“Phonsa Phezu KukaJehova Umthwalo Wakho”—Kanjani?
UDAVIDE, inkosi eyaziwayo yezizwe eziyi-12 zasendulo zombuso kaIsrayeli, yasinikeza lesisikhuthazo: “Phonsa phezu kukaJehova umthwalo wakho, uzakukuphasa; akayikuvuma naphakade ukuba olungileyo azanyazanyiswe.”—IHubo 55:22.
Kungani iseluleko esinjalo sifaneleke ngokukhethekile uma sivela eNkosini uDavide? Futhi ungasilalela kanjani?
UDavide wayenenkambo enezigigaba kakhulu ekukhonzeni uJehova uNkulunkulu. Lapho esemusha wabulala ibhubesi, ibhere nomdondoshiya onguGoliyati. UDavide wavelela ekulweni, welula imincele kaIsrayeli wasendulo yafinyelela eminceleni eyayibekwe uNkulunkulu. Ngaphandle kwalokho, wayengalingani namuntu ekuqambeni umculo nasekubhaleni amahubo. Kodwa uDavide akanambithanga kuphela izinjabulo zempumelelo nokuchuma kodwa futhi nosizi olujulile nokuhlupheka.—1 Samuweli 16:18; 17:34-36; 18:7.
Isizathu Sokuba UDavide ‘Aphonse Umthwalo Wakhe KuJehova’
Lapho uDavide ethi “phonsa phezu kukaJehova umthwalo wakho,” okokuqala, wayezisho yena. Kungashiwo kanjani lokho? Ngoba ngokwendaba kusobala ukuthi uDavide waqamba lelihubo lapho amandla akhe obukhosi ephansi. Lokhu kwakulapho indodana yakhe enesifiso esibi uAbisalomu icishe iphumelela ekuhlwitheni isihlalo sobukhosi kuyise.
Isimo esibucayi sikaDavide sisobala emazwini okuqala eHubo 55:1: “Lalela, Nkulunkulu, umkhuleko wami, ungazifihli ekunxuseni kwami. Ngizwele, ungiphendule; ngiyayaluza ekukhaleni kwami, ngiyabubula.” Emavesini ayisithupha engeziwe uqhubeka nalomqondo.
Kungani uDavide azithola ekulesisimo? Kungenxa yezitha zakhe. Ngokulandelayo uthandazela ukuba uNkulunkulu athathe izinyathelo ngokumelene nezitha zakhe futhi ikakhulukazi asuse umngane owayephenduke imbuka. Ngokungangabazeki lona kwakunguAhitofeli, okungathiwa ngaye: “Ngokuba akusiso isitha esingiklolodelayo; . . . kepha nguwe-ntanga yami, mhlobo wami nomngane wami. Sasihlalisana kamnandi; sasiya endlini kaNkulunkulu kanye nebandla elithokozayo.”—IHubo 55 Amavesi 12-14.
Ngemva kokuchaza isimo sakhe nembangela yaso, uDavide uthi, ngokwengxenye, ngokuthembela kwakhe kuJehova: “Mina ngizakukhala kuNkulunkulu; uJehova uzakungisindisa.” (IHubo 55 Ivesi 16) Khona-ke ngemva kokuzeluleka, “phonsa phezu kukaJehova umthwalo wakho,” uDavide uphetha ihubo ngamazwi afanayo okuthembela koPhezukonke, ethi: “Wena-Nkulunkulu uyakubaphonsa egodini lokubhubhisa; . . . kepha mina ngizakwethemba wena.” Futhi yeka ukuthi amazwi kaDavide abonakala eyiqiniso kanjani! Indodana yakhe elangazelayo uAbisalomu nomeluleki wayo okhohlisayo uAhithofeli bafinyelela esiphelweni kungakabi isikhathi, kodwa uDavide waqhubeka ebusa njengenkosi egcotshiwe kaNkulunkulu.—IHubo 55 Amavesi 22, 23.
Imithwalo Yemfanelo
Ngaphambi kokucabangela indlela esingalandela ngayo iseluleko sikaDavide esiphefumlelwe ngokwaphezulu sokuphonsa imithwalo yethu kuJehova, kubonakala kufanelekile ukuphawula ukuthi kuneminye imithwalo yemfanelo okumelwe siyithwale ngokwethu. Umphostoli uPawulu ongumKristu wabhala: “Ngokuba yilowo nalowo uyakuthwala owakhe umthwalo.” (Galathiya 6:5) ‘Imithwalo’ enjalo iyimithwalo yemfanelo okungeyethu ngoba singamadoda, abafazi, abazali, abantwana, abaqashwa, oFakazi BakaJehova noma, ngokwesibonelo, abadala abamisiwe ebandleni lobuKristu. Ngeke siyiphonse leyomithwalo kuJehova ngokuphelele noma ngokungacabangi kodwa kumelwe sizimisele ukuyithwala ngokwethu. Kungokufanayo uma kuziwa ekwenzeni izinqumo. IZwi likaNkulunkulu linikeza imithetho nezimiso, kodwa kumelwe siyisebenzise ezinkingeni ezibhekene nathi. Yebo, singakwazi futhi simelwe sicele kuNkulunkulu ukuhlakanipha, amandla nomoya wakhe ongcwele ukuba usisize ekuthwaleni lemithwalo, kodwa akumelwe sizame ukuyixosha.
