1995—Kuthiwani Ngekusasa Lethu?

“Izwe lidinga isiqondiso esingcono kunezikhalazo ezivamile zombuso wentando yeningi nezimakethe—kodwa asikho esitholakalayo.”

—UWill Hutton, kuyi-Guardian Weekly.

NGOKOMBONO womuntu, lawo mazwi angase abonakale eyiqiniso. Izwe libonakala lintula isiqondiso esinokwethenjelwa esingaholela ekuthuleni, ekulondekeni, ebulungiseni, ekulinganeni, nakuhulumeni omuhle. Umuntu uye wazama cishe zonke izimiso zohulumeni, kusukela emibusweni ephethwe amakhosi kuya kuma-republic, kusuka emibusweni yobushiqela kuya emibusweni yentando yeningi, kodwa nakuba kunjalo usathola izwe lakhe licishe lingabuseki. Kufanele aphendukelephi manje?

Kubonakala kunokuzikhethela—indlela eyisa ezweni elinobudlova, ubugebengu, ukonakala, ukungabi nabulungisa, ubuzenzisi benkolo nobezombangazwe, ukuzondana kwezizwe, nokuxhashazwa kwabampofu okwengeziwe. Leyo indlela abanye abathi iholela esiphithiphithini.

Noma kukhona indlela ewumqansa enzima, edinga ukuzidela eyisa ezweni elingcono elisekelwe ekhambini likaNkulunkulu eliwuhulumeni, elitholakala eBhayibhelini. Inzima ngoba kudingeka ukuziphatha okuhle, ukuzidela komuntu siqu, ukubheka ukuphila ngombono ongokomoya, nokukholelwa kuNkulunkulu onenjongo. Kodwa ukuze umuntu aphumelele kuleyo ndlela ewumqansa kudingeka futhi ukuba azithobe—azithobe phambi koMdali wakhe. Kumelwe aphendukele kuNkulunkulu ukuze athole ukubusa okulungile. Umphostoli ongumKristu uPetru waluleka: “Ngakho-ke, zithobeni ngaphansi kwesandla sikaNkulunkulu esinamandla, ukuze aniphakamise ngesikhathi esifanele; kuyilapho niphonsa konke ukukhathazeka kwenu phezu kwakhe, ngoba uyanikhathalela.”—1 Petru 5:6, 7; IsAmbulo 4:11.

Ubani Otshala Inzondo?

Umuntu ngokwakhe akanakulishintsha ngokuphelele lelizwe libe elilungile—izici ezimbi zobugovu ziyinqwaba futhi zinamandla kakhulu. Umprofethi uJeremiya wayeqinisile lapho ebhala: “Ngiyazi, Jehova, ukuthi indlela yomuntu ayikuye uqobo; akukuyo indoda ukuba ihambe, iqondise izinyathelo zayo.” (Jeremiya 10:23) Ngaphandle kukaNkulunkulu, umuntu akanakuziqondisa ngokuphumelelayo izinyathelo zakhe ukuze kuzuze wonke umkhaya wesintu. Ngani? Ngoba ngaphezu kokungapheleli kwethu esakuzuza njengefa, ngaso sonke isikhathi kunaleso sitha esingabonakali uSathane, esikulungele ukubangela abantu ukuba bahlanganyele empini echitha igazi, njengoba senza eRwanda.—Genesise 8:21; Mathewu 4:1-11.

Ukuze atshale ubandlululo, inzondo, nokubulala ezinhliziyweni nasezingqondweni zabantu, uSathane uye wafaka izizwe imibono yokuphakama kobuzwe, isizwe, nenkolo. Lemfundiso ejulile yenzondo igxiliswa kusuka ebuntwaneni ngabazali abanezingqondo ezigxiliswe kuyo, ngokuvamile inkolelo enamakhulu eminyaka ikhona. Khona-ke lenkolelo iqiniswa izimiso zesikole nezimfundiso ezingokwenkolo. Ngaleyo ndlela izigidi zabantu zikhula zinenzondo nobandlululo ezinhliziyweni zazo. Ziyalolongwa, zikhohliswe kusuka ebuntwaneni, ukuba ziphendukele abanye abantu ziqondiswa abaholi bezombangazwe nabenkolo abangenazimiso abangamaphekula. Ukushiwo kweziqubulo ezingenangqondo nezinkulumo eziqoshiwe zabaholi kungakutshala lokhu, kungokhela umlilo wequbula, ongagcina ubangele “ukuhlanzwa kohlanga” noma ukuqothulwa kohlanga.

