Isikole Sase-Afrika—Sasifundisani?

NGUMLOBELI WE-PHAPHAMA! EGHANA

ISIKOLE sase-Afrika? Abanye abantu baseNtshonalanga kungase kubamangalise ukwazi ukuthi ilungiselelo elinjalo lalikhona ngempela ezikhathini ezidlule. Ngokudabukisayo, umbono weHollywood ngomAfrika njengomuntu ononya ophethe umkhonto uye wahlala ezingqondweni zabantu. Abaningi bakuthola kunzima nje ukucabanga ukuthi umAfrika wasendulo wayengabhekwa kanjani njengomuntu ofundile.

Ngempela kuyiqiniso ukuthi ama-Afrika akhulela emiphakathini yamasiko awazange ayithole imfundo yencwadi noma imfundo evamile yasekilasini. Nokho, esikhathini eside ngaphambi kokuba uhlobo lwemfundo evamile yaseYurophu lufike kuleli zwekazi, imiphakathi eminingi yase-Afrika yayinezimiso zemfundo eziphumelelayo ezazisiza abantwana ukuba bakuhlomele kahle ukusebenza nokuphila emasikweni akubo endawo. Ngokwesibonelo, cabangela indlela yokufunda yama-Akan, abantu baseGhana abakhuluma isiTwi.

Isikole Sasekhaya

Phakathi kwama-Akan, ikhaya lalisebenza njengendawo eyinhloko yokufunda. Imfundo yomntwana yayiqala lapho efunda ukukhuluma kubazali bakhe. Ngesikhathi esifanayo, wayethola nezifundo zakhe zokuqala ngemikhuba emihle. Ngokwesibonelo, lapho isivakashi ekhaya simbingelela, umntwana wayefundiswa indlela efanele yokuphendula ngesizotha. Kamuva, lapho umntwana ethunywa, wayetshelwa indlela enesizotha yokudlulisela noma yimiphi imiyalezo ayithunyiwe.

Ngaleyo ndlela, indlela yokufundisa yama-Akan yayifana naleyo eshiwo eBhayibhelini kuzAga 22:6: “Khulisa umntwana ngendlela eyakuba-ngeyakhe; kuyakuthi lapho esekhulile, angasuki kuyo.” Abazali, ikakhulukazi ubaba, babenesithakazelo ekukhuliseni abantwana. Isaga sama-Akan sasithi: “Uma umntwana engafuzi unina, ufuza uyise.”

Njengoba umntwana ayekhula, kwakukhula nokujula kwemfundo yakhe. Wayefundiswa ngokuphila, hhayi ngezincwadi, kodwa ngezindaba ezishukumisa ingqondo, ezinjengeyesicabucabu sasenganekwaneni okuthiwa uKwaku Ananse. Yeka ukuthi abantwana babezithanda kanjani lezi zindaba! Phakathi nomoya wokuhwalala, noma ngobusuku obubandayo obunonyezi, babehlala bazungeze umlilo bazijabulele ngokusuka enhliziyweni lezi zindaba zokunqoba nokwehlulwa.

Enye indaba edumile ithi u-Ananse wawuhamba wonke umhlaba ukuze afake konke ukuhlakanipha komhlaba ebhodweni. Njengoba kwakubonakala ukuthi wayewufezile umsebenzi wakhe, wanquma ukulengisa leli bhodwe phezulu esihlahleni, ukuze lokhu kuhlakanipha kungatholwa muntu. Waqala umsebenzi onzima wokugibela esihlahleni, leli bhodwe eligcwele ukuhlakanipha lilenga esiswini sakhe. Njengoba ayezabalaza, indodana yakhe eyizibulo, uNtikuma, yaqhamuka futhi yammemeza: “Hawu, baba! Ubani ongagibela isihlahla elengise ibhodwe esiswini sakhe? Awulibelethi ngani ukuze ukwazi ukunyakaza kahle?” U-Ananse wabheka phansi endodaneni yakhe wabe esememeza: “Usithathaphi isibindi sokungifundisa?”

Kodwa manje kwase kusobala ukuthi okunye ukuhlakanipha kwakungakangeni ebhodweni lakhe! Ethukutheliswe yilokhu, u-Ananse walijikijela phansi leli bhodwe, laphahlazeka futhi lasakaza konke ukuhlakanipha. Abafika kuqala lapho baba abahlakaniphe kunabo bonke. Isifundo: Akekho umuntu onegunya lokwengamela ukuhlakanipha. Ngaleyo ndlela ama-Akan ayethi: “Umuntu oyedwa akawenzi umkhandlu.”—Qhathanisa nezAga 15:22; 24:6.

