Imibuzo Evela Kubafundi
Ingabe bekungaba okufanelekile ukwamukela ukugonywa noma umjovo othile wezempilo one-“albumin” ethathwe egazini lomunye umuntu?
Uma silimisa ngesihloko, umKristu ngamunye kumelwe azinqumele yena siqu kulokhu.
Izinceku zikaNkulunkulu ngokufanelekile zifuna ukulalela isiqondiso esitholakala kuzEnzo 15:28, 29, sokuyeka igazi. Ngokufanelekile, amaKristu awanakuyidla inyama engakhishwanga igazi noma imikhiqizo enjengamasoseji egazi. Kodwa umthetho kaNkulunkulu usebenza nakwezokwelapha. OFakazi BakaJehova baphatha ikhadi elishoyo ukuthi bayakwenqaba ‘ukumpontshelwa igazi, igazi elingahlungiwe, amangqamuzana abomvu egazi, amangqamuzana amhlophe egazi, izinhlayiya zegazi, noma i-blood plasma.’ Nokho, kuthiwani ngemijovo ye-serum enesilinganiso esincane samaprotheni egazi?
Sekuyisikhathi eside oFakazi beqaphela ukuthi lena indaba yesinqumo sangasese ngokuvumelana nonembeza womuntu ngamunye oqeqeshwe ngeBhayibheli. Lokhu kwavezwa esihlokweni esithi “Imibuzo Evela Kubafundi” se-Nqabayokulinda ka-June 1, 1990, eyakhuluma ngemijovo ye-serum okungenzeka udokotela ayituse uma umuntu evulekele ezifweni ezithile. Izakhi ezisebenzayo zemijovo enjalo aziyona i-blood plasma ngokwazo kodwa zingamasosha omzimba avela kuyi-blood plasma yalabo abaye bakwazi ukumelana nalesisifo. Amanye amaKristu anomuzwa wokuthi angayamukela imijovo enjalo ngonembeza omuhle aye aphawula ukuthi amasosha omzimba avela egazini lowesifazane okhulelwe adlulela egazini lomntwana osesizalweni sakhe. “Imibuzo Evela Kubafundi” yakuphawula lokhu, kanye neqiniso lokuthi i-albumin ethile idlula isuka kowesifazane okhulelwe iye kumntanakhe.
Abaningi baye bakuthola kuyingqayizivele lokhu, njengoba okunye ukugoma okungenziwanga ngegazi kungase kube nesilinganiso esincane ngokuqhathaniswa se-albumin etholakala kuyi-plasma eyasetshenziswa noma yanezelwa ukuze kugcinwe izithako zilinganiselwe kulenhlanganisela. Okwamanje kusetshenziswa futhi isilinganiso esincane ngokuqhathaniswa se-albumin emijovweni ye-hormone mbumbulu ye-EPO (erythropoietin). Abanye oFakazi baye bamukela imijovo ye-EPO ngenxa yokuthi ingasheshisa ukukhiqizwa kwamangqamuzana abomvu egazi futhi ingakhulula udokotela ekubeni nomuzwa wokuthi ukumpontshelwa igazi kungase kudingeke.
Ezinye izinhlanganisela zezokwelapha ezihlanganisa isilinganiso esincane ngokuqhathaniswa se-albumin zingase zisetshenziswe esikhathini esizayo, njengoba izinkampane zamakhemisi ziveza imikhiqizo emisha noma zishintsha izindlela zokwenziwa kwemikhiqizo ekhona kakade. Khona-ke, amaKristu angase afune ukucabangela ukuthi ukugoma, noma omunye umjovo udokotela awutusayo unayo yini i-albumin. Uma engabaza noma enesizathu sokukholelwa ukuthi i-albumin iyinhlanganisela, angabuza udokotela wawo.
Njengoba kuphawuliwe, oFakazi abaningi abazange bakwenqabe ukwamukela umjovo onesilinganiso esincane se-albumin. Nakuba kunjalo, noma ubani ofuna ukufunda okwengeziwe ngalendaba ngaphambi kokwenza isinqumo somuntu siqu kufanele abukeze ukwaziswa okunikezwe esihlokweni esithi “Imibuzo Evela Kubafundi” esiku-Nqabayokulinda ka-June 1, 1990.