“Into Ephulukisayo Enkabeni Yakho”
KUNENKOLELO yokuthi inani elikhulu lezifo zesintu libangelwa ukucindezeleka okungokomzwelo okunjengokwesaba, ukudabuka, umona, ukucasuka, inzondo nomuzwa wecala. Sinalokhu engqondweni, yeka indlela aduduza ngayo amazwi eBhayibheli athi ‘ukwesaba uJehova’ ‘kuyinto ephulukisayo enkabeni yakho nento eqabulayo emathanjeni akho’!—IzAga 3:7, 8, NW.
Amathambo awuhlaka olumisa umzimba. Ngakho, iBhayibheli lisebenzisa igama elithi ‘amathambo’ sakungathekisa, ukuze libhekisele kumuntu uqobo—ikakhulukazi lapho ethintwa yimizwa nemizwelo ejulile. Kodwa kungamuphi umqondo ukwesaba uJehova ‘kuyinto ephulukisayo enkabeni yakho’?
Izazi zeBhayibheli zinemibono ehlukahlukene mayelana nokusetshenziswa ‘kwenkaba’ kule ndima. Omunye umhlaziyi uthi ngenxa yokuthi ‘inkaba’ “imaphakathi nomzimba,” ingase imelele zonke izitho ezibalulekile. Esinye isazi sisikisela ukuthi igama elithi ‘inkaba’ lingase lisho umzanyana, njengoba lisetshenziswe kuHezekeli 16:4. Uma kunjalo, kungasho ukuthi izAga 3:8 zigcizelela isidingo sethu sokuncika ngokuphelele kuNkulunkulu—njengoba nje umbungu ongenakuzisiza uncike ngokuphelele kunina ukuze wondleke. Omunye futhi umqondo uwukuthi elithi ‘inkaba’ lapha kungenzeka libhekisela ezicubwini nasemisipheni yomzimba. Kuleli vesi, kungenzeka ukuthi lezi zingxenye ziqhathaniswa ‘namathambo’—okuyizingxenye zomzimba eziqine kakhudlwana.
Kungakhathaliseki ukuthi ithini incazelo eqondile, kunye esiqiniseka ngako: Ukubonisa ukwesaba uJehova okunenhlonipho kuyinkambo yokuhlakanipha. Ukuzivumelanisa nezindinganiso zikaNkulunkulu kunganikela enhlalakahleni yethu engokomzimba njengamanje. Ngaphezu kwalokho, kungasilethela umusa kaJehova, oyoholela ekuphileni okungenakuphela nasempilweni ephelele—ngokomzimba nangokomzwelo—ezweni lakhe elisha elizayo.—Isaya 33:24; IsAmbulo 21:4; 22:2.
[Umthombo Wesithombe ekhasini 32]
Dr. G. Moscoso/SPL/Photo Researchers