Isipho SikaJehova Somoya Ongcwele

“Kakhulu kangakanani uYihlo osezulwini uzakubapha abacela kuye uMoya oNgcwele.”—LUKA 11:13.

1, 2. (a) Yisiphi isithembiso uJesu asenza ngokuphathelene nomoya ongcwele, futhi kungani lokhu kududuza ngempela? (b) Uyini umoya ongcwele?

EKWINDLA yonyaka ka-32 C.E. lapho uJesu eshumayela izindaba ezinhle eJudiya, wakhuluma nabafundi bakhe ngokupha kukaJehova. Wasebenzisa imifanekiso ethile enamandla wabe esenza isithembiso esimangalisayo, ethi: “Uma nina eningababi nikwazi ukubapha abantwana benu izipho ezinhle, kakhulu kangakanani uYihlo osezulwini uzakubapha abacela kuye uMoya oNgcwele.”—Luka 11:13.

² Yeka indlela lawomazwi aduduza ngayo! Njengoba sikhuthazelela isiyaluyalu sezinsuku zokugcina zalelizwe, sibhekana nobutha bukaSathane namademoni akhe, futhi silwa nokuthambekela kwethu siqu okunesono, kuyajabulisa ngempela ukwazi ukuthi uNkulunkulu uyosiqinisa ngomoya wakhe. Ngempela, ukukhuthazela ngokwethembeka akunakwenzeka ngaphandle kwalokho kusekelwa. Ingabe uke wawezwa amandla alomoya, ongamandla ayisiphekupheku akhe uNkulunkulu ngokwakhe? Ingabe uyazi ukuthi ungakusiza kangakanani? Ingabe uwusebenzisa ngokugcwele?

Amandla Omoya Ongcwele

3, 4. Bonisa amandla omoya ongcwele.

³ Okokuqala cabangela amandla omoya ongcwele. Cabanga uhlehlele emuva onyakeni ka-1954. Kwakungesikhathi ibhomu lehydrogen liqhunyiselwa phezu kweBikini Atoll eNingizimu Pacific. Ngesikhashana nje ngemva kokuqhuma kwebhomu, lesosiqhingi esihle sambozwa yilangabi elikhulu lomlilo futhi sonakaliswa ukuqhuma okunamandla alingana nokuqhuma kweTNT engamathani ayizigidi ezingu-15. Ayevelaphi wonke lawomandla abhubhisayo? Kwakuwumphumela wokwenza amandla ngengxenye encane nje yeuranium nehydrogen eyakha umnyombo webhomu. Nokho, kuthiwani uma ososayensi bebengenza okuphambene nalokho abakwenza eBikini? Ake sithi bebengaqoqa wonke lawomandla awumlilo bese bewashintsha abe amakhilogremu ambalwa euranium nehydrogen. Yeka ukuthi lokho bekuyoba impumelelo engakanani! Nokho, uJehova wenza okuthile okufana nalokho kodwa ngesilinganiso esikhulu kakhulu lapho “ekuqaleni [edala] izulu nomhlaba.”—Genesise 1:1.

⁴ UJehova unamandla amakhulu angapheli. (Isaya 40:26) Lapho edala, kumelwe ukuba wasebenzisa amanye alamandla lapho ebumba zonke izinto ezakha indawo yonke. Yini ayisebenzisa kulomsebenzi wokudala? Umoya ongcwele. Siyafunda: “Ngezwi likaJehova izulu lenziwa, namabandla onke ngomoya womlomo wakhe.” (IHubo 33:6) Futhi ukulandisa ngendalo kukaGenesise kufundeka kanje: “UMoya [ongcwele] kaNkulunkulu wehla-wenyuka phezu kwamanzi.” (Genesise 1:2) Yeka ukuthi umoya ongcwele ungamandla amakhulu kangakanani!

