Yenza Igama LikaJehova Nezenzo Zakhe Kwaziwe
1 “Bongani uJehova, nibize igama lakhe, nizazise phakathi kwabantu izenzo zakhe. . . . Mazithokoze izinhliziyo zabamfuna uJehova.” (IHu. 105:1, 3) Umhubi owaloba lawo mazwi wathola injabulo enkulu ekutsheleni abanye ngoJehova ‘nezenzo’ zakhe. Ziphi izenzo? Ngokungangabazeki lezo ezihlobene nobukhosi bukaNkulunkulu obukhazimulayo ‘nezindaba ezinhle zensindiso yakhe.’—IHu. 96:2, 3, NW; 145:11, 12.
2 Njengoba sisondela enkathini yeSikhumbuzo Sika-2001, sinezizathu eziningi zokujabula ngokusebenzelana kukaJehova nathi. Kanjani? Ngempela iSidlo SeNkosi Sakusihlwa, siwumkhosi omkhulu onyakeni kuwo wonke amaKristu eqiniso. Asikho esinye isenzakalo esifana naso ngokubaluleka, injongo, noma inqubo. Lesi yisikhathi sokuba sonke sikhumbule lokho uJehova noJesu abakwenza ukuze basilungiselele indlela yokuba sisindiswe. Akumangalisi ukuthi ngenkathi yeSikhumbuzo, silindela ukubona ukwanda komsebenzi enkonzweni yasensimini, njengoba sazisa ‘izindaba ezinhle zensindiso’!
3 Ingabe Uyoba Yiphayona Elisizayo? Ngo-April odlule inani elikhulu labangu-10 126 labhalisa njengamaphayona asizayo eNingizimu Afrika. (EBotswana kwaba namaphayona asizayo angu-173, eLesotho engu-237, eNamibia engu-92, eSt. Helena Island engu-11 kanti ayengu-286 eSwazini.) Kulo nyaka, singenza yini ukuba u-March no-April kube izinyanga ezikhethekile zomsebenzi owandisiwe enkonzweni? U-March uneMigqibelo emihlanu, u-April unamaSonto amahlanu kanti u-April 7 uyoba uSuku Lukamagazini olukhethekile. Ngokuhlela ukusebenza izinsuku ezigcwele enkonzweni ngempela-sonto, abamemezeli abaningi abasebenza isikhathi esigcwele baye bathola ukuthi bangakwazi ukuba amaphayona asizayo. Ukuze lifinyelele amahora adingekayo angu-50 ngenyanga, iphayona elisizayo kudingeka libe namahora angu-12 ngesonto ngokwesilinganiso. Zicabangele kahle izimiso ezisikiselwe ebhokisini elisekhasini 4. Ingabe sikhona kulezi esiyohambisana nezimo zakho? Uma kungenjalo, mhlawumbe ungase uzenzele esakho isimiso ukuze ube yiphayona elisizayo kulo-March no-April.
4 Abadala kufanele baqale manje ukwakha intshiseko nokusekela lo msebenzi wenkonzo owandisiwe. Ngonyaka odlule kwelinye ibandla lapho bonke abadala nezinceku ezikhonzayo babhalisa njengamaphayona asizayo, abamemezeli abangu-64 kwabangu-121 baphayona ngo-April! Futhi ibandla lajabula ngokubona abamemezeli abangabhapathiziwe abayisithupha beqala ukubika ngo-March no-April. Ngempela, lesi yisikhathi esingcono kakhulu sokuba izingane nabasanda kuhlanganyela babuze abadala ukuthi bayafaneleka yini ukuba baqale ukuhlanganyela emsebenzini wokufakaza obala.
5 Imizamo Eyengeziwe Iletha Izibusiso: Amabandla azibekela imigomo ekhethekile futhi enze umzamo owengeziwe ajabulela izibusiso eziningi. Amanye amabandla angase agxile kakhulu ekuhlanganiseni insimu engasetshenzwa njalo, agxile kwezinye izindlela zokufakaza noma aqokomise ukufakaza ngocingo—okuyindlela ephumelelayo yokukhuluma nabangatholakali emakhaya nabaninikhaya abasezindaweni okungangeneki kuzo.
6 Ingabe impilo ebuthakathaka noma ukuguga kufanele kuvimbele noma ubani ukuba ahileleke ngangokunokwenzeka enkonzweni? Akunjalo ngaso sonke isikhathi. Ngokwesibonelo, udade oneminyaka engu-86 ubudala onesifo somdlavuza waba yiphayona elisizayo ngo-April odlule naphezu kwemilenze yakhe eyayivuvukele. Ukufakaza ngocingo kwenza wakwazi ukuhlanganyela ngokugcwele enkonzweni, wandisa ukudumisa kwakhe uJehova. Lokhu kwashukumisa kokubili yena nebandla.
7 Silungiselele Kahle ISikhumbuzo: Kulo nyaka iSikhumbuzo singo-April 8. Njengoba leli kuyiSonto, kufanele babe baningi abayoba khona. Kungenzeka sibe nenani elikhulu ukuwedlula wonke uma senza ingxenye yethu ngokuba (1) thina ngokwethu sibe khona (2) futhi simeme nabanye ukuba babe nathi eSikhumbuzweni. Obani okufanele sibameme?
