Sinesizathu Sokukhamuluka Ngenjabulo
“Bayakuthola ukujabula nokuthokoza, kubaleke usizi nokububula.”—ISAYA 35:10.
1. Obani namuhla abanesizathu esikhethekile sokujabula?
CISHE uphawulile ukuthi bambalwa abantu abanenjabulo yangempela kulezi zinsuku. Nokho, njengamaKristu eqiniso, oFakazi BakaJehova banenjabulo. Futhi amathemba okuthola leyo njabulo aphambi kwezinye izigidi zabangakabhapathizwa, abasha nabadala, abahlanganyela noFakazi. Iqiniso lokuthi manje ufunda lamazwi kulomagazini libonisa ukuthi usuyitholile kakade lenjabulo noma ukuthi ungayithola.
2. Injabulo yomKristu ihluke kanjani esimweni esivamile sabantu abaningi?
2 Abantu abaningi banomuzwa wokuthi ukuphila kwabo kuntula okuthile. Kuthiwani ngawe? Kuyavunywa, ungase ungabi nazo zonke izinto ezibonakalayo ongase uzisebenzise, ngokuqinisekile hhayi zonke abantu banamuhla abacebile nabanamandla abanazo. Futhi ungase uthande ukuba nempilo enhle namandla engeziwe. Noma kunjalo, singasho singenqeni ukuthi uma kuziwa enjabulweni, ucebé futhi unempilo ukudlula abaningi ezinkulungwaneni zezigidi ezisemhlabeni. Kanjani?
3. Yimaphi amazwi abalulekile okufanele siwanake, futhi ngani?
3 Khumbula amazwi kaJesu: “Lezizinto ngizikhulume kini, ukuze injabulo yami ibe kini futhi injabulo yenu yenziwe igcwale.” (Johane 15:11) “Injabulo yenu yenziwe igcwale.” Yeka incazelo! Ukuhlolisisa indlela yokuphila yobuKristu kungembula izizathu eziningi zokuba injabulo yethu igcwale. Kodwa njengamanje, phawula amazwi abalulekile ku-Isaya 35:10. Lamazwi abalulekile ngoba asithinta kakhulu namuhla. Siyafunda: “Abahlengiweyo bakaJehova bayakubuya baye eSiyoni ngokwethaba, intokozo engunaphakade [“ukuthokoza isikhathi esingenakuphela,” NW] ibe-phezu kwamakhanda abo; bayakuthola ukujabula nokuthokoza, kubaleke usizi nokububula.”
4. Hlobo luni lwenjabulo okukhulunywa ngalo ku-Isaya 35:10, futhi kungani kufanele sikunake lokhu?
4 “Ukuthokoza isikhathi esingenakuphela.” Amazwi athi “isikhathi esingenakuphela” awukuhunyushwa okunembile kwalokho u-Isaya akubhala ngesiHeberu. Kodwa, njengoba eminye imibhalo ibonisa, okusikiselwa yileli vesi ukuthi “phakade.” (IHubo 45:6; 90:2; Isaya 40:28) Ngakho ukuthokoza ngeke kube nakuphela, ezimweni eziyovumela—yebo, zivune—ukuthokoza okumi phakade. Ingabe lokho akuzwakali kujabulisa? Nokho, mhlawumbe lelo vesi ulizwa njengamazwi achaza isimo esicatshangelwayo, okukwenza ucabange: ‘Lokho akungithinti ngempela ngendlela izinkinga nezinkathazo zami zansuku zonke ezingithinta ngayo.’ Kodwa amaqiniso abonisa okuhlukile. Isithembiso esingokwesiprofetho ku-Isaya 35:10 sisho okuthile ngawe namuhla. Ukuze ubone ukuthi kanjani, ake sihlole lesi sahluko esihle, u-Isaya 35, uphawule umongo wengxenye ngayinye. Qiniseka ukuthi uzokujabulela esizokuthola.