Imisebenzi Eyisimangaliso

5. Yiziphi izindlela eziphakeme umoya ongcwele osebenza ngazo?

⁵ Umoya ongcwele usasebenza ngezindlela eziphakeme kakhulu. Uhola futhi uqondise inhlangano kaJehova yasezulwini. (Hezekeli 1:20, 21) Njengamandla akhishwa yibhomu lehydrogen, ungasetshenziswa ngendlela ebhubhisayo ekukhipheni isahlulelo ezitheni zikaJehova, kodwa futhi uye wasebenza nangezinye izindlela ezisimangalisayo.—Isaya 11:15; 30:27, 28; 40:7, 8; 2 Thesalonika 2:8.

6. Umoya ongcwele wamsekela kanjani uMose nabantwana bakwaIsrayeli ekusebenzelaneni kwabo neGibithe?

⁶ Ngokwesibonelo, cishe ngo-1513 B.C.E., uJehova wathumela uMose ukuba aye kuFaro waseGibithe amtshele ukuba akhulule abantwana bakwaIsrayeli. Eminyakeni engu-40 ngaphambili, uMose wayekade engumalusi kwaMidiyani, ngakho kungani uFaro kwakufanele alalele umalusi? Ngoba uMose wayeza ngegama lowukuphela kukaNkulunkulu weqiniso, uJehova. Ukuze afakazele lokhu, uJehova wamnika amandla okwenza izimangaliso. Lezimangaliso zazishukumisa kangangokuba ngisho nabapristi baseGibithe baphoqeleka ukuba bavume: “Lokhu kungumunwe kaNkulunkulu.”a (Eksodusi 8:19) UJehova waletha izinhlupho eziyishumi eGibithe, okwathi eyokugcina yazo yaphoqelela uFaro ukuba avumele abantu bakaNkulunkulu ukuba bahambe eGibithe. Lapho uFaro nebutho lakhe ngenkani ewaxosha, amaIsrayeli aphunyuka lapho kuvulwa indlela ngokuyisimangaliso oLwandle Olubomvu. Ibutho laseGibithe lawalandela futhi laminza olwandle.—Isaya 63:11-14; Hagayi 2:4, 5.

7. (a) Kwakuyiziphi ezinye izizathu zokuba umoya ongcwele wenze izimangaliso? (b) Nakuba izimangaliso ezibangelwa umoya ongcwele zingasenzeki, kungani umlando wazo oseBhayibhelini ududuza?

⁷ Yebo, uJehova ngomoya wakhe wenzela amaIsrayeli izimangaliso ezinamandla ngesikhathi sikaMose, nangezinye izikhathi. Yayiyini inhloso yalezozimangaliso? Zaqhubekisela phambili izinjongo zikaJehova, zabangela ukuba igama lakhe laziwe, futhi zabonisa amandla akhe. Futhi ngezinye izikhathi, njengoba kwakunjalo ngoMose, zazifakazela ngokuwujuqu ukuthi lowomuntu usekelwa uJehova. (Eksodusi 4:1-9; 9:14-16) Nokho, izimangaliso ezibangelwa umoya ongcwele beziyivela-kancane kuwo wonke umlando.b Ngokunokwenzeka, abantu abaningi ababephila ezikhathini zeBhayibheli abazange bazibone, futhi namuhla azisenzeki. Nokho, njengoba namuhla silwa nezinkinga ezingase zibonakale zingenakunqobeka, akududuzi yini ukwazi ukuthi uma sicela kuJehova ngokholo, uyosinikeza umoya ofanayo owasekela uMose phambi kukaFaro futhi wavulela amaIsrayeli indlela oLwandle Olubomvu?—Mathewu 17:20.

Imibhalo Ephefumlelwe

8. Yayiyini indima yomoya ongcwele ekunikezweni kweMiyalo Eyishumi?

⁸ Ngemva kokukhululwa kwawo eGibithe, uMose waholela amaIsrayeli eNtabeni iSinayi, lapho uJehova enza khona isivumelwano kanye nawo futhi wawanikeza uMthetho wakhe. Ingxenye eyinhloko yalowoMthetho owanikezwa ngoMose kwakuyiMiyalo Eyishumi, futhi amakhophi ayo okuqala ayeqoshwe ezibhebheni zamatshe. Kanjani? Ngomoya ongcwele. IBhayibheli lithi: “[UJehova] eseqedile ukukhuluma noMose entabeni yaseSinayi wamnika izibhebhe zombili zobufakazi, izibhebhe zamatshe, zilotshiwe ngomunwe kaNkulunkulu.”—Eksodusi 31:18; 34:1.

