“Siphonswa Phansi, Kodwa Asibhujiswa”

NJENGOBA ILANDISWA U-ULF HELGESSON

Ngo-July 1983, bengengamile, odokotela babaza: “Uphapheme!” Iqhubu elingamasentimitha angu-12 ubude lase lisusiwe emfunkulwini wami ngokuhlinzwa okuyinkimbinkimbi okwathatha amahora angu-15. Ngakhubazeka ngokuphelele.

EZINSUKWINI ezimbalwa kamuva, ngadluliselwa esibhedlela esasiqhele cishe ngamakhilomitha angu-60 ukusuka edolobheni lakithi eHälsingborg, eningizimu yeSweden. Lapho, ngaqala isimiso sokululanyiswa. Isazi sokwelapha ngokubhucunga umzimba sathi kwakuzoba nzima kakhulu, kodwa ngangimagange ukuqala. Ngangikufuna ngempela ukubuye ngizihambele. Ngokuqhubeka nesimiso sokuzivivinya amahora amahlanu ngosuku, ngathuthuka ngokushesha.

Esikhathini esingangenyanga kamuva lapho umbonisi ojikelezayo ekhonza ibandla lethu, yena nabanye abadala abangamaKristu bathatha uhambo olude bezoqhuba umhlangano wabadala bebandla egumbini lami lasesibhedlela. Yeka indlela engajabula ngayo ngalobu bufakazi bothando lobuzalwane! Abahlengikazi bakuleli wodi banikeza lonke leli qembu itiye namasemishi ngemva komhlangano.

Ekuqaleni intuthuko yami yabamangalisa odokotela. Ngemva kwezinyanga ezintathu ngakwazi ukuhlala esihlalweni sami sabakhubazekile futhi ngima nokuma isikhashana. Ngangijabula futhi ngizimisele kakhulu ukubuye ngihambe. Umkhaya wami namaKristu esinawo babengikhuthaza kakhulu phakathi nokuvakasha kwabo. Ngangikwazi nokuya ekhaya izikhathi ezimfushane.

Isithiyo Uqobo Lwaso

Nokho, ngemva kwalokho angibange ngisathuthuka ukudlula lapho. Ngokushesha isazi sokwelapha ngokubhucunga umzimba sangitshela umyalezo obuhlungu: “Ngeke usaba ngcono kunalokhu!” Umgomo manje wawuwukungiqinisa ukuze ngikwazi ukuzihambela ngesihlalo sabakhubazekile. Ngazibuza ukuthi kwakuzokwenzekani kimi. Umkami wayezomisa kanjani? Wayenze ukuhlinzwa okukhulu futhi edinga usizo lwami. Ingabe kwakuzodingeka nginakekelwe sikhathi sonke yikhaya labakhubazekile?

Ngacindezeleka kakhulu. Umfutho enganginawo, isibindi, namandla kwancipha kancane kancane. Kwadlula izinsuku, ngahlala ngingakwazi ukuhamba. Ngangingakhubazekile emzimbeni kuphela kodwa futhi ngangindikindiki ngokomzwelo nangokomoya. ‘Ngangiphonswe phansi.’ Ngaso sonke isikhathi ngangiye ngacabanga ukuthi ngiqinile ngokomoya. Nganginokholo olujulile eMbusweni kaNkulunkulu. (Daniyeli 2:44; Mathewu 6:10) Ngangiqiniseka ngesithembiso seBhayibheli sokuthi zonke izifo nokugula kuyophulukiswa ezweni elisha likaNkulunkulu lokulunga nokuthi sonke isintu siyobuyiselwa ekuphileni okuphelele lapho. (Isaya 25:8; 33:24; 2 Petru 3:13) Manje ngangizizwa ngingakhubazekile nje emzimbeni kodwa nangokomoya. Ngazizwa ‘ngibhujisiwe.’—2 Korinte 4:9.

Ngingakaqhubeki kakhulu, ake ngilandise kafushane ngesizinda sami.

Umkhaya Ojabulayo

Ngazalwa ngo-1934, futhi bengilokhu ngiphilé saka. Ngasekuqaleni kwawo-1950, ngabona u-Ingrid, futhi sashada ngo-1958 sazinza edolobheni lase-Östersund, enkabeni yeSweden. Ukuphila kwethu kwashintsha ngo-1963 lapho siqala ukufunda iBhayibheli noFakazi BakaJehova. Ngaleso sikhathi sase sinezingane ezincane ezintathu—u-Ewa, uBjörn, noLena. Ngokushesha wonke umkhaya wethu wawufunda futhi uthuthuka kahle olwazini lwamaqiniso eBhayibheli.

