Izinzuzo Zokwesaba UNkulunkulu Weqiniso
“NginguJehova uNkulunkulu wakho okufundisile okukusizayo, okuholile ngendlela omelwe ukuhamba ngayo.”—ISAYA 48:17.
1. Iziphi izinhlekelele ezazingagwenywa ngokwesaba kokuhlonipha uNkulunkulu?
UKUBE u-Adamu wahlakulela ukwesaba kokuhlonipha uNkulunkulu, kwakungase kumvimbele esonweni esaholela ekufeni kwakhe kwaphakade nasezinkulungwaneni zeminyaka yosizi enzalweni yakhe. Ukube isizwe sakwa-Israyeli sasendulo sasilalela iseluleko sikaJehova sokumesaba nesokumthanda, lesosizwe sasingeke sithunjelwe eBabiloni, futhi sasingeke senqabe iNdodana kaNkulunkulu futhi sibe necala lokuchitha igazi layo. Ukube izwe namuhla belimesaba uNkulunkulu, bekungeke kube nokonakala kuhulumeni noma kwezebhizinisi, bekungeke kube nobugebengu, ibingeke ibe khona impi.—IzAga 3:7.
2. Naphezu kwezimo ezweni elisizungezile, kungani kufanele sihlakulele ukwesaba uJehova?
2 Nokho, kungakhathaliseki ukuthi izwe elisizungezile lenzani, thina njengabantu ngabanye, njengemikhaya, nanjengamabandla ezinceku zikaJehova singazuza ekuhlakuleleni ukwesaba uNkulunkulu weqiniso. Lokhu kuyavumelana nesikhumbuzo uMose asinikeza isizwe sakwa-Israyeli: “UJehova uNkulunkulu wakho ufunani kuwe ngaphandle kokuba umesabe uJehova uNkulunkulu wakho, uhambe ngezindlela zakhe zonke, umthande, umkhonze uJehova uNkulunkulu wakho ngayo yonke inhliziyo yakho, nangawo wonke umphefumulo wakho, ugcine imiyalo kaJehova . . . ukuba kube-kuhle kuwe, na?” (Duteronomi 10:12, 13) Yiziphi ezinye zezinzuzo esizitholayo lapho sesaba uJehova, uNkulunkulu weqiniso?
Ukuhlakanipha—Kuyigugu Kunegolide
3. (a) Iyiphi inzuzo ephambili esingayamukela? (b) Lisho ukuthini iHubo 111:10?
3 Inzuzo ephambili ukuhlakanipha kweqiniso. IHubo 111:10 lithi: “Ukumesaba uJehova kungukuqala kokuhlakanipha.” Kusho ukuthini lokho? Ukuhlakanipha kuyikhono lokusebenzisa ulwazi ngendlela ephumelelayo ukuze kuxazululwe izinkinga, kugwenywe ingozi, futhi kufinyelelwe imigomo ethile. Kuhilela ukwahlulela okuhluzekile. Isiqalo, ingxenye yokuqala, isisekelo sokuhlakanipha okunjalo, ukwesaba uJehova. Ngani? Ngoba yonke indalo ingumsebenzi wezandla zakhe. Ixhomeke kuye. Unikeze isintu inkululeko yokuzikhethela kodwa akasinikanga ikhono lokuqondisa izinyathelo zaso ngokuphumelelayo ngaphandle kwesiqondiso sakhe. (Joshuwa 24:15; Jeremiya 10:23) Singaba nempumelelo ehlala njalo uma nje siwazisa lawomaqiniso ayisisekelo aphathelene nokuphila futhi siphila ngokuvumelana nawo. Uma ulwazi lwethu ngoJehova lusinikeza isiqinisekiso esingenakunyakaziswa sokuthi intando kaNkulunkulu iyophumelela nakanjani nokuthi isithembiso sakhe nekhono lokuvuza ukuthembeka kuqinisekile, khona-ke ukwesaba kokuhlonipha uNkulunkulu kuyosishukumisela ukuba senze ngokuhlakanipha.—IzAga 3:21-26; Heberu 11:6.
4, 5. (a) Kungani imfundo yaseyunivesithi yensizwa ethile yayishiya ingenakho ukuhlakanipha kweqiniso? (b) Lendoda nomkayo bakwazi kanjani kamuva ukuzuza ukuhlakanipha kwangempela, futhi lokhu kwakushintsha kanjani ukuphila kwabo?
