Abamemezeli BoMbuso Bayabika
‘Okuvunwayo Kuvuthiwe’ EBurma
◻ IZWE elihle laseBurma linabamemezeli bezindaba ezinhle abangaphezu kwe-1 500. Imihlangano yabo yamuva nje yaqhutshwa ngolimi lwesiBurma, isiLushai, nesiHaka Chin, nengqikithi yezi-2 273 yababekhona. Okuhlangenwe nakho okulandelayo kubonisa isithakazelo abantu abanjengezimvu abanaso esigijimini soMbuso futhi kugcizelela lokho okwabonwa uJohane embonweni: “Sekomile okuvunwayo komhlaba.”—IsAmbulo 14:15.
Kwenzeka EDinam
◻ Lapho elinye iphayona elikhethekile lisenkonzweni yendlu ngendlu eMatupi, lahlangana nomfundi owayenesithakazelo ikakhulukazi sokwazi ngesihogo. Lapho echazelwa ukuthi isihogo seBhayibheli siyithuna elivamile lesintu, wamangala kakhulu. Akakwazanga ukuthula kodwa wafuna ukutshela izihlobo zakhe emuva edolobhaneni laseDinam. Phakathi namaholide esikole, wabuyela edolobhaneni lakubo futhi wasakaza iqiniso ngesihogo. Umlamu wakhe wayenesithakazelo kakhulu sokwazi okwengeziwe, ngakho-ke wabuyela nomfundi emuva eMatupi ukuze azikhulumele mathupha nalelophayona. Wahlala amasonto amaningana eMatupi futhi wafunda nephayona. Kamuva, phakathi nokuvakasha kwakhe kwesibili eMatupi, wacelisisa amaphayona ukuba ahambele idolobhana lakubo, ngoba, wathi kwakunabantu abaningi lapho abanesithakazelo. Omathathu amaphayona asamukela isimemo ngenjabulo. Kwawathatha amahora ayi-12 anzima ukufika eDinam.
Ngosuku amaphayona afika ngalo eDinam kwakunomngcwabo, futhi abantu ababevela emadolobhaneni aseduze nabo babekhona ukuze bezwe okwengeziwe ngalesihogo seBhayibheli. Bonke bagijimela ukuyobona izivakashi. Kwalandela ingxoxo yeBhayibheli eyaqala ngo-7:00 ntambama kwaze kwaba u-11:00 ebusuku. Umuntu ocabangelayo esixukwini wamisa ingxoxo ngo-11:00 ebusuku,evumela amaphayona ukuba athi ukuphumula kancane ukuze alungele usuku olulandelayo. Ngosuku olulandelayo ekuseni, baqalisa ingxoxo yeBhayibheli cishe ngehora lesikhombisa futhi baqhubeka kwaze kwaba ihora leshumi ebusuku, bethatha amakhefu okudla kuphela. Lapho lawomaphayona ehamba kulelidolobhana, abantu abanjengezimvu bawacela ukuba aphinde abuye azochitha isikhathi esengeziwe nabo. Yeka ilungelo okuyilo ukusiza abantu abanjalo abafundisekayo ngezindaba ezinhle eziyigugu zoMbuso. Ngempela, okuvunwayo ‘komile’ eBurma!
Ukuthola Iqiniso Encwadini Elahliwe
◻ Enye indoda eBurma yayivakashele umngane wayo othengisa izincwadi ezindala namaphephandaba njengamaphepha asesebenzile futhi yabona enye incwadi endala engenaso isembozo phakathi kwamaphepha asesebenzile. Yayicosha yayisiqala ukuyifunda. Ngokushesha yayisithathekile yiyo. Kwenzeka ukuba ibe incwadi yeWatch Tower Society ethi Ukulalela UMfundisi oMkhulu. Yabhalela ihhovisi legatsha leNhlangano ukuze ithole izincwadi ezengeziwe. Ihhovisi legatsha lathumela ngokushesha iphayona ukuba liyivakashele. Kwaqaliswa isifundo nayo, futhi ngemva nje kwezifundo ezimbalwa, yabona lapho iqiniso likhona futhi yaqala ukuhlanza ukuphila kwayo kwemikhuba emibi futhi kamuva yalahla izithombe zayo zenkolo yobuHindu. Kungakapheli isikhathi eside, yona nendodakazi yayo endala bazinikezela kuJehova futhi babhapathizwa. Manje iyiphayona elivamile.
Ngempela, “ukuvuna kukhulu, kodwa izisebenzi ziyingcosana” ensimini ethelayo yaseBurma.—Mathewu 9:37, 38.