Khona-ke iyini imithwalo esingayiphonsa kuJehova? Iyizinkathazo, izinhlupheko, ukudumazeka nokwesaba ngokuqondene nesikhathi esizayo, njengalokho uDavide ahlangabezana nakho. Futhi ihlanganisa imithwalo ehilela ubuthakathaka bethu nokushiyeka. Lena imithwalo okufanele siyiphonse kuJehova, ngoba umphostoli uPetru uthi: “Niphonse izinkathazo zenu zonke phezu kwakhe.” Ngani? “Ngokuba uyanikhathalela.”—1 Petru 5:6, 7.
UJesu Kristu wanikeza iseluleko esifanayo eNtshumayelweni yakhe yaseNtabeni. ‘Kanjani?’ ungase ubuze. Nokho, akasitshelanga nje kuphela ukuba singakhathazeki ngokuthi siyakudlani, siyakuphuzani nokuthi siyakwembathani kodwa futhi wasitshela isizathu sokuthi kungani singamelwe sikhathazeke ngokunjalo. UJesu wanikeza lokhu kuqiniseka: “Uma uNkulunkulu embathisa kanjalo utshani basendle . . . akayikunembathisa kakhulu nina eninokukholwa okuncane na? . . . UYihlo wasezulwini uyazi ukuthi niyakudinga konke lokhu.”—Mathewu 6:25-32.
NgoMthandazo
Nokho, singayiphonsa kanjani ngempela ‘imithwalo yethu kuJehova’? Enye indlela iwukuya kuye njalo ngomthandazo. Akulona yini iqiniso ukuthi omunye wemithwalo esiyithwala nsuku zonke iwukuqaphela kwethu ukushiyeka ezimfanelweni zikaNkulunkulu zokulunga? Yebo, kodwa ngokuya kuNkulunkulu ngomthandazo singase siphunyuzwe kulowothwalo. UJesu wabonisa lokhu ngendaba yomthelisi, ngenxa yokuzithoba nokuthandaza ngokuqotho kuNkulunkulu ukuba abe nomusa kuye, wafakazelwa njengolunge kakhulu kunomFarisi ongumzenzisi. Ngamanye amazwi, umthelisi wakhululwa kanjalo emthwalweni wakhe wokuba necala. Kodwa nasi isixwayiso: Ngokwesimo sethu esingokomoya, ubungako besono sethu nesimo secala lethu, singase sidinge ukuthola usizo lwabanye, njengabadala bebandla, ukuze sikhululwe emthwalweni wethu.—Luka 18:9-14; Galathiya 6:2; Jakobe 5:14-16.
Ukuze imithandazo yethu isisize ekuphonseni imithwalo yethu kuJehova kumelwe ibe ngeqotho ngempela, neqinisile ngempela ngalezozinto. Kungakho siyalwa: “Ningakhathazeki ngalutho, kepha kukho konke izicelo zenu mazaziwe nguNkulunkulu ngokukhuleka nokunxusa kanye nokubonga.” Lokho kuyosisiza ekusethuleni imithwalo, ngoba khona-ke ‘ukuthula kukaNkulunkulu okudlula ukuqonda konke kuyakulondoloza izinhliziyo zethu nemicabango yethu.’—Filipi 4:6, 7.
Siza uphawule ukuthi uPawulu uphawula ukunxusa nokukhuleka. Kuyini ukunxusa? Lena imithandazo yentshiseko. Futhi kusho ukuthini ukuba nentshiseko? Leligama livela esiqwini esisho “ukushisa, ukubila.” Ngakho ukuba nentshiseko kusho ukuvutha, umuzwa ofudumele, oqinile. Imithandazo yethu kumelwe ibe njalo uma siyophumelela ngayo ‘ekuphonseni imithwalo yethu kuJehova.’
Uma siqotho ngempela emithandazweni yethu, siyokhuthazela futhi emithandazweni. Ngemva kokwenza umfanekiso ngesidingo sokuphikelela emthandazweni, iNkosi yethu uJesu Kristu yanxusa: “Ngithi kini: Celani, niyakuphiwa; funani, niyakufumana; ngqongqothani, niyakuvulelwa. Ngokuba yilowo nalowo ocelayo uyamukeliswa, nofunayo uyafumana, nongqongqothayo uyakuvulelwa.” (Luka 11:2-10) Ngempela, asiqhubeke sicela, sifuna, sinxusa, futhi uBaba wethu osezulwini uyozethwesa imithwalo engase iphonswe ngokufanele kuye.