4 Cabangela lesisibonelo. Emashumini eminyaka adlule, insizwa ethile yayifunda e-University of Saskatchewan, eCanada. Okwakuhlanganiswe ezifundweni zayo kwakuyisayensi yezinto eziphilayo, futhi yafundiswa ukuziphendukela kwemvelo. Ngemva kokuthola iziqu, yagxila emkhakheni we-atomic physics, ithola umfundaze wokuqhubeka nezifundo zayo e-University of Toronto. Njengoba yayifunda, yabona ubufakazi obumangalisayo bokuhleleka nomklamo endleleni ama-athomu akheke ngayo. Kodwa yayingazitholi izimpendulo kulemibuzo: Ubani owaklama konke lokhu? Nini? Futhi ngani? Ngaphandle kwalezozimpendulo, ingabe yayingalusebenzisa yini ulwazi lwayo ngokuhlakanipha ezweni ngalesosikhathi elalisempini? Yini eyayizoyiqondisa? Ubuzwe? Isifiso semivuzo yezinto ezibonakalayo? Empeleni, ingabe yayithole ukuhlakanipha kweqiniso?
5 Ngokushesha ngemva kokuthola kwayo iziqu, leyonsizwa nomkayo baqala ukufunda iBhayibheli noFakazi BakaJehova. EZwini likaNkulunkulu siqu, baqala ukuthola izimpendulo ababengazitholi ngaphambili. Baqala ukwazi uMdali, uJehova uNkulunkulu. Njengoba babefunda ngoMose oLwandle Olubomvu nangoDaniyeli nabangane bakhe eBabiloni, bafunda ukubaluleka kokungesabi abantu kodwa uNkulunkulu. (Eksodusi 14:10-31; Daniyeli 3:8-30) Ukwesaba kokuhlonipha uNkulunkulu okunjalo okuhambisana nothando lwangempela ngoJehova kwaqala ukubashukumisa. Ngokushesha yonke inkambo yokuphila kwabo yashintsha. Lensizwa ekugcineni yamazi uMuntu eyayifunde ngomsebenzi wezandla zakhe ezifundweni zesayensi yezinto eziphilayo. Yaqala ukuqonda injongo yoMuntu okuhlakanipha kwakhe yayikubonile kuboniswe ekuhloleni kwayo i-physics. Esikhundleni sokusebenzisa ulwazi lwayo ukuze iveze izinto ezazizobulala umakhelwane wayo, yona kanye nomkayo bafuna ukusiza abanye bathande uNkulunkulu nomakhelwane babo. Babhalisa enkonzweni yesikhathi esigcwele njengabamemezeli boMbuso kaNkulunkulu. Kamuva, baba khona e-Watchtower Bible School of Gilead futhi bathunywa njengezithunywa zevangeli.
6. Uma sinokuhlakanipha okusekelwe ekwesabeni uJehova, imiphi iminako eyize esiyoyigwema, futhi yini esiyoyenza esikhundleni sayo?
6 Yiqiniso, akubona bonke abangaba izithunywa zevangeli. Kodwa sonke singakujabulela ukuhlakanipha okusekelwe ekwesabeni uJehova. Uma sihlakulela lokho kuhlakanipha, ngeke sifake ezingqondweni zethu ngokulangazela amafilosofi abantu eqinisweni abaqagelayo nje kuphela ngokuphathelene nokuphila. Siyozikhandla ekutadisheni iBhayibheli, eliphefumulelwe uMthombo wokuphila, uJehova uNkulunkulu, lowo ongasinika ukuphila okuphakade. (IHubo 36:9; Kolose 2:8) Esikhundleni sokuba izigqila zesimiso sezentengiselwano ngokwaso esintengantengela onqenqemeni lokubhubha, siyolalela iseluleko sikaJehova sokwaneliswa ukudla nezambatho, kuyilapho senza ubuhlobo bethu noNkulunkulu bube yinto eza kuqala ekuphileni. (1 Thimothewu 6:8-12) Kunokuba senze njengokungathi ikusasa lethu lixhomeke ekumeni kahle ngokomnotho kulelizwe, siyokholelwa iZwi likaJehova lapho lisitshela ukuthi izwe liyadlula kanjalo nesifiso salo, kodwa lowo owenza intando kaNkulunkulu uhlala kuze kube phakade.—1 Johane 2:17.
