Siphathiswe Izindaba Ezinhle
1 Alive lilikhulu leli lungelo esinalo lokuphathiswa izindaba ezinhle zikaNkulunkulu! (1 Thes. 2:4) Nakuba abanye bengase basenqabe lesi sigijimi esinamandla, abanhliziyo ziqotho sibaheha njengephunga elimnandi. (2 Kor. 2:14-16) Kwabazamukelayo futhi bazilalele, izindaba ezinhle zisho ukusindiswa. (Roma 1:16) Yini okufanele siyenze ngalezi zindaba ezinhle esiziphathisiwe?
2 UJesu Nabaphostoli: Ukumemezela izindaba ezinhle kwakuza kuqala kuJesu. (Luka 4:18, 43) Ngisho nalapho ekhathele futhi elambile, uthando lwakhe ngabantu nokusazisa kwakhe lesi sigijimi kwamenza ukuba asitshele abanye. (Marku 6:30-34) Ngesenzo nangesibonelo, wagcizelela ezingqondweni zabafundi bakhe ukubaluleka komsebenzi wokushumayela ngoMbuso.—Math. 28:18-20; Marku 13:10.
3 Belingisa uJesu, abaphostoli basimemezela ngentshiseko isigijimi soMbuso. Ngisho nalapho beshaywa futhi beyalwa ukuba bayeke ukushumayela, “baqhubeka ngaphandle kokuyekethisa, befundisa futhi bememezela izindaba ezinhle.” (IzE. 5:40-42) Umphostoli uPawulu wazikhandla kulo msebenzi. (1 Kor. 15:9, 10; Kol. 1:29) Leli lungelo lokutshela abanye izindaba ezinhle walifanisa nesikweletu ayesikweleta abanye abantu, futhi wayezimisele ukudela ukuthokomala ukuze asikhokhe.—IzE. 20:24; Roma 1:14-16.
4 Yilungelo Esinalo Nathi Namuhla: Ukuwazisa kwethu lo msebenzi ongcwele esiwuphathisiwe kuyosenza sifune izindlela zokwandisa ingxenye yethu emsebenzini wokushumayela. (Roma 15:16) U-Edward, owayehamba ngesihlalo sabakhubazekile, wayehlala phambi komnyango wehhotela akhulume nabantu abahlala khona ngokholo lwakhe. Nokho, ngenxa yokuthi wayefisa ukwenza okwengeziwe, wacela ukuba akhelwe igumbi elikhethekile elolini, wayesephayona ngalo leli loli iminyaka eminingi, ehamba amakhilomitha amaningi. Njengo-Edward, abaningi namuhla baye balungisa izimo zabo ukuze bahlanganyele kakhudlwana ekusakazeni izindaba ezinhle.
5 Kwangathi nathi namuhla singalingisa uJesu nabaphostoli senze umsebenzi wokushumayela uze kuqala ngaso sonke isikhathi ekuphileni kwethu. Ngokwenza kanjalo, sibonisa uthando lwethu ngabantu nokwazisa kwethu ngalezi zindaba ezinhle esiziphathisiwe.