Ukusuka E-Olympia Kuya ESydney
ABANINGI babheka iMidlalo Yama-Olympic njengomncintiswano wemidlalo obaluleke kakhulu emhlabeni. I-World Book Encyclopedia ithi: “Asikho esinye isenzakalo sezemidlalo esikhanga abantu ngale ndlela. Le midlalo ihanjelwa yizigidi eziningana zabantu, kanti amakhulu ezigidi emhlabeni wonke ayibuka kuyithelevishini.”
Umlando Omfushane
IMidlalo Yama-Olympic yasungulwa eminyakeni eyizinkulungwane edlule. Ecabanga ukuthi imidlalo yokusubatha ithokozisa imimoya yabafileyo, amaGreki asendulo ayeba nemikhosi yesizwe eyayixuba inkolo nezemidlalo. Lena yayihlanganisa imidlalo yase-Isthmus, yaseNemea, yama-Olympic neyasePythian. Kule midlalo, eyama-Olympic yayaziswa kakhulu, ngoba yayidumisa uZeus, amaGreki ayembheka njengenkosi yonkulunkulu.
Kubonakala sengathi kuma-Olympic asendulo kwakuba nesenzakalo esisodwa kuphela, ukugijima ibanga elide. Kodwa ngokuhamba kwesikhathi kwahlanganiswa neminye imiqhudelwano, njengemijaho yezinqola zamahhashi kanye nezivivinyo ezinzima zamandla okukhuthazela. Izivakashi zazitheleka kulesi senzakalo zivela kuyo yonke indawo. Ukuze kuqinisekwe ukuthi ziphephile, kwakushaywa umthetho wokuba izikhali zibekwe phansi ngaphambi nangemva kwale midlalo.
Lapho iRoma iqala ukubusa, ama-Olympic aqala ukuncipha. Empeleni, amaRoma amaningi ayeyinyanya imidlalo yokusubatha. Umuntu owayehlukile kulokhu kwakunguMbusi uNero. Wangenela le midlalo ngo-67 C.E. futhi wayiwina yonke imiqhudelwano ayeyingenele. Kubonakala sengathi abantu ababeqhudelana naye babazi ukuthi kufanele bazihlenge engozini! Noma kunjalo, ngo-394 C.E., imidlalo yama-Olympic yayisimisiwe.
Ukuvuselelwa Kwama-Olympic
Eminyakeni engaba amakhulu angu-15 kamuva, lokho abavubukuli baseJalimane abakuthola ethafeni lase-Olympia yasendulo kwavuselela isithakazelo kule midlalo. Khona-ke, uBaron Pierre de Coubertin, umFulentshi oneminyaka engu-29 ubudala, wahlongoza ukuba lesi senzakalo sivuselelwe. Ngakho, ngo-1896 kwaba neMidlalo Yama-Olympic yokuqala yosuku lwanamuhla e-Athens. Kusukela ngalowo nyaka, kuye kwaba nemidlalo yama-Olympic, cishe ngokungaphuthi, njalo ngemva kweminyaka emine.
Abaningi namuhla bayilindela ngamehlo abomvu le midlalo. Kulo nyaka, izobanjelwa eSydney, e-Australia, kusukela ngo-September 15 kuya ku-October 1. Kuyoba nemidlalo engu-28, imiqhudelwano engu-292 kanye nezikhawu ezingu-635 zokuyingenela, abadlali bona bayoba ngaphezu kuka-10 300.
Nokho, eminyakeni yamuva nje kuye kwaba nezimpikiswano ngama-Olympic. Abantu abaningi baze bathi izinhloso ezinhle zama-Olympic zisengozini. Ukuhlolisisa okwenzekayo lapho kugqugquzelwa le midlalo kuzosivula amehlo kodwa futhi kusishaqise.
[Umthombo Wesithombe ekhasini 3]
Scala/Art Resource, NY