Amandla Okukhangisa
ESIKHATHINI eside esidlule, isikhathi sezikhangiso zezentengiselwano kuyithelevishini sasethulwa ngalawa mazwi, “Manje kulandela amazwi ambalwa avela kubaxhasi bethu.” Abaxhasi yizinkampani ezikhokhayo ukuze imikhiqizo yazo ikhangiswe. Nakuba “amazwi ambalwa avela kubaxhasi bethu” esemaningi, abaxhasi basayixhasa ngokwezimali imithombo yezindaba nezokuzijabulisa—ithelevishini, omagazini, amaphephandaba nomsakazo. Ngenxa yalokho, abaxhasi bazama ukulawula ukuthi yini evela emithonjeni yezindaba nokuthi yini okungafanele ivele.
Ngokwesibonelo: Ngo-1993 inkampani eyenza imoto kanokusho yaseJalimane yabhalela omagazini abangu-30 ibatshela ukuthi izikhangiso zezimoto zayo kufanele zinyatheliswe “engosini yomhleli efanelekile kuphela.” Le ncwadi yachaza ukuthi omagazini abanalesi sikhangiso akufanele banyathelise noma yini egxeka le moto, imikhiqizo yaseJalimane, noma izwe laseJalimane ngokwalo. Akumangalisi-ke ukuthi le nkampani, echitha amaRandi ayizigidi ezingu-74,6 ekukhangiseni komagazini, ibingalindela ukuyithola ‘ingosi yomhleli efanelekile.’
Akumangalisi futhi lapho omagazini abakhangisa izingubo ezintsha zomshado bengazamukeli izikhangiso zezingubo ezingamasekeni noma lapho amaphephandaba anohlu lwabathengisi bezindlu engakutshela ukuthi uyithola kanjani indlu ngaphandle kokusebenzelana nomthengisi. Ngokufanayo, akufanele kusimangalise lapho imithombo yezindaba ekhangisa ngogwayi noma ngamathikithi emidlalo yemali ingakugxeki ukubhema noma ukugembula.
Imikhuba Yabathengi
Ngakho-ke, amandla ezikhangiso adlulela ngalé kokuthengisa izimpahla. Akhuthaza indlela yokuphila yabathengi, umkhuba wembulunga yonke ogxile ezintweni ezibonakalayo.
Ingabe kukhona okungalungile ngalokho? Kuxhomeke ekutheni ubuza bani. Abakhangisi bathi abantu bayakuthanda ukuthenga nokuba nezinto; ukukhangisa kufeza izifiso zabo. Ngaphezu kwalokho, bathi ukukhangisa kuvula amathuba emisebenzi, kuxhasa ezemidlalo nezobuciko, kwenza abantu bayithole kalula imithombo yezindaba, kukhuthaza ukuncintisana, kuthuthukisa imikhiqizo, kugcina amanani ephansi, futhi kusiza abantu bathenge benolwazi.
Abanye bathi ukukhangisa kwenza abantu bahlale befuna izinto futhi banganeliswa yilokho abanakho, okukhuthaza ukuhaha. Umcwaningi u-Alan Durning uyabhala: “Izikhangiso, njengenkathi esiphila kuyo, ziyashintshashintsha, zikhuthaza ukuphilela injabulo, zinemibono ehlukahlukene futhi zishisekela imfashini; zidumisa abantu, ziveza ukusebenzisa izinto njengendlela yokuthola ukwaneliseka, futhi ziqinisekisa ukuthi intuthuko yezobuchwepheshe iyimpumelelo.”
Amandla Okukhangisa Kuwe
Ingabe ukukhangisa kwezentengiselwano kuyakulolonga lokho esiyikho nalokho esikufunayo? Mhlawumbe. Nokho, ukuthi lelo thonya likhulu noma lincane kuxhomeke kwamanye amathonya.
Uma siqondiswa izimiso nezindinganiso zeBhayibheli, siyoqaphela ukuthi akukho lutho olungalungile ngokuba nezinto ezibonakalayo. Phela, uNkulunkulu wabusisa u-Abrahama, uJobe, uSolomoni nabanye ngengcebo enkulu.
