Intsha Iyabuza . . .

Ngingayithola Kanjani Imali?

“Ngifuna umsebenzi ozongiholela imali enhle.”—Tanya.

INTSHA eningi inombono ofana nokaTanya. Osemusha okuthiwa uSergio uthi: “Ngifuna imali yokuthenga imoto futhi ngikwazi ukuzithengela izingubo zokugqoka. Angifuni ukuncika kubazali bami ukuze ngithole yonke into.” ULaurie-Ann osemncane unesizathu esifanayo sokufuna umsebenzi. Uthi: “Ngiyintombazane, futhi ngiyakuthanda ukuthenga.”

Ngakho, akumangalisi ukuthi ngokukamagazini i-U.S.News & World Report, “abafundi [base-U.S.] abathathu kwabane basesikoleni esiphakeme sebeyasebenza ngemva kwesikole nangezimpelasonto.” Ngokwezinga elithile, lokhu kuveza “uthando lwemali” olungalinganiseli oludlangile ezweni lanamuhla elithanda izinto ezibonakalayo. (1 Thimothewu 6:10) Nokho, akuyona yonke intsha efuna imali evumela ukunqotshwa uthando lwezinto ezibonakalayo.

IBhayibheli lithi: ‘Imali ingeyesivikelo.’ (UmShumayeli 7:12, NW) Futhi kungase kube nezizathu eziningi ezizwakalayo ezingenza osemusha ongumKristu afune imali.a Ngokwesibonelo, u-Avian osemusha, uyachaza ukuthi kungani esebenza izinsuku ezimbili ngesonto: “Kungisiza ukuba ngizisekele njengoba ngiyiphayona elivamile [umshumayeli wesikhathi esigcwele].”

Kungenzeka ukuthi nawe unezizathu ezifanayo zokufuna itoho. Mhlawumbe unomgomo wokuya emhlanganweni wesigodi wamaKristu. Noma kungenzeka udinga izingubo ezengeziwe ezingafaneleka ukuba uzigqoke emihlanganweni yebandla. Kungakhathaliseki ukuthi isizathu siyini, lezi zinto zidinga imali. Yiqiniso, uJesu wathembisa ukuthi uNkulunkulu wayeyobanakekela labo ‘abafuna kuqala uMbuso kaNkulunkulu.’ (Mathewu 6:33) Kodwa lokhu akusho ukuthi kufanele uhlale nje usonge izandla ngale ndaba. (Qhathanisa nezEnzo 18:1-3.) Yiziphi-ke izinyathelo ezingokoqobo ongazithatha uma udinga ukuthola imali?

Isiqalo

Ake sithi abazali bakho bayakuvumela ukuthi usebenze, into yokuqala ongayenza kungase kube ukuya komakhelwane, othisha nezihlobo futhi ubatshele ukuthi ufuna umsebenzi. Uma unamahloni okubabuza ngokuqondile, ungase nje ubabuze ukuthi babesebenza kuphi lapho besebasha. Bangase bakunikeze imibono ewusizo. Uma abantu abaningi bazi ukuthi ufuna umsebenzi, kungenzeka uthole usizo noma uthunyelwe kubantu abafanele.

Ngokulandelayo, zama ukubheka ezikhangisweni zamaphephandaba nasemabhodini ezaziso ezitolo, esikoleni nakwezinye izindawo zomphakathi. Osemusha okuthiwa uDave uthi: “Ngawuthola kanjalo umsebenzi. Ngabheka iphephandaba, ngase ngibathumelela incwadi yami yezimfanelo nge-fax futhi ngabashayela ucingo.” Nokho, ingabe uqaphele ukuthi imisebenzi eminingi ayikhangiswa? Ngokukamagazini i-Seventeen, abanye balinganisela ukuthi “imisebenzi emithathu kweyishumi isuke ingekho kuze kube yilapho kufika umuntu ofanele ewufuna lowo msebenzi.” Mhlawumbe ungasiza umqashi abone ukuthi kudingeka akutholele umsebenzi!

Kodwa kanjani? Ungase ucabange: ‘Angikaze ngisebenze ngaphambili.’ Nokho, cabangisisa. Ingabe wake wanakekela ingane yakini lapho abazali benu bengekho noma wagada abantwana babanye abantu? Lokhu kubonisa ukuthi unokwethenjelwa. Ingabe wake wasiza ubaba wakho lapho elungisa imoto? Lokho kubonisa ukuthi unekhono lokukhenikha. Ingabe uyakwazi ukubhala ngomshini noma ukusebenzisa i-computer? Noma ingabe wathola amamaki amahle emsebenzini wesikole owawusungula wena? Lawa amaphuzu amahle angenza abaqashi bakuthathe.

