Kungani Sithandaza, “Mawufike Umbuso Wakho”?
“Umbuso kaNkulunkulu awufiki ubonwa ngamehlo. Futhi kabayikusho ukuthi: Bhekani, nanku, nokuba, nankuya; ngokuba bhekani, umbuso kaNkulunkulu uphakathi kini.”—Luka 17:20, 21.
1, 2. Ngokuvumelana nemithombo yezindaba enokwethenjwa, kungani isikhathi sethu singachazwa njengesesabisayo?
INGABE siyawudinga umbuso kaNkulunkulu? Ngokuqinisekile kakhulu siyawudinga! Ngoba thina bantu namuhla sichusha enkathini enzima kakhulu kuwo wonke umlando. Lezi izikhathi ezesabekayo! Igcizelela lokhu, iGuardian Weekly yaseManchester kaJune 7, 1981, yasho lokhu: “ILandani, iParis, iBonn, iRome, neBrussels kungabhujiswa konke ngokuphelele izikhali ezicitshwayo ezingamaSS-20 iSoviet Union eye yazakha kusukela ekuqaleni kwalenyanga. . . . Ngasinye isikhali esicitshwayo siqukethe amakhanda aqhumayo angamakilotons ayi-150, okusho ukuthi amandla esikhali esewonke ngokumelene nomuzi ngamunye angaba makhulu ngokuphindwe ka-30 ngaphezu kwaleso esadedelwa eHiroshima. Uma isidubule amahlanu amaSS-20 ayo iSoviet Union ingabe isasele nayi-210 engawadubula kwezinye izindawo, ngaphandle kokucela usizo emabuthweni ayo amabhomu, emikhunjini yayo yamanzi, noma ezikhalini ezicitshwayo phakathi kwamazwekazi eziyi-1 400, ngasinye esingamamegratons amaningi agcinelwe izikhathi ezibaluleke kakhulu.”
2 Umagazini iTime kaOctober 26, 1981, endabeni yawo enesihloko esisesembozweni esithi “Ukuhlomisa Izwe,” wachaza isimo njengesinge“nakuqondiswa futhi esingenakulinganisela okuqondakalayo.” Wakhuluma nge“shayisa uvalo nesheshayo inhlalayenza: ezizweni ezifanayo ezincane nezinkulu, ukuthengiselana ngezikhali kuye kwaba izikhali eziyinhloko zokudala izivumelwano phakathi kwezizwe . . . ‘ingxenye eyinhloko esisekelweni sezombangazwe zezwe.’”
3. (a) NgokukaGenesise 6:11, 13, usuku lukaNowa lufana kanjani nosuku lwethu? (b) Yimaphi amazwi kajesu manje anokusebenza okumangalisayo?
3 Ngokuqinisekile, “njengasemihleni kaNowa,” umhlaba usuye “wagcwala ubudlwangudlwangu” ngisho nobudlova obukhulu kakhulu obusenokwenzeka ngezinga elikhulu. (Genesise 6:11, 13; Mathewu 24:37) Akumangalisi ukuthi uJesu, lapho eprofetha ‘ngezinto ezaziyokwenzeka’ ekupheleni kwezwe, wathi “usizi luyakwehlela izizwe, zixakeke . . . , abantu baphele amandla ngokwesaba nangokubheka okuvelela umhlaba.”—Luka 21:25, 26, 36.
Yimani Isibindi!
4. Kungani isimo sethu kumelwe kube esinethemba?
4 Nokho, ingabe singalindela ukuba uMdali onothando womhlaba wethu omuhle avumele abantu abanobudlova noma izizwe ezicuphe ukususa impi zibhubhise ngokuphelele umsebenzi wezandla zakhe? Ingabe singacabanga nje ukuthi uJehova uNkulunkulu uyovumela labo besintu abaye ‘bakhanda izinkemba zabo zaba amakhuba’ futhi “abakhuleka kuye ngomoya nangeqiniso” ukuba bashabalaliswe izitha zakhe? (Isaya 2:2-4; Johane 4:24) Phinde! Futhi kungalesosizathu uJesu enezela encazelweni yakhe yezehlakalo zosuku lwanamuhla lamazwi: “Kepha nxa kuqala ukuvela lokho, lulamani, niphakamise amakhanda enu, ngokuba kusondele ukukhululwa kwenu.” (Luka 21:28) UJesu usitshela ukuba sibe nesimo esiqondile, sokwethembela kokuhle ngokuphathelene nezimo ezihlukene ezisizungezile kulesi‘siphelo sesimiso sezinto.’—Mathewu 24:3-8, 33.
5. Hlobo luni lwezwe okumelwe siphile kulo, kodwa kumelwe sibe namuphi umqondo?
5 Ezingxenyeni eziningi zezwe akusa londekile ukuhamba ngezinyawo ezitaladini. Inani lamadivosi liyakhuphuka, imikhaya iyehlukana, futhi ukuluthwa imilaliso nobuhlobo bobulili obungemthetho kuye kwakhula kwaba ngesimo esingazange sibe khona ngaphambili. Leli izwe abakhulekeli bakaJehova okumelwe baphile kulo. Kodwa nakuba sisezweni, asifuni ukuba sihlulwe yizwe. Ngalokho singaba nengqondo efana nekaJesu, owathi: “Ezweni niyakuba lusizi, kepha yimani isibindi, mina ngilinqobile izwe.”—Johane 16:33.