Abantu Okwakudingeka Bathokoze
5. Isiprofetho esiku-Isaya isahluko 35 sitholakala esimweni esinjani esingokwesiprofetho?
5 Okuzosisiza, ake sibheke isizinda, isimo esingokomlando salesi siprofetho esivusa amadlingozi. Umprofethi ongumHeberu u-Isaya wasiloba cishe ngo-732 B.C.E. Kwakusasele amashumi eminyaka ngaphambi kokuba amabutho aseBabiloni abhubhise iJerusalema. Njengoba u-Isaya 34:1, 2 ebonisa, uNkulunkulu wayebikezele ukuthi wayezoletha impindiselo ezizweni, njengesakwa-Edomi, okukhulunywe ngaso ku-Isaya 34:6. Ngokusobala wasebenzisa abaseBabiloni basendulo ekwenzeni lokho. Ngokufanayo, uNkulunkulu wenza ukuba abaseBabiloni bachithe uJuda ngoba amaJuda ayengathembekile. Waba yini umphumela? Abantu bakaNkulunkulu bathunjwa, futhi izwe labo laba incithakalo iminyaka engu-70.—2 IziKronike 36:15-21.
6. Kunamuphi umehluko phakathi kwalokho okwakuyokwehlela abakwa-Edomi nalokho okwakuyokwehlela amaJuda?
6 Nokho, kunomehluko omkhulu phakathi kwabakwa-Edomi namaJuda. Ukujeziswa ngokwaphezulu kwabakwa-Edomi kwakungenasiphelo; ekugcineni, banyamalala. Yebo, usengawavakashela amanxiwa angenalutho endaweni okwakuhlala kuyo abakwa-Edomi, njengamanxiwa asePetra adume umhlaba wonke. Kodwa namuhla, asikho isizwe noma abantu abangase babizwe ngokuthi ‘abakwa-Edomi.’ Ngakolunye uhlangothi, ingabe ukwenziwa incithakalo kukaJuda abaseBabiloni kwakuyohlala kuze kube phakade, kushiye lelozwe lingenanjabulo phakade?
7. AmaJuda ayethunjelwe eBabiloni kungenzeka asabela kanjani ku-Isaya isahluko 35?
7 Lapha isiprofetho esihle esiku-Isaya isahluko 35 sinencazelo evusa amadlingozi. Singase sibizwe ngokuthi isiprofetho sokubuyiselwa, ngoba sagcwaliseka okokuqala lapho amaJuda ebuyela ezweni lawo ngo-537 B.C.E. Ama-Israyeli ayethunjelwe eBabiloni akhululwa ukuba abuyele ezweni lawo. (Ezra 1:1-11) Nokho, kuze kube yilapho lokho kwenzeka, amaJuda ayethunjelwe eBabiloni ayecabanga ngalesi siprofetho saphezulu kungenzeka ayezibuza ukuthi ayeyozithola zinjani izimo emuva ezweni lesizwe sawo, kwaJuda. Futhi wona ayeyoba sesimweni esinjani? Izimpendulo zihlobene ngokuqondile nokuthi kungani ngempela sinesizathu sokukhamuluka ngenjabulo. Ake sibone.
8. Yiziphi izimo amaJuda ayeyozithola lapho ebuya evela eBabiloni? (Qhathanisa noHezekeli 19:3-6; Hoseya 13:8.)
8 Ngokuqinisekile isimo sasingeke sibonakale sithembisa kumaJuda ngisho nalapho ezwa ukuthi ayengabuyela ezweni lawo. Izwe lawo lase libe incithakalo amashumi ayisikhombisa eminyaka, isikhathi sokuphila komuntu sonke. Kwakwenzekeni kulelozwe? Noma imaphi amasimu ayelinyiwe, izivini, noma amasimu ezithelo ayeyobe eseyihlane. Amasimu noma izindawo ezaziniselwa ngenkasa zaziyobe seziyindawo engahlumi lutho noma ugwadule. (Isaya 24:1, 4; 33:9; Hezekeli 6:14) Cabanga nangezilwane zasendle ezaziyobe ziziningi. Lezi zazingahlanganisa ezidla inyama, njengamabhubesi nezingwe. (1 AmaKhosi 13:24-28; 2 AmaKhosi 17:25, 26; IsiHlabelelo seziHlabelelo 4:8) Futhi ayengeke angawanaki amabhere, anamandla okulimaza indoda, owesifazane, noma ingane. (1 Samuweli 17:34-37; 2 AmaKhosi 2:24; IzAga 17:12) Asisayiphathi nokuyiphatha eyamabululu nezinye izinyoka ezinesihlungu, noma ofezela. (Genesise 49:17; Duteronomi 32:33; Jobe 20:16; IHubo 58:4; 140:3; Luka 10:19) Ukube wawukanye namaJuda ayebuya eBabiloni ngo-537 B.C.E., cishe wawuyonqikaza ukuhambahamba endaweni enjalo. Yayingelona ipharadesi lapho efika.
