“Siyobonana EMbusweni KaNkulunkulu”
“Mngane Othandekayo! Rupert, namuhla ngigwetshelwe ukufa. Ungangikhaleli. Yamukela uthando lwami wena nabo bonke abasendlini. Siyobonana eMbusweni kaNkulunkulu.”
NGO-JUNE 8, 1942, uFranc Drozg wabhala la mazwi emizuzwini embalwa ngaphambi kokuba adutshulwe amasosha amaNazi. Wabulawelwani?
Ngokwamarekhodi aseMnyuziyamu Wenkululeko Yesizwe eMaribor, eSlovenia, lo mkhandi wensimbi owayeneminyaka engu-38 ubudala wenqaba ukujoyina i-Wehrmannschaft, iqembu lamabutho empi amaJalimane elaliseSlovenia eyayilawulwa ngamaJalimane. Wayeyi-Bibelforscher, noma umFundi WeBhayibheli, njengoba oFakazi BakaJehova babaziwa kanjalo ngaleso sikhathi kuleyo ndawo. Njengoba ayenza ngokuvumelana no-Isaya 2:4 futhi ezibiza ngesikhonzi soMbuso kaNkulunkulu, wayengeke ayisekele impi yamaNazi.—Mathewu 6:33.
Edolobheni lakubo lasePtuj, uFranc wayaziwa njengommemezeli oshisekayo wezindaba ezinhle zoMbuso kaNkulunkulu. (Mathewu 24:14) Naphezu kobunzima obuningi, washumayela izindaba ezinhle engayeki kwaze kwaba yilapho eboshwa ngo-May 1942.
OFakazi BakaJehova abaningi baseSlovenia bashushiswa kanzima ngamaNazi. UFranc wayengomunye wabokuqala kubo ukubulawelwa izinkolelo zakhe ezingokwenkolo. NjengamaKristu ekhulu lokuqala, waqiniswa yila mazwi athi: “Kumelwe singene embusweni kaNkulunkulu ngezinsizi eziningi.” (IzEnzo 14:22) Ukuthi wayekholelwa ukuthi lowo hulumeni wasezulwini ungokoqobo kwabonakala emazwini akhe okugcina athi, “Siyobonana eMbusweni kaNkulunkulu.”
[Imithombo Yezithombe ekhasini 32]
Franc Drozg: Photo Archive-Museum of National Liberation Maribor, Slovenia; letter: Original kept in Museum of National Liberation Maribor, Slovenia