6. (a) ‘Ekunqobeni izwe,’ isiphi isibonelo esihle uJesu asibeka? (b) Kungani uJesu asifundisa ukuba sithandaze sithi, “Mawufike umbuso wakho”?
6 Kungani uJesu wakwazi ‘ukunqoba izwe’? Kwakungenxa yokholo lwakhe oluqinile embusweni kaNkulunkulu owethenjisiwe. Wayazi ukuthi uJehova uyoletha uMbuso ngesikhathi nangendlela yaKhe siqu. UJesu wasenza igugu ngokujulile isabelo sakhe siqu njengeNkosi ekhethiwe. Ukuze athole uMbuso, wadela yonke into ayengase abe nayo emhlabeni njengomuntu ophelele. Ufuna ukuba nathi sijabulele izibusiso zoMbuso. Kungalesizathu uJesu afundisa abafundi bakhe ukuba bathandaze bathi: “Mawufike umbuso wakho.” (Mathewu 6:10) Emakhulwini eminyaka, ngokuqondile amakhulu ezigidi zesintu aye awuphindaphinda lomthandazo. Kodwa yeka ukuthi bayingcosana kangakanani abaye baqonda ukuthi uMbuso usho ukuthini!
UMbuso—Ungokoqobo!
7. (a) Yikuphi ukuqhathanisa okusisiza ukuba siqaphele ukuthi umbuso kaNkulunkulu ungokoqobo? (b) Ababusi boMbuso bakhethwa kanjani, futhi kungani singaqiniseka ukuthi ngokuqinisekile bayonakekela izithakazelo zesintu?
7 Umbuso kaNkulunkulu ungumbuso ongokoqobo ngempela. Njengoba nanamuhla sisenemibuso yabantu, njengoMbuso Ohlangene, uMbuso waseNepal, uMbuso weDenmark, neminye eminingi, ngakho umbuso kaNkulunkulu uyilungiselelo loqobo likahulumeni. Njengemibuso esemhlabeni enamaphalamende awo, izigele nabakhulumeli bayo abakhethiwe, ngakho umbuso wezulu unoJesu njengeNkosi kaNkulunkulu emisiwe, kanye nababusi abakanye naye abakhethiwe. Kodwa-ke lapha, bakhethwe uNkulunkulu ngokwakhe phakathi kwabantu abathembekile. Bangaba“khethiweyo bakaNkulunkulu, abathandekayo, abangcwele.” (Kolose 3:12) UNkulunkulu ngokwakhe uzazi kahle kakhulu izimfanelo ezifiselekayo kubabusi abalungileyo, ukuze laba bengase ngokuqinisekile banakekele izithakazelo zesintu. Ngemva kokuvuselwa kwabo embusweni wasezulwini, lababusi abayi-144 001 basezulwini bayoba sesimweni sokuphatha izindaba zobukhosi boMbuso emhlabeni.—IsAmbulo 14:1.
8, 9. (a) Kungani eLobukholwa lehluleka ukufundisa ukuthi uMbuso unezikhonzi? (b) Kodwa zingobani lezozikhonzi, futhi ikuphi iBhayibheli elikuthembisayo ezingase zikujabulele? (c) Obani kuphela namuhla abamemezela ‘izindaba ezinhle,’ futhi yiyiphi injabulo engase ibe ngeyakho namuhla?
8 Khona-ke, obani abayoba izikhonzi zoMbuso? Uma ubungayofuna impendulo ezinkolweni zeLobukholwa, beziyokutshela ukuthi akuyikubabikho zikhonzi ezinjalo. Zilandela ifilosofi yaseGreece yokuthi yonke imiphefumulo ayifi, nokuthi iya “ezulwini” noma “esihogweni.” Azikholelwa esithembisweni esimangalisayo seBhayibheli sovuko lwasemhlabeni, nokuthi uNkulunkulu “uyakuhlala” nesintu “azesule izinyembezi zonke emehlweni abo; ukufa akusayikubakhona; nokudabuka, nokukhala, nobuhlungu akusayikubakhona.” (Johane 5:28, 29; IsAmbulo 21:3, 4) Yebo, izikhonzi zoMbuso ziyoba izinkulungwane zezigidi zesintu eziyophila phakade epharadesi lembulunga yonke khona lapha kulomhlaba. Futhi kuzo zonke izinkolo emhlabeni, oFakazi BakaJehova bawukuphela kwabo namuhla abatshela abantu bomhlaba ‘lezindaba ezinhle.’—IHubo 37:9, 29.
9 Uma usuzamukele kakade ‘izindaba ezinhle’ awujabuli yini ngokuthi othile wahlanganyela nawe lelithemba? Awuthokozi yini ukwazi lokho umbuso kaNkulunkulu ozokwenzela isintu? Awujabuli yini ngokuthi, ekulindeleni konke lokho umbuso oyokufeza ungase ube nengxenye ekungcweliseni igama eliphakeme loMlungiseleli walowombuso, uNkulunkulu wethu, uJehova? Alikho ilungelo elikhulu elingaba khona namuhla kunalelo lokumemezela “ivangeli lombuso” kwabanye besintu esiswele!—Mathewu 24:14; IHubo 145:10, 11.
Umthandazo Wethu Wokushiseka
10. Ngokuqondene noMbuso, kungani kumelwe senze umthandazo wokushiseka, futhi sinakuphi ukuqiniseka?
10 Khona-ke, yeka ukuthi kumelwe sishiseke kangakanani ekuthandazeleni ukuba igama likaNkulunkulu lingcweliswe ngokufika kombuso wakhe! Yeka ukuthi kumelwe siqiniseke kangakanani ukuthi uMbuso ‘uzofika’ ngokushesha, ukuba ufeze intando kaNkulunkulu emhlabeni wethu! Njengoba siyizinceku zikaNkulunkulu ezizinikezele nezibhapathiziwe, singaqiniseka, futhi, ukuthi uJehova uyophendula imithandazo yethu yokusekelwa kosuku nosuku, yokuthethelelwa kwezono zethu, nesivikelo ngokumelene nobuqili be“nyoka” endala, uDeveli. Lezo yizinto uJesu asifundisa ukuba sizithandazele.—Mathewu 6:9-13; IsAmbulo 12:9.
11. Ngenxa yezinkinga zezwe, isiphi iseluleko sikaPawulu esifanelekile kulesikhathi, futhi ngani?
11 Ngempela kukwelinonya izwe elinendluzula, lelo izinhloko zemikhaya ezithola kunzima ngokwengeziwe ukubhekana nokwenyuka kwamanani okusheshayo nezinye izinkinga ezingokomnotho. Futhi sidinga ukuhlala silindile, ukuze singahluleki ngokomoya noma ngokokuziphatha ngaphansi kokuhlasela kwesitha. Ngokuvumelana nesiluleko sikamphostoli uPawulu kwabase-Efesu 6:11-18, ‘ngokuthandaza konke nokunxusa . . . masiqhubeke nokuthandaza ngawo wonke amathuba emoyeni.’ Ngoba uNkulunkulu ngokuqinisekile uyophendula imithandazo yabazinikezele bakhe—imithandazo esekuvumelaneni nentando yakhe.—IHubo 65:2, 4, 5.
12. Kungani uMbuso kumelwe ube ovelele emithandazweni yethu?
12 Kwangathi singathandaza ngobuqotho, “Mawufike umbuso wakho.” Futhi kungani uMbuso kumelwe ube ngovelele emithandazweni yethu? Kungoba uyindlela kaNkulunkulu, ithuluzi lakhe, lokususa yonke indawo yesitha sakhe esikhulu nabo bonke abanikela ukuphila kwabo ekubuseni kukaSathane. Umbuso wobuMesiya uyilungiselelo laKhe lokuhlanza igama lakhe elimangalisayo kukho konke ukuhlambalaza okuye kwanqwatshelwa kulo kuso sonke isikhathi seminyaka engamakhulu angama-60. Umbuso ngeNdodana kaNkulunkulu, uJesu Kristu, uyosebenzisa esintwini amandla esihlengo somhlatshelo kaJesu, ngisho nasekuvuseleni ekuphi leni izinkulungwane zezigidi manje ezilele emathuneni. (1 Thimothewu 2:3-6; IsAmbulo 20:12) Ingabe unosizi ngenxa yokulahlekelwa othile othandekayo? Ingabe udatshukiswa izimo zezwe eziba zimbi? Khona-ke awujabuli yini ngokuthi ungase ube yingxenye yokuphela kwabantu abathemba labo likuJehova nasezithembisweni zakhe ezikhazimulayo zoMbuso? (IHubo 144:15; 146:5) Kumelwe ujabule! Futhi ngokuqinisekile kumelwe uthandaze uthi, “Mawufike umbuso wakho.”
LOKHO ‘UKUFIKA’ KOMBUSO OKUYOKUFEZA
□ Ukususa ububi, impi, ukucindezela,
□ Ukukhulula bonke abakhonza uNkulunkulu “ngomoya nangeqiniso”
□ Ukulungiselela uhulumeni woqobo onabaphathi abakhethwe uNkulunkulu
□ Ukuvusa abafileyo, ukuhlanganisa zonke izizwe njengezikhonzi zasemhlabeni zoMbuso
□ Ukufaka esikhundleni sobumpofu nokonakala ukuchuma, ukwahlulelwa ngokulunga kwabo bonke
[Isithombe ekhasini 10]
Njengoba ohulumeni babantu bengaboqobo kungokufanayo nangohulumeni umbuso wasezulwini