7. (a) IzAga 16:16 zisisiza kanjani ukuba sibe nomuzwa olinganiselwe wezindinganiso? (b) Imiphi imivuzo esiyithola ngokwenza intando kaNkulunkulu ibe into eyinhloko ekuphileni kwethu?
7 IzAga 16:16 ziyasikhuthaza ngokusho lokhu ngokuyiqiniso: “Kungcono kangakanani ukuzuza ukuhlakanipha [ukuhlakanipha okuqala ngokwesaba uJehova] kunegolide; yebo, ukuzuza ukuqonda nga kukhethwa kunesiliva.” Ukuhlakanipha nokuqonda okunjalo kuyosishukumisela ekubeni senze ukwenza intando kaNkulunkulu kube into eyinhloko ekuphileni kwethu. Futhi imuphi umsebenzi uNkulunkulu awuphathise oFakazi bakhe kulenkathi emlandweni womuntu? Ukushumayela ngoMbuso wakhe nokusiza abanhliziyo ziqotho ukuba babe abafundi beqiniso bakaJesu Kristu. (Mathewu 24:14; 28:19, 20) Lona umsebenzi oletha imivuzo yokwaneliseka kweqiniso nenjabulo enkulu. Khona-ke, ngesizathu esihle iBhayibheli lithi: “[Uyajabula, NW] umuntu othola ukuhlakanipha.”—IzAga 3:13.
Isivikelo Ekwenzeni Okungalungile
8. (a) Yisho inzuzo yesibili etholakala ngokwesaba uNkulunkulu. (b) Ikuphi okubi esivikeleka kukho? (c) Ukwesaba kokuhlonipha uNkulunkulu kuba kanjani amandla amakhulu ashukumisayo?
8 Inzuzo yesibili etholakala ekwesabeni uNkulunkulu iwukuthi siyavikelwa ekwenzeni okubi. Labo abamhlonipha ngokujulile uNkulunkulu abazinqumeli ngokwabo lokho okuhle nalokho okubi. Abakubheki njengokubi lokho uNkulunkulu athi kuhle, futhi izinto uNkulunkulu athi zimbi abazibheki njengezinhle. (IHubo 37:1, 27; Isaya 5:20, 21) Ngaphezu kwalokho, umuntu oshukunyiswa ukwesaba kokuhlonipha uNkulunkulu akamane nje agcine ngokwazi lokho uJehova athi kuhle nalokho athi kubi. Lowomuntu uthanda lokho okuthandwa uJehova futhi azonde lokho okuzondwa uJehova. Ngenxa yalokho, wenza ngokuvumelana nezindinganiso zikaNkulunkulu. Ngaleyondlela, njengoba kuphawulwe kuzAga 16:6, “ngokumesaba uJehova kudedwa ebubini.” Ukwesaba kokuhlonipha uNkulunkulu okunjalo kuba amandla amakhulu ashukumisayo okufinyelela lokho umuntu angase angakwazi ukukwenza ngamandla akhe.
9. Isifiso esinamandla sokungafuni ukudumaza uNkulunkulu sasithonya kanjani isinqumo sowesifazane othile waseMexico, kwaba namuphi umphumela?
9 Ngisho noma ukwesaba kokuhlonipha uNkulunkulu kuqala ukuba khona kumuntu, kungamqinisela ukugwema ukwenza okuthile angase azisole ngakho kukho konke ukuphila kwakhe. Ngokwesibonelo, owesifazane owayekhulelwe eMexico wabuza omunye woFakazi BakaJehova ngokuphathelene nokukhipha isisu. UFakazi wafundela lona wesifazane imibhalo embalwa wayesembonisa: “KuMdali, ukuphila kubaluleke kakhulu, ngisho nokuphila kwalabo abangakazalwa.” (Eksodusi 21:22, 23; IHubo 139:13-16) Ukuhlola kwasemtholampilo kwakubonise ukuthi umntwana wakhe angase akhubazeke. Kodwa manje, eshukunyiswa yilokho ayekubone eZwini likaNkulunkulu, lona wesifazane wanquma ukuba ambelethe umntwana wakhe. Udokotela wakhe wenqaba ukuphinde abonane naye, futhi umyeni wakhe wamsongela ngokuthi uzomshiya, kodwa lona wesifazane wayeqinile. Ngokuhamba kwesikhathi, wabeletha intombazane—ekahle, ephilile, futhi enhle. Eshukunyiswa ukwazisa, wafuna oFakazi, futhi baqala ukufunda naye iZwi likaNkulunkulu. Phakathi nesikhathi esingangonyaka, yena nomyeni wakhe babhapathizwa. Emhlanganweni wesigodi eminyakeni embalwa kamuva, bajabulela ukuphinde bahlangane naloyaFakazi wokuqala futhi bamethula endodakazini yabo ethandekayo eneminyaka emine ubudala. Inhlonipho efanele ngoNkulunkulu nesifiso esinamandla sokungafuni ukumdumaza ngokuqinisekile kunethonya elinamandla ekuphileni komuntu.