9. Kungasiphi isizathu labo ababebuyile babenesisekelo sethemba nokuqiniseka?
9 Noma kunjalo, uJehova ngokwakhe wayeholele abakhulekeli bakhe ekhaya, futhi unamandla okushintsha isimo esiyincithakalo. Awukukholelwa yini ukuthi uMdali angakwenza lokho? (Jobe 42:2; Jeremiya 32:17, 21, 27, 37, 41) Ngakho yini ayezoyenzela—yini ayenzela—amaJuda ayebuya kanye nezwe lawo? Lokhu kubathinta kanjani abantu bakaNkulunkulu ezikhathini zanamuhla nesimo sakho—samanje nesesikhathi esizayo? Okokuqala, ake sibone okwenzeka emuva ngaleso sikhathi.
Ajabula Ngesimo Esishintshile
10. Yiluphi ushintsho u-Isaya 35:1, 2 alubikezela?
10 Kwakuyokwenzekani lapho uKoresi evumela amaJuda ukuba abuyele kulelo lizwe elingajabulisi? Funda isiprofetho esivusa amadlingozi ku-Isaya 35:1, 2: “Kuyakujabula ihlane nogwadule, kuthokoze uqwathule, lukhahlele njengentebe. Luyakukhahlela kahle, luthokoze, yebo, luthokoze, luhube; luyakuphiwa udumo lweLebanoni, nobukhosi beKarmeli nobeSharoni, lubone inkazimulo kaJehova, nobukhosi bukaNkulunkulu wethu.”
11. U-Isaya wasebenzisa luphi ulwazi lwezwe?
11 Ezikhathini zeBhayibheli, izindawo iLebanoni, iKarmeli, neSharoni zazaziwa ngobuhle bazo obuncwaba. (1 IziKronike 5:16; 27:29; 2 IziKronike 26:10; IsiHlabelelo seziHlabelelo 2:1; 4:15; Hoseya 14:5-7) U-Isaya wasebenzisa lezo zibonelo ukuze achaze indlela elaliyoba yiyo izwe elishintshiwe, ngosizo lukaNkulunkulu. Kodwa ingabe lokhu kwakuyothinta umhlabathi nje kuphela? Ngokuqinisekile akunjalo!
12. Kungani singase sithi isiprofetho esiku-Isaya isahluko 35 sigxile kubantu?
12 U-Isaya 35:2 ukhuluma ngezwe ngokuthi ‘liyathokoza, lithokoze, lihube.’ Siyazi ukuthi umhlabathi nezitshalo ‘kwakungathokozi’ ngokoqobo. Kodwa, ukushintshwa kwako kuvunde futhi kukhiqize kwakungabangela ukuba abantu bazizwe ngaleyo ndlela. (Levitikusi 23:37-40; Duteronomi 16:15; IHubo 126:5, 6; Isaya 16:10; Jeremiya 25:30; 48:33) Izinguquko ezingokoqobo ezweni ngokwalo zaziyohambisana nezinguquko kubantu, ngoba lesi siprofetho sigxile kubantu. Ngakho, sinesizathu sokuqonda amazwi ka-Isaya njengabhekiswe ngokuyinhloko ezinguqukweni ezazizoba kumaJuda ayebuyile, ikakhulukazi injabulo yawo.
13, 14. U-Isaya 35:3, 4 wabikezela luphi ushintsho kubantu?
13 Ngokuvumelana nalokho, ake sihlole okwengeziwe kwalesi siprofetho esishukumisayo ukuze sibone ukuthi sagcwaliseka kanjani ngemva kokukhululwa nokubuya kwamaJuda eBabiloni. Emavesini 3 no-4, u-Isaya ukhuluma ngezinye izinguquko kulabo ababebuyile: “Qinisani izandla ezibuthakathaka, nimise amadolo axegayo. Yishoni kwabanenhliziyo eyesabayo ukuthi: Qinani, ningesabi; bhekani, uNkulunkulu wenu uyeza ngokuphindisela, impindiselo ivela kuNkulunkulu; nguye oza ukunisindisa.”
