UNkulunkulu INdodana Noma INdodana KaNkulunkulu”?
“Wena unguKristu, iNdodana kaNkulunkulu ophilayo.”—MATHEWU 16:16.
1. (a) Yimuphi umbono amalungu amaningi amasonto anawo ngoJesu? (b) Yikuphi ukukhulumela okuthakazelisayo uJesu akwenza ngalokhu?
INGABE uJesu wayenguNkulunkulu? Amalungu amaningi amasonto eLobukholwa angaphendula ngoyebo. Kodwa bewazi yini ukuthi kunothile uJesu ambiza ngokuthi “uNkulunkulu”? Vula iBhayibheli lakho kuJohane 20:17 futhi ufunde amazwi kaJesu ngasekugcineni kwalelovesi: “Ngenyukela kuBaba noYihlo, kuNkulunkulu wami noNkulunkulu wenu.” Uma lokho kumangaza, ungase ushaqeke ngezinye izinto iBhayibheli elizishoyo ngoJesu noNkulunkulu.
2. Yikuphi okunye ukukhulumela okuthakazelisayo iBhayibheli elikwenzayo ngobuhlobo phakathi kukaJesu noNkulunkulu?
2 Cabanga okwesikhashana, ngengilosi eyamemezela ukuzalwa kukaJesu, kuMariya. Ayizange ithi ingane yakhe izoba uNkulunkulu, kodwa yathi izoba “iNdodana kaNkulunkulu.” (Luka 1:35) Futhi kunokuba ithi, njengoba abanye besho, “uNkulunkulu ngokwakhe” weza emhlabeni ukuba azoba isihlengo, imiBhalo ithi “uNkulunkulu wathuma iNdodana yakhe” ukuba yenze lokhu.—Galathiya 4:4, 5; 1 Johane 4:9, 10.
3, 4. Amazwi kaPetru noJohane uMbhapathizi aphikisana kanjani nemfundiso yeLobukholwa kaZiqu-zintathu?
3 UJesu wabuza abafundi bakhe ukuthi babethi ungubani. Ingabe uSimoni Petru waphendula ngokuthi: “UnguNkulunkulu”? Cha. UPetru wathi: “Wena unguKristu, iNdodana kaNkulunkulu ophilayo.” Ingabe uJesu wamlungisa uPetru? Cha, uJesu wathi: “Ubusisiwe wena-Simoni kaJona, ngokuba inyama negazi akukwambulelanga lokhu kodwa uBaba osezulwini.”—Mathewu 16:15-17.
4 Ababhali benkolo, bekholelwa ukuthi uNkulunkulu unguZiqu-zintathu, bakhuluma “ngoNkulunkulu iNdodana.” Nokho, uJohane uMbhapathizi akazange abize uJesu ngokuthi “uNkulunkulu iNdodana” kodwa “iNdodana kaNkulunkulu.” Abafundi bakaJesu abazange bathi, “UnguNkulunkulu iNdodana,” kodwa bathi, “ngempela uyiNdodana kaNkulunkulu.” Kukhona omkhulu umehluko phakathi kwalamazwi.—Johane 1:34; Mathewu 14:33.
Ingabe UYise Mkhulu?
5. Yini engashiwo ngesikhundla sikaJesu sasezulwini?
5 IBhayibheli likhuluma ngokuba khona kukaJesu ngaphambi kokuba umuntu. Waba khona ngaphambi kokuba uAbrahama abe khona, wayenoYise wasezulwini “izwe lingakabikho,” ‘izibulo lezidalwa zonke’ futhi “konke kwadalwa ngaye.” (Johane 17:5; 8:58; Kolose 1:15-17) UJesu “wazithobisa, elalela kwaze kwaba sekufeni, yebo, ekufeni kwesiphambano. Ngalokho uNkulunkulu wamphakamisa kakhulu, wamnika igama eliphezu kwamagama onke.” IBhayibheli lithi futhi “uNkulunkulu weNkosi yethu uJesu Kristu . . . emvusa kwabafileyo, wamhlalisa ngakwesokunene sakhe ezulwini, ngaphezu kwakho konke ukubusa, negunya, namandla, nobukhosi, namagama onke aphathwayo, kungekulelizwe lodwa kepha nakulo elizayo.”—Filipi 2:8, 9; Efesu 1:17, 20, 21.
6-8. Yiziphi ezinye zezinto uJesu azisho ngokuphathelene nesikhundla sakhe uma siqhathaniswa nesikaYise?