10. Ukwesaba kokuhlonipha uNkulunkulu kungaqinisela abantu ekugqashuleni kuziphi izinhlobo zokwenza okungalungile?
10 Ukwesaba kokuhlonipha uNkulunkulu kuyasiqinisa ngokumelene nezinhlobo eziningi zokwenza okungalungile. (2 Korinte 7:1) Lapho kuhlakulelwa ngokufanele, kungasiza umuntu ukuba ayeke izono zangasese, ezaziwa nguye noJehova kuphela. Kungamsiza ukuba agqashule ebugqilini bokusebenzisa kabi uphuzo oludakayo noma izidakamizwa. Owayengumlutha wezidakamizwa eNingizimu Afrika wachaza: “Njengoba ngangingenisa ulwazi ngoNkulunkulu, ngahlakulela nokwesaba ukumenyelisa noma ukumdumaza. Ngangazi ukuthi uyangibona, futhi ngangilangazelela ukwamukeleka phambi kwakhe. Kwangishukumisela ekubeni ngilahle izidakamizwa enganginazo ngokuzihambisa namanzi endlini yangasese.” Ukwesaba kokuhlonipha uNkulunkulu kuye kwasiza izinkulungwane ezengeziwe ngezindlela ezifanayo.—IzAga 5:21; 15:3.
Isivikelo Ekwesabeni Abantu
11. Ukwesaba uJehova okunempilo kungasivikela kuluphi ugibe oluvamile?
11 Ukwesaba uNkulunkulu okunempilo kuyasivikela futhi ekwesabeni umuntu. Abantu abaningi bahlushwa ukwesaba umuntu ngokwesilinganiso esikhulu noma esincane. Ngisho nabaphostoli bakaJesu Kristu bamshiya futhi babaleka lapho ebanjwa amasosha ensimini yaseGetsemane. Kamuva, uPetru, egcekeni lompristi omkhulu, edidekile futhi ebanjwe ukwesaba, waphika ukuthi wayengomunye wabafundi bakaJesu nokuthi wayemazi ngisho nokumazi. (Marku 14:48-50, 66-72; Johane 18:15-27) Kodwa abaphostoli basizwa ukuba babuye basimame ngokomoya. Ngakolunye uhlangothi, ezinsukwini zeNkosi uJehoyakimi, u-Uriya indodana kaShemaya wanqotshwa kakhulu ukwesaba kangangokuba washiya inkonzo yakhe njengomprofethi kaJehova futhi wabaleka kulelozwe, kodwa wamane nje wabanjwa futhi wabulawa.—Jeremiya 26:20-23.
12. (a) IzAga 29:25 zibhekisela kusiphi isivikelo ekwesabeni umuntu? (b) Ukuthemba uNkulunkulu kuhlakulelwa kanjani?