9, 10. Umoya ongcwele wawusebenza kanjani ekulotshweni kwemiBhalo YesiHeberu, futhi lokhu kubonakala kanjani ezinkulumweni ezasetshenziswa abafundi bakaJesu?

⁹ Ngaphezu kweMiyalo Eyishumi, uJehova ngomoya wakhe wanikeza amaIsrayeli amakhulukhulu emithetho nezimiso ukuze ziqondise ukuphila kwamadoda nabesifazane abathembekile. Futhi kwakusazolandela okwengeziwe. Emakhulwini eminyaka ngemva kosuku lukaMose, amaLevi akufakazela lokhu emthandazweni wasobala oya kuJehova: “Iminyaka eminingi wababekezelela [amaIsrayeli], wabaxwayisa ngoMoya wakho ngesandla sabaprofethi bakho.” (Nehemiya 9:5, 30) Iziprofetho eziningi eziphefumlelwe ezashiwo yilabobaprofethi zalotshwa. Ngaphezu kwalokho, umoya ongcwele washukumisela amadoda athembekile ekubeni alobe imilando engcwele nezingoma ezisuka enhliziyweni zokudumisa.

¹⁰ UPawulu wayekhuluma ngayo yonke lemibhalo lapho ethi: “Yonke imibhalo iphefumulelwe nguNkulunkulu.” (2 Thimothewu 3:16; 2 Samuweli 23:2; 2 Petru 1:20, 21) Ngempela, lapho becaphuna lemibhalo, abafundi bakaJesu bekhulu lokuqala leminyaka babevame ukusebenzisa izinkulumo ezinjengokuthi ‘umoya ongcwele wakhuluma ngomlomo kaDavide,’ “wakhuluma kahle uMoya oNgcwele ngoIsaya,” noma ukuthi nje ‘umoya ongcwele uthi.’ (IzEnzo 1:16; 4:25; 28:25, 26; Heberu 3:7) Yeka isibusiso okuyiso ukuthi wona lomoya ongcwele owathonya ukubhalwa kwemiBhalo Engcwele uye wayilondoloza ukuze ikwazi ukusiqondisa futhi isiduduze namuhla!—1 Petru 1:25.

Ukuthembela Emoyeni Ongcwele

11. Yikuphi ukusebenza komoya okwabonakala ngokuphathelene nokwakhiwa kwetabernakele?

¹¹ Lapho amaIsrayeli ekanise phansi kweNtaba iSinayi, uJehova wawayala ukuba akhe itabernakele njengesikhungo sokukhulekela kweqiniso. Ayeyokwenza kanjani lokhu? “UMose wathi kubantwana bakwaIsrayeli: Bhekani, uJehova ubizé ngegama uBesaleli indodana kaUri kaHure, owesizwe sakwaJuda; umgcwalisile ngoMoya kaNkulunkulu, ngokuhlakanipha nangokuqonda nangokwazi nangamandla emisebenzini yonke.” (Eksodusi 35:30, 31) Umoya ongcwele wathuthukisa noma yiliphi ikhono elingokwemvelo uBesaleli ayenalo, futhi wayengakuqondisa ngokuphumelelayo ukwakhiwa kwalesosakhiwo esiphawulekayo.