8 Bheka umbhalo ogciniwe wenkonzo yakho yasensimini ukuze uthole amagama alabo abaye babonisa isithakazelo esithile eqinisweni, nakuba kungenzeka ukuthi awubahambeli njalo. Emasontweni amabili noma amathathu ngaphambi kweSikhumbuzo, gxila ekuhambeleni bonke laba uphethe isimemo seSikhumbuzo. Uma izimo zakho zivuma, sikisela ukubalungiselela okokuhamba labo abangaphumelela.
9 Kwamanye amabandla, azisetshenziswa zonke izimemo zeSikhumbuzo ezinyathelisiwe. Onobhala bamandla kufanele baqiniseke ukuthi izimemo zitholakala kusenesikhathi ukuze zisakazwe zonke. Ungase ubhale ngomshini noma ubhale ngokucacile isikhathi nendawo yeSikhumbuzo ngezansi ephepheni lesimemo. Noma ungase uhlanganise nesimemo esibonisa ikheli leHholo LoMbuso uma iSikhumbuzo sizoba lapho. Siyanikhumbuza ukuthi ezimweni eziningi isimemo seSikhumbuzo kufanele sinikezwe umninikhaya esandleni.
10 Khumbula Abapholile: Kuyajabulisa lapho umfundi weBhayibheli ezinikezela kuJehova futhi ebonakalisa lokhu ngokucwiliswa emanzini. Nokho, unyaka ngamunye abanye phakathi kwethu bayayeka ukuhlanganyela nathi futhi bayeke ukutshela abanye ngegama likaJehova nezenzo zakhe. Sinesizathu esihle sokukhathazeka. Nakuba abaningi abapholile bengalilahlanga iqiniso, kungenzeka ukuthi bayeka ukushumayela ngenxa yokudumazeka, izinkinga zomuntu siqu noma ezinye izinkinga zokuphila. (Math. 13:20-22) Labo abasesimweni esibuthakathaka ngokomoya badinga usizo ukuze babuyele ebandleni ngaphambi kokuba bagwinywe isimiso sikaSathane. (1 Pet. 5:8) Kule nkathi yeSikhumbuzo sifuna ukwenza umzamo okhethekile wokusiza bonke abapholile abafanelekayo ukuba baphinde bahileleke ekushumayeleni izindaba ezinhle.
11 Unobhala webandla kufanele akhumbuze abaqhubi bezifundo nganoma ibaphi abapholile abasemaqenjini abo. IKomiti Yenkonzo Yebandla iyohola ekuhleleni ukuba kwenziwe ukuhambela kokwalusa kubo bonke abapholile. Uma kubonakala ukuthi lowo muntu uyozuza esifundweni seBhayibheli somuntu siqu, umbonisi wenkonzo uyolungiselela usizo ngemva kokuxoxa namanye amalungu ekomiti yenkonzo ukuthi ngubani ofaneleka kangcono ukuba amqhubele isifundo. Nakuba kungase kungadingeki ukuba isifundo siqhutshwe isikhathi eside, lowo owabelwe ukuba asiqhube angase abike isikhathi, izimpindelo nesifundo seBhayibheli.
12 Ngo-April odlule udade owayesebenza endlini ngendlu wahambisela insizwa ethile omagazini emgwaqweni. Yaveza ukuthi umkayo usenguFakazi opholile. Yabuza ukuthi likuphi iHholo LoMbuso futhi yamema lo dade ukuba avakashele yona nomkayo. Ngenxa yalokho, lo mbhangqwana waba khona emhlanganweni olandelayo futhi wavuma ukuba uqhutshelwe isifundo seBhayibheli.
13 Lungela Umsebenzi Owandisiwe! Umhubi owamemezela ukuthi kufanele senze igama likaJehova nezenzo zakhe zaziwe wanezela: “Hlabelelani kuye, nimhubele, nikhulume ngezimangaliso zakhe zonke. Zibongeni egameni lakhe elingcwele.” (IHu. 105:2, 3) Masibonise ukukhathalela kwethu igama likaJehova elikhulu ‘nemisebenzi yakhe emangalisayo’ ngokwandisa imizamo yethu enkonzweni, senze le nkathi yeSikhumbuzo ibe nkulu ukuzedlula zonke!
[Ibhokisi ekhasini 4]
Izindlela Ezihlukahlukene Zokuhlela Amahora Angu-12 Ngesonto Ukuze Sibe Ngamaphayona Asizayo
Usuku Amahora
UMsombuluko 1 2 − −
ULwesibili 1 − 3 −
ULwesithathu 1 2 − 5
ULwesine 1 − 3 −
ULwesihlanu 1 2 − −
UMgqibelo 5 4 3 5
ISonto 2 2 3 2
Ingqikithi: 12 12 12 12
Ingabe esinye salezi zimiso sizokusiza? Uma kungenjalo, kungani ungazenzeli isimiso sakho?