12 Yini engasiza umuntu ukuba anqobe ukwesaba umuntu? Ngemva kokuxwayisa ngokuthi “ukwesaba abantu kubeka ugibe,” izAga 29:25 ziyenezela: “Owethemba uJehova uyalondeka.” Ukuthemba uJehova kuyisihluthulelo. Ukuthemba okunjalo kusekelwe olwazini nakokuhlangenwe nakho. Ngokutadisha iZwi lakhe, sibona ubufakazi bokulunga kwezindlela zikaJehova. Sijwayelana nezenzakalo ezibonisa ukuba kwakhe nokwethenjelwa, ukuqiniseka kwezithembiso zakhe (kuhlanganise naleso sovuko), uthando lwakhe namandla amakhulu kunawo wonke. Khona-ke lapho senza ngokuvumelana nalololwazi, senza izinto uJehova athi sizenze futhi senqaba ngokuqinile lokho asixwayisa ngakho, siqala ukuzizwela mathupha ukunakekela kwakhe kothando nokuba kwakhe nokwethenjelwa. Sizibonela ngokwethu siqu ubufakazi bokuthi amandla akhe ayasebenza ukuze afeze intando yakhe. Ukuthembela kwethu kuye, kanye nothando lwethu ngaye nesifiso sethu esiqotho sokugwema ukumdumaza, kuyakhula. Ukuthembela okunjalo kusekelwe esisekelweni esiqinile. Kusebenza njengesivikelo ekwesabeni umuntu.
13. Ukwesaba kokuhlonipha uNkulunkulu kungasisiza kanjani emsebenzini wethu wokuziphilisa, ekhaya, nasesikoleni?
13 Ukuthembela kwethu kuJehova, kanye nokwesaba kokuhlonipha uNkulunkulu, kuyosiqinisela ukwenza okulungile uma umqashi esisongela ngokulahlekelwa umsebenzi wethu ngenxa yokwenqaba ukuhlanganyela emikhubeni yokungathembeki yezamabhizinisi. (Qhathanisa noMika 6:11, 12.) Ukwesaba kokuhlonipha uNkulunkulu okunjalo kubangela ukuba izinkulungwane eziningi zamaKristu ziphikelele ekukhulekeleni kweqiniso naphezu kokushushiswa amalungu omkhaya angakholwa. Futhi kunikeza intsha esafunda isibindi sokuziveza njengoFakazi BakaJehova, futhi kuyiqinisela ukubhekana nokugconwa efunda nabo ekilasini abeya izindinganiso zeBhayibheli. Ngakho, omunye uFakazi osemusha wathi: “Abakucabangayo akubalulekile ngempela. Yilokho uJehova akucabangayo okubalulekile.”
14. Izinceku zikaJehova zikwazi kanjani ukunqoba ngisho nalapho ukuphila kwazo kusongelwa?
14 Lokho kuqiniseka okufanayo kuqinisa amaKristu eqiniso ukuba abambelele ngokuqinile ezindleleni zikaJehova ngisho nalapho ukuphila kwawo kusongelwa. Ayazi ukuthi kumelwe alindele ukushushiswa okuvela ezweni. Ayaqaphela ukuthi abaphostoli babhaxabulwa nokuthi uJesu Kristu ngokwakhe washaywa futhi wabulawa abantu ababi. (Marku 14:65; 15:15-39; IzEnzo 5:40; qhathanisa noDaniyeli 3:16-18.) Kodwa izinceku zikaJehova zinethemba eligcwele lokuthi angaziqinisa ukuba zikhuthazele; ukuthi ngosizo lukaNkulunkulu zinganqoba; ukuthi uJehova akasoze ahluleka ukuvuza labo abathembekile—uma kudingekile ngisho nangokuvuselwa ekuphileni ezweni lakhe elisha. Uthando lwazo ngoNkulunkulu kanye nokwesaba kokuhlonipha uNkulunkulu kuzishukumisela ngokunamandla ukugwema ukwenza noma yini eyomdumaza.
15. Yini eyenza oFakazi BakaJehova bakwazi ukulondoloza ubuqotho babo emakamu okuhlushwa amaNazi?
15 Lesisisusa sabangela oFakazi BakaJehova ukuba bamelane nokuphathwa ngesihluku kwasemakamu okuhlushwa amaNazi phakathi nawo-1930 nawo-1940. Balalela iseluleko sikaJesu esitholakala kuLuka 12:4, 5: “Ngithi kini, bangane bami, Ningabesabi labo ababulala umzimba futhi ngemva kwalokhu bangakwazi ukwenza lutho olungaphezu kwalokho. Kodwa ngizonibonisa ukuthi ubani okumelwe nimesabe: Yesabani lowo onegunya lokuphonsa eGehena ngemva kokubulala. Yebo, ngiyanitshela, yesabani Yena.” Ngaleyondlela, uGustav Auschner, uFakazi owayesekamu lokuhlushwa laseSachsenhausen, wabhala kamuva: ‘Ama-SS adubula u-August Dickmann futhi asongela ukusidubula sonke uma sasingalisayini iphepha elilahla ukholo lwethu. Akukho namunye kithi owasayina. Sasesaba kakhulu ukudumaza uJehova kunokwesaba izinhlamvu zabo.’ Ukwesaba umuntu kuholela ekuhlehleni, kodwa ukwesaba uNkulunkulu kwenza umuntu ame eqinile ngenxa yokulungile.
