UDaniel Nebheji Lakhe Lomhlangano

UJESU wabakhuza abaholi benkolo abazishaya abalungile ngesikhathi becasukela abafanyana ababedumisa uNkulunkulu obala. UJesu wababuza kufanele: “Anizange yini nikufunde lokhu, ‘Emlonyeni wezingane nowabasancela ulungiselelé indumiso’?”—Mathewu 21:15, 16.

UDaniel, oneminyaka eyisithupha ubudala futhi ohlanganyela ebandleni laseJalimane elikhuluma isiRashiya, uwubufakazi bokuthi izingane zisamdumisa uJehova. Yena nonina nodadewabo baya emhlanganweni wesigodi woFakazi BakaJehova eDuisburg. Babeqala ngqá ukuya emhlanganweni omkhulu kangaka. Konke kwakukusha kubo: ukuba sehhotela, ukuba phakathi kwezindimbane zabantu, ukuhlala phansi izinsuku ezintathu, ukubona ubhapathizo, ingasaphathwa-ke eyedrama. UDaniel waziphatha kanjani sonke lesi sikhathi? Wayengeve eyisibonelo.

NgoMsombuluko wangemva komhlangano sebebuyele ekhaya, uDaniel wavuka walungela ukuya enkulisa. Kodwa yini ayesayifake ebhantshini lakhe? Ibheji elibonisa ukuthi wayesemhlanganweni wesigodi! Unina wabe esemchazela: “Khehla, umhlangano usuphelile. Usungalikhipha ibheji.” Kodwa uDaniel wathi: “Ngifuna wonke umuntu azi ukuthi bengikuphi nokuthi ngifundeni.” Ngakho lonke lolo suku enkulisa wayelifakile lelo bheji futhi eziqhayisa ngalo. Lapho ofundisa enkulisa embuza ngalo, wamxoxela izinto ezishiwo emhlanganweni.

Ngokwenza kanjalo, uDaniel wayelingisa isibonelo sezinkulungwane zabafana namantombazane abaye badumisa uJehova obala phakathi namakhulu amaningi eminyaka.