Ingabe Isonto Lakho Kumelwe Libe Kwezombangazwe?
Ngomlobeli wePhaphama! eBrazil
MUDE futhi uzacile. Ngokusobala, sekuyisikhathi eside engagezi. Njengomfana osebenza ukucwebezelisa izicathulo, ufuna amakhasimende. Endlini yokulinda, othile umupha ikhekhe elenziwe ekhaya. Uyalithatha ngezandla ezingcolile. Ngaphandle kokuwuthi vú uhlala phansi futhi uqala ukulimamfuza. Abanye abantwana bayaqhamuka, futhi ngamunye kubo uthola ingxenye encane. Ngokushesha ikhekhe selinyamalele.
Izimo ezinjalo ezidabukisayo zivamile emadolobheni amakhulu emhlabeni wonke. Lapho, abantu abangenakubalwa abangenamakhaya baphila futhi bafele emigwaqweni. Emakamelweni nasemijondolo, omama bayazabalaza, babulawe ngisho nayindlala, ngenxa yabantwana babo abancane. Nokho, owayengumongameli waseU.S. uLyndon B. Johnson wake wathi: “Ukwahlulela kwezombangazwe zanamuhla kukwenza kube isilingo ukungabanaki abampofu, ngenxa yokuthi bayiqembu labambalwa elingenakuzikhulumela.”
Ngesikhathi esifanayo, ukubabona ngokoqobo abantwana belambile kushukumisela umuntu ukuba azibuze: ‘Kuyokwenzekani kubo bonke abantwana abashiyiwe? Ingabe abahluphekayo bayoke baluthole usizo?’
Iyini Indima Yesonto?
Ngokungangabazeki uyakhathazeka ngezinto ezinjengobumpofu, indawo yokuhlala, nempilo. Khona-ke, ingabe wake wazibuza: ‘Ingabe isonto lami kumelwe lishisekele izinguquko zomphakathi?’
Mhlawumbe uthambekele ekuphenduleni ngalendlela: ‘Kungani lingenakukwenza? Isonto kumelwe lisebenzise ithonya lalo ukuze lenze umhlaba ube yindawo engcono.’ Ngakolunye uhlangothi, ingabe uzizwa njengongqongqoshe wezomthetho waseBrazil, uPaulo Brossard, owathi: “Izindaba zezwe zixoxwa umbuso, futhi izindaba ezingokomoya zixoxwa yisonto”?
EBrazil, lapho kunamaKatolika amaningi khona kunakunoma yiliphi elinye izwe, ababhishobhi manje bakhuluma ngokukhululekile ngezimpikiswano zomphakathi. Ngokwesibonelo, iLatin America Daily Post iyaphawula: “Isonto laseBrazil ngezinga elikhulayo seliye laba ngumpetha wembangela yabangenandawo, ekuguqukeni okungokomlando kusukela ezinsukwini lapho isonto linikeza ukusekela okwengeziwe kuhulumeni obuswa abambalwa [isigungu esibusayo].”
Imfundiso Yenkolo Entsha
Ukuguquka, noma ukushintsha, phakathi kwabefundisi abaningi bamaKatolika kuye kwaphumela emfundisweni yenkolo entsha ngokuphelele. Ngokwephephandaba laseBrazil, “imfundiso yenkolo yenkululeko ibhekisela enhlanganweni esakazeke kabanzi phakathi kwabapristi baseBrazil abahambisana nokusekela kwesonto amalungu afuna izinguquko ahlose ukulwa nobumpofu nokucindezeleka.”
Lemfundiso yenkolo ehlukile ithi uJesu wayengumkhululi. Ithuthukisa ‘inkolelo engokwesisekelo yokuthi umsebenzi oyinhloko wobuKristu uhilela ukusekela abampofu kwezombangazwe.’ Ngakho imfundiso yenkolo yenkululeko yenza kube okulungile ukuba kuthathwe isinyathelo ezweni kuyilapho abampofu bebekhuthazwa njalo ukuba banganaki lutho.
Umshisekeli uFrancis O‘Gorman uyachaza: “Kufanele kube khona ushintsho. Kukhona okuthile okungalungile emphakathini lapho izingxenye ezimbili kwezintathu zezwe zihlushwa ubumpofu ngenxa yokuthi zincishwa amalungelo azo. Sinomcebo wokondla wonke umuntu. Sibona abacebile beceba kakhulu kuyilapho abampofu beba mpofu kakhulu.”