Amakhono Okuphila

Imfundo yama-Akan yayihlanganisa nokuqeqesha emakhonweni okuphila. Abafana abaningi babethatha imisebenzi yawoyise—ngokuvamile ukulima. Kodwa kwakunamanye amakhono okwakudingeka afundwe, njengokuzingela, ukukhama iwayini ezihlahleni zamasundu, nobuciko obunjengokwaluka obhasikidi. Imisebenzi eyinkimbinkimbi, njengokubaza amapulangwe noma ukwaluka, abafana babeyifundiswa izingcweti. Futhi kuthiwani ngamantombazane? Ukuqeqeshwa kwawo kwakugxile ngokuyinhloko emakhonweni okunakekela ikhaya njengokukhama amafutha emifino, ukwenza insipho nezitsha zobumba, ukuphotha ukotini, njalonjalo.

Isayensi yayingashiywa ngaphandle “ohlelweni lwezifundo” zesikole esingokwesiko. Ulwazi lwamakhambi okwelapha, ukuthakwa nokwabiwa kwawo, lwaludluliswa kusuka kubaba kuya endodaneni noma kusuka kugogo noma kumkhulu kuya kumzukulu. Umntwana wayefunda nokubala izinombolo, esebenzisa iminwe yakhe kanye nezimabula, amatshe, nezinti ezinezimpawu. Imidlalo enjenge-oware ne-draught yayithuthukisa amakhono okubala.

Ngokuya ezigcawini zenkantolo zikawonk’ uwonke, umAkan osemusha wayezuza nokuqonda izimiso zezombangazwe nezokwahlulela. Imingcwabo kanye nemicimbi yokuzijabulisa kwakungamathuba okufunda izililo, izinkondlo, umlando, umculo, ukushaya izigubhu, nokusina kwabantu bendawo.

Umthwalo Wemfanelo Emphakathini

Phakathi kwama-Akan, umntwana wayengeyena unkom’ idla yodwa. Kusukela ebuntwaneni wayeqasheliswa umthwalo wakhe wemfanelo emphakathini. Wayethola izifundo zakhe zokuqala ngalokhu lapho edlala nontanga yakhe. Lapho esemdala wayehlanganyela emisebenzini yokubambisana njengokusebenzela umphakathi. Lapho eziphatha kabi, isijeziso sasingakhishwa abazali bakhe kuphela, kodwa nanoma yiliphi ilungu elidala lomphakathi. Ngempela, kwakubhekwa njengesibopho sokuziphatha okuhle somuntu omdala ukujezisa noma yimuphi umntwana oziphatha kabi.

Isiyalo esinjalo sasemukelwa kahle ngoba abantwana babefundiswa ukuhlonipha abantu abadala. Eqinisweni, ama-Akan ayevame ukuthi: “Isalukazi asiyena ugogo womuntu oyedwa kuphela.” Ngaleyo ndlela ukuhlonipha nokusiza asebekhulile kwakuyisibopho. Futhi noma yimuphi umntwana owayenqaba ukusiza umuntu omdala, ngaphandle kwesizathu esizwakalayo, wayecetshwa kubazali bakhe.

Imfundo Engokwenkolo

Ama-Akan ayeyithanda kakhulu inkolo, eyihlonipha imvelo nendawo yonke engaziwa. Yiqiniso, ayekholelwa konkulunkulu abaningi. Noma kunjalo, ama-Akan ayekholelwa ebukhoneni boMuntu Ophakeme oyedwa. (Roma 1:20) Igama lesi-Akan elisho “uNkulunkulu,” noma yimuphi unkulunkulu, lithi onyame. Nokho, kuma-Akan lelo gama labonakala lingakwanele ukuchaza uMdali. Ngakho, ambiza ngokuthi u-Onyankopɔn, okusho ukuthi “uNkulunkulu Okuwukuphela Kwakhe Omkhulu.”

