Ukubaluleka Kokuhlabelela Ekukhulekeleni Kweqiniso

UNGACABANGA ngezwe elingenawo umculo? Ungeke uphinde uzwe ukuhlabelela kwenjabulo kwezingane noma izwi elimnandi lenyoni inightingale noma ibellbird? Ngeke uphinde uzwe ukugigitheka okuthathelwanayo kwemagpie noma uhlelo oluhoshozelayo lwekookaburra? Ngokujabulisayo, lokhu akusoze kwenzeka. Kodwa ukucabanga ngento enjalo kuqokomisa esinye sezipho eziningi zikaNkulunkulu kubantu: Isipho somculo.

UJehova UNkulunkulu Womculo

Kungani ukucula kuletha intokozo nenjabulo kithi sonke? Esinye sezizathu siwukuthi uJehova ngokwakhe uyazijabulela futhi uyazithokozela izingoma zokudumisa zezidalwa zakhe. Ungacabanga ngesikhathi lapho zonke izingelosi zimemeza ngenxa yenjabulo ngobuhle bendalo kaJehova yasemhlabeni? Noma ungazicabanga umi ushaqekile phakathi kwabelusi ngobusuku basekwindla bokuzalwa kukaJesu njengomuntu, uvuswa amadlingozi umsindo wesixuku esikhulu sezingelosi zihlabelela iculo elithi: “Udumo kuNkulunkulu kweliphezulu”?—Luka 2:13, 14; Jobe 38:7.

Enye indlela uJehova abonisa ngayo ukuthi unguNkulunkulu womculo yayiwukwenza ukuhlabelela kube ingxenye yokukhulekela kweqiniso kwaIsrayeli. Kamuva, uNkulunkulu waphinda wembula ukusondelana okuseduze phakathi kokuhlabelela nokukhulekela kweqiniso embonweni wesAmbulo owanikwa umphostoli uJohane. Komunye umbukwane ongokwesiprofetho iqembu elikhulu labahlabeleli—elinamalungu ayizi-144 000—lihlabelela iculo elisha elimnandi phambi kwesihlalo sobukhosi sikaNkulunkulu.—IsAmbulo 14:3.

Ukuhlabelela Ezikhathini Zangaphambi KobuKristu

Ubukhosi bukaNkulunkulu nezenzo zakhe ezesabekayo kwabangela futhi ukuba izinceku zakhe zasemhlabeni zihlabelele. Yizwa umphumela oshukumisayo ukuhlabelela okwaba nawo kumaIsrayeli masinyane ngemva kokukhululwa kwawo okuyisimangaliso ebugqilini baseGibithe. Inhliziyo kaMose nezamadoda akwaIsrayeli zashukunyiswa ngokomzwelo njengoba babehlabelela ingoma yokunqoba belanda ngalokho uJehova akwenzile kuFaro nempi yakhe.—Eksodusi 15:1-21.

Kamuva emlandweni wakwaIsrayeli, usuku olukhulu lwafika, lapho ngaphansi kokuqondisa kweNkosi uDavide, umphongolo wesivumelwano wawuzofakwa etendeni elimiselwe wona ngokukhethekile. Yeka isenzakalo somlando! Kwakungekhona ukuhlabelela okuvelele kuphela kodwa futhi nomculo wezinsimbi ovusa amadlingozi wenezela ebuhleni balolosuku.—1 IziKronike 16:4-36.

Uthando lukaDavide ngomculo nekhono lakhe lokushaya ihabhu kwagcizelela isifiso sakhe sokuthuthukisa umculo nokuhlabelela ekukhulekeleni kweqiniso. KumaHubo 33:1, 3, sizwa isicelo sakhe sozwela kubakhulekeli bakaJehova ukuba bahlabelelele uNkulunkulu kakhulu ngazo zonke izinhliziyo zabo: “Yethabani kuJehova nina-balungileyo; . . . nibethe kahle ngenhlokomo.”

Ukuhlabelela Ezikhathini ZobuKristu

Ezikhathini zakuqala zobuKristu, ukuhlabelela kwakunengxenye evelele ekukhulekeleni kweqiniso. UJesu nabaphostoli bakhe bahlabelela ndawonye ngemva kwesidlo sakusihlwa ngaphambi nje kokufa kukaJesu. (Marku 14:26) Besejele, oPawulu noSila bahlabelela kakhulu ukuze kuzwe bonke. (IzEnzo 16:25) NjengoDavide, umphostoli uPawulu wayekushisekela ukuhlabelela. Ngokuphindaphindiwe wakhuthaza amaKristu akholwa kanye nawo ukuba ahlabelele izingoma zokudumisa uJehova.—Efesu 5:18, 19; Kolose 3:16.