Ungayibukeli phansi imisebenzi yakho yokuzilibazisa nezithakazelo. Ngokwesibonelo, uma ukwazi ukudlala insimbi yomculo, bheka ukuthi asikho yini isikhala esitolo somculo. Ngokusobala unesithakazelo emikhiqizweni ethengiswa yileso sitolo futhi ngokuqinisekile ungaba sesimweni esingcono sokuphendula imibuzo yabathengi.

Ukufaka Isicelo Somsebenzi

Ake sithi usuwenzile amalungiselelo engxoxo yokufuna umsebenzi. Bheka indlela ogqoka futhi uzilungise ngayo, njengoba ukubukeka kusho okuthile ngawe. Kungasho ukuthi “uthembekile, ucocekile, uhlelekile”—noma kungasho okuphambene nalokho. IBhayibheli liwusizo uma likhuthaza abesifazane abangamaKristu ukuba “bazihlobise ngezingubo ezilungiswe kahle, ngesizotha nangokuhluzeka kwengqondo.” (1 Thimothewu 2:9) Lokho kuhlanganisa namadoda. Ungagqoki izingubo eziyimfashini noma ezinobudlabha lapho uya engxoxweni yokufuna umsebenzi, kungakhathaliseki ukuthi lowo msebenzi unjani.

Isimo sakho sengqondo nemikhuba yakho nakho kusho okuningi ngawe. Sebenzisa uMthetho Wegolide: Phatha abanye ngendlela ofuna ukuphathwa ngayo. (Mathewu 7:12) Fika ngesikhathi. Bonisa intshiseko futhi uphaphame. Yiba nemikhuba emihle. Ngaphandle kokuqhosha noma ukweqisa, chaza ukuthi kungani unomuzwa wokuthi uyawufanelekela lo msebenzi. Ungagwegwesi.

Abanye ochwepheshe batusa ukuba ufike (noma uthumele kusengaphambili) incwadi yakho yezimfanelo ebhalwe kahle nehlelekile. Kufanele ibhalwe igama lakho, ikheli, inombolo yocingo, umsebenzi owufunayo, izinga lemfundo (kuhlanganise nanoma iziphi izifundo ezikhethekile oye wazenza), umsebenzi owake wawenza ngaphambili (kuhlanganise kokubili umsebenzi oholelayo nowokuzithandela), amakhono akhethekile, izithakazelo zakho nemisebenzi yokuzilibazisa (lokhu kungabonisa amakhono akho), futhi ubhale ukuthi amaphepha obufakazi akhona uma bewadinga. Ungase ulungiselele nephepha eliseceleni elinohlu lwamagama, amakheli nezinombolo zocingo zabantu abathile abangase bakukhulumele kahle kulo msebenzi. Nokho, qiniseka ukuthi ucela imvume yabo kusengaphambili. Bangahlanganisa abaqashi bakho bangaphambili, uthisha, umeluleki wasesikoleni, umngane osekhulile—nanoma ubani ongafakazela amakhono noma izici zobuntu bakho.

Ukuzisebenza

Kuthiwani-ke uma naphezu kwemizamo yakho yonke ungawutholi umsebenzi? Lokhu kuvamile emazweni amaningi. Kodwa ungadangali. Ukuqala ibhizinisi lakho kungase kube yikhambi. Ziyini izinzuzo zalokhu? Ungase ukwazi ukuzenzela isimiso sakho siqu futhi usebenze kakhulu noma kancane ngendlela oyithandayo. Yiqiniso, ukuzisebenza kudinga ukuba uzimisele, uzithibe futhi uzimisele ukuvela namacebo amasha.

Kodwa nhloboni yebhizinisi ongase uliqale? Cabanga ngomakhelwane bakho. Ingabe kunesidingo sezimpahla noma izinkonzo okungekho muntu ozenzayo? Ngokwesibonelo, ake sithi uyazithanda izilwane. Ungase ugeze noma ugunde izilwane zomakhelwane bakho bese bekukhokhela. Noma mhlawumbe ukwazi ukudlala insimbi yomculo. Ingabe ungabafundisa abanye ukuyidlala? Noma mhlawumbe ungase wenze umsebenzi abanye abawubukela phansi, njengokugeza amafasitela noma ukuhlanza. UmKristu akanamahloni ngokusebenza ngezandla zakhe. (Efesu 4:28) Ungase uzame ngisho nokufunda ikhono elisha. Hlola imitapo yezincwadi ukuze uthole izincwadi zokuzifundisa, noma ucele umngane akufundise. Ngokwesibonelo, uJoshua osemusha wathatha izifundo zobuciko bokubhala. Ngakho waqala ibhizinisi elincane lokubhala izimemo zemishado nezemicimbi.—Bheka ibhokisi elithi “Imisebenzi Ongayenza.”

