Incwadi Evela ENdikimbeni Ebusayo
“UNKULUNKULU uluthando.” (1 Joh. 4:16) Yebo, uJehova uwuthando olwenziwe samuntu. Yeka indlela okuvusa amadlingozi ngayo ukuphila kulesi sikhathi lapho sibona izindlela eziningi olubonakaliswa ngazo uthando lukaNkulunkulu nobufakazi bokuthi injongo kaJehova yothando iqhubekela phambili ekugcwalisekeni ngokungenakuvinjelwa!
Njengabantu bakaNkulunkulu, sinelungelo lokuba ofakazi boPhezukonke. (Isaya 43:10-12) Ngokuqondene nabantu basendulo begama lakhe, uJehova wathi: “Ngenxa yokuba ubuyigugu emehlweni ami, futhi ubudumile, uthandekile kimi.” (Isaya 43:4) La mazwi ayasebenza naku-Israyeli ongokomoya namuhla. Ngaphezu kwalokho, uJehova uyabathanda bonke nalabo abangabesixuku esikhulu, abanethemba lokuphila phakade epharadesi emhlabeni. Cabanga nje! UJehova uthi: “Uthandekile kimi.” Engqondweni yakho, ingabe uyamuzwa uJehova esho lokhu ngawe?
Nakuba sizungezwe abaningi ezweni ‘abapholelwe luthando’ futhi lokhu kungase kusidikibalise, yeka ukuthi kuyisikhuthazo esikhulu kanjani ukuqaphela njalo iqiniso lokuthi uJehova uyasithanda! (Math. 24:12) NjengoFakazi BakaJehova, singofakazi bothando lwakhe olukhulu ngoba siyazibonela ngawethu uthando lwakhe ekuphileni kwethu kwansuku zonke. Ngenxa yokuthi uJehova uyasithanda, ubusisa umsebenzi wethu wokushumayela izindaba ezinhle esiwenza njengabantu ngabanye nanjengeqembu. INdikimba Ebusayo isanda kwehlisa amahora afunekayo anyanga zonke kumaphayona avamile aba ngu-70, kumaphayona asizayo aba ngu-50. Umphumela ube ukwanda kwenani lamaphayona. Phakathi nonyaka wenkonzo odlule, ngokwesilinganiso, bangu-738 343 oFakazi ababengamaphayona akhethekile, avamile, noma asizayo. Inani elihlangene lenza ukwanda ngamaphesenti angu-5,7 uma kuqhathaniswa nesilinganiso sonyaka owandulele. Ngenxa yokushumayela ngentshiseko nesibusiso sikaJehova, isonto ngalinye, ngokwesilinganiso, kwakhiwa amabandla amasha angu-45. Njalo ngempelasonto kubhapathizwa abathile emhlabeni wonke. Ngonyaka odlule, ngokwesilinganiso, isonto ngalinye kwabhapathizwa abangu-6 220 njengesibonakaliso sokuzinikezela kwabo nesothando lwabo ngoJehova. Inani labashumayela izindaba ezinhle emhlabeni kabanzi manje selifinyelele inani eliphakeme lika-5 912 492.—Math. 24:14.
Ukuzindla ngothando lukaNkulunkulu kwenza uthando lwethu ngoJehova lukhule. Uthando esinalo ngaye singalubonisa ngokufunda iBhayibheli noma ukulalela amakhasethi eBhayibheli zonke izinsuku. Ngokuvamile siyazinika isikhathi sento esiyithandayo. Uma simthanda uJehova, siyokwenza umzamo wokwethembeka ukuze sihlele isimiso sethu sansuku zonke sihlanganise nokufunda ingxenye yeBhayibheli. Ngesikhathi esifanayo, ukuzindla ngalokho esikufundayo kuyolukhulisa uthando lwethu ngoJehova. Uthando nolwazi olunembile kufanele kuhambisane. Kuhle ukuba lokhu kokubili kuvame kumuntu, kungabi bikho akushaya indiva. EyabaseFilipi 1:9 ithi: “Yilokhu engiqhubeka ngikuthandazela, ukuba uthando lwenu luvame nakakhulu ulwazi olunembile nokuqonda okugcwele.”—Bheka iHubo 119:97.
Uthando lwethu asilubonisi uJehova kuphela kodwa silubonisa nabo bonke abafowethu emhlabeni. ‘Sinothando ngayo yonke inhlangano yabafowethu.’ (1 Pet. 2:17) Ekuqaleni konyaka wenkonzo, abaningi kinina bajabulela ubudlelwane bothando nezihambeli zemihlangano yezizwe. Abanye bakhiwa ubudlelwane obabusemihlanganweni yesigodi.
Onyakeni odlule, abazalwane abangamashumi ezinkulungwane babhekana nobunzima ngenxa yezimpi zombango nezinhlekelele ezithile. Kwahlelwa imikhankaso yokusiza labo ababentula. Ezimweni eziningi usizo olunjalo lwanikezwa nomakhelwane abangebona oFakazi. Lokhu kuyingxenye yokubonisa uthando kubantu abasezweni. NjengamaKristu, ‘siyamthanda umakhelwane.’ (Math. 22:39) Kodwa kudingeka sikhumbule ukuthi umthwalo wethu wemfanelo oyinhloko uwukuhlanganyela ngentshiseko emsebenzini osindisa ukuphila wokushumayela nokufundisa—umsebenzi obaluleke ngaphezu komsebenzi wokuthuthukisa inhlalakahle yabantu.—Math. 28:19, 20.
Njengoba siphila ezweni eligcwele ubudlova nezokuzijabulisa ezingcolile nalapho kudunyiswa khona ukuphishekela ingcebo, kudingeka sijulise uthando lwethu ngoJehova ukuze sikwazi ukumelana nokuyenga kwezwe. (1 Joh. 2:15) Ukuba khona njalo emihlanganweni kuyosisiza sikwenze lokhu. Umhubi uDavide ‘wayeyithanda inkundla yendlu kaNkulunkulu’ futhi efisa ukubusisa uJehova “emihlanganweni.”—IHu. 26:8, 12.
Ukujulisa uthando lwethu ngoJehova kuyasiqinisa ukuze sikwazi ukuma siqine lapho sibhekene nokushushiswa. Sibuye siqiniswe nayinkolelo yokuthi akukho ndalo ‘eyosihlukanisa nothando lukaNkulunkulu olukuKristu Jesu iNkosi yethu.’—Rom. 8:39.
Siyajabula ukunazisa ukuthi kusukela ngo-October 1999, kukhethwe abazalwane abane abagcotshiwe ukuba bakhonze kanye nathi eNdikimbeni Ebusayo. Lokhu kwamenyezelwa emhlanganweni waminyaka yonke. Isilinganiso sobudala babazalwane abasanda kukhethwa singu-57, kanti isilinganiso seminyaka yabo yenkonzo yesikhathi esigcwele singu-31. BangoSamuel F. Herd, M. Stephen Lett, Guy H. Pierce noDavid H. Splane.
Kungakhathaliseki ukuthi usukhulile ngeminyaka, umusha, noma uyingane, qiniseka ngokuthi iNdikimba Ebusayo ikuthanda kakhulu.—1 Joh. 3:23; 2 Joh. 1.
“Kwangathi ningandiselwa isihe nokuthula nothando” njengoba ‘nizigcina othandweni lukaNkulunkulu.’—Jude 2, 21.
Abafowenu,
INdikimba Ebusayo YoFakazi BakaJehova