12. Umoya wabaqinisa kanjani abantu ngezindlela ezingavamile ngemva kwesikhathi sikaMose?

¹² Esikhathini esithile kamuva, umoya kaJehova wasebenzisa uSamsoni, umnikeza amandla angaphezu kwawomuntu ukuba akwazi ukukhulula uIsrayeli kumaFilisti. (AbAhluleli 14:5-7, 9; 15:14-16; 16:28-30) Futhi kamuva, uSolomoni wanikezwa ukuhlakanipha okukhethekile njengenkosi yabantu bakaNkulunkulu abakhethiwe. (2 IziKronike 1:12, 13) Ngaphansi kwakhe, uIsrayeli wachuma kunanini ngaphambili, futhi isimo sakhe senjabulo saba umfuziselo wezibusiso ezizojatshulelwa abantu bakaNkulunkulu ngaphansi kokuBusa Kweminyaka Eyinkulungwane kukaKristu Jesu, uSolomoni Omkhulu.—1 AmaKhosi 4:20, 25, 29-34; Isaya 2:3, 4; 11:1, 2; Mathewu 12:42.

13. Umlando wokuba umoya uqinise uBesaleli, uSamsoni, noSolomoni usikhuthaza kanjani namuhla?

¹³ Yeka isibusiso okuyiso ukuthi uJehova wenza ukuba nathi sikwazi ukuwuthola wona lomoya! Lapho sizizwa singafaneleki ukuba sifeze isabelo esithile noma ukuhlanganyela emsebenzini wokushumayela, singacela ukuba uJehova asinikeze umoya ofanayo nalowo awunikeza uBesaleli. Lapho sihlushwa ukugula noma sikhuthazelela ushushiso, umoya ofanayo owanika uSamsoni amandla angavamile uyosiqinisa—nokho, nakuba kungeke kube ngokuyisimangaliso. Futhi lapho sibhekana nezinkinga ezinzima noma kudingeka senze izinqumo ezibalulekile, singacela uJehova, owanikeza uSolomoni ukuhlakanipha okungavamile, ukuba asisize senze izinto ngokuhlakanipha. Khona-ke, njengoPawulu, siyothi: “Nginamandla ukwenza konke ngaye ongiqinisayo.” (Filipi 4:13) Futhi isithembiso sikaJakobe siyosebenza kithina: “Uma-ke kukhona kini oswela ukuhlakanipha, makacele kuNkulunkulu obapha bonke ngobuhle engajakadi, khona uyakuphiwa.”—Jakobe 1:5.

14. Ezikhathini zasendulo nanamuhla, obani abaye basekelwa umoya ongcwele?

¹⁴ Umoya kaJehova futhi wawuphezu kukaMose emsebenzini wakhe wokwahlulela isizwe. Lapho abanye bemiswa ukuba basize uMose, uJehova wathi: “[Ngiyothatha] okomoya ophezu kwakho, ngikubeke kuwo; ayakuthwala umthwalo wabantu kanye nawe, ukuze ungawuthwali wedwa.” (Numeri 11:17) Ngakho, lawomadoda akudingekanga ukuba asebenze ngamandla awo siqu. Umoya ongcwele wawasekela. Sifunda ukuthi kamuva umoya kaJehova waba phezu kwabanye abantu futhi. (AbAhluleli 3:10, 11; 11:29) Lapho uSamuweli egcoba uDavide njengenkosi kaIsrayeli yesikhathi esizayo, umbhalo uthi: “USamuweli wayesethatha uphondo lwamafutha, wamgcoba phakathi kwabafowabo; uMoya kaJehova wehlela phezu kukaDavide ngamandla, kusukela kulolosuku kuya phambili.” (1 Samuweli 16:13) Labo namuhla abanemithwalo yemfanelo ebalulekile—eyomkhaya, eyebandla, noma eyenhlangano—bangaduduzeka ngokwazi ukuthi umoya kaNkulunkulu usazisekela izinceku zakhe njengoba zinakekela izibopho zazo.

15. Iyiphi indlela umoya ongcwele oye waqinisa ngayo inhlangano kaJehova (a) ezinsukwini zikaHagayi noZakariya? (b) namuhla?

