Isibusiso SikaJehova Siyasicebisa
1 Ngokuvamile ukuphumelela komuntu kubonakala ngobungako bemali ayiholayo. Kungakho abantu abaningi bebheka labo abanemali njengabajabula kakhulu nabanelisekile. Nokho, ngokudabukisayo abantu abanomuzwa wokuthi imali ingaletha injabulo banephutha. (UmSh. 5:12) Labo “abazimisele ngokuceba” ngokwezinto ezibonakalayo abayitholi injabulo ehlala njalo. (1 Thim. 6:9) Ngokuphambene, izinceku zikaJehova zingabantu abajabulayo futhi abacebe kunabo bonke emhlabeni. (IzAga 10:22; IsAm. 2:9) Kwenzeka kanjani?
2 Ubufakazi Bengcebo Yethu: Sinokuqonda okujulile okungokomoya futhi silazi kahle iZwi likaNkulunkulu, iBhayibheli. Ngenhlangano yakhe esemhlabeni, uJehova uyaqhubeka esifundisa ngaye ngokwakhe nangeNdodana yakhe, ukuze sithole inzuzo ehlala njalo. Ulwazi olunembile lwenza sikwazi ukusondela kuJehova futhi sijabulele ubuhlobo obuseduze naye. (Jak. 4:8) Ukukwazi ukuhlukanisa okuhle kokubi nokulandela imithetho kaNkulunkulu kuyasivikela ezifweni nasezingozini ezithile. Siyaqiniseka ukuthi uJehova uyosinakekela, okuyophumela ekwanelisekeni kokuhlonipha uNkulunkulu nasekuthuleni kwengqondo.—Math. 6:33.
3 Sijabulela ukuthula nobunye nabazalwane bethu abangokomoya ngoba sihlakulela isithelo somoya kaNkulunkulu. Njengoba sihlanganiswe isibopho esiqinile sothando, akudingeki neze sizizwe silahliwe uNkulunkulu noma abafowethu lapho sibhekene nosizi.—Gal. 6:10.
4 Ukuphila kwethu kunenjongo ngempela. Sikubheka njengelungelo elimangalisayo ukuhlanganyela emsebenzini wokushumayela izindaba ezinhle embulungeni yonke. Lokhu kusilethela injabulo ehlala njalo njengoba sisiza abanye ukuba babe nobuhlobo obuhle noNkulunkulu futhi bakhonze kanye nathi ngobunye ekukhulekeleni okuhlanzekile. Ingcebo yethu engenakulinganiswa yenkonzo iletha udumo kuJehova futhi isinikeza ukwaneliseka okutholakala ngokuba nesandla ekungcwelisweni kwegama lakhe. Sigcina isimo esihle sengqondo, sazi ukuthi ithemba lethu ngekusasa lizofezeka ngokushesha.
5 Ukubonisa Ukwazisa Kwethu: Kwangathi singahlale sibonisa ukwazisa ngezibusiso zikaJehova, ezisenza abantu abacebe ukubadlula bonke emhlabeni. (IzAga 22:4) Ukuzinika isikhathi usuku ngalunye ukuze sizindle ngalokho esinakho kusishukumisela ukuba simbonge uJehova ngothando lwakhe lokupha futhi siqhubeke sizinikela ngokukhethekile kuye.