Umbono WeBhayibheli
UNkulunkulu Uzibheka Kanjani Izinto Ezisiza Ekukhulekeleni?
Izinto zokusiza ekukhulekeleni zivamile enkolweni yobuBuddha, ubuHindu, ubuSulumane, ubuJuda, kumaRoma Katolika nasenkolweni yobu-Orthodox BaseMpumalanga. Ngenxa yalokho, izigidi zabantu cishe kuwo wonke amazwe zikholelwa ukuthi izinto ezinjalo zizisiza ukuba zisondele kuNkulunkulu, zamukeleke kuye, noma zithole izibusiso. Lifundisani iBhayibheli?
SEKUYIZINKULUNGWANE zeminyaka kusetshenziswa izinto ezisiza umuntu lapho ethandaza. Ngokwesibonelo, eNinive lasendulo, abavubukuli bathole “abesifazane ababili abanamaphiko bemi phambi kwesihlahla esingcwele bethandaza; [ngasesandleni] sokunxele bephethe umqhele wezimbali noma irosari.”—The Catholic Encyclopedia.
Amarosari afeza yiphi injongo? Incwadi efanayo iyaphendula: “Uma kunomthandazo okufanele uphindwe izikhathi eziningi cishe kuthenjelwa entweni ethile ephathwa ngesandla okulula ukuyisebenzisa kunokubala ngeminwe.”
Amasondo omthandazo enza ukuphindaphinda umthandazo kube lula. Isikhathi ngasinye lapho liphendulwa ngesandla, umoya, amanzi, noma ugesi, lokho kubhekwa njengokuthandaza. Amasondo omthandazo avame ukusetshenziswa lapho kwenziwa imilolozelo. Cabangela indlela uNkulunkulu azizwa ngayo ngalezi zinto.
“Ungaphindaphindi Izinto Ezifanayo”
UJesu Kristu, lowo ngisho nezigidi ezingewona amaKristu ezimbheka njengomprofethi kaNkulunkulu, wachaza umbono woMdali mayelana nemithandazo ephindaphindwayo, ethi: “Lapho uthandaza, ungaphindaphindi izinto ezifanayo, njengoba nje kwenza abantu bezizwe, ngoba bacabanga ukuthi bayozwiwa ngokusebenzisa kwabo amazwi amaningi.”a—Mathewu 6:7.
Ngakho, uma uNkulunkulu engahambisani ‘nokuphindaphinda kwethu into efanayo,’ ingabe izinto ezisetshenziswa njengeziwusizo ekuphindeni imithandazo enjalo zona bezingamukeleka? Ngenxa yalokho, iBhayibheli alikhulumi ndawo ngenceku kaNkulunkulu weqiniso ethembekile eyake yasebenzisa amarosari, amasondo omthandazo, noma ezinye izinto ezinjalo ekukhulekeleni. Izizathu zalokho zicaca nakakhulu uma siqonda ukuthi uyini ngempela umthandazo kanye nenjongo yawo.
Umthandazo Othokozisa UNkulunkulu
Emthandazweni kaJesu oyisibonelo, wabhekisela ngokukhethekile kuNkulunkulu ngokuthi “uBaba Wethu.” Yebo, uMdali wethu akayena umuntu ozazisayo noma amandla ayimfihlakalo okumelwe kushwelezwe kuwo ngemithandazo, imicikilisho, noma amazwi aphindaphindwayo. Kunalokho, unguBaba onothando, futhi ufuna ukuba simbheke ngaleyo ndlela futhi simthande. UJesu wathi: “Ngiyamthanda uBaba.” (Johane 14:31) Umprofethi wakwa-Israyeli wasendulo wathi: “O Jehova, wena unguBaba wethu.”—Isaya 64:8.
Singasondela kanjani kuJehova njengoBaba ongokomoya? (Jakobe 4:8) Njengakunoma ibuphi ubuhlobo, sisondela kuNkulunkulu ngokukhulumisana naye. UNkulunkulu “ukhuluma” nathi ngeBhayibheli—iZwi lakhe elilotshiwe—lapho esembulela khona imisebenzi yakhe, ubuntu bakhe nenjongo yakhe. (2 Thimothewu 3:16) Nathi sikhuluma noNkulunkulu ngomthandazo. Kodwa-ke umthandazo onjalo kufanele ube qotho futhi usuke enhliziyweni, ungabi isilandelo nje.