14 Akuqinisi yini ukucabanga ukuthi uNkulunkulu wethu, okwazi ukushintsha isimo sendawo esiyincithakalo, unesithakazelo esingaka kubakhulekeli bakhe? Wayengafuni ukuba amaJuda athunjiwe azizwe ebuthakathaka, edumele, noma ekhathazekile ngekusasa. (Heberu 12:12) Cabanga ngesimo salabo bathunjwa abangamaJuda. Ngaphandle kwethemba ababelithola eziprofethweni zikaNkulunkulu ngekusasa labo, kwakuyoba nzima ngabo ukuba nethemba. Kwakunjengokungathi babesemgodini omnyama, bengakhululekile ukuba banyakaze nokuba bakhuthale ekukhonzeni uJehova. Kungenzeka ukuthi kubo kwakubonakala sengathi akukho ukukhanya ngaphambili.—Qhathanisa noDuteronomi 28:29; Isaya 59:10.
15, 16. (a) Yini esingaphetha ngokuthi uJehova wayenzela ababebuyile? (b) Kungani ababebuyile kungamelwe ukuba babelindele ukuphulukiswa okuyisimangaliso ngokomzimba, kodwa yini uNkulunkulu ayenza ngokuvumelana no-Isaya 35:5, 6?
15 Nokho, yeka ukuthi lokho kwashintsha kanjani lapho uJehova enza ukuba uKoresi abakhulule babuyele ekhaya! Abukho ubufakazi beBhayibheli bokuthi uNkulunkulu wavula ngokuyisimangaliso amehlo amaJuda athile ayeyizimpumputhe ayebuyela emuva, wavula izindlebe zezithulu, noma welapha izitho ezithile ezazikhubazekile noma zinqamukile. Nokho, empeleni wenza okuhle ngaphezu kwalokho. Wawabuyisela ekukhanyeni nasenkululekweni yezwe lawo alithandayo.
16 Akukho okubonisa ukuthi ababebuyile babelindele ukuba uJehova enze ukuphulukisa okungokomzimba okuyisimangaliso kanjalo. Kumelwe ukuba baqaphela ukuthi uNkulunkulu wayengenzanga kanjalo ngo-Isaka, uSamsoni, noma u-Eli. (Genesise 27:1; AbAhluleli 16:21, 26-30; 1 Samuweli 3:2-8; 4:15) Kodwa uma babelindele ukuba isimo sabo sishintshwe ngokwaphezulu ngendlela engokomfanekiso, abazange badunyazwe. Ngokuqinisekile ngomqondo ongokomfanekiso, amavesi 5 no-6 agcwaliseka ngempela. U-Isaya wabikezela ngokunembile: “Khona amehlo ezimpumputhe ayakuvulwa, zivuleke nezindlebe zezithulu. Khona unyonga luyakutshekula njengendluzele, nolimi lwesimungulu luyakuhuba.”
Ukwenza Izwe Libe NjengePharadesi
17. Ngokusobala yiluphi ushintsho olungokoqobo uJehova alwenza?
17 Labo ababebuyile ngokuqinisekile babeyoba nesizathu sokukhamuluka ngenjabulo ngenxa yezimo ezinjengalezo u-Isaya aqhubeka ezichaza: “Ngokuba ehlane kuyakubhoboka amanzi, nemifudlana kwahlongasibi. Isihlabathi esibengezelayo siyakuba-yichibi, isigagadu sibe-yimithombo yamanzi; ekhaya lamakhanka lapho ayebuthisa khona kuyakuba-khona igceke lomhlanga nekhwani.” (Isaya 35:6b, 7) Nakuba singase singaliboni kuyo yonke leyo ndawo namuhla, ubufakazi busikisela ukuthi indawo eyayiyiJuda yake yaba “ipharadesi elinesimo sasemaphandleni.”a
18. AmaJuda ayebuyile cishe asabela kanjani ezibusisweni zikaNkulunkulu?
18 Ngokuphathelene nezimbangela zokujabula, cabanga ukuthi kumelwe ukuba insali yamaJuda yazizwa kanjani lapho ibuyiselwa eZweni Lesithembiso! Yayisesimweni sokuthatha izwe elingahlumi lutho, okuhlala kulo izimpungushe nezinye izilwane ezinjalo, iliguqule. Wawungeke yini ukujabulele ukwenza umsebenzi onjalo wokubuyisela, ikakhulukazi uma wazi ukuthi uNkulunkulu uyayibusisa imizamo yakho?