6 Nokho uJesu ngokuphindaphindiwe akabonisanga ukulingana noYise kodwa ukuzithoba kuye. Wathi wayethunywe uYise, eqondiswa nguYise, eyalwa uYise afanele akusho. (Johane 3:17; 5:36; 6:38; 12:49, 50) UJesu wathi ‘ufeze umsebenzi’ uYise amnikeza wona ukuba awenze, nokuthi abalandeli bakhe “bazile ukuthi wena [Baba] ungithumile.”—Johane 17:4, 6, 18, 25.
7 Ngisho nezitha zikaJesu azizange zimsole ngokuthi uthi unguNkulunkulu. Kunalokho, zathi uzenza “olingana noNkulunkulu” ngokubiza uNkulunkulu ngokuthi uYise. Zazifuna ukubulala uJesu ngoba, njengoba inguqulo edumile yamaRoma Katolika ikubeka: “Wathi uNkulunkulu unguYise, ngakho wazenza olingana noNkulunkulu.” UJesu wathi: “Ngiqinisile, ngiqinisile ngithi kini, iNdodana ingenze lutho ngokwayo, ingenza kuphela lokho ebona uYise ekwenza: futhi noma yikuphi okwenziwa uYise neNdodana iyakwenza kanjalo.”—Johane 5:18, 19, The Jerusalem Bible.
8 Naphezu kwesikhundla sakhe esiphakeme, uJesu watshela abaphostoli bakhe: “UBaba mkhulu kunami.” (Johane 14:28) Abanye abantu bathi lokho kwakuyiqiniso kuphela ngoba uJesu wayesesemhlabeni nokuthi akuselona iqiniso manje njengoba esenyukele ezulwini. Kodwa lokho akukhona okushiwo iBhayibheli.
Ngemva Kokwenyuka KukaJesu
9. UPawulu wawubonisa kanjani umehluko ngisho naphakathi kukaJesu ovusiwe noNkulunkulu?
9 Ngemva kokwenyukela kukaJesu ezulwini, abalandeli bakhe baqhubeka nokufundisa ukuthi uYise mkhulu kuneNdodana. Eminyakeni engaphezu kwengama-20 kamuva, uPawulu wabhala ngo“Nkulunkulu uYise weNkosi yethu uJesu Kristu.” (Roma 15:6) Wabhekisise lawomazwi. UPawulu ukhuluma ngoNkulunkulu kaJesu. Ngokuphikelelayo uPawulu wenza lomehluko hhayi nje phakathi kukaYise noJesu kodwa phakathi kukaNkulunkulu noJesu. Ubhala ngoNkulunkulu kanye noKristu. Ukubingelela kukaPawulu okuvamile ezincwadini zakhe kwakuthi: “Makube-kini umusa nokuthula okuvela kuNkulunkulu uBaba wethu naseNkosini uJesu Kristu.” (Roma 1:7; 1 Korinte 1:3; 2 Korinte 1:2; Galathiya 1:3; Efesu 1:2; Filiphi 1:2) UPawulu futhi wabhala, hhayi ukuthi uKristu unguNkulunkulu, kodwa ukuthi “ungumfanekiso kaNkulunkulu,” ngakho emmelela ngokufanelekile. (2 Korinte 4:4) Nokho, umhumushi weThe Living Bible, ekholelwa ukuthi uNkulunkulu unguZiqu-zintathu, washintsha lengxenyana ukuba ifundeke kanjena, “uKristu, onguNkulunkulu.” Kodwa njengoba lokho akusikho ngempela ekushoyo, kwanezelwa lombhalo wasezansi: “Ngokwezwi nezwi, ‘ongumfanekiso kaNkulunkulu.’”
10. IsAmbulo siwubonisa kanjani umehluko phakathi kukaJesu noNkulunkulu?
10 Incwadi yeBhayibheli yesAmbulo nayo ayihlukanisi nje kuphela phakathi kukaJesu noYise kodwa phakathi kukaJesu noNkulunkulu. Ivula ngokuthi, “Isambulo sikaJesu Kristu amnika sona uNkulunkulu.” (IsAmbulo 1:1) Eminyakeni engaphezu kwama-60 ngemva kokwenyuka kukaJesu, isambulo sikhuluma ngoJesu wasezulwini njengothi: “Onqobayo ngiyakumenza abe-yinsika ethempelini likaNkulunkulu wami, . . . ngiyakuloba negama likaNkulunkulu wami phezu kwakhe, negama lomuzi kaNkulunkulu wami iJerusalema elisha elehla ezulwini kuNkulunkulu wami, negama lami elisha.”—IsAmbulo 3:12.
