Ingabe Uyakhumbula?

Ukujabulele yini ukufunda omagazini bamuva be-Nqabayokulinda? Bona ukuthi ungayiphendula yini imibuzo elandelayo:

• Kungani kwakudingeka ukuba uMesiya afe?

Ukufa kukaJesu kwafakazela ukuthi umuntu ophelele angakulondoloza ukuzinikela kwakhe kuNkulunkulu naphezu kovivinyo olukhulu. Ngaphezu kwalokho, wayekhokha inhlawulo yesono inzalo ka-Adamu eyasizuza njengefa, evula indlela yokuba ithole ukuphila okuphakade.—12/15, amakhasi 22-23.

• Yini engasiza umuntu ukuba alusebenzise kahle uphuzo oludakayo?

Ukuthandaza nokutadisha iBhayibheli kungaba usizo. Kubalulekile ukuhlakulela ukuzithiba, ukunamathela esinqumweni sakho nokukhetha abangane abahle. Umuntu okhetha ukuphuza kufanele azibekele imingcele, afunde ukwenqaba.—1/1, amakhasi 7-9.

• Kuhlanganisani ukukhulumisana nezingane ngendlela ezuzisayo?

Kusho okungaphezu kokutshela izingane, kuhlanganisa ukuzibuza imibuzo nokulindela izimpendulo zazo ngesineke. Abaningi baye bathola ukuthi izikhathi zokudla zibanikeza amathuba amahle okukhulumisana.—1/15, amakhasi 18-19.

• UJehova uphelele, pho kwenziwa yini ukuba azisole?

Ngezinye izikhathi, uNkulunkulu uyayishintsha indlela abheka ngayo abantu. Ngokwesibonelo, ama-Israyeli asendulo amshiya kaningi uJehova futhi akhonza abanye onkulunkulu. Lapho kwenzeka lokhu, uJehova wayesisusa isivikelo sakhe. Nokho, lapho abantu bezisola ngesiphambeko sabo futhi becela usizo kuNkulunkulu, wayeshintsha indlela ayezizwa ngayo ngabo noma ‘adabuke.’ (AbaHl. 2:18)—2/1, ikhasi 21.

• Iziphi izimo ezingenza umuntu acabangele ukubhapathizwa okwesibili?

Uma kuwukuthi ngesikhathi ebhapathizwa, wayephila esimweni esithile noma wayenza okuthile ngasese ayengasuselwa khona ukube wayesebhapathiziwe.—2/15, ikhasi 22.

• Iziphi izaba ezintathu eziyiphutha abanye abazenzayo ngokungathembeki kwabo?

Abanye banomuzwa wokuthi kuyafaneleka ukweba ngoba behlupheka. Abanye bakuthethelela ngokuthi, “Wonke umuntu uyakwenza.” Abanye abaye bacosha izinto eziyigugu baye bazigcina bethi, “Uma uzitholele kusuke kungeyakho.” IBhayibheli alizisekeli noma iziphi zalezi zaba.—3/1, amakhasi 12-14.

• Emfanekisweni kaJesu kakolweni nokhula, kumelelani ukuhlwanyela imbewu enhle?

INdodana yomuntu, uJesu, yalungiselela insimu phakathi nenkonzo yayo yasemhlabeni. Imbewu enhle yahlwanyelwa kusukela ngePhentekoste lika-33 C.E. kuqhubeke lapho amaKristu egcotshwa njengabantwana bakaNkulunkulu, abantwana boMbuso.—3/15, ikhasi 20.

• Ukolweni ongokomfanekiso osemfanekisweni kaJesu ulethwa kanjani enqolobaneni kaJehova? (Math. 13:30)

Ukugcwaliseka kuye kwathatha isikhathi eside phakathi nesiphelo salesi simiso sezinto. Abantwana boMbuso abagcotshiwe, ukolweni ongokomfanekiso, balethwa enqolobaneni kaJehova lapho belethwa ebandleni lobuKristu elibuyiselwe noma lapho benikwa umvuzo wabo wasezulwini.—3/15, ikhasi 22.

• Obani abanquma uhlu lwezincwadi zeBhayibheli ezakha imiBhalo YamaKristu YesiGreki?

Akuwona umkhandlu othile wesonto noma abaholi benkolo. Kunalokho, amaKristu eqiniso, eqondiswa umoya ongcwele kaNkulunkulu, aqaphela izincwadi ezaziphefumulelwe ngempela. Lokhu kuvumelana neqiniso lokuthi esinye sezipho zomoya ezimangalisayo ezanikezwa ibandla lobuKristu lapho lisaqala kwaba “ikhono lokwahlukanisa amazwi aphefumulelwe.” (1 Kor. 12:4, 10)—4/1, ikhasi 28.