Funda Ukwesaba UNkulunkulu Njengo-Obadiya

U-Obadiya wayengamele indlu yeNkosi embi u-Ahabi, umbusi owavumela izenzo ezimbi zokukhulekela uBhali ukuba zigcwale ezweni. Kodwa, u-Obadiya wayemesaba uJehova ‘kusukela ebusheni bakhe.’ (1 AmaKh. 18:​1-13) Ngakho lapho iNdlovukazi uJezebeli iyala ukuba kubulawe bonke abaprofethi bakaJehova, u-Obadiya wayazi ukuthi kwakudingeka abe nesibindi futhi enze okuthile ukuze avimbele leyo nto embi ukuba ingenzeki. Ukufihla umprofethi oyedwa nje kwakuyingozi; noma kunjalo, u-Obadiya wafihla abaprofethi abangu-100 wabanika nokudla ngesikhathi kunendlala enkulu! Cabanga ukuthi kwakunzima kangakanani ukufihlela amakhulu abaprofethi bamanga ababekhonza inkosi nendlovukazi lokho ayekwenza.—1 AmaKh. 18:19.

Yini esingayifunda kule ndoda eyayesaba uNkulunkulu? Nakuba u-Obadiya ayemesaba u-Ahabi, wayemesaba nakakhulu uNkulunkulu. Lokho kwamenza waba nesibindi sokubeka ukuphila kwakhe engozini ukuze avikele abafowabo. Uma ukukhulekela kweqiniso kuvinjezelwe lapho esihlala khona, nathi singafunda ukwesaba uNkulunkulu. Ukwesaba uNkulunkulu ngale ndlela kungasinika amandla okusekela abafowethu nodadewethu ababhekene novivinyo.