Ukulondolozwa Kokuphila
16. Yini eyenza uNowa wakwazi ukulondoloza inkambo elungile amashumi ngamashumi eminyaka kwaze kwafika uZamcolo, futhi waba yini umphumela ngaye nangendlu yakhe?
16 UNowa wasinda ezinsukwini zokugcina zezwe langaphambi kukazamcolo. UJehova wayenqume ukubhubhisa izwe elibi langalesosikhathi ngenxa yobubi bomuntu. Nokho, okwangalesosikhathi, uNowa wayekulelozwe elaligcwele ubudlova, ukuziphatha okubi kakhulu, kanye nokuzithela ngabandayo ekwenzeni intando yaphezulu. Naphezu kokushumayela ukulunga kukaNowa, “abanakanga kwaze kwafika isikhukhula, sabakhukhula bonke.” (Mathewu 24:39) Kodwa uNowa akazange achezukiswe emsebenzini uNkulunkulu ayewubeke phambi kwakhe. Wenza “njengalokho uNkulunkulu emyalile wakwenza.” (Genesise 6:22) Yini eyagcina uNowa eqhubeka unyaka nonyaka kwaze kwafika uZamcolo? AmaHeberu 11:7 ayaphendula: “Ngokholo uNowa, ngemva kokunikwa isixwayiso saphezulu sezinto ezingakabonwa, wabonisa ukwesaba kokuhlonipha uNkulunkulu.” Ngenxa yalokho, yena nomkakhe namadodana akhe nawomkawo balondolozwa kuZamcolo.
17. (a) Kungakhathaliseki ukuthi abanye abantu benzani, yini okufanele siyenze? (b) Kungani labo abesaba uJehova bengabantu abajabula ngempela?
17 Siphila enkathini efana ngezindlela eziningi neyosuku lukaNowa. (Luka 17:26, 27) Isixwayiso siyanikezwa futhi. IsAmbulo 14:6, 7 sisitshela ngengelosi endiza emkhathini enxusa abantu bazo zonke izizwe nezizwana nezilimi ukuba ‘besabe uNkulunkulu bamnike inkazimulo.’ Kungakhathaliseki ukuthi izwe elikuzungezile lenzani, lalela lawomazwi, bese udlulisela isimemo kwabanye. NjengoNowa, yenza ngokholo futhi ubonise ukwesaba kokuhlonipha uNkulunkulu. Ukwenza kwakho kanjalo kungaholela ekulondolozweni kokuphila kwakho nokuphila kwabanye abaningi. Njengoba sicabanga ngezinzuzo ezijatshulelwa yilabo abesaba uNkulunkulu weqiniso, singavumelana nakanjani nomhubi ophefumlelwe owahlabelela: “[Uyajabula, NW] umuntu omesaba uJehova, othokoza kakhulu ngemithetho yakhe.”—IHubo 112:1.
Ubungaphendula Kanjani?
◻ Ziyini izinzuzo ezivelele ezitholakala ngokwesaba uNkulunkulu weqiniso?
◻ Kungasivikela kanjani ukuhlakanipha okusekelwe ekwesabeni kokuhlonipha uNkulunkulu?
◻ Kungani ukwesaba kokuhlonipha uNkulunkulu kusenza sibalekele okubi?
◻ Ukwesaba kokuhlonipha uNkulunkulu kusivikela kanjani ekwesabeni umuntu?
◻ Ukwesaba kokuhlonipha uNkulunkulu kuhlobene kanjani namathemba ethu okuphila kwesikhathi esizayo?
[Izithombe ekhasini 16, 17]
“[Uyajabula, NW] umuntu omesaba uJehova, othokoza kakhulu ngemithetho yakhe.”—IHubo 112:1