Ekukhulekeleni kobuKristu kosuku lwanamuhla, ukuhlabelela futhi kuyisici esigqamile. Ngo-1905 kwakhishwa incwadi ethi Hymns of the Millennial Dawn. Ikhasi elinesihloko lichaza izingoma zayo ezingama-333 ngokuthi “iQoqo Lekhethelo Lamahubo Nezihlabelelo Nezingoma Ezingokomoya Zokusiza Abantu BakaJehova Ekuhlabeleleni Nasekuhubeleni INkosi Ezinhliziyweni Zabo.”

Kwathi ngo-1928 kwalungiselelwa iculo elibukeziwe elinezingoma ezingama-337. Linesihloko esithi Songs of Praise to Jehovah, isandulela salo sathi: “Lezizingoma zizotholakala zivumelana namaqiniso aphezulu asezoqondakala manje.” Nokho, njengoba iminyaka yayidlula futhi nokukhanya kweqiniso kukhula, kwabonakala ukuthi ezinye zalezingoma zazithonywe ukucabanga okuvela enkolweni yamanga. Ngaphezu kwalokho, kwakudingeka izingoma zoMbuso zokukhuthaza ukushumayela izindaba ezinhle, njengoba ukumemezela kwasobala kwakuba okuqokonyiswa kakhulu.—Mathewu 24:14; Heberu 13:15.

Ngo-1944, kwalungiselelwa iculo elithi Kingdom Service Songbook, linezingoma zoMbuso ezingama-62. Eminyakeni engamashumi amabili kamuva, ngo-1966, kwakhishwa incwadi ethi Singing and Accompanying Yourselves With Music in Your Hearts (NgesiZulu eyakhishwa ngo-1979.) Lena yayinezingoma zoMbuso eziyi-119 ezazihlanganisa zonke izici zokuphila nokukhulekela kobuKristu, kuhlanganise nokufakaza kwabanye kanye nokudumisa uJehova uNkulunkulu noKristu Jesu.

Cishe sekudlule amanye amashumi amabili eminyaka, okuthé phakathi nawo ukukhanya kweqiniso kuqhubeke kwanda. (IzAga 4:18) Kwabonakala isidingo selinye futhi iculo. Ngakho, ngo-1984 kwakhishwa iculo elinesihloko esithi Sing Praises to Jehovah. Linezingoma zoMbuso ezingama-225, ezinamagama nomculo okuqanjwe izikhonzi zikaJehova ezizinikezele kuphela ezivela kuzo zonke izingxenye zomhlaba.

Sebenzisa Ngokugcwele Umculo Ongokwasezulwini

Umfanekiso osemakhasini amabili okugcina aleliculo elisha usikhuthaza ukuba sisebenzise umculo ongokwasezulwini ngokugcwele emihlanganweni yobuKristu. Abaculi basethempelini abaqeqeshiwe ababoniswe lapho ngokukhanyayo baphakamisa amaphimbo abo nezinhliziyo behlabelelela uNkulunkulu.—1 IziKronike 25:7.

Singahlabelela ngendlela efanayo emihlanganweni yethu yobuKristu, sivula imilomo yethu futhi sihlabelela ngokusuka ezinhliziyweni zethu. Nokho, akuthina sonke esikwenzayo lokho. Mhlawumbe ukuzithwala kusenza silahlekelwe injabulo yokuhlabelelela uJehova ngaphandle kwamahloni, kungakhathaliseki ukuthi sinanhloboni yezwi. Noma singase sikhathalele kakhulu indlela esizwakala ngayo kulabo abami eduze. UMose wayenenkinga efanayo—hhayi eyokuhlabelela, kodwa eyokukhuluma. Impendulo uJehova amnika yona ingasisiza uma sithambekele ekudebeseleni ukuhlabelela ngenxa yokuntula ikhono lokuhlabelela. UJehova wabuza uMose: “Ubani owenzile umlomo womuntu na? . . . Akusimina, uJehova, na?” (Eksodusi 4:11) Ngokuqinisekile, uJehova uyolalela ngenjabulo njengoba sisebenzisa noma yiliphi ikhono asinike lona ukuba sihlabelele izindumiso zakhe ngokuzwakalayo!

