Ukubuka Ithelevishini Ngokuqapha

UMBIKO ohlanganiswe yiqembu lezingqapheli e-United States, othi Not in the Public Interest—Local TV News in America, uthi ithelevishini “iwumlandisi wezindaba ohamba phambili, umzanyana nomlolongi wombono womphakathi. I-TV ikuyo yonke indawo . . . Njengentuthu kagwayi, isemoyeni.” Futhi njengoba ukuhogela intuthu kagwayi kuyingozi, ngokufanayo ukuhlala amahora amaningi ubuka izinhlelo ze-TV ngokunganaki kuyalimaza—ikakhulukazi ezinganeni.

Mayelana nobugebengu nobudlova kuyi-TV, lo mbiko ofanayo uphawula ukuthi “imibiko eminingi yocwaningo iye yabonisa ukuthi ukubuka izithombe ezinobudlova kunethonya elibi ekhonweni lezingane lokufunda, kwandisa ulaka futhi kunciphisa uzwela.” Ngo-1992 i-American Medical Association yathi “ubudlova bethelevishini buyingozi esongela impilo yentsha.”

Ungalilawula kanjani ithonya lezinhlelo ze-TV ezilimaza izingane zakho? Lo mbiko ubala amanye amacebiso, athathwe ekutuseni kwezinhlangano ezimbalwa zempilo yomphakathi, akhuluma ngokuthi ungayibuka kanjani ithelevishini ngokuqapha. Amanye alawo macebiso ahlanganisa okulandelayo.

◼ Hlela futhi ulinganisele isikhathi osichitha ubuka i-TV. Beka imingcele yokuthi izingane zingayibuka nini. Ungayibeki i-TV emakamelweni ezingane.

◼ Beka ibalazwe eduze ne-TV ukuze izingane zikwazi ukubheka izindawo ezizibona ezinhlelweni.

◼ Yibuke nezingane zakho i-TV ukuze ukwazi ukuchaza umehluko phakathi kwezinto eziyinganekwane neziyiqiniso. Izingane eziningi ezineminyaka engaphansi kweshumi azikwazi ukuhlukanisa.

◼ Ungayibeki ithelevishini endaweni esobala. Beka ithelevishini ekhabetheni elinezivalo. Kuyokwenza kube nzima ukuyivula nokushintshashintsha iziteshi.