Ngemva nje kokuba siqale ukufunda, sathuthela eHälsingborg. Lapho, mina nomkami sazinikezela kuJehova futhi sabhapathizwa ngo-1964. Injabulo yethu yanda lapho indodakazi yethu endala, u-Ewa, ibhapathizwa ngo-1968. Eminyakeni engu-7 kamuva, ngo-1975, uBjörn noLena nabo babhapathizwa, futhi ngonyaka olandelayo ngamiswa njengomdala ebandleni lobuKristu.

Umsebenzi wami wokuziphilisa wawungenza ngizinakekele kahle izidingo zomkhaya wami ezingokwenyama. Injabulo yethu yakhula lapho uBjörn no-Lena bengenela inkonzo yesikhathi esigcwele. Ngokushesha uBjörn wamenywa ukuba akhonze ehhovisi legatsha loFakazi BakaJehova e-Arboga. Ukuphila kwakusivuma. Khona-ke, ekuqaleni kuka-1980, ngaqala ukuzwa imiphumela yeqhubu elagcina lisusiwe kulokho kuhlinzwa okukhulu ngo-1983.

Ukunqoba Ukukhubazeka Okungokomoya

Lapho ngitshelwa ukuthi ngeke ngiphinde ngikwazi ukuhamba, ukuphila kwakungathi kuwohloka nxazonke. Ngabuye ngawathola kanjani futhi amandla angokomoya? Kwaba lula kunalokho engangikucabanga. Ngamane ngathatha iBhayibheli lami ngaqala ukulifunda. Lapho ngiqhubeka ngifunda, ngaya ngithola amandla angokomoya. Ngaphezu kwakho konke ngazisa iNtshumayelo kaJesu yaseNtabeni. Ngayifunda ngiphindelela futhi ngazindla ngayo.

Umbono wami wenjabulo ekuphileni wavuseleleka. Ngokufunda nangokuzindla, ngaqala ukubona amathuba esikhundleni sezithiyo. Sabuya isifiso sami sokuhlanganyela amaqiniso eBhayibheli nabanye, futhi nganelisa lesi sifiso ngokufakaza ezisebenzini zasesibhedlela nakwabanye engangihlangana nabo. Umkhaya wami wangisekela ngokugcwele futhi waqeqeshelwa ukunginakekela. Ekugcineni ngakwazi ukuphuma esibhedlela.

Ekugcineni ngaba sekhaya. Yeka ukuthi kwaba usuku olujabulisa kanjani kithi sonke! Umkhaya wami wahlela isimiso esasihlanganisa nokunginakekela. Indodana yami, uBjörn, yanquma ukuyeka ukusebenza ehhovisi legatsha loFakazi BakaJehova, yeza ekhaya ukuze isize ngokunginakekela. Kwakududuza kakhulu ukuthandwa nokukhathalelwa kangako umkhaya wami.

Ukubhekana Nesinye Isithiyo

Nokho, njengoba isikhathi siqhubeka, impilo yami yawohloka, futhi kwaba nzima ukuba nginyakaze. Ekugcineni, naphezu kwemizamo yokuzinikela yomkhaya wami, ababange besakwazi ukunginakekela ekhaya. Ngakho ngacabanga ukuthi kungaba ngcono ngiyohlala ekhaya labakhubazekile. Kwaphinde kwasho izinguquko nenqubo entsha. Kodwa angizange ngikuvumele lokhu kube yisithiyo ngokomoya.

Angizange ngiyeke ukufunda iBhayibheli nokucwaninga. Ngaqhubeka ngicabangela engangingakwenza, hhayi engangingenakukwenza. Ngazindla ngezibusiso ezingokomoya bonke oFakazi BakaJehova abanazo. Ngahlala ngiseduze noJehova ngomthandazo futhi ngasebenzisa wonke amathuba okushumayela kwabanye.

Manje ngichitha ubusuku nezingxenye zemini ekhaya labakhubazekile. Izikhathi zantambama nakusihlwa ngizichitha ekhaya noma emihlanganweni yethu yobuKristu. Abezenhlalakahle bangihlelela into yokuya nokubuya emihlanganweni nasekhaya. Umkhaya wami ozinikele, abazalwane ebandleni, nezisebenzi zasekhaya labakhubazekile banginakekela ngendlela emangalisayo.

