Umuntu Osegugile Onokwazisa
Owesifazane waseJapane oneminyaka engama-79 washukunyiselwa ukuba abhale incwadi elandelayo ngemva kokufunda INqabayokulinda kaJune 1, 1987, eyayinesihloko esithi “Ubani Oyonakekela Abagugile?”
Kubazalwane Engibazisayo,
Lapho ngitadisha umagazini kaJune 1, 1987, ophathelene nabagugile, ngithola indaba iqondakala kakhulu futhi ingeyomusa. Lapho ngifika esigabeni se-11, kwadingeka ukuba ngithathe iduku lami ngoba ngamane ngakhala isikhathi eside futhi ngangakwazi ukuthula. Lezo kwakuyizinyembezi zokubonga okujulile. Yeka uthando nomusa! Ngangingenza kuphela lokho iHubo 150 elikushoyo—ngidumise uJehova! Ngokuzithoba nginibonga kakhulu bazalwane ngokukhipha lezihloko ezicabangelayo ezikhuluma ngokubonisa umusa kubantu abagugile, kuze kube semininingwaneni emincane kakhulu. Yebo, ngiyabonga ngezihloko ezinhle enizikhipha inyanga ngayinye, futhi anginawo amazwi okusho ngokwanele ukwazisa kwami. Ngiyaphinda futhi, ngiyanibonga.
Ngokujabulisayo, wonke umuntu ebandleni lethu unothando olukhulu nomusa. Bangiyisa futhi bangibuyise ensimini ngezimoto zabo, futhi ngenxa yenkonzo yabo yomusa, ngiyiphayona elisizayo. Ngibonga ngokujulile ngosuku ngalunye engiluphilayo enhlanganweni enhle kakhulu nevikelayo.
Namuhla ezweni, lapho abantu abagugile banda ngokwengeziwe kodwa bengamukelwa, akukho okuyigugu ngokwengeziwe kunezibusiso esizamukela kuNkulunkulu onothando kangaka. Ngithandazela ukuba ngisize abantu abaningi ngangokunokwenzeka ukuba bafunde iqiniso ukuze bajabule kanye nathi.
Udumo maluye kuJehova futhi ukubonga kuze kini, bafowethu abathandekayo. Sizani ningixolele ngesandla sami esibi, enginamahloni ngaso. Kwangathi uJehova anganibusisa futhi aninike impilo enhle.
Isalukazi esimpofu esizigugele,
[kusayiniwe] uNogami
Amazwi nemizwa enjengalena kuqinisekisa iqiniso lokuthi uthando lobuKristu beqiniso alunamingcele noma alulinganiselwe eminyakeni ethile. OFakazi BakaJehova, abasha nabagugile, babonakalisa ukuba kwabo abafundi ngokuphila ngokuvumelana namazwi kaJesu: “Ngalokho bonke bayakukwazi ukuthi ningabafundi bami, uma nithandana.”—Johane 13:35.