Umbono WeBhayibheli
Ingabe Ulwazi NgoNkulunkulu Lungolwabakhethiweyo Abambalwa?
NGOBUSUKU bangoJuly ngo-1987 kwenzeka isenzakalo esingavamile ePalais des Congres eseParis, eFrance. Phakathi ehholo, izibani ezinemibala zakhanyisa zonke izindonga njengoba imisindo endondayo, enesizotha yamaelectronic, eyayihambisana nezikhawu zokushaya kwensimbi eyingungu nokukhala kwamacilongo, kuvimbanise yonke indlu. Amadoda amabili esiteji ayegqoke izinto ezifihla ubuso ezimnyama anyakazisa kancane udengezi olukhipha umlilo olulengayo olwalusasikebhe, kuyilapho kuthunqa intuthu enemibala evela emaceleni esiteji. Ngesikhathi esifanayo, kwavela amadoda nabesifazane abaningi ababembethe okumhlophe phambi kwezilaleli eziyizi-4<uEF5C>000.
Kwakwenzekani? Ingabe kwakuyikhonsathi yerock? Cha, kwakuwumkhosi wokuvula iRosicrucian, inhlangano enikezelwe ekuhlakanipheni okwaziwa abambalwa noma okuyimfihlakalo. Nokho, ngezimfunda zaloluhlelo lomphakathi wezwe, lomkhosi wawumane nje uyisinyathelo sokuqala ochungechungeni lwezinhlobo zemikhosi yokuvula.
Ngezinye izindlela iqembu eliwumshoshaphansi lamaRosicrucians liyefana namahlelo eGnostic lawo anda phakathi nekhulu lesibili leminyaka C.E. futhi ayephikisana nobuKristu. AmaGnostic ayekholelwa ukuthi insindiso iza ngolwazi oluyimfihlakalo nokuthi ukuhlakanipha okunjalo okuyimfihlakalo kunikezwa abambalwa kuphela abakhethiwe. Kodwa ingabe ulwazi ngoNkulunkulu lungolwabambalwa abakhethiwe? Ingabe lugcinelwe iqembu elincane labakhethwa kuqala?
Ingabe UbuKristu Buwubuzalwane Obuyimfihlakalo?
Abanye abalobi bacabangela ukuthi ngokwesilinganiso esithile ubuKristu bungobabathile, noma bugcinelwe abambalwa. Encwadini yakhe ethi L’ésotérisme, uLuc Benoist, umphathi ongakhokhelwa woMnyuziyamu waseFrance, wabhala: “Ezinye izibonakaliso zemfundiso egodliwe zitholakala ezincwadini zikaSt. Paul: ‘Nganipha ubisi futhi angizange nginiphe ukudla okuqinile. . . . Noma ngubani odla ubisi kuphela akaqondi lutho lwezinkulumo zokuHlakanipha.’ [Kuchazwe kususelwa kweyoku-1 Korinte 3:2 nakumaHeberu 5:13] Imibhalo yoBaba [beSonto] bakuqala ibhekisela ‘eqinisweni okungekho mfunda engaliqonda.’”
Nokho, ingabe umphostoli uPawulu, wayebhala ngolwazi olwembulelwe abambalwa? Cha, umongo wamazwi kaPawulu ubonisa ukuthi empeleni, wayesola amaKristu akanye nawo ayengesibo abasanda kukholwa. UPawulu wayebhalela amaKristu ayengazange athuthuke ngokomoya futhi ‘okwakufanele abe ngabafundisi’ babanye abantu “uma kuya ngesikhathi” besokholweni.—Heberu 5:12.
Kanjalo, uPawuIu wayengabhekiseli emaqinisweni ayefisa ukuwagcina eyimfihlo kodwa ezincazelweni ayefisa ukuzihlanganyela nabo, nokho ezazingaphezu kokuqonda kwabo okungokomoya ngenxa yokuthi babengazange baqhubeke olwazini lwemiBhalo njengoba kwakufanele benze kanjalo. Singafanisa isimo sikaPawulu phakathi kwalawomaKristu athile nothisha wezibalo olindela abafundi bakhe ukuba bathuthuke. Uma abafundi behluleka ukuwenza kahle umsebenzi wabo owenzelwa ekhaya futhi khona-ke bangaziqondi ngokugcwele izindlela zokuhlanganisa nokuphindaphinda ezilula, bekungaba nzima ngothisha ukuba abasize baqonde izibalo okuthiwa ama-algebraic equations.
Ulwazi Luvulekele Bonke
Kuyavunywa, ulwazi lweBhayibheli alulona olumi ndawonye. Ngokuhamba kwesikhathi nangomzamo ungakwazi ukuthola ukuzwisisa okungcono iqiniso kanye nokuziqonda ngokujulile izinto ezingokomoya. Ngokungaphezulu, iBhayibheli libonisa ukuthi uJehova uye wembula ngokuqhubekayo izinjongo zakhe ezincekwini zakhe, kodwa alilokothi likhulume nganoma imaphi “amaqiniso afihliweyo” angatholwa abathile futhi afihlelwe abanye abafuni beqiniso abaqotho abaphila enkathini efanayo. (IHubo 147:19, 20; IzAga 2: 1-11; 4:18; Isaya 45:19) Lokhu akuzange kwenzeke nje kuphela lapho uNkulunkulu esebenzelana nesizwe sakwaIsrayeli kodwa futhi nalapho iNdodana yakhe, uJesu Kristu, yayibeka isisekelo sobuKristu.