Ebonisa lokho isikhathi esizayo esiseduze esingase sikulethe, uMartin van Creveld, isazi-mlando sezempi kwa-Israel, wabhala kwethi The Transformation of War: ‘Ngokombono wanamuhla, kubonakala kunamathuba amakhulu okuthi ukushisekela inkolo ngokungenangqondo kuzoba nendima enkulu ekukhuthazeni izimpi zezikhali’ eNtshonalanga kunanoma isiphi isikhathi “kuleminyaka engu-300 edlule.” Ngakho inkolo, kunokuba ibe ithonya lokuthula nokuthuthukisa ingokomoya lesintu, imi ndawonye endimeni yayo engokomlando yokubangela inzondo, impi, nokubulala.

Kuthenjiswa Ikusasa Elihlukile

Ukuze isintu sifanelekele ukuphila ezweni elisha elinobulungisa, khona-ke kumelwe sihlanganyele ekugcwaliseni isiprofetho sika-Isaya: “[UJehova] uyakusifundisa izindlela zakhe, sihambe emikhondweni yakhe, . . . Uyakwahlulela phakathi kwezizwe, anqume phakathi kwabantu abaningi; bayakukhanda izinkemba zabo zibe-ngamakhuba, nemikhonto yabo ibe-ngocelemba; isizwe asiyikuphakamisela isizwe inkemba, zingabe zisafunda ukulwa.”—Isaya 2:3, 4.

Obani namuhla abalalela lesi siprofetho esihle emhlabeni wonke? Obani abafa eRwanda kunokuba babulale abakholwa kanye nabo besinye isizwe? Obani abafa emakamu okuhlushwa amaNazi kunokuba bakhonze emabuthweni kaHitler? Obani abaye bachitha isikhathi emajele asemazweni amaningi kunokuba bafunde ukulwa? Yilabo abaye bajabulela ukugcwaliseka kuka-Isaya 54:13: “Bonke abantwana bakho bayakuba-ngabafundi bakaJehova, nokuthula kwabantwana bakho kuyakuba-kukhulu.”

OFakazi BakaJehova emhlabeni wonke banalokho kuthula manje ngoba baye bamukela ukufundisa kukaJehova okuvela eZwini lakhe, iBhayibheli. Balandela izimfundiso nesibonelo sikaKristu Jesu. Futhi wathini? “Ngininika umyalo omusha, wokuba nithandane; njengoba nje nami nginithandile, ukuba nani nithandane. Bonke bayokwazi ngalokhu ukuthi ningabafundi bami, uma ninothando phakathi kwenu.” (Johane 13:34, 35) OFakazi BakaJehova babonisa lolu thando kangangokuba, nakuba babengamaKatolika namaProthestani ngaphambili, manje basebenza ndawonye ngokuvumelana eNyakatho Ireland. Nakuba babeyizitha ezingokwenkolo ngaphambili, manje babambisene njengamaKristu kwa-Israel, eLebanon, nakwamanye amazwe. Abasafundi ukulwa. Yeka ukuthi bekungenza umehluko kangakanani ukuba bonke abantu emhlabeni bebelalela amazwi kaJesu futhi bewasebenzisa ekuphileni kwabo!

OFakazi BakaJehova bakholelwa ukuthi izwe elisha elithenjisiwe likaNkulunkulu liseduze, izwe eliyobuswa uhulumeni wasezulwini. Yisiphi isisekelo abanaso sethemba elihle kangaka?