Isixwayiso: Ungagijimeli kunoma iliphi ibhizinisi ngaphambi kokuhlola zonke izindleko nezici ezihilelekile. (Luka 14:28-30) Okokuqala, xoxa ngakho nabazali bakho. Futhi xoxa nabanye abaye baba namabhizinisi anjalo. Ingabe kuyodingeka ukhokhe intela? Ingabe kuyodingeka uthole amalayisense noma izincwadi zemvume? Xoxa neziphathimandla zendawo ukuze uthole imininingwane.—Roma 13:1-7.

Linganisela!

Yiqiniso, kunengozi uma wenza okuningi kunalokho ongakwazi ukukuthwala. ULaurie-Ann wathi ngentsha esebenzayo: “Abawenzi umsebenzi omningi wesikole owenzelwa ekhaya, futhi basuke bekhathele kakhulu ukuba balalele ekilasini.” Yiqiniso, ezingxenyeni ezithile zomhlaba, intsha ayinakuzikhethela kodwa kufanele isebenze isikhathi eside ukuze isize imikhaya yakubo ikwazi ukuphila. Kodwa uma ungekho ngaphansi kwaleso simo, kungani weqisa kule ndaba? Ngokochwepheshe abaningi, ukusebenza amahora angaphezu kwangu-20 isonto ngalinye lapho ufunda esikoleni kuwukweqisa futhi akuzuzisi. Abanye basikisela ukuba usebenze amahora angu-8 kuya kwayishumi isonto ngalinye.

Uma usebenzisa isikhathi sakho esiningi, amandla nokuphaphama emsebenzini wangemva kwesikole, impilo yakho, amamaki futhi ikakhulukazi ingokomoya lakho kungaqala ukwehla. Yebo, akubona abantu abadala kuphela abaye baminyaniswa ‘amandla engcebo okukhohlisa nezifiso zazo zonke ezinye izinto.’ (Marku 4:19) Ngakho linganisela. USolomoni waxwayisa ngokusebenza ngokweqile, ethi: “Kungcono ukhweshe lokuthula kunezandla zombili zigcwele umshikashika kanye nokufuna umoya.”—UmShumayeli 4:6.

Yebo, ukwenza imali kungase kudingeke. Futhi uma izisusa zakho zokwenza kanjalo zizinhle futhi zibonisa ukuhlonipha uNkulunkulu, njengezika-Avian, okukhulunywe ngaye ekuqaleni, ungaqiniseka ukuthi uJehova uyobusisa imizamo yakho. Nokho, qiniseka ukuthi umsebenzi awukubambi kangangokuba uze ukhohlwe ‘yizinto ezibaluleke ngokwengeziwe,’ okungukuthi, izithakazelo ezingokomoya. (Filipi 1:10) Nakuba imali ingase ibe ‘isivikelo,’ ubuhlobo bakho noNkulunkulu obuyokwenza uphumelele ngempela.—UmShumayeli 7:12, qhathanisa ne-NW; IHubo 91:14.

[Imibhalo yaphansi]

[Ibhokisi ekhasini 22]

Imisebenzi Ongayenza

• Ukugeza amafasitela

• Ukudayisa noma ukudiliva iphephandaba

• Ukususa iqhwa

• Ukusebenza engadini noma ukusika utshani

• Ukunakekela abantwana abancane

• Ukuphakela izilwane, ukuzihambisa noma ukuzigeza

• Ukupholisha izicathulo

• Ukuchibiyela izingubo noma uku-ayina

• Ukutshala izitshalo nokuzidayisa

• Ukufuya izinkukhu noma ukudayisa amaqanda

• Ukubhala ngomshini noma nge-computer

• Ukwenzela abanye imisebenzi ethile

• Ukudiliva izimpahla

• Ukufundisa umculo noma ezinye izifundo

[Isithombe ekhasini 21]

Ukusebenza ngokweqile kungenza amamaki akho ehle