Ukubonga Ngesihe SikaNkulunkulu
1 Ngaphambi kokuba abe umKristu, umphostoli uPawulu wayekuphikisa ngobudlova ukwanda kobuKristu. Nokho, ngenxa yokuthi wayenza ngokungazi, waboniswa isihe. UJehova wabonisa umusa wakhe ongafanelwe wanika uPawulu isabelo sokushumayela. Sasiyigugu kuye leso sabelo. (IzE. 26:9-18; 1 Thim. 1:12-14) Ukwazisa kwakhe isihe sikaJehova kwenza ukuba uPawulu azidele ekufezeni inkonzo yakhe.—2 Kor. 12:15.
2 Ngesihe sikaNkulunkulu, nathi sinikezwe inkonzo. (2 Kor. 4:1) NjengoPawulu, singabonisa ukwazisa kwethu ngesihe esisibonisiwe ngokuzikhandla ekusizeni abanye ukuba bakhule ngokomoya. Enye indlela esingakwenza ngayo lokhu iwukuqala nokuqhuba izifundo zeBhayibheli.
3 Ukuqala Izifundo ZeBhayibheli: Enye indlela yokuqala izifundo zeBhayibheli iwukusungula umzila kamagazini. Njengoba silokhu sibavakashela njalo labo abasemzileni wethu, sizazi kangcono izinto ezibakhathazayo. Ngokuhamba kwesikhathi kungaba khona isihloko komunye womagazini esingasebenza njengesiqalo sokwethula isifundo seBhayibheli ngencwajana ethi Yini UNkulunkulu Ayifunayo? Ekuhambeleni okulandelayo, kungenzeka sikwazi ukuqhubeka nengxoxo ngencwajana ethi Yini UNkulunkulu Ayifunayo? lapho simhambisela omagazini umninikhaya.
4 Kudingeka Umthandazo Nomzamo: Umthandazo kanye nomzamo wenkuthalo yiko okuyothuthukisa umsebenzi wakho wokushumayela. Udade oyiphayona owayenesifundo esisodwa seBhayibheli wathandaza kuJehova ecela ukuba ambusise ngezifundo ezengeziwe. Wabe esenza ngokuvumelana nemithandazo yakhe. Wahlola inkonzo yakhe waphawula ukuthi lapho enza izimpindelo wayengazisikiseli izifundo zeBhayibheli. Waqala ukwenza kanjalo, ngokushesha wayesenezinye izifundo ezimbili.
5 Akuve kuyilungelo ukuhlanganyela ekwaziseni ‘ngezindaba ezinhle zomusa ongafanelwe kaNkulunkulu’! (IzE. 20:24) Kwangathi ukubonga kwethu ngesihe sikaNkulunkulu kungasenza sikhuthale ekusizeni abanye bazuze emseni kaJehova ongafanelwe.