Uzoba Khona Yini Wena?
1 UFakazi othile ongumakad’ ebona wake wathi: “Uma uphuthelwa usuku lokuqala lomhlangano, usuke uphuthelwe lukhulu!” Kungani ayezizwa ngaleyo ndlela? Ngoba usuku lokuqala luyisiqalo sedili elingokomoya elicebile inhlangano kaJehova esilungiselele lona. (Isaya 25:6) Ukuba khona kwethu kusukela ekuqaleni kwalo kubonisa ukuthi sizizwa ngendlela umhubi azizwa ngayo: “Ngajabula lapho bethi kimi: ‘Masiye endlini kaJehova.’”—IHu. 122:1.
2 Nokho, ngonyaka odlule kweminye yeMihlangano Yesigodi ‘Yabafundisi Bezwi LikaNkulunkulu’ inani lababekhona ngoLwesihlanu laliphansi kakhulu kunelangoMgqibelo nangeSonto. Lokhu kusho ukuthi inani elikhulu kakhulu labafowethu laphuthelwa izingxenye zemihlangano ezanikeza ukwaziswa okubalulekile ngezwi lesiprofetho. Balahlekelwa ngisho nawubudlelwano obujabulisayo namanye amakholwa.
3 Ungavumeli Umsebenzi Wokuziphilisa Ukuphazamise: Kungenzeka ukuthi isizathu sokuba abanye bangabi khona ngoLwesihlanu ukukhathazeka ngokuthi hleze balahlekelwe umsebenzi wabo. Nokho, oFakazi abaningi baye bathola ukuthi abaqashi babo bazimisele ukubambisana nabo kule ndaba uma becela isikhathi kusengaphambili. Omunye umqashi, lapho ebona ukuzimisela okungagudluki komunye udade oyiphayona kokuba khona kuyo yonke imihlangano yebandla nemihlangano emikhulu, wahlabeka umxhwele kakhulu kangangokuba waze waya naye emhlanganweni wesigodi usuku lonke!
4 Akufanele umane nje uphethe ngokuthi umqashi wakho ngeke akunike isikhathi, noma ngokuthi ukuphuthelwa usuku olulodwa lomhlangano wesigodi akukubi neze. Unokuqiniseka okusuka enhliziyweni, lungiselela ukuba uchazele umqashi wakho ngemiBhalo nangobuhlakani, ukuthi kungani ukuya emhlanganweni wesigodi kuyisici esibalulekile sokukhulekela kwakho. (Heb. 10:24, 25) Yibe usuthembela ngokugcwele ezithembisweni zikaJehova, uqaphela ukuthi noma yini oyidingayo ngokwezinto ezibonakalayo uyoyithola uma uqhubeka ubeka izidingo ezingokomoya ngaphambi kwazo zonke ezinye izinto ekuphileni.—Math. 6:33; Heb. 13:5, 6.
5 Isici esiyisihluthulelo ukwazisa ‘izinto ezibaluleke kakhulu.’ (Fil. 1:10, 11; IHu. 27:4) Lokhu kusishukumisela ukuba sihlele ukuzuza ngokugcwele kuleli lungiselelo elibalulekile elivela kuJehova. Qala manje ukwenza amalungiselelo aqondile, futhi uzimisele ukuthi uzoba khona ngazo zontathu izinsuku!