Ukuba Matasa Kakhulu Ngezindaba Ezinhle
UMPHOSTOLI uPawulu wayesebunzimeni oFakazi BakaJehova abayizikhonzi zesikhathi esigcwele ababaziyo—wayengenamali. Ngakho eKorinte wenza umsebenzi ophansi wokuthunga amatende ayewufunde lapho esemusha. Lomsebenzi wawunzima, futhi ngezinye izikhathi kungenzeka ukuthi izandla zakhe zazopha ngenxa yokubamba indwangu yamatende elukhuni. Imali ayeyithola lapho yayicishe ingakwaneli kahle ukudla nezambatho, kodwa wayeneliseka, ngoba lapho umsebenzi wakhe wokuziphilisa usuphelile usuku ngalunye, wayebeka phansi amathuluzi omsebenzi wakhe abese enza lokho ayekuzele eKorinte kwasekuqaleni—washumayela izindaba ezinhle!—Filipi 4:11, 12.
Lapho kufika iSabatha, uPawulu wayeqonda esinagogeni. Yiqiniso, uPawulu ekuqaleni wakhuluma nezilaleli zakhe zaseKorinte “ngobuthakathaka nangokwesaba, nangokuthuthumela okukhulu.” (1 Korinte 2:1, 3) Kodwa ekhuthazwe ukusabela kwabathile esigijimini sakhe, uPawulu waqhubeka “washumayela esinagogeni ngamasabatha onke, wazuza abaJuda namaGreki.”—IzEnzo 18:1-4.
Nokho, okwesikhashana uPawulu wayengenakwenza okungaphezu kokushumayela ingxenye yesikhathi nje kuphela. Khona-ke kwafika uSila noThimothewu bevela eMakedoniya nomnikelo wesihle ‘owakuqeda ukuswela kwakhe.’ (2 Korinte 11:9; Filipi 4:15) Okwamkhuthaza, futhi, kwakuyizindaba zokuthi abazalwane baseThesalonika babemi beqinile naphezu kokushushiswa.—1 Thesalonika 3:6.
Waba yini umphumela kuPawulu? “UPawulu waqala ukuba matasa kakhulu ngezwi [“wanikela sonke isikhathi sakhe ekushumayeleni,” The Jerusalem Bible; Today’s English Version], efakaza kumaJuda ukuze abonise ukuthi uJesu unguKristu.” (IzEnzo 18:5, NW) Esakhululekile ekucindezelekeni ngokwezimali okwesikhashana, uPawulu wayengakwazi ukuphumula kwaze kwaba yilapho ebuyela emsebenzini wokushumayela isikhathi esigcwele. Wabuyela kulomsebenzi ngentshiseko, engashumayeli kumaJuda kuphela kodwa ezinika ngisho nesikhathi sokuloba eyokuqala yezincwadi zakhe eziphefumlelwe—incwadi eya kwabaseThesalonika.
Isibonelo Sethu Namuhla
Umbhalo womsebenzi omkhulu kaPawulu eKorinte uye walondolozelwa ukuze ukhuthaze wonke amaKristu amatasa kakhulu ngezindaba ezinhle. UPawulu waqaphela ukuthi iNkosi uJesu ngokwayo yayidlulisele udumo olukhulu kubafundi bayo lokuba “ukukhanya kwezwe.” Kwakungamelwe bakufihle lokhu kukhanya. UJesu wabatshela: “Makukhanye ukukhanya kwenu phambi kwabantu ukuba babone imisebenzi yenu emihle, badumise uYihlo osezulwini.” (Mathewu 5:14-16) Lokhu kwasho ukuhlanganyela ngokugcwele emsebenzini wokushumayela owabikezelwa uJesu. (Mathewu 24:14; 28:19, 20; IzEnzo 1:6-8) Ukushunyayelwa kwalezindaba ezinhle zoMbuso kwakuyisizathu esiyinhloko sokuba khona kwebandla lobuKristu.
AmaKristu okuqala, njengoPawulu, athatha lomsebenzi wokushumayela ngokungathi sína. Kanjalo, lapho izitha zikaNkulunkulu zicabanga ukuthi zazikucimile ukukhanya kweqiniso ngokubulala ngonya “iNkosi yokuphila,” abalandeli bayo baqhubeka bewukukhanya kwezwe, beshumayela ngenkuthalo. (IzEnzo 3:15) Ngisho noshushiso aluzange luyithiye imizamo yabo. Umbhalo weBhayibheli uthi: “Abayekanga ukufundisa nokushumayela ivangeli ngoJesu Kristu imihla yonke ethempelini nasemakhaya.” (IzEnzo 5:42) Akukho lutho olwalungabavimba!
