Izixuku Ziyanezelwa
1 Ukwanda okwenzeka ebandleni lobuKristu namuhla kuyamangalisa njengoba kwakunjalo nasekhulwini lokuqala. (IzE. 2:41; 4:4) Ngonyaka odlule, kwabhapathizwa abafundi abasha abangu-366 579, okuyisilinganiso sabangu-1000 ngosuku! Eminyakeni emithathu edlule kuye kwabhapathizwa abangaphezu kwesigidi. Ngempela uJehova uye waqhubeka enezela izixuku zabakholwayo.—IzE. 5:14.
2 Abaningi abasanda kuhlanganyela abangenakho okuhlangenwe nakho ekuphileni kobuKristu badinga ukuba basizwe futhi baqeqeshwe yilabo abaqinile okholweni. (Roma 15:1) KumaKristu akuqala kwakunabanye okwathi ngisho nangemva kweminyaka babhapathizwa, bahluleka ‘ukuphokophela ekuvuthweni.’ (Heb. 5:12; 6:1) Yingakho uPawulu encwadini ayeyibhalele amaHeberu aqokomisa izici amaKristu okudingeka akhule kuzo ngokomoya. Yiziphi lezo zici, futhi lunganikezwa kanjani usizo oludingekayo?
3 Ukuba Nemikhuba Emihle Yokutadisha: Ngokuvumelana neseluleko sikaPawulu, ukuba umfundi omuhle kuhilela ukufunda ngenkuthalo, ukuphindaphinde bese ukusebenzisa “ukudla okuqinile” okulungiselelwa inhlangano kaJehova. (Heb. 5:13, 14; bheka INqabayokulinda ka-August 15, 1993, amakhasi 12-17.) Ngokuhlanganyela izingxoxo ezingokomoya nabasanda kukholwa nangokubachathazela amagugu eqiniso oye wawafunda ngokucwaninga komuntu siqu, ungase ubashukumisele ukuba babe nemikhuba emihle yokutadisha. Mhlawumbe ngezikhathi ezithile ungamema umuntu osanda kukholwa ukuba abe khona esifundweni sakho somuntu siqu noma somkhaya wakho.
4 Ukuba Khona Njalo Emihlanganweni: Isibonelo sakho sokuthembeka namazwi othando akhuthazayo kuyowasiza amalungu ebandla asanda kuhlanganyela ukuba agweme esinye isici esikhathazayo uPawulu akhuluma ngaso—“inkambiso” abanye abanayo yokuphutha emihlanganweni yobuKristu. (Heb. 10:24, 25) Basize baqaphele ukuthi imihlangano iyisici esingokomoya esibaluleke kakhulu ebandleni. Thatha isinyathelo kuqala sokubenza bazizwe bamukelekile njengengxenye yobuzalwane.
5 Ukuya KuJehova Ngesibindi: Ukuze sinqobe ubuthakathaka obungokwenyama namaphutha obuntu, kufanele sinxuse uJehova ngomthandazo, simtshele imicabango yethu ejule kakhulu kanye nokusikhathazayo okuyimfihlo. Abasanda kuhlanganyela kufanele bafunde ukuthi akufanele banqikaze ukucela usizo lukaJehova, njengoba uPawulu ayala. (Heb. 4:15, 16; 10:22) Ukulandisa okuhlangenwe nakho kwakho siqu okumayelana nalokhu kuyoqinisa ukuqiniseka kosanda kukholwa ukuthi uJehova uyayizwa imithandazo esuka enhliziyweni.
6 Ukuhlela Isikhathi Senkonzo: UPawulu wabonisa nokuthi ‘ukunikela ngaso sonke isikhathi kuNkulunkulu umhlatshelo wokudumisa,’ kuyaqinisa ngokomoya. (Heb. 13:15) Ingabe ungammema ummemezeli osanda kuhlanganyela ukuba ahlanganyele nawe emalungiselelweni amasonto onke enkonzo yasensimini? Mhlawumbe ningalungiselela izintshumayelo nobabili noma nicabangele isici senkonzo lommemezeli omusha angakasizami.
7 Izixuku ezenezelwayo ziletha injabulo enkulu. Ukuzikhandla ekuqeqesheni nasekwelulekeni amalungu ebandla asanda kuhlanganyela kuyowasiza ukuba akhe ukholo oluqinile oludingekayo ukuze ‘alondoloze imiphefumulo yawo iphila.’—Heb. 3:12, 13; 10:39.