‘Uthando Lwenu Nonke Luyanda’
NGO-2004 kwaba nezinhlekelele ezingokwemvelo eziningana eJapane. Zihlanganisa izivunguvungu, izikhukhula nokuzamazama komhlaba. Zahlukumeza ukuphila kwabaningi, kanye noFakazi BakaJehova. (UmShumayeli 9:11) Nokho, lezi zinhlekelele zaveza amathuba okuba oFakazi babonisane uthando lobuzalwane.—1 Petru 1:22.
Ngokwesibonelo, ngenxa yezimvula ezinamandla ezazingo-July, umfula omaphakathi neJapane wagcwala wachichima. Izikhukhula zacekela phansi imizi yoFakazi BakaJehova engaphezu kwengu-20. Kwelinye iHholo LoMbuso, kwangena amanzi aze aba ngaphezu kwemitha ukusuka phansi. OFakazi ababevela emabandleni aseduze bafika ngokushesha bezosiza. Amakhulu ezisebenzi zokuzithandela ahlanza izindlu ezazigcwele udaka. IHholo LoMbuso lahlanzwa ngokuphelele futhi lalungiswa ngamasonto amabili nje.
Ngo-October 23, yona le ndawo yahlaselwa ukuzamazama komhlaba okungu-6,8 esikalini sikaRichter. Kwashona abantu abangu-40, futhi abangaphezu kuka-100 000 kwadingeka bashiye imizi yabo. Amanzi, igesi nogesi kwanqamuka. Nakuba indawo lapho ukuzamazama kwaqala khona yayiqhele ngamakhilomitha angu-50 kuphela, iHholo LoMbuso elalisanda kulungiswa alizange lithinteke. Lavele laba iyona ndawo yosizo lwesikhashana. Ababonisi abangamaKristu bahlola ngokushesha ukuthi abakholwa nabo babephephile yini futhi bakhululeka lapho bethola ukuthi akekho noyedwa kubo owayelimele noma eshonile. Ngakusasa ekuseni kakhulu, oFakazi abayisithupha ababeyizisulu zesikhukhula sango-July, bemagange ukusiza bazicelela ukuhambisa ukudla namanzi kuleyo ndawo eyayinokuzamazama komhlaba. Ngemva kwamahora nje kube nokuzamazama komhlaba, izimpahla zokusiza zase zitholakala.
Omunye umbonisi uyalandisa: “Labo ababeyizisulu zezikhukhula babheka ukusiza labo abahlukunyezwe ukuzamazama komhlaba njengethuba lokubonisa ukuthi bayalwazisa usizo ababelutholile. Babezikhandla kusukela entathakusa kuze kube sebusuku kakhulu. Futhi yeka indlela ubuso babo obabuchichima ngayo injabulo!”
Izikhukhula noma ukuzamazama komhlaba akulona usongo esibophweni sothando esihlanganisa ubuzalwane bobuKristu boFakazi BakaJehova. Kunalokho, lapho izinhlekelele ezinjalo zenzeka, amaKristu abona lokho umphostoli uPawulu akutshela akholwa nabo eThesalonika: ‘Uthando lwenu nonke luyanda komunye nomunye.’—2 Thesalonika 1:3.