Ezikhathini zanamuhla, amaKristu ngokufanayo aye aba matasa kakhulu ngomsebenzi wokufakaza. Ngasekupheleni kwekhulu le-19 leminyaka, abafundi abaqotho beZwi likaNkulunkulu baqala ukubona isidingo sokuhlanganyela amaqiniso eBhayibheli nabanye. IZion’s Watch Tower Tract Society—inhlangano esingezinga lezizwe zonke—yamiswa ngokomthetho ngo-1884. LabaFundi BeBhayibheli, kusukela ngo-1931 abaziwa ngokuthi oFakazi BakaJehova, baye bawugcwalisa ngokoqobo umhlaba ngolwazi lweZwi likaNkulunkulu. Umsebenzi wabo wenkuthalo uye waphumela ebuthweni elikhulu labantu abangaphezu kwezigidi ezine! Futhi ngokungangabazeki inani labo lizoqhubeka landa ngaphansi kokuqondisa kukaJehova.—Isaya 60:22.
Ingabe Uyayenza Ingxenye Yakho?
UJesu wathi: “Ukuvuna kukhulu, kodwa izisebenzi ziyingcosana.” (Mathewu 9:37, 38) Ngo-1990 abantu abacishe babe yizigidi eziyishumi baba khona eSikhumbuzweni sokufa kukaKristu. Yeka ithuba elimangalisayo elikhona lesivuno esandisiwe emhlabeni kabanzi! Kodwa nakuba sijabula ngalokhu kwanda okuqhubekayo, ngamunye kumelwe azibuze, ‘Mina ngihlanganyela ngezinga elingakanani kulomsebenzi omuhle? Ingabe ngihlanganyela njalo—masonto onke uma kungenzeka?’
Abadala kumelwe bahole kulomsebenzi ‘njengezibonelo zomhlambi.’ (1 Petru 5:3) Yiqiniso, abadala abaningi banemisebenzi yokuziphilisa. Nomphostoli uPawulu wayenawo lapho eseKorinte. Nokho, wabekela eceleni isikhathi somsebenzi wokushumayela wasikhathi sonke. Abadala abaningi namuhla ngokufanayo baba matasa kakhulu ngemisebenzi engokomoya ngezimpela-sonto. Lokhu kungaba nomphumela onamandla nokhuthazayo kubo bonke ebandleni. Ngezinye izinyanga lapho kwenziwa umzamo okhethekile, amabandla amaningana aba nengxenye enkulu yabamemezeli bawo abangenela inkonzo yobuphayona. Iyini imfihlo? Abadala bayahola kokubili ekushumayeleni nasekuhleleni amalungiselelo enkonzo yasensimini.
Izinceku ezikhonzayo ngokufanayo zingaba ithonya elihle ebandleni uma zihlanganyela njalo enkonzweni yasensimini. Khumbula, imiBhalo iyala ukuba zibe ‘ezizimisele, . . . [amadoda] akhonza kahle.’ (1 Thimothewu 3:8, 13, qhathanisa neNW.) Ukwethembeka enkonzweni yasensimini kubalulekile ukuze umzalwane afanelekele ukuba umdala noma inceku ekhonzayo.—Thithu 1:8, 9.
NjengoPawulu, abanye bayakwazi ukunciphisa emsebenzini wokuziphilisa bese bephayona. Inani lamaphayona avamile, asizayo, nakhethekile landa lisuka ku-137 861 eminyakeni eyishumi nje edlule laya ku-536 508 ngo-1990. Ngokuqinisekile, isibusiso nokuvunyelwa uJehova obekungabangela lokhu. Nokho, amaphayona kumelwe anakekele ukuba asebenzise kahle isikhathi, hhayi ukumane anqwabelanise amahora. Maphayona, ingabe niyilungele kahle futhi niyaphumelela enkonzweni? Ingabe nilwela ukwenza intuthuko eqhubekayo ukuze inkonzo yenu ibe nezithelo ngempela?