Isinyathelo SikaNkulunkulu Esiwumnqamulajuqu Esithenjisiwe

EZwini lakhe, iBhayibheli, uNkulunkulu uye wathembisa ukubusa okulungile kuso sonke isintu esilalelayo. Ngomprofethi wakhe uDaniyeli, waprofetha ukuthi ekupheleni kwalesi simiso samanje, wayeyomisa uhulumeni ohlala njalo futhi onokulunga. “Ezinsukwini zalawomakhosi uNkulunkulu wasezulwini uyakumisa umbuso ongasoze wachithwa nobukhosi bawo bungayikushiyelwa kwabanye abantu, kepha uyakuchoboza, uqede yonke lemibuso, wona uqobo ume phakade.” (Daniyeli 2:44) Lokhu ukubusa koMbuso okufanayo uKristu akufundisa abakholwayo ukuba bakucele emthandazweni wakhe odumile: “Baba wethu osemazulwini, malingcweliswe igama lakho. Umbuso wakho mawuze. Intando yakho mayenzeke nasemhlabeni, njengasezulwini.”—Mathewu 6:9, 10.

Kulowo mthandazo sicela uNkulunkulu ukuba agcwalise izithembiso zakhe ngokuqondene nokubusa kwakhe okunokulunga. Futhi siyazi ukuthi uNkulunkulu akanakuqamba amanga. UPawulu wakhuluma ‘ngokuphila okumi phakade lokho uNkulunkulu, ongenakuqamba amanga, akuthembisa ngaphambi kwezikhathi ezimiyo njalo.’ (Thithu 1:2; Heberu 6:17, 18) Futhi yini uNkulunkulu aye wayithembisa? Umphostoli uPetru uyaphendula: “Kukhona amazulu amasha nomhlaba omusha esikulindele ngokwesithembiso sakhe, futhi kukho kuyohlala ukulunga.”—2 Petru 3:13; Isaya 65:17; IsAmbulo 21:1-4.

Ngaphambi kokuba lokho kubusa okulungile kujatshulelwe ngokugcwele lapha emhlabeni, kumelwe kwenziwe ukuhlanza okukhulu. Iziprofetho zeBhayibheli ziyavumelana ekuboniseni ukuthi lesi sinyathelo sokuhlanza izwe likaSathane namabutho akhe amabi sizokwenzeka ngokushesha. (Bheka uMathewu, isahluko 24; uLuka, isahluko 21; noMarku, isahluko 13.) Lesi sinyathelo sokugcina sokuhlanza sibizwa ngokuthi impi ye-Armagedoni, ‘impi yosuku olukhulu lukaNkulunkulu uMninimandla onke.’—IsAmbulo 16:14, 16.

Naphezu kwalokho abaningi abangase bakucabange, unyaka ka-2000 awubalulekile. Phela, lowo nyaka ubaluleke kweLobukholwa kuphela. Amanye amasiko anezimiso zawo zokubala izikhathi. Okubalulekile ukuthi manje isikhathi sokuphendukela kuNkulunkulu naseZwini lakhe ukuze uzitholele ngokwakho lokho ‘okuyintando kaNkulunkulu enhle neyamukelekayo nepheleleyo.’ (Roma 12:1, 2) Okubalulekile ukuthi manje isikhathi sokuba ukhethe—ukuba uye esikhathini esizayo esibusiswe uNkulunkulu noma uqhubeke endleleni ekhungathekisayo yezwe likaSathane. Sikunxusa ukuba ukhethe indlela kaNkulunkulu. Khetha ukuphila!—Duteronomi 30:15, 16.

[Amazwi acashunwe esihlokweni ekhasini 14]

“Kukhona amazulu amasha nomhlaba omusha esikulindele ngokwesithembiso sakhe.”—2 Petru 3:13

[Isithombe ekhasini 13]

Izizwe zingazikhanda ngempela izinkemba zazo zibe amakhuba kuphela ngaphansi kokubusa koMbuso kaNkulunkulu