikhonzini zawo. UJesu wathi: “Bonke bayokwazi ngalokhu ukuthi ningabafundi bami, uma ninothando phakathi kwenu.” (Johane 13:35) OFakazi BakaJehova bazama ukuphila ngokuvumelana nalemfuneko eyisisekelo yobuKristu beqiniso. Ngenxa yalokho, ubuzalwane babo buyamangalisa, buhlanganisa amaJuda nama-Arabhu, abantu baseCroatia nabaseSerbia, amaHutu namaTutsi. Izigidi zoFakazi BakaJehova emhlabeni wonke njengamanje zinakho lokhu kuthula okugcina ngokuba yiphupho eningini lesintu.
Isikhuthazo sokuba baqhubeke bephila ngezimiso zeBhayibheli futhi baqhubeke beshumayela izindaba ezinhle zoMbuso kaNkulunkulu saqokonyiswa esimisweni soMhlangano Wesigodi “Wezithunywa Zokuthula KukaNkulunkulu.” Siyakumema ukuba ufunde umbiko olandelayo walomhlangano wezinsuku ezintathu oshukumisayo oye wajatshulelwa izigidi zabantu.