Umhlaba Ungaba Yini Nobunye?

INGABE umhlaba wethu usonqenqemeni lokuthula noma lwenhlekelele? Kubonakala kungenzeka noma ikuphi kulokhu.

Abanye abaholi bezwe basho kugcwale umlomo ukuthi ukuthula embulungeni yonke kuwumgomo ongafinyeleleka—mhlawumbe ngoba ukuvuma ukuthi awunakufinyeleleka kuyinto ethusa kakhulu ukuyicabanga. Ngakolunye uhlangothi, abaningi bayathuthumela lapho becabanga ngemibuzo enjengale: Imaphi amazwe anezikhali ezibulala uyaca? Angalokotha yini azisebenzise? Kungenzekani uma engazisebenzisa?

Umlando ubonisa ukuthi umbango nobandlululo bekulokhu kuthiya noma iliphi ithemba lobunye, futhi ngokuvamile inkolo iye yaba neqhaza elikhulu ekubhebhezeleni izingxabano esikhundleni sokuzidambisa. Intatheli uJames A. Haught iyabhala: “Noma yini ehlukanisa abantu ingabangela inzondo, futhi inkolo ingenye yezinto ezinamandla kakhulu ezihlukanisa abantu. . . . Naphezu kwenkolelo evame kakhulu yokuthi inkolo yenza abantu ‘balunge,’ kusobala ukuthi yenza abantu abathile benze izenzo ezimbi kakhulu.” Umlobi uSteven Weinberg unombono ocishe ufane. Uyabhala: “Yinkolo kuphela engenza abantu abalungile benze okubi.”

Likhona yini ithemba lokuthi umhlaba wethu uyoke ube nobunye? Yebo! Kodwa njengoba sizobona, ubunye bomhlaba abunakulethwa umuntu noma izinkolo abantu abazenzele zona.

[Amazwi acashunwe esihlokweni ekhasini 3]

Ingabe umhlaba unjengesiqhumane esingaqhuma noma nini?