Ihlukanisa Isonto
Imfundiso yenkolo yenkululeko ihlukanisa isonto lamaKatolika ngokuphelele. Ngokwesibonelo, uPapa John Paul II uye wakulahla ukuhileleka kwabapristi kuyo. Wathi: “Umqondo wokuba kukaKristu umuntu wezombangazwe, ofuna izinguquko, indoda engumgumbuqeli yaseNazaretha, awuvumelani nemfundiso yekhathekisimu.” Eqinisweni, uPapa uzama ukuvimbela izinhlangano zabashisekeli, ngokwesaba ukuthi isonto laseLatin America livumela ukukhohliswa amabutho alwayo.
Muva nje, upapa wagxeka isazi semfundiso yenkolo saseBrazil uLeonardo Boff ngenxa yokusekela imfundiso yenkolo yenkululeko. Ngokuthakazelisayo, abanezikhundla eziphakeme kumaKatolika, njengopapa, ababagxeki abasekeli bemfundiso yenkolo yenkululeko ngenxa yokuhileleka kwabo kwezombangazwe, njengoba isonto seliye laba nomlando omude wokuhileleka okunjalo. Cha, kodwa bamelene nayo ngenxa yokufana kwemfundiso yenkolo yenkululeko nomqondo wobukhomanisi.
UVicente Cardinal Scherer waseBrazil wathi amakhomanisi “anendlela ehlukile kuleyo eyayisetshenziswa esikhathini esidlule yokungena kancane kancane bese ebusa. Esikhundleni sokusebenzisa izindlela ezinonya . . . azama ukuyenga amaqembu athile aphikisayo eSonto ukuba eze kuwo, futhi ngeshwa aye aphumelela ukuwenza ahlanganyele ekuthuthukiseni imizamo yobukhomanisi.”
UBoaventura Kloppenburg, umbhishobhi wamaKatolika waseSalvador, eBrazil, ekhuluma ngabasekeli bemfundiso yenkolo yenkululeko wathi: “Bafuna ukwenza ukufundwa kabusha kweVangeli, ukuchazwa kabusha kwemfundiso nomlando, ukumiswa okwaziwayo kwemithetho yokusonta, ukungavinjelwa konembeza abalungile ngomqondo wokuthi abantu bangenza izenzo zezinguquko ngaphandle kwezinkinga.”
Akumangalisi ukuthi amaKatolika aqotho akuthola kunzima ukulandela abaholi besonto abaphikisana kakhulu kangaka bona ngokwabo.
Ingabe Imfundiso Yenkolo Yenkululeko Iyophumelela?
Nakuba abasekeli bemfundiso yenkolo yenkululeko bengaba nezinhloso ezinhle, izinguquko ezidingekile azenzeki kalula. Ukuba yinkimbinkimbi komphakathi wesintu nobugovu ozalwe nabo kubonisa ukuthi ngisho noma ushintsho lungenziwa, izinkinga ngeke zixazululwe. Kunjengoba uLord Halifax abhala: “Lapho abantu beneliseka ngenkululeko yabo, abavamile ukuthola okuthile ngokunqoba kwabo ngaphandle kwababusi abasha”
Zibuze: Ingabe labo abakholelwa ezinhlanganweni ezinjalo njengeyemfundiso yenkolo yenkululeko bayazi lapho beholelwa khona? UJesu waxwayisa ngokuqhubekela phambili ungaboni, ethi: “Kepha nxa impumputhe ihola impumputhe, ziyakuyela emgodini zombili.”—Mathewu 15:14.
Ngakho-ke, ingabe uqinisekile ngokuthi unombono ongokoqobo wokucindezeleka kwabaswele emaZweni Ampofu nokuthi kungaxazululwa kanjani? Ingabe uNkulunkulu uyazibona izinkinga zobumpofu nokucindezeleka, futhi ingabe uyokwenza okuthile ngazo?
[Amazwi acashunwe esihlokweni ekhasini 11]
“Lapho abantu beneliseka ngenkululeko yabo, abavamile ukuthola okuthile ngokunqoba kwabo ngaphandle kwababusi abasha”