Cabanga, futhi, ngendlela uPawulu noSila ababehlabelela kakhulu ngayo lapho besejele. Akukho mahloni lapho, futhi babengenazinsimbi zomculo zokubasekela, kwakungekho ngisho nencwadi yamaculo ababengayilandela. Cabanga ngalesosimo: “Kepha phakathi kobusuku oPawulu nosila bekhuleka bamdumisa uNkulunkulu ngamahubo, iziboshwa zabezwa.” (IzEnzo 16:25) Ingabe lokhu kwakungenxa yokuthi uPawulu noSila babenamanzwi okuhlabelela aqeqeshiwe? Akunjalo. Ababekukhathalela ngokuyinhloko kwakuwukuhlabelela ngokuzwakalayo futhi ngokusuka enhliziyweni. Babehlabelela kakhulu nangokusuka enhliziyweni! Yini thina esiyikhathalela ngokuyinhloko lapho sihlabelela izingoma zokudumisa?

Sonke Singathuthuka

Iseluleko somculi uDavide siyafaneleka lapha: “Nibethe kahle ngenhlokomo.” (IHubo 33:3) Yilokho uJehova akulindele kuzo zonke izinceku zakhe—hhayi okungaphezulu noma okungaphansi kokwenza ‘okusemandleni ethu.’ Uma senza lokho kanye, singalindela ukuba uJehova abusise imizamo yethu, futhi ngokujabulisayo—futhi kwesinye isikhathi ngokumangalisayo—singase sithuthuke.a

Nakhu okunye ukusikisela okungakusiza uthuthukise izinga lokuhlabelela kwakho: Zama ukulalela njalo izingoma zoMbuso ezintsha, usebenzise umculo wamakhasethi oqoshiwe noma amarekhodi, lapho kunokwenzeka. Ngabanye, ukuhlabelela izingoma ekhaya noma emibuthwaneni emincane nabakholwa nabo kuye kwabonakala kuwusizo futhi kujabulisa. Kubalulekile ukuba umculo oholayo udlalwe kakhulu ngokwanele emihlanganweni yebandla ukuze uzwiwe yibo bonke abahlabelelayo. Lokhu kwenza kube lula ukulandela indlela yokuculwa kwengoma futhi kwandise ukuqiniseka kulabo abahlabelelayo. Owethula ingoma ezohlatshelelwa kumelwe asho isihloko sayo, mhlawumbe aphawule ngisho nokufaneleka kwayo, futhi hhayi inombolo yayo nje kuphela.

Bazali, ingabe niyabakhuthaza abantwana benu ukuba bahlabelele izingoma zoMbuso ngentshiseko nangokusuka enhliziyweni? Imikhaya eye yakhuthaza abantwana bayo ukuba bahlabelele ngokusuka ezinhliziyweni, nangokuqonda, ezikhathini eziningi iye yathola lokhu kuwusizo oluhle ekukhuleni ngokomoya.

Izinzuzo Ziningi

Ziningi izinzuzo zokuhlabelela kakhulu nangokusuka enhliziyweni. Ukuhileleka kwethu komuntu siqu ekukhulekeleni kwasobala kuyaqina. Labo abemi eduze bayakhuthazeka ukuba bahlabelele kakhulu lapho bezwa ukuhlabelela kwethu okungenamahloni. Futhi lonke ibandla liyazuza, ngoba umculo onesigqi uyathathelwana!

Ngaphezu kwalokho, ukuhlabelela okunamandla kunikeza ubufakazi obuhle kulabo abeze emihlanganweni okokuqala. Labo abadlula ngaphandle kwamaHholo ethu oMbuso, kanye nomakhelwane abahlala eduze, bahlatshwa umxhwele ukuhlabelela kwethu okuhle, njengoba kwenzeka ngeziboshwa ezezwa oPawulu noSila. Lokhu kuye ngisho kwabangela ukuba abanye abasizwayo bafune ukwazi okwengeziwe ngeqiniso.

Okubaluleke nakakhulu, ukuhlabelela kwethu okuthuthukile kuyoletha udumo olukhulu kuJehova, uMsunguli womculo nokuhlabelela, ofanelwe ukudunyiswa ngokuhlabelela ngaphezu kwabo bonke.

[Umbhalo waphansi]