Ngakolunye uhlangothi, uma sisebenzisa izimiso ezingokomBhalo, siyogwema ukunganeliseki kwalabo abafuna ukwaneliseka nenjabulo ngokuhlala bephishekela izinto ezibonakalayo. Umyalezo weBhayibheli awuthi “Thenga uze waneliswe.” Kunalokho, lisitshela ukuthi:
Themba uNkulunkulu. “Yala labo abacebile esimisweni samanje sezinto ukuba bangaqhoshi, futhi bangabeki ithemba labo engcebweni engaqinisekile, kodwa kuNkulunkulu, osinikeza zonke izinto ngokucebile ukuze sizijabulele.”—1 Thimothewu 6:17.
Yaneliseka. “Asilethanga lutho ezweni, futhi asinakuhamba nalutho. Ngakho, uma sinokokuzisekela nokokuzimboza, siyokwaneliswa yilezizinto.”—1 Thimothewu 6:7, 8.
Yiba nesizotha. “Ngifisa ukuba abesifazane bazihlobise ngezingubo ezilungiswe kahle, ngesizotha nangokuhluzeka kwengqondo, hhayi ngezitayela zokwaluka izinwele nangegolide noma amaparele noma ngemvunulo ebiza kakhulu, kodwa ngendlela efanele abesifazane abathi bahlonipha uNkulunkulu, okuwukuthi, ngemisebenzi emihle.”—1 Thimothewu 2:9, 10.
Yazi ukuthi ulwazi lokuhlonipha uNkulunkulu luphakeme kunengcebo. “Ubusisiwe umuntu othola ukuhlakanipha nomuntu ozuza ingqondo, ngokuba inzuzo yakho inhle kunenzuzo yesiliva, nokutholakalayo kukho kunegolide. Kuyigugu kunamarubi, nakho konke ongakufisa akunakulinganiswa nakho. Ubude bezinsuku busesandleni sakho sokunene, nakwesokhohlo kukhona ingcebo nodumo. Izindlela zakho ziyizindlela zokumnandi; yonke imikhondo yakho ingukuthula. Kungumuthi wokuphila kwabakubambayo, nababambelela kukho babusisiwe.”—IzAga 3:13-18.
Yiba nomoya wokupha. “Kukhona injabulo eyengeziwe ekupheni kunekhona ekwamukeleni.”—IzEnzo 20:35.
Umuntu angase athi lezi zihloko eziwuchungechunge ziwuhlobo lokukhangisa, “zithengisa” umqondo wokuthi amagugu ezinto ezibonakalayo akufanele abaluleke ngaphezu kwamagugu angokomoya. Akungabazeki ukuthi uyavumelana naleso siphetho.
[Ibhokisi ekhasini 9]
Ukumemezela UMbuso KaNkulunkulu
Iyiphi enye yezindlela ezingcono kakhulu zokufinyelela abantu ngomyalezo oshukumisayo? Incwadi ethi Advertising: Principles and Practice ithi: “Ezweni elikahle umkhiqizi wezinto ngamunye angakwazi ukuxoxa ngokuqondile nomthengi ngamunye ngomkhiqizo noma ngenkonzo ethengiswayo.” Sekuyiminyaka engaba ngu-2000 amaKristu eqiniso ememezela uMbuso kaNkulunkulu ngokuzithandela esebenzisa le ndlela. (Mathewu 24:14; IzEnzo 20:20) Kungani amabhizinisi engeziwe engayisebenzisi le ndlela yokufinyelela abantu? Le ncwadi iyachaza: “Kumba eqolo. Ukuhambela kwabathengisi indlu ngayinye kungabiza ngaphezu kuka-$150 [R745].” Yiqiniso, amaKristu “akhangisa” ngoMbuso kaNkulunkulu ngokuzithandela. Kuyingxenye yokukhulekela kwawo.
[Izithombe ekhasini 8]
Umyalezo weBhayibheli awuthi “Thenga uze waneliswe”