¹⁵ Iminyaka engaba inkulungwane ngemva kosuku lukaMose, abathembekile phakathi kwabantwana bakwaIsrayeli babuyela eJerusalema bevela eBabiloni benokuthunywa kokwakha kabusha ithempeli. (Ezra 1:1-4; Jeremiya 25:12; 29:14) Nokho, kwaphakama izithiyo ezinzima futhi badumala iminyaka eminingi. Ekugcineni, uJehova wavusa abaprofethi uHagayi noZakariya ukuba bakhuthaze amaJuda ukuba angathembeli emandleni awo siqu. Kodwa lomsebenzi wawuyofezwa kanjani? “Kungabi-ngempi, kungabi-ngamandla, kepha kube-ngomoya wami kuphela, usho uJehova-Sebawoti.” (Zakariya 4:6) Futhi njengoba umoya kaNkulunkulu wawubasekela, ithempeli lakhiwa. Abantu bakaNkulunkulu namuhla ngendlela efanayo baye bafeza okuningi. Ukushunyayelwa kwezindaba ezinhle kuye kwanda emhlabeni wonke. Izigidi zabantu zifundiswa iqiniso nokulunga. Kuhlelwa imihlangano. Kwakhiwa amaHholo oMbuso namahhovisi egatsha. Okuningi kwalokhu kuye kwenziwa naphezu kokuphikisa okunzima. Kodwa oFakazi BakaJehova abazange badumale, bayazi ukuthi konke abakufezile, abakufezanga ngempi, nangamandla omuntu, kodwa ngomoya kaNkulunkulu.

Umoya KaNkulunkulu Ekhulwini Lokuqala Leminyaka

16. Izinceku zikaJehova zangaphambi kobuKristu zinakuphi okuhlangenwe nakho ngokusebenza komoya kaNkulunkulu?

¹⁶ Njengoba sesibonile, izinceku zikaNkulunkulu zangaphambi kobuKristu zaziwazi kahle amandla omoya kaNkulunkulu. Zazithembela kuwo ukuba azisize zifeze izibopho ezisindayo futhi zifeze intando kaNkulunkulu. Zazazi futhi ukuthi uMthetho neminye imibhalo engcwele kwakuphefumlelwe, kulotshwe ngethonya lomoya kaJehova, futhi kanjalo ‘kwakuyiZwi likaNkulunkulu.’ (IHubo 119:105) Nokho, kuthiwani ngenkathi yobuKristu?

17, 18. Yikuphi okunye ukubonakaliswa okuyisimangaliso komoya enkathini yobuKristu, futhi lokhu kwafeza yiphi injongo?

¹⁷ Ikhulu lokuqala leminyaka leSikhathi sethu Esivamile nalo laba nemisebenzi emangalisayo yomoya kaNkulunkulu. Kwakunokuprofetha okuphefumlelwe ngomoya. (1 Korinte 14:1, 3) Ekugcwalisekeni kwesithembiso sikaJesu sokuthi umoya ongcwele wawuyokhumbuza abafundi bakhe konke ayekushilo futhi wawuyobafundisa izici ezengeziwe zeqiniso, izincwadi eziningi zalotshwa ngethonya lomoya ongcwele. (Johane 14:26; 15:26, 27; 16:12, 13) Futhi kwakukhona izimangaliso, njengoba kuzoxoxwa ngazo kakhudlwana esihlokweni sethu esilandelayo. Ngempela, ikhulu lokuqala leminyaka laqalisa ngesimangaliso esiphawulekayo. Cishe ngonyaka ka-2 B.C.E., kwakufanele kuzalwe umntwana okhethekile, futhi njengesibonakaliso, unina osemusha kwakufanele abe incasakazi. Kwakungenzeka kanjani lokho? Ngomoya ongcwele. Umbhalo uthi: “Ukuzalwa kukaJesu Kristu kwaba-nje: unina uMariya esemiselwe uJosefa, bengakahlangani wafunyanwa ekhulelwe ngoMoya oNgcwele.”—Mathewu 1:18; Luka 1:35, 36.