19. Uhambo lokubuya ekuthunjweni eBabiloni lwalunemibandela ngamuphi umqondo?
19 Nokho, kwakungekhona ukuthi noma yimuphi umthunjwa ongumJuda eBabiloni noma bonke baphindela emuva beyohlanganyela kulokho kuguqulwa kwesimo okujabulisayo. UNkulunkulu wabeka imibandela. Akekho owayengcoliswe imikhuba engokwenkolo yobuqaba yaseBabiloni, owayevunyelwe ukubuya. (Daniyeli 5:1, 4, 22, 23; Isaya 52:11) Futhi kwakungeke kubuyele nanoma ubani owayezibophezele ngobuwula enkambweni engahlakaniphile. Bonke abanjalo banqatshelwa. Ngakolunye uhlangothi, labo ababehlangabezana nezindinganiso zikaNkulunkulu, ayebabheka njengabangcwele ngomqondo olinganiselwe, babengabuyela emuva kwaJuda. Babengahamba njengokungathi ngeNdlela yobuNgcwele. U-Isaya wakwenza kwacaca lokho evesini 8: “Kuyakuba-khona umendo nendlela eyakuthiwa iNdlela yobuNgcwele; ongcolileyo akayikuhamba ngayo, kepha iyakuba-ngeyabantu bakhe; abahamba ngayo, noma beyiziwula, abayikuduka kuyo.”
20. Yini amaJuda okwakungadingeki ayesabe njengoba ebuyela emuva, kwaba namuphi umphumela?
20 AmaJuda ayebuyela emuva kwakungadingekile esabe ukuhlaselwa abantu abanjengezilo noma amaqembu abaphangi. Ngani? Ngoba uJehova wayengeke abavumele abanjalo babe kuleyo Ndlela nabantu bakhe ababethengwe kabusha. Ngakho babengahamba bebheke phambili ngokujabula, benamathemba ajabulisayo. Phawula indlela u-Isaya akuchaza ngayo lokho lapho ephetha lesi siprofetho: “Akuyikuba-khona lapho ingonyama, nesilwane esihahayo asiyikukhuphukela khona; lokho akuyikufunyanwa khona, kepha abakhululiweyo bayakuhamba ngayo. Abahlengiweyo bakaJehova bayakubuya baye eSiyoni ngokwethaba, intokozo engunaphakade ibe-phezu kwamakhanda abo; bayakuthola ukujabula nokuthokoza, kubaleke usizi nokububula.”—Isaya 35:9, 10.
21. Thina namuhla kufanele sikubheke kanjani ukugcwaliseka kuka-Isaya isahluko 35 osekwenzekile kakade?
21 Yeka umbono ongokwesiprofetho esiwuthola lapha! Nokho, lokhu akufanele sikubheke njengokuphathelene nomlando nje odlule, njengokungathi kwakuyindaba enhle, engathintene nesimo noma ikusasa lethu. Iqiniso liwukuthi lesi siprofetho sigcwaliseka ngendlela emangalisayo namuhla phakathi kwabantu bakaNkulunkulu, ngakho, ngempela siyasithinta ngabanye. Sisinikeza isizathu esizwakalayo sokukhamuluka ngenjabulo. Lezi zici ezihilela ukuphila kwakho kwamanje nokwesikhathi esizayo kuxoxwa ngazo esihlokweni esilandelayo.
[Umbhalo waphansi]
a Ekuhloleni kwaso leyo ndawo, isazi sezokukhiqizwa kwezitshalo uWalter C. Lowdermilk (esimelele i-U.N. Food and Agriculture Organization) saphetha: “Lelizwe lake laba ipharadesi elinesimo sasemaphandleni.” Sabonisa nokuthi isimo sezulu lapho asizange sishintshe kakhulu “kusukela ezikhathini zamaRoma,” futhi “‘ugwadule’ olwathatha indawo yalelizwe elake lachuma lwabangelwa umuntu, hhayi imvelo.”
Ingabe Uyakhumbula?
◻ U-Isaya isahluko 35 wagcwaliseka nini okokuqala?
◻ Ukugcwaliseka kokuqala kwalesi siprofetho kwakuyoba namuphi umphumela?
◻ UJehova wayigcwalisa kanjani eka-Isaya 35:5, 6?
◻ Yiluphi ushintsho ezweni nasesimweni sawo amaJuda ayebuyile alujabulela?
[Isithombe ekhasini 9]
Izincithakalo zasePetra, endaweni okwake kwahlala kuyo abakwa-Edomi
[Umthombo]
Garo Nalbandian
[Izithombe ekhasini 10]
Lapho amaJuda esekuthunjweni, indawo enkulu yelakwaJuda yaba njengehlane, igcwele izilo ezinonya njengamabhere namabhubesi
[Imithombo]
Garo Nalbandian
Bear and Lion: Safari-Zoo of Ramat-Gan, Tel Aviv