Lingisa Ubulungisa BukaJehova
1 “UJehova ungumthandi wobulungisa.” (IHu. 37:28) Ngakho, nakuba enqume ukulibhubhisa leli zwe elingalungile, uye wahlela ukuba kukhishwe isixwayiso kuqala. (Marku 13:10) Lokhu kunika abantu ithuba lokuphenduka futhi basindiswe. (2 Pet. 3:9) Ingabe siyakulwela ukulingisa ubulungisa bukaJehova? Ingabe usizi nokuhlupheka komkhaya wesintu kusishukumisela ukuba sihlanganyele ithemba loMbuso nabanye? (IzAga 3:27) Ukuthanda ubulungisa kuyosiqhubezela ukuba sishumayele ngenkuthalo.
2 Shumayela Ngokungakhethi: Ngokumemezela injongo kaNkulunkulu kubo bonke abantu ngokungakhethi, ‘sibonisa ubulungisa.’ (Mika 6:8) Kumelwe simelane nokuthambekela kokungapheleli kokwahlulela abanye ngokwalokho abayikho ngaphandle. (Jak. 2:1-4, 9) ‘Intando kaJehova iwukuba zonke izinhlobo zabantu zisindiswe futhi zifinyelele olwazini olunembile lweqiniso.’ (1 Thim. 2:4) Izwi likaNkulunkulu leqiniso lingenza izinguquko ezimangalisayo ekuphileni kwabantu. (Heb. 4:12) Ukwazi leli qiniso kungasishukumisela ukuba sikhulume nabantu sinokuqiniseka, sikhulume ngisho nanalabo okungenzeka bénqaba ukusilalela ngaphambili.
3 Omunye udade osebenza esitolo wayesaba umthengi othile owayeza njalo kuleso sitolo ngenxa yokubukeka kwakhe. Nokho, lapho ithuba elikahle livela, wazama ukumshumayeza lo mthengi wamtshela ngePharadesi likaNkulunkulu elithenjisiwe. Sakudelela, lo mthengi waphendula wathi akakholelwa ezinganekwaneni wathi futhi yena uyi-hippie futhi uzidlela izidakamizwa. Kodwa lo dade akaliphonsanga ithawula. Ngelinye ilanga, lo mthengi wabuza udade ukuthi uzibona kanjani izinwele zakhe ezinde, ngakho ngokuhlakanipha wamchazela lokho okushiwo iBhayibheli ngaleyo ndaba. (1 Kor. 11:14) Engalindele lo dade, ngosuku olulandelayo lo mthengi wafika eshefe kahle futhi enezinwele ezimfushane! Wacela isifundo seBhayibheli, futhi omunye umzalwane wakujabulela ukumqhubela sona. Lo mthengi wathuthuka wazinikezela futhi wabhapathizwa. Njengalo mthengi, abaningi abakhonza uJehova namuhla bayakwazisa ukungakhethi nemizamo yokuphikelela yalabo abábalethela isigijimi soMbuso.
4 Maduze uJehova uzoqeda ukungalungi emhlabeni. (2 Pet. 3:10, 13) Kulesi sikhathi esilinganiselwe esisele, kwangathi singalingisa ubulungisa bukaJehova ngokunikeza bonke abantu ithuba lokusinda embubhisweni ezayo yezwe likaSathane elingalungile.—1 Joh. 2:17.