11. Umehluko phakathi kukaJesu noNkulunkulu wenziwe kanjani esahlukweni sokugcina seBhayibheli?
11 Lomehluko phakathi kukaNkulunkulu neWundlu uJesu Kristu wenziwe kwaze kwaba sesahlukweni sokugcina seBhayibheli, lapho isihlalo esikhulu sasezulwini seJerusalema Elisha elikhazimulayo singachazwa njengesihlalo sikaZiqu-zintathu ocatshangelwayo, kodwa njenge‘sihlalo sobukhosi sikaNkulunkulu neseWundlu.’ (IsAmbulo 22:1, 3) Lamazwi akunzima ukuwaqonda, ngaphandle-ke kokuba uye wafundiswa ukuzama ukuwenza asho okuthile angakusho.
“Ngakwesokunene SaMandla”
12. (a) UJesu wasichaza kanjani isikhundla ayezoba naso ngemva kokuvuka kwakhe? (b) IHubo 110:1 likubonisa kanjani ukuthi uJesu akasiye uJehova?
12 Izitha zikaJesu, zifuna isizathu sokumbulala, azizange zibuze ukuthi wayethi unguNkulunkulu yini, kodwa ukuthi “wayenguKristu, iNdodana kaNkulunkulu yini.” Waphendula: “Usho khona. Nokho ngithi kini: Kusukela manje niyakubona iNdodana yomuntu ihlezi ngakwesokunene saMandla, iza emafwini ezulu.” (Mathewu 26:63, 64) Ngaphambili uJesu wayecaphune futhi wasebenzisa kuye amazwi kaDavide: “UJehova wathi eNkosini yami: Hlala ngakwesokunene sami, ngize ngenze izitha zakho zibe-yisenabelo sezinyawo zakho.” UJesu akazange asho ukuthi wayenguJehova, noma ingxenye kaZiqu-zintathu engekho ngokombhalo, kodwa wathi wayezoba ngakwesokunene sikaJehova, alinde ukugcwaliseka kwesikhathi sikaNkulunkulu nezinjongo.—IHubo 110:1; Mathewu 22:42-44.
13. UStefanu wabonani ngaphambi nje kokuba afe ngenxa yokholo lwakhe?
13 UStefanu, umuntu wokuqala ukufela ukholo lwakhe kuKristu, wanikezwa umbono kaJesu ovusiwe ezulwini. Ingabe wabona uJesu enjengoNkulunkulu, noma ingxenye kaZiqu-zintathu? Cha. Njengoba uJesu noDavide babebikezele, wabona uJesu “ngakwesokunene sikaNkulunkulu.” IThe Living Bible ithi uStefanu wabona “uJesu emi ngakwesokunene sikaNkulunkulu.”—IzEnzo 7:55, 56.
14. Umbono kaDaniyeli ubonisani ‘ngonjengendodana yomuntu’?
14 Umbono omkhudlwana walokhu utholakala embonweni okhazimulayo kaDaniyeli woMdala Wezinsuku. UDaniyeli wabhala: “Ngabona emibonweni ebusuku; bheka, kwafika namafu ezulu onjengendodana yomuntu; yafika komdala wezinsuku, yasondezwa phambi kwakhe. Yanikwa ukubusa, nobukhosi, nombuso, ukuze bonke abantu nezizwe, nezilimi bayikhonze; ukubusa kwayo kungukubusa okungunaphakade okungayikudlula, nombuso wayo yiwo ongayikuchithwa.” (Daniyeli 7:13, 14) UJesu wayengesiye oMdala Wezinsuku, uJehova uNkulunkulu, kodwa wayeyiNdodana yomuntu. Futhi qaphela ukuthi lona walethwa eduze phambi kukaYise wasezulwini, ukuba amukele “ukubusa, nobukhosi, nombuso, ukuze bonke abantu, nezizwe, nezilimi [bamkhonze].”—Qhathanisa noMathewu 25:31.
