Bayabona Ukuthi Sihlukile
1 Ngonyaka odlule, abantu abangaphezu kuka-300 000 bazihlanganisa nathi ngokubhapathizwa. Yini laba bantu abaye bayibona koFakazi BakaJehova ebenza bafune ukuba yingxenye yenhlangano kaNkulunkulu? Kungani sihlukile kuzo zonke ezinye izinkolo? Nazi ezinye izimpendulo ezisobala:
—Sinamathela eBhayibhelini kunasemibonweni yomuntu siqu: Sikhulekela uJehova uNkulunkulu “ngomoya nangeqiniso,” njengoba nje uJesu Kristu athi kufanele senze kanjalo. Lokhu kuye kwasho ukulahla amanga angokwenkolo nokuvumelana neZwi likaNkulunkulu elilotshiwe.—Joh. 4:23, 24; 2 Thim. 3:15-17.
—Siya kubantu kunokuba sibalinde beze kithi: UKristu usithume ukuba sishumayele futhi sifundise, futhi silingisa isibonelo sakhe sokufuna abanhliziyo ziqotho. Sibafuna emakhaya abo, emigwaqweni nanoma kuphi lapho bengase batholakale khona.—Math. 9:35; 10:11; 28:19, 20; IzE. 10:42.
—Sinikeza bonke abantu imfundo yeBhayibheli mahhala: Sisebenzisa impahla yethu namandla mahhala, sinikele ngamahora angaphezu kwezigidi eziyinkulungwane unyaka ngamunye enkonzweni kaNkulunkulu. Asikhethi, sifunda iBhayibheli nabantu bazo zonke izinhlobo.—Math. 10:8; IzE. 10:34, 35; IsAm. 22:17.
—Siqeqeshwe kahle ukuba sisize abantu ngokomoya: Ngesifundo somuntu siqu seBhayibheli nangemfundo etholakala emihlanganweni yebandla, emihlanganweni yesifunda neyesigodi, sithola imfundo engokwasezulwini eqhubekayo neyigugu, esenza sikwazi ukukhanyisela abanye ngokomoya.—Isaya 54:13; 2 Thim. 2:15; 1 Pet. 3:15.
—Iqiniso silithatha ngokungathi sína, silisebenzise ekuphileni kwethu kwansuku zonke: Ngenxa yokuthi siyamthanda uNkulunkulu, senza izinguquko, sivumelanise ukuphila kwethu nentando yakhe. Ubuntu bethu obusha obunjengobukaKristu budonsela abanye eqinisweni.—Kol. 3:9, 10; Jak. 1:22, 25; 1 Joh. 5:3.
—Sizama ukuphila nokusebenza nabanye ngokuthula: Ukuhlakulela izimfanelo zokuhlonipha uNkulunkulu kusisiza ukuba siqaphele izenzo nokukhuluma kwethu. ‘Sifuna’ ukuhlala nabo bonke abantu ‘ngokuthula futhi sikuphishekele.’—1 Pet. 3:10, 11; Efe. 4:1-3.
2 Izibonelo zokuphila kobuKristu abantu abazibona enhlanganweni kaJehova zishukumisela abaningi ukuba bamukele iqiniso. Kwangathi isibonelo sethu siqu singaba nethonya elifanayo kulabo abasaziyo nabasibonayo.