Ukwenza Engingakwenza

Angizibheki njengenkubela, futhi umkhaya wami nabafowethu abangamaKristu abangiphathi njengayo. Nginakekelwa ngothando, okungenza ngikwazi ukuqhubeka ngikhonza ngokuphumelelayo njengomdala. Ngiqhuba iSifundo Sencwadi Sebandla isonto ngalinye, kanye nesifundo sebandla samasonto onke se-Nqabayokulinda eHholo LoMbuso. Kunzima kimi ukuphenya iBhayibheli, ngakho kwabelwa umuntu ozongisiza ekwenzeni lokho emihlanganweni. Ngiqhuba imihlangano futhi nginikeze izinkulumo ngihlezi esihlalweni sami sabakhubazekile.

Ngakho ngisakwazi ukwenza izinto eziningi engangijabulela ukuzenza ngaphambili, kuhlanganise nokwenza ukuhambela kokwelusa. (1 Petru 5:2) Lokhu ngikwenza lapho abafowethu nodadewethu beza kimi bezofuna usizo noma iseluleko. Ngisebenzisa nocingo, ngithatha isinyathelo kuqala ngokushayela abanye ucingo. Isikhuthazo sivela nxazombili. (Roma 1:11, 12) Muva nje umzalwane othile uthe: “Lapho nje ngizizwa ngidangele, ungishayela ucingo ungenze ngiqabuleke.” Kodwa nami ngiyakhuthazeka, ngokwazi ukuthi uJehova uyayibusisa imizamo yami.

Ngaphambi nangemva kwemihlangano, ngiba nobudlelwane obuhle nezingane ebandleni. Njengoba ngihlala esihlalweni sami sabakhubazekile, sixoxa sibhekene emehlweni. Ngithanda ubuqotho bazo nokungagunci. Umfanyana othile wake wathi kimi: “Uyinkubela enhle ngendlela ekhethekile!”

Ngokugxila kulokho engingakwenza esikhundleni sokuqhatha usizi ngalokho engingenakukwenza, ngiye ngajabulela ukukhonza uJehova. Ngifundé okuningi kulokho okuye kwangehlela. Ngiqaphelé ukuthi izilingo esidlula kuzo ziyasiqeqesha futhi zisiqinise.—1 Petru 5:10.

Abantu abaningi abaphile kahle, engiye ngabaqaphela, bayehluleka ukucabanga ukuthi ngaso sonke isikhathi kumelwe sikuthathe ngokungathi sína ukukhulekelwa kukaBaba wethu osezulwini. Uma singakwenzi lokho, isimiso sethu sokutadisha, imihlangano, nenkonzo yasensimini, kungaba inqubo nje evamile. Lamalungiselelo ngiwabheka njengabalulekile ukuze sisinde ekupheleni kwaleli lizwe singene ePharadesi lasemhlabeni likaNkulunkulu elithenjisiwe.—IHubo 37:9-11, 29; 1 Johane 2:17.

Ngaso sonke isikhathi kumelwe sigcine ithemba lokuphila emhlabeni kaNkulunkulu omusha ozayo liphila ezinhliziyweni zethu. (1 Thesalonika 5:8) Ngifundé nokuba ngingayeki ukulwa nokuthambekela ekudumazekeni. Ngifundé ukubheka uJehova njengobaba, nenhlangano yakhe njengomama ongizalayo. Ngiye ngaqaphela ukuthi uma senza umzamo, uJehova angasebenzisa noma ubani kithi ukuba abe yinceku yakhe ephumelelayo.

Nakuba ngezinye izikhathi ngiye ngaba nomuzwa wokuthi ‘ngiphonswe phansi,’ ngomqondo ongokomfanekiso, angizange ‘ngibhujiswe.’ Angikaze ngilahlwe uJehova nenhlangano yakhe, noma umkhaya wami nabafowethu abangamaKristu. Ngokuthatha kwami iBhayibheli futhi ngiqale ukulifunda, ngathola amandla angokomoya. Ngiyambonga uJehova uNkulunkulu, osinika “amandla angaphezu kwavamile” lapho sithembela kuye.—2 Korinte 4:7.

Ngethemba eligcwele nangokuthembela kuJehova ngokuphelele, ngililindele ngabomvu ikusasa. Ngiyaqiniseka ukuthi maduze nje uJehova uNkulunkulu uzofeza isithembiso sakhe sepharadesi elibuyiselwe lapha emhlabeni nazo zonke izibusiso ezimangalisayo eliyoziletha.—IsAmbulo 21:3, 4.