Imivuzo Yenkonzo Enokulinganisela
Ingabe uyakwazisa ukwaziswa okunikeza ukuphila okunikezwa inyanga ngayinye kuNqabayokulinda nakumngane wayo, iPhaphama!? Ngokungangabazeki uyakwazisa. Ingabe ukwazisa kwakho kuye kwakushukumisela ukuba uhlanganyele ekusakazeni labomagazini? Omunye udade eBotswana wenza kanjalo. Ngaphambili wayeliphikisa iqiniso, kodwa umyeni wakhe wamfundela labomagazini. Ngokuhamba kwesikhathi inhliziyo yakhe yashintsha futhi waba uFakazi. Nakuba engakwazi ukufunda, uyaphumelela kakhulu ekuhambiseni omagazini, ethi, “Angikwazi ukufunda, kodwa umyeni wami uyangifundela labomagazini. Ngiyabajabulela, futhi ngiyaqiniseka ukuthi nawe uzobajabulela.”
Kungani ungahlanganyeli masonto onke kulomsebenzi osindisa ukuphila? Ngokushesha uma usunezimfanelo ezingokomoya, ibandla lobuKristu liyojabulela ukukusiza ukuba uqale. Nokho, ukuhambisa omagazini kungesinye nje isici senkonzo. Noma ubani omatasa kakhulu ngezindaba ezinhle uzama ukuba nenkonzo enokulinganisela. Ngokwesibonelo, iWatch Tower Society ikhipha izigidi zezincwadi ezinoqwembe oluqinile, futhi lezi zinikezwa umphakathi njengomthombo ohlala njalo ngokwengeziwe wokudla okuhle okungokomoya. Ingabe usuye waba ophumelela ngokwanele enkonzweni yakho ukuba uhambise izincwadi, ezinjengethi Ungaphila Phakade EPharadesi Emhlabeni?
Futhi kuthiwani ngabantu ababonisa isithakazelo? Ingabe uyabhala yini phansi ukuze uphindele kubo? Ukuphindela okunjalo kungaholela esicini senkonzo esiletha injabulo enkulu kunazo zonke—umsebenzi wesifundo seBhayibheli sasekhaya. Khumbula, uJesu wasiyala kuMathewu 28:19, 20 ukuba ‘senze abafundi, sibabhapathize.’ Lokho kusho ukutadisha iBhayibheli nabo. Yiqiniso, ukuqalisa isifundo ngokuvamile kudinga ukuphikelela. Omunye uFakazi wahlangana nombhangqwana osukhulile owasivuma ngenhliziyo yonke isifundo seBhayibheli sasekhaya. Kodwa wasihlehlisa isifundo amasonto amathathu elandelana. Ekugcineni isifundo saqalwa. Khona-ke, okwesikhashana, lombhangqwana wawungafundi cishe njalo ngemva kokweqisa isonto. Nokho ekugcineni umfazi wathuthukela ezingeni lokubhapathizwa. “Ngemva kokubhapathizwa,” kukhumbula lomzalwane, “amehlo akhe agcwala izinyembezi zenjabulo, okwaletha izinyembezi zenjabulo kokubili kimi nakumkami.” Yebo, ukuba matasa kakhulu ngezindaba ezinhle kuletha injabulo engachazeki!
Zenze Utholakale!
UJesu Kristu nomphostoli uPawulu baye babeka izibonelo ezinhle zokuzinikela okumelwe sizilingise. Futhi sinezibonelo eziningi ezinhle phakathi koFakazi BakaJehova ezikhathini zanamuhla. Manje yisikhathi sokuba bonke abazi izindaba ezinhle bashiseke ngokugcwele ekwaziseni abanye ngazo. IBhayibheli liyasiqinisekisa ukuthi konke ukusebenza okunjalo “akusilo ize.”—1 Korinte 15:58.
NjengoPawulu, abaningi banezibopho ezingokwezimali okumelwe bahlangabezane nazo. Ngenxa yalokhu, abaningi bangase bangakwazi ukuphayona. Kodwa ngosizo lukaJehova, bonke bangalandela iseluleko esihle esinikezwe kwabaseRoma 12:11: “Ekukhuthaleni ningenqeni, nivuthe emoyeni, nikhonze iNkosi.” Futhi uma izimo zishintsha futhi zivumela isikhathi esengeziwe ukuba sisetshenziselwe enkonzweni kaJehova, noma ubani omthanda ngempela uJehova, njengoPawulu, uyolibamba lelothuba. Yiba matasa kakhulu ngezindaba ezinhle! Ukwenza kanjalo ngeke kulethe kuphela izibusiso manje kodwa ngesikhathi esizayo kuyophumela ekuphileni okuphakade okunenjabulo nentokozo engapheli!—Mathewu 19:28, 29.