15. Yini eboniswa isAmbulo ukuthi lesixuku esikhulu siyoyazi?
15 Incwadi yeBhayibheli yesAmbulo ibonisa ngokusobala ukuthi isixuku esikhulu esivela kuzo zonke izizwe nezilimi esiza ngaphansi kokubusa kukaKristu sizoba abantu abazi umehluko phakathi kukaNkulunkulu kanye neWundlu uJesu Kristu, ngoba ukumemeza kwabo kokudumisa kuthi: “Insindiso ngekaNkulunkulu wethu ohlezi esihlalweni sobukhosi neyeWundlu.” Ngokungaphezulu, abayizi-144 000 abami neWundlu uJesu Kristu, eNtabeni yasezulwini iSiyoni “banegama lalo negama likaYise lilotshwe emabunzini abo.”—IsAmbulo 7:9, 10; 14:1.
INdodana Kabani?
16. Yini amaJuda ayeyoyiqonda uma uJesu ethi uYise yilowo ayembiza ngokuthi uNkulunkulu wawo?
16 AmaJuda ayazi ngegama likaNkulunkulu. Ayazi ukuthi uJesu wayekhuluma ngobani uma ethi: “NguBaba ongidumisayo, enisho ngaye ukuthi unguNkulunkulu wenu.” (Johane 8:54) Wayengubani loNkulunkulu? Kungakhathaliseki ukuthi babengaliphimisela noma cha, balibona igama lakhe eziboniselweni zabo zemiBhalo, lalisemiqulwini emasinagogeni abo, futhi lalibhalwe ngezinhlamvu zesiHeberu enguqulweni yeBhayibheli iSeptuagint yesiGreki ababeyifunda futhi beyisebenzisa. (Bheka isihloko esithi “Igama LikaNkulunkulu EmiBhalweni YamaKristu,” ikhasi 8.) UJehova akusilo elinye igama likaJesu. Lapho uJesu ethi “uNkulunkulu unguYise” futhi ezibiza ngokuthi “iNdodana kaNkulunkulu,” izilaleli zakhe ezingamaJuda zaziyoqonda ukuthi wayethi uyiNdodana yalowo ogama lakhe lalibhalwa ngezinhlamvu ezine zesiHeberu uYHWH. Wayengasho ukuthi unguJehova, kodwa wayethi uyiNdodana kaJehova.—Johane 5:18; 11:4.
Isivumelwano Esisha SamaKristu
17, 18. (a) Yimaphi amaphuzu ayisihluthulelo owabona esiprofethweni sikaJeremiya sesivumelwano esisha, futhi sibaluleke kangakanani lesiprofetho? (b) Umlamuleli walesivumelwano wenzani?
17 Isiprofetho esikhulu sikaJeremiya sesivumelwano esisha sibonisa ukuthi hhayi nje amaJuda kuphela kodwa namaKristu ngokufanayo, ayezoba abantu begama likaJehova. Uma abahumushi beBhayibheli lakho balisebenzisa ngokufanele igama likaNkulunkulu lapho livela khona esiHeberwini sakuqala, ubungafunda lamazwi:
“Bheka, izinsuku ziyeza, usho uJehova, lapho ngiyakwenza isivumelwano esisha nendlu kaIsrayeli nendlu kaJuda. . . Kepha yilesi esiyisivumelwano engizakusenza nendlu kaIsrayeli emva kwalezozinsuku, usho uJehova: ngiyakufaka umthetho wami ezibilinini zabo, ngiwulobe ezinhliziyweni zabo, ngibe-nguNkulunkulu wabo, bona babengabantu bami; abasayikufundisana, kube-yilowo nalowo umakhelwane wakhe, kube-yilowo nalowo umfowabo, ngokuthi: Yazi uJehova, ngokuba bonke bayakungazi, kusukela kwabancane kuya kwabakhulu babo, usho uJehova.”—Jeremiya 31:31-34.
18 Umphostoli uPawulu ongumKristu usebenzisa izahluko ezine zencwadi yamaHeberu (izahluko 7-10) ekuchazeni lesivumelwano esisha, uNkulunkulu asimisa noIsrayeli ongokomoya. UPawulu akasikiseli ukuthi uKristu wayengumenzi walesivumelwano (esaqinisekiswa ngegazi lakhe), kodwa uthi uKristu ‘wayengumlamuleli’ waso. Umenzi waso kwakunguJehova uNkulunkulu. Ngomlamuleli waso, uPawulu wabhala: “UKristu . . . wangena ezulwini uqobo ukuba manje abonakale ebusweni bukaNkulunkulu ngenxa yethu.”—Heberu 8:6; 9:15, 24.