Ukholo Nemisebenzi
Ngemithandazo yethu, ngokufanayo nanganoma isiphi esinye isici sokuphila kwethu kobuKristu nenkonzo, lesisimiso siyasebenza: “Makwenzeke kini njengokukholwa kwenu.” (Mathewu 9:29) Kumelwe sibe nokholo oluthokozisa uNkulunkulu. Akumelwe sibe nokukholelwa komphefumulo wonke ukuthi ukhona kuphela kodwa kumelwe futhi siqiniseke ukuthi uvuza labo abamfuna ngobuqotho. (Heberu 11:6) Kumelwe sibe nokholo lokuthi uNkulunkulu uyosizwa.
Ukuze sibe nokholo oluqine kanjalo, sidinga ukutadisha iZwi likaNkulunkulu. Kumelwe sizimisele ukuzifunda nezincwadi ezihlobene zobuKristu nsuku zonke. Kulula ukukhohlwa iseluleko seBhayibheli neziqinisekiso zalo ezinhle. Ngakho izinto eziningi zomhlaba ziqhubeka zigcwala kithi! Kodwa kuphela ngokuzondla njalo ngeZwi likaNkulunkulu singajwayelana ngempela noJehova, izimfanelo zakhe ezimangalisayo nezindlela zakhe zokusebenzelana nezinceku zakhe zasemhlabeni. Yeka ukuthi iZwi likaJehova likuqokomisa kanjani ukunakekela kwakhe kothando abantu bakhe! Izikhathi eziningi sifunda ngendlela aphendula ngayo imithandazo yezinceku zakhe. (Genesise 20:17; IzEnzo 12:5, 17) Futhi ungakhohlwa ukuthi uJehova uhlala ‘engumuzwi wemithandazo’ onokwethenjwa njalo.—IHubo 65:2.
Okuwusizo ngezindlela eziningi kuneyodwa kuwukuzikhumbuza imibhalo yeBhayibheli, ikakhulukazi leyo esiqinisekisa ngokunakekela kukaNkulunkulu kothando. Phakathi kwaleyo yileyo ecashunwe ngenhla, namahubo athile, njengamaHubo 23 ne-Hubo 103. Yeka indlela engcono yokugcina umqondo wethu umatasa futhi nokususa imicabango ephazamisayo ngokuzikhumbuza nokusho ngekhanda amavesi eZwi likaNkulunkulu! Ngokuba nemibhalo yeBhayibheli engqondweni yethu singazondla ngeZwi lakhe ngisho noma sesisesimweni sokungakwazi ukufunda iBhayibheli. Ngokwesibonelo, singazindla ngemiBhalo uma singakwazi ukulala ebusuku. (Qhathanisa neHubo 63:6.) Ngokuqinisekile, konke lokhu kuwusizo ‘ekuphonseni umthwalo wethu kuJehova.’
Ngokungaphezulu, ‘ukuphonsa umthwalo wethu kuJehova’ kuhilela ukwenza kwethu ingxenye yethu. Khumbula ukuthi “ukukholwa ngaphandle kwemisebenzi kufile.” (Jakobe 2:26) UJesu wabonisa ngokufanayo eNtshumayelweni yakhe yaseNtabeni, ngoba ngemva kokuseluleka ukuba singakhathazeki kodwa sibe nokholo ekunakekeleni kukaNkulunkulu, wayala: “Funani kuqala umbuso kaNkulunkulu nokulunga kwakhe, khona konke lokhu kuyakwenezelwa nina.” Ngokuqinisekile, ukulandela lesoseluleo kuyosisiza ukuba sihlale sikhululekile ekukhathazekeni.—Mathewu 6:33.
Okuwusizo futhi, kuwukufunda ukuqeqesha umqondo wethu. Kungenzeka siye sangena esimweni sokucabanga okuphambene. Uma sesizilethe ngobuqotho izicelo zethu kuJehova futhi saphonsa izinkathazo zethu kuye, kumelwe sizishiye lapho ngaphandle kokuqhubeka sikhathazeka. Kumelwe futhi siziqeqeshe mayelana namazwi ethu nezenzo. Kumelwe senze intuthuko futhi singaphindeli emaphutheni afanayo njalonjalo, njengokungathi ‘sizungeza esiyingini.’ Kunalokho, masibe njengomphostoli uPawulu ‘siyitube imizimba yethu, siyenze izigqila.’ Kumelwe futhi silalele iseluleko sikaJesu ‘sokulinda, sikhuleke njalo,’ ngoba “umoya uyavuma, kepha inyama ibuthakathaka.”—1 Korinte 9:27; Mathewu 26:41.
Ngakho-ke, ‘ungawuphonsa kanjani umthwalo wakho’ kuJehova? Ngokuphikelela ngobuqotho emthandazweni, ngokuzondla njalo ngeZwi likaNkulunkulu, ngokufuna kuqala uMbuso kaNkulunkulu nangokuziqeqesha. Khona-ke, ngokuvumelana nesithembiso sakhe, uJehova uyokusekela futhi ngeke akuvumele ukuba uxege.