Onkulunkulu abangaphansi babekhulekelwa ngoba kukholelwa ukuthi kwakuyilungiselelo likaNkulunkulu Omkhulu. Ezingqondweni zawo lokhu kwakufana nendlela inkosi eyayikhonzwa ngayo ngezinduna. Nakuba kunjalo, umntwana ngamunye wama-Akan wayefundiswa lenkolo.

Imfundo Engokwesiko Namuhla

Eminyakeni yamuva nje izigidi zama-Afrika ziye zafudukela emadolobheni amakhulu lapho imfundo evamile yasekilasini icishe yathatha khona isikhundla sezindlela ezingokwesiko zokufundisa. Noma kunjalo, isikole sase-Afrika sisaqhubeka sichuma kweminye imiphakathi, ikakhulukazi emaphandleni. Phela, amanye ama-Afrika aye aba ngisho nanenzuzo yemfundo engokwesiko kanye nemfundo evamile yasesikoleni!

Ngokwesibonelo, cabanga ngesikhonzi esingumKristu saseGhana okuthiwa u-Alfred. Naphezu kokujabulela imfundo evamile yasesikoleni, uzihlonipha kakhulu izici eziningi zendlela yokuphila engokwesiko. U-Alfred uthi: “Izihlobo zami eziningi ezingafundile, nakuba zinemfundo engokwesiko kuphela, zingabafundisi abahle kakhulu ezicini eziwusizo zokuphila. Ukusebenza nezinye ezingamaKristu kuzo kuye kwangifundisa izindlela eziningi eziphumelelayo zokunikeza isigijimi sami ngendlela elula, eshaya emhloleni. Ngaleyo ndlela ngingafinyelela abantu abanesizinda esingokwesiko kanye nalabo abanemfundo evamile yasesikoleni. Ngokuvamile, ngithatha isaga noma umfanekiso osetshenziswa yilaba bantu, ngiwulungise, bese ngiwufaka ezinkulumweni zami zeBhayibheli. Ngokuvamile lokhu kuzihlaba umxhwele kakhulu izilaleli! Nokho, eqinisweni udumo kufanele luye kulamadoda nabesifazane abaqeqeshwe ngokwesiko.”

Khona-ke, ngokusobala, isikole sase-Afrika sinezici eziningi ezithandekayo futhi sifanelwe inhlonipho, hhayi ukudelelwa. Kungenzeka asizange siziveze izimangaliso zobuchwepheshe, kodwa saveza isimo somkhaya esiqinile, ukuzwana, nabantu abahlakaniphile, abanesimo esikhangayo senjabulo, abanomoya wokupha nowokungenisa izihambi. Khona-ke, akumangalisi ukuthi abase-Afrika abaningi abahlala emadolobheni bazama ukuhlala bexhumana nezihlobo ezihlala emaphandleni ngokuzivakashela ngezikhathi ezithile. Izenzakalo ezinjalo zinezikhathi ezingathandeki. Ngokuvamile abantu abahlala emadolobheni bayashiyeka lapho kuziwa emikhubeni engokwesiko. Ngokwesibonelo, ngokuvamile abazi ukuthi lapho uxhawula iqembu, indlela “efanele” iwukuba uqale ngakwesokudla uye ngakwesobunxele. Noma kunjalo, ukuvakasha okunjalo kungaba okuqabulayo kubo bonke.

Noma kunjalo, kumelwe kuvunywe ukuthi nakuba isikole esingokwesiko sase-Afrika safundisa inhlonipho nokuzinikela, asizange silufundise ulwazi olunikeza ukuphila lukaJehova neNdodana yakhe, uJesu Kristu. (Johane 17:3) OFakazi BakaJehova banelungelo lokusebenza phakathi kwama-Akan namanye amaqembu ezinhlanga zase-Afrika ukuze bazinikeze lolu lwazi olubalulekile. Baye bafundisa izinkulungwane zase-Afrika ezintula imfundo evamile yasesikoleni ukuzifundela nokubhala ukuze zikwazi ukuzitadishela iZwi likaNkulunkulu. Kulabo “abaqaphela isidingo sabo esingokomoya,” lena imfundo ebaluleke kakhulu umuntu angayithola.—Mathewu 5:3.

[Izithombe ekhasini 25]

Phakathi kwama-Akan, umntwana wayeqasheliswa umthwalo wakhe wemfanelo emphakathini

[Isithombe ekhasini 26]

EmaHholo OMbuso oFakazi BakaJehova kufundiswa abangafundile