19. Lesiprofetho sithi ubani owayezoba uNkulunkulu walabo ababezoba sesivumelwaneni esisha sobuKristu?
19 Ubani uJeremiya athi uzoba uNkulunkulu wamaKristu esivumelwaneni esisha? UJehova! UJehova owathi: “Ngiyakwenza . . . Ngiyakufaka . . . Ngibe-nguNkulunkulu wabo.” Futhi lesiprofetho sithi ngamaKristu esivumelwano esisha: “Bonke bayakungazi, kusukela kwabancane kuya kwabakhulu babo, usho uJehova.” Ngakho bonke labo abasesivumelwaneni esisha sobuKristu ngempela—kanye namanye amaKristu athembekile ahlanganyela nabo—bazoba ngabantu abazi futhi abakhonza uJehova! Eminyakeni engaphezu kwama-400 edlule, uJohn Calvin wabhala: “Lawamazwi athi: ‘Yazini uJehova,’ abonakalisa izimpawu zokuqala zokholo.”—Commentaries on the Book of the Prophet Jeremiah and the Lamentations, nguJohn Calvin, eyahunyushwa nguJohn Owen, ikhasi 136.
Isimo Esishintshile
20. Yini izilaleli zikaJesu okwakudingeka ziyiqaphele?
20 Ngosuku lukaJesu izilaleli zakhe zazimazi uNkulunkulu ka-Abrahama, ulsaka kanye noJakobe. Okhokho babo babekhulekela uJehova, futhi babenethempeli likaJehova phakathi kwabo. Ababedinga ukukwazi, ukubaluleka kokwazisa nokulandela uJesu. Ngakho uJesu wathi bonke kufanele “bazise iNdodana, njengokuba bazisa uYise. Ongayazisi iNdodana kamazisi noYise oyithumileyo.”—Johane 5:23.
21, 22. (a) Lesisimo siphambaniswe kanjani namuhla? (b) Yini okungamelwe singayinaki?
21 Namuhla isimo singesiphambene. Amalungu amasonto eLobukholwa asho okuningi ngeNdodana kodwa awamnaki “uYise oyithumileyo.” KwakunguNkulunkulu owaphakamisa uJesu “kakhulu, wamnika igama elingaphezu kwamagama onke, ukuze kuthi ngegama likaJesu amadolo onke aguqe, awabasezulwini, nawabasemhlabeni, nawabangaphansi komhlaba, nezilimi zonke zivume ukuthi UJESU KRISTU UYINKOSI, kube-yinkazimulo kuNkulunkulu uYise.”—Filipi 2:9-11.
22 Asifanele, njengoba abaningi beye benza, singalinaki leloqiniso—lokuthi ukuvuma kwethu uJesu kufanele kube “yinkazimulo kuNkulunkulu uYise.” Abaningi abaholi benkolo banamuhla, kanye nabalandeli babo, bonke baye bakhohlwa uYise. Nokho, emthandazweni kuYise wasezulwini, uJesu wathi: “Ukuphila okuphakade yilokhu ukuba bazi wena-Nkulunkulu wedwa oqinisileyo.” Kodwa lokho akwanele. Sifanele sifunde futhi silandele lowo uNkulunkulu amthuma. Ngakho, uJesu waqhubeka, “Nomthumileyo, uJesu Kristu.”—Johane 17:3.
Imibuzo Yokubukeza
□ Yimaphi amazwi angokweBhayibheli abonisa umehluko phakathi kukaJesu noNkulunkulu?
□ Ingabe amazwi kaJesu athi “uBaba mkhulu kunami” ayeseyiqiniso nangemva kokubuyela kukaJesu ezulwini?
□ Yini uDavide noDaniyeli abayisho esisiza ukuba siqonde isikhundla sikaJesu ezulwini?
□ Isiprofetho sikaJeremiya sesivumelwano esisha sibonisa ukuthi yini amaKristu eqiniso ayezoyazi ngoNkulunkulu?
[Ibhokisi ekhasini 17]
“UNkulunkulu INdodana” Umqondo Wamuva
I“New Catholic Encyclopedia,” UmQulu 13, ikhasi 426, ithi: “Ukubuza noma iT[estamente] E[lisha] likhuluma ngoJesu njengoNkulunkulu iNdodana” kuwuku“funa umcabango ngaYe owamiswa muva nje.”
Khona-ke, uJesu nabaphostoli bakhe bafundisa ukuthi ‘wayeyiNdodana kaNkulunkulu,’ kodwa kwakungabantu bamuva bamasonto abamisa umqondo ‘kaNkulunkulu iNdodana.’