Amavulandlela Ezokwelapha
LAPHO eneminyaka engu-61, uJosé, ohlala edolobhaneni lase-Oupeye, eBelgium, watshelwa ukuthi wayedinga ukufakelwa isibindi. Uthi: “Ngashaqeka kakhulu.” Eminyakeni nje engamashumi amane edlule, kwakungenakwenzeka ukufakelwa isibindi. Ngisho nangawo-1970, amathuba okusinda ayengamaphesenti angaba ngu-30 kuphela. Nokho, namuhla, sekuwumkhuba ukufakela abantu isibindi, futhi izinga lempumelelo selithé xaxa.
Kodwa kusekhona isithiyo esikhulu. Njengoba ukufakelwa isibindi ngokuvamile kubangela ukopha okukhulu, odokotela bavame ukumpompela igazi lapho behlinza. Ngenxa yezinkolelo zakhe ezingokwenkolo, uJosé wayengalifuni igazi. Kodwa wayefuna ukufakelwa isibindi. Kwakungenakwenzeka? Abanye bangase bacabange kanjalo. Kodwa udokotela omkhulu ohlinzayo nozakwabo babenomuzwa wokuthi kwakungenzeka bamhlinze ngokuphumelelayo ngaphandle kwegazi. Futhi benza lokho kanye! Ngemva nje kwezinsuku ezingu-25 ehlinziwe, uJosé wabuyela ekhaya kumkakhe nendodakazi.a
Ngenxa yamakhono alabo umagazini i-Time obabiza ngokuthi “amaqhawe ezokwelapha,” ukwelapha nokuhlinza ngaphandle kwegazi sekuyinsakavukela. Kodwa kungani kudingeka kangaka? Ukuze siphendule lowo mbuzo, ake sihlole umlando omubi wokumpontshelwa igazi.
[Umbhalo waphansi]
a OFakazi BakaJehova babheka ukuhlinzwa kokufakelwa isitho somzimba njengendaba kanembeza womuntu siqu.
[Isithombe ekhasini 3]
Emhlabeni wonke njengamanje, kunodokotela abangaphezu kuka-90 000 abaye bakwenza kwaziwa ukuthi bazimisele ukwelapha oFakazi BakaJehova ngaphandle kwegazi