Isimemo Esikhethekile
1. Uyoqala nini umkhankaso wokuhambisa izimemo zemihlangano ka-2014?
1 Uma ubuhlela ukuphekela abangane noma umndeni isidlo esikhethekile esidinga umzamo nemali eningi, cishe ubuyokujabulela ukubamema. Ngendlela efanayo, mkhulu umsebenzi owenziwe ekulungiseleleni ukudla okungokomoya esizokuthola emihlanganweni yesigodi neyezizwe yango-2014. Siyoba nelungelo lokumemela abanye emhlanganweni kusasele amasonto amathathu ukuba uqale. Yini eyosisiza ukuba sihambise izimemo ngentshiseko?
2. Yini eyosishukumisela ukuba sihlanganyele ngokugcwele emkhankasweni?
2 Uma sicabanga ngokwazisa ngendlela esizuza ngayo edilini elingokomoya uJehova asenzela lona emihlanganweni siyoshukumiseleka ukuba sihlanganyele ngokugcwele kulo mkhankaso. (Isaya 65:13, 14) Kufanele sikhumbule nokuthi umkhankaso wethu waminyaka yonke uba nemiphumela emihle. Abanye esibamemayo bazoba khona emhlanganweni. Nokho kungakhathaliseki ukuthi bangaki abasabelayo, imizamo yethu eqotho phakathi nomkhankaso iyoletha udumo kuJehova ibonise nomoya wakhe wokupha.—IHu. 145:3, 7; IsAm. 22:17.
3. Zizohanjiswa kanjani izimemo?
3 Indikimba ngayinye yabadala kufanele inqume indlela ibandla elingahambisa ngayo izimemo kubantu abaningi, kuhlanganise nokuthi kufanele yini zishiywe emizini engenabantu noma zihanjiswe enkonzweni yasobala ensimini yebandla. Ngezimpelasonto omagazini kufanele bahanjiswe kanye nezimemo uma kufaneleka. Uma uMgqibelo wokuqala enyangeni uwela ezinsukwini zomkhankaso, kufanele kugxilwe kakhulu ekuhanjisweni kwezimemo kunasekuqaleni izifundo zeBhayibheli. Lapho umkhankaso uphela, yeka indlela esiyojabula ngayo ngokwazi ukuthi sihlanganyele ngentshiseko kuwo futhi samema abantu abaningi ngangokunokwenzeka ukuba bahlanganyele nathi edilini elingokomoya uJehova asenzele lona!