¹⁸ Lapho uJesu esekhulile, wakhipha amademoni, waphilisa abagulayo, wavusa ngisho nabafile ngamandla omoya ongcwele. Abanye babalandeli bakhe nabo benza izimangaliso nemisebenzi yamandla. Lamakhono akhethekile ayeyizipho zomoya. Yayiyini injongo yawo? Njengoba nje kwakunjalo ngezimangaliso zangaphambili, ayethuthukisa izinjongo zikaNkulunkulu futhi embula amandla akhe. Ngaphezu kwalokho, ayebonisa ukuba yiqiniso kokusho kukaJesu ukuthi wayethunywe uNkulunkulu; futhi kamuva, afakazela ukuthi ibandla lamaKristu lekhulu lokuqala leminyaka laliyisizwe sikaNkulunkulu esikhethiwe.—Mathewu 11:2-6; Johane 16:8; IzEnzo 2:22; 1 Korinte 12:4-11; Heberu 2:4; 1 Petru 2:9.

19. Ukholo lwethu luqiniswa kanjani ukulandisa kweBhayibheli ngezimangaliso zikaJesu nabaphostoli bakhe?

¹⁹ Nokho, umphostoli uPawulu wathi ukubonakaliswa okunjalo okuyisimangaliso komoya kwakungenxa yokuthi ibandla lalisafufusa futhi kwakuzodlula, ngakho thina namuhla asiziboni izimangaliso ezinjalo ezibangelwa umoya ongcwele. (1 Korinte 13:8-11) Noma kunjalo, izimangaliso ezenziwa uJesu nabaphostoli bakhe azigcini ngokuba ezithakazelisayo ngokomlando. Ziqinisa ukholo lwethu esithembisweni sikaNkulunkulu sokuthi ukugula nokufa ngeke kube nandawo ngaphansi kokubusa kukaJesu ezweni elisha.—Isaya 25:6-8; 33:24; 65:20-24.

Zuza Emoyeni Ongcwele KaNkulunkulu

20, 21. Singazenza kanjani sitholakalele ilungiselelo lomoya ongcwele?

²⁰ Yeka ukuthi lomoya ungamandla amakhulu kangakanani! Kodwa amaKristu namuhla angazenza kanjani ukuba awutholakalele? Okokuqala, uJesu wathi kufanele siwucele, ngakho kungani ungenzi lokho kanye? Thandaza kuJehova ukuba akunikeze lesipho esimangalisayo hhayi nje kuphela ngezikhathi zokucindezeleka kodwa ngaso sonke isikhathi. Ngaphezu kwalokho, funda iBhayibheli ukuze umoya ongcwele ukwazi ukukhuluma nawe. (Qhathanisa namaHeberu 3:7) Zindla ngalokho okufundayo futhi ukusebenzise ukuze umoya ongcwele ukwazi ukuthonya ukuphila kwakho. (IHubo 1:1-3) Futhi, yiba nobudlelwano—ngokomuntu siqu, emabandleni, nasemihlanganweni—nabanye abathembela emoyeni kaNkulunkulu. Yeka indlela umoya ongcwele obaqinisa ngayo ngokucebile labo abadumisa uNkulunkulu wabo “emihlanganweni”!—IHubo 68:26.

²¹ UJehova akayena yini uNkulunkulu ophayo? Uthi kumelwe nje sicele umoya ongcwele futhi uyosinikeza wona. Yeka indlela okuwubuwula ngayo ukuthembela ekuhlakanipheni kwethu siqu namandla kuyilapho singaluthola usizo olunjalo olunamandla! Nokho, kunokunye okuphathelene nomoya kaNkulunkulu okusithintayo njengamaKristu, futhi lokhu kuzoxoxwa ngakho esihlokweni esilandelayo.

[Imibhalo yaphansi]

Ungayiphendula Yini Imibuzo Elandelayo?

◻ UJehova wazidala kanjani zonke izinto endaweni yonke?

◻ Yiziphi ezinye izindlela umoya ongcwele owasebenza ngazo ezikhathini zangaphambi kobuKristu?

◻ Kusiduduza kanjani namuhla ukwazi lokho umoya ongcwele owakufeza ezikhathini zasendulo?

◻ Singazenza kanjani sitholakalele ilungiselelo lomoya ongcwele?

[Isithombe ekhasini 10]

Umoya owanikeza uSamsoni amandla angaphezu kwawomuntu ungasinikeza amandla okwenza konke