Phakathi nenkonzo yakhe yeminyaka emithathu nengxenye, uJesu wahlanganisa ingxenye enkulu yensimu yakwaIsrayeli. Ingabe lokhu wakwenza ngokuyimfihlo noma ngokuvakashela iqembu eliseduze kuphela lalabo abafundisa ngasese? Cha. Washumayela isigijimi sakhe obala, ngokuvamile phambi kwezixuku. Ngokushesha ngaphambi kokufa kwakhe, lapho iziphathimandla zenkolo zakwaJuda zimbuza ngokuphathelene nendlela yakhe yokufundisa, wachaza: “Ngikhulumile obala ezweni. Ngezikhathi zonke bengifundisa esinagogeni nasethempelini, lapho abaJuda bonke bebuthana khona, angikhulumanga lutho ngasese.”—Johane 18:20.
Ingabe uphawulile ukuthi isigijimi sikaJesu siqondiswe ezilalelini eziningi kakhulu kunezasePalestina nje kuphela? Siqondiswe ezweni lonke! UJesu akazange athi: ‘Ngikhulume izwi kubo bonke abantu,’ okungukuthi, kuwo wonke amaJuda. Kunalokho, njengoba kwakungokwesiprofetho, wakhetha igama eliqondile ‘lezwe.’a Ngaleyondlela, uJesu akazange ashumayele imfundiso eqondwa abambalwa; kwakungekawonk’ uwonke, kuyo yonke indawo.
Kuyiqiniso, uJesu wasebenzisa ulimi olungokomfanekiso, ikakhulukazi lapho efundisa ngemifanekiso. Kodwa lendlela yayimane nje imenza akwazi ukukhetha phakathi kwezilaleli zakhe. Labo ababengenaso isithakazelo sangempela emfundisweni kaJesu babemane nje balalele imifanekiso yakhe futhi bahambe ngaphandle kokuhlolisisa ngokujulile indaba. Labo abomele ulwazi babehlala ukuze bathole incazelo eyenezelwe. Ngakho-ke, ulwazi lwalutholakala kubo bonke abalufunayo abaqotho.—Mathewu 13:13, 34-36.
Iqiniso lokuthi ubuKristu buvulekele bonke lisobala futhi nangendlela okushiwo ngayo amazwi kuyo yonke imiBhalo. Ngokwesibonelo, elinye lamavesi okugcina eBhayibheli linesimemo sikaNkulunkulu esithi ‘woza uphuze amanzi okuphila ngesihle.’ Futhi lisho ngokuqondile: “Nowomileyo makeze; othandayo makathabathe amanzi okuphila ngesihle.” Ngakho, futhi, ulwazi lweBhayibheli kwakumelwe lwenziwe lutholakale kubo bonke.—IsAmbulo 22:17; qhathanisa noIsaya 55:1.
Nakuba ulwazi ngoNkulunkulu lutholakala kubo bonke, nokho umzamo uyadingeka ukuze lutholakale. IBhayibheli lisikhuthaza ukuba ‘silufune njengesiliva, siluphenye njengamagugu afihliweyo.’ (IzAga 2:4) Ngokomphumela, ulwazi kumelwe luzuzwe eZwini likaNkulunkulu, iBhayibheli, khona-ke ukuhlakanipha kuyoba sobala lapho izimiso zalo nemithetho kusetshenziswa.
Ingabe kuwufanele umzamo? Yebo, ngoba ukuhlakanipha okunjalo kuletha ‘umusa kaJehova’ futhi kangaholela ekuphileni okuphakade. Yeka ingcebo! Ingabe wena ngokwakho usuqalile ukufunisisa lolulwazi olubaluleke kunalo lonke?—IzAga 8:34-36; IHubo 119:105.
[Imibhalo yaphansi]
a UJesu akazange asebenzise amazwi athi (pant·iʹ toi la·oiʹ) “kubo bonke abantu,’ okungukuthi, bonke abahlangene noma bonke bohlanga olufanayo; kodwa athi (toi koʹsmoi) “ezweni,” okungukuthi, uhlanga lwesintu, isintu. Ngokuthakazelisayo, iA Critical and Exegetical Commentary on the Gospel According to St. John ithi ngoJohane 18:20: “Kuyaphawuleka ukuthi amazwi anamandla kakhulu asemaVangelini aphikisa imfundiso eyimfihlakalo noma eyembulelwa abathile emazwini kaJesu atholakala kuJn [Johane].”
[Amazwi acashunwe esihlokweni ekhasini 24]
Esiteji amadoda amabili agqoke izinto ezifihla ubuso ezimnyama anyakazisa kancane udengezi olukhipha umlilo olulengayo olusasikebhe