‘Omunye Wemisebenzi Yobunjiniyela Emikhulu Kakhulu’
LAPHO kwakhiwa ithempeli likaJehova eJerusalema ngesikhathi sokubusa kweNkosi uSolomoni eminyakeni engaba ngu-3 000 edlule, kwenziwa isitsha esihle samanzi ngethusi sabe sesibekwa ngaphandle endaweni yokungena yethempeli. Sasinesisindo esingaphezu kwamathani angu-30 futhi sasimumatha amanzi angamalitha angaba ngu-40 000. Lo bhazabhaza wesitsha kwakuthiwa ulwandle olubunjiwe. (1 AmaKhosi 7:23-26) “Akungabazeki nakancú ukuthi [lesi sitsha] sasingomunye wemisebenzi yobunjiniyela emikhulu kakhulu kweyake yenziwa esizweni samaHebheru,” kusho owayeyisikhulu sezobuchwepheshe kuyi-National Research Council of Canada, u-Albert Zuidhof, kumagazini i-Biblical Archeologist.
Lwakhiwa kanjani lolu lwandle? IBhayibheli lithi: ‘Inkosi yabumba izinto zethusi eSifundeni SaseJordani emtatsheni wobumba.’ (1 AmaKhosi 7:45, 46) UZuidhof uthi: “Kumelwe ukuthi kwasetshenziswa indlela yokubumba ngenhlaka [lost wax] efana naleyo esasetshenziswa namanje ekwenzeni izinsimbi ezinkulu zethusi.” Echaza, uthi ngokuyinhloko lokhu kwakuyohilela ukwakhiwa komfanekiso wolwandle ngenhlaka bese ababumbi bensimbi bakha amagobongo amabili, ngaphakathi nangaphandle kwenhlaka bawayeke ome. Izinyathelo zokugcina kwakuyoba ukuncibilikiswa kwenhlaka iphume kuthi kuleso sikhala ephuma kuso kuthelwe uketshezi lwethusi.
Kwakudingeka ikhono elikhulu ukuze kwakhiwe lolu lwandlekazi olubunjiwe futhi olunesisindo esikhulu. La magobongo, elangaphakathi nelangaphandle, kwakumelwe akwazi ukumelana namandla ethusi elincibilikisiwe elingamathani angaba ngu-30, futhi leli thusi kwakumelwe lithelwe ngokuqhubekayo ukuze lingaqhekeki noma libe nezimfa. Cishe lokhu kwakudinga uchungechunge lwamaziko omlilo axhumene ukuze kuthelwe ithusi elincibilikisiwe egobongweni. Umsebenzi omkhulu kakhulu!
Emthandazweni wayo lapho inikezela ithempeli, iNkosi uSolomoni yabonga uJehova uNkulunkulu ngawo wonke umsebenzi wethempeli owenziwa, ithi: “Wenza isithembiso ngomlomo wakho, futhi ngesandla sakho siqu wenzé ukuba kugcwaliseke.”—1 AmaKhosi 8:24.