Cabanga ngalokhu: Emkhayeni onemfudumalo nonothando, ngokuvamile izingane ezihlakaniphile zikhuluma kanjani nabazali bazo? Ingabe beziyophindaphinda amazwi noma inkulumo efanayo, mhlawumbe zibale ukuthi seziyiphinde kangaki leyo nkulumo? Lutho neze! Kunalokho, beziyokhuluma amazwi anenjongo, anenhlonipho futhi asuka enhliziyweni.
Ukuthandaza kuNkulunkulu kufanele kube into efanayo. Empeleni, singakhuluma noNkulunkulu cishe nganoma yini esikhathazeke ngayo. EyabaseFilipi 4:6, 7 ithi: “Ningakhathazeki ngalutho, kodwa kukho konke izicelo zenu mazaziwe nguNkulunkulu ngomthandazo nangokunxusa kanye nokubonga; ukuthula kukaNkulunkulu . . . kuyolinda izinhliziyo zenu namandla enu engqondo.” Ngokuvamile, uma sikhathazeke ngokuthile, singathandaza ngokuphindaphindiwe ngakho. Kodwa lokhu akufani nokuphindaphinda amazwi afanayo.—Mathewu 7:7-11.
IBhayibheli liqukethe izibonelo eziningi zemithandazo ethokozisa uNkulunkulu, kuhlanganise namahubo, noma izingoma nemithandazo eyashiwo uJesu ngokwakhe.b (IHubo 17 no-86, imibhalo eyisandulela; Luka 10:21, 22; 22:40-44) Omunye wale mithandazo utholakala kuJohane isahluko 17. Zinike ithuba lokuwufunda. Njengoba wenza kanjalo, phawula indlela uJesu athulula ngayo inhliziyo yakhe kuNkulunkulu. Phawula nendlela umthandazo wakhe ongenabugovu ngayo—indlela oveza ngayo uthando lwakhe olujulile ngabalandeli bakhe. Wathi: ‘Baba ongcwele, babheke ngenxa yomubi,’ uSathane.—Johane 17:11, 15.
Ingabe amazwi kaJesu uwezwa ewumcikilisho othile ongenanjongo? Lutho neze! Yeka isibonelo esihle asibekela sona! Yebo, bonke abafuna ukusondela kuNkulunkulu weqiniso kufanele bamazi kahle njengomuntu. Khona-ke, beshukunyiswa uthando olusekelwe olwazini, kumelwe balahle amasiko nemikhuba yenkolo engamthokozisi uNkulunkulu. Kwabanjalo, uJehova uthi: “Ngiyoba uyihlo, nina nibe amadodana namadodakazi ami.”—2 Korinte 6:17, 18.
[Imibhalo yaphansi]
a Emthandazweni wakhe oyisibonelo, uJesu akazange athi: “Khona-ke, kumelwe nithandaze lo mthandazo,” okwakuyophikisana namazwi ayesanda kuwasho. Kunalokho, wathi: “Khona-ke, kumelwe nithandaze ngale ndlela.” (Mathewu 6:9-13) Wayeqonde ukuthini? Njengoba umthandazo oyisibonelo ubonisa, kufanele sikhathalele kakhulu izinto ezingokomoya esikhundleni sezinto ezingokwenyama.
b Nakuba amahubo ayehlatshelelwa ngezikhathi ezihlukahlukene, ayengaphindaphindwa njengemilolozelo, futhi ayengasetshenziswa emicikilishweni ehlanganisa amarosari noma amasondo omthandazo.
WAKE WAZIBUZA?
◼ Ingabe iseluleko sikaJesu sokuba singaphindaphindi imithandazo siyakuthinta ukusetshenziswa kwamarosari namasondo omthandazo?—Mathewu 6:7.
◼ Imithandazo yethu kufanele yembuleni ngendlela esimbheka ngayo uNkulunkulu? —Isaya 64:8.
◼ Uma siwenqaba amanga angokwenkolo, uNkulunkulu uyosibheka kanjani? —2 Korinte 6:17, 18.