Ingabe Yaklanywa?
Inhlanzi Eyonga Amandla
Ukuze kwakhiwe imoto enamandla, eyongayo, futhi engayingcolisi imvelo, abaklami bahlola endaweni enganakekile ukuze bathole amasu—ngaphansi kolwandle! Inhlanzi okuthiwa i-boxfish, etholakala eduze nezixhobo zamakhorali olwandle olungasezindaweni ezishisayo, iyisibonelo esihle kakhulu sokwakha imoto engasindi futhi ekwazi ukumelana namandla omoya ngokumangalisayo.
Cabanga ngalokhu: Le nhlanzi ingabhukuda ngejubane—ihambe ibanga eliphinda ubude bomzimba wayo kasithupha ngomzuzwana nje. Kodwa leli jubane aliwona nje amandla kuphela. Ngokuphambene nalokho okwakulindelwe, izinhlangothi eziyisithupha zale nhlanzi zithuthukisa ikhono layo lokutshuza emanzini. Empeleni, onjiniyela abakha imoto eyenziwe ngomfanekiso we-boxfish futhi bayihlola emhubheni onomoya, bathola ukuthi imoto eklanywe ngale ndlela iphambana nomoya kalula kakhulu kunezimoto ezivamile.
I-boxfish inesikhumba esinamathele emathanjeni okuyenza ibe namandla amakhulu kodwa ibe inesisindo esincane. Lapho isemanzini kuba nomoya omncane oyizungezayo le nhlanzi okuyenza itshuze kahle nakuba kunamagagasi. Ngakho, le nhlanzi inekhono elimangalisayo lokuphenduphenduka emanzini nokuzivikela ekulimaleni.
Onjiniyela bakholelwa ukuthi i-boxfish inikeza imfihlo yokwakha imoto elondekile, eyonga uphethiloli kodwa engasindi. UDkt Thomas Weber ongunjiniyela, uthi: “Empeleni nje, samangala lapho sithola ukuthi le nhlanzi ebukeka ngendlela engajwayelekile, iyona eyisibonelo sokuklama imoto ekwazi ukumelana nomoya kalula neyonga uphethiloli.”
Ucabangani? Ingabe le nhlanzi eyonga amandla yazivelela? Noma kunothile owayiklama?
[Imithombo Yesithombe ekhasini 10]
Boxfish: © Hal Beral/V&W